ائلچین

تورک دیلی و ادبیاتی

آنادیلی حاققیندا شئعیر توپلوسو

+0 بگندیم

آنادیلی گونو قوتلو اولسون

یونسکو گئنل قورولو ۱۹۹۹ - ینجی ایلینده ۲۱ فئورال گونونو  " اولوسلار آراسی آنــادیــلی گــونو " اولاراق قبول ائتدی. بو گون ایلک اولاراق ۲۰۰۰- ینجی ایلیندن بو یانا دونیا چاپیندا قوتلانماغا باشلانیب .دونیانین ان قایدالی دیللرینین اوچونجوسو ساییلان آنادیلیمیز تورکجه،دونیانین ان چوخ قونوشولان اون دیلیندن بیریدیر.اوروپادا ایسه  قونشولان ایکینجی بؤیوک دیل ساییلیر.بو مناسیبته گؤره آنادیلینه حصر اولان شعرلرین توپلوسو حاضیرلانماقدادیر . سئویملی اوخوجولار اؤز شئعرلرینی یاخود سئودیکلری باشقا شاعیرلریمیزین شئعرلرینی بو مجموعه یه آرتیرا بیلرلر.

 آنادیلی گونو حاققیندا باشقا یازیلار

آنادیلی شئعیرلرینین موبایل کیتابینی بوردان ائندیرین

آنادیلی شئعیرلری

آنا دیلیم-آنادیلیم
سن شرفیم شوهره تیم سن

دوداغیمدا حسر تیم سن

َدوشمانلارا نیفر تیم سن

کیمدیر سنی دانا دیلیم ‌

آنا دیلیم-آنادیلیم

****

یازانمادی الیم سنی

دوغرادیلار دیلیم سنی

قان آغلادئ ائلیم سنی!!

بویانماسین قانا دیلیم

آنادیلیم-آنادیلیم

****

سن ابدی واریم منیم

دارگونومده یاریم منیم

سینه م اوسته تاریم منیم

قالدئ یانا-یانا دیلیم!!

آنادیلیم-آنادیلیم

****

دولوخسانما گلر سحر

گؤزیاشینئ سیلر سحر

نور ساچینا الر سحر

چیچک له نر آنا ،دیلیم

آنادیلیم-آنادیلیم

****

دونیا بویو  یوکسک اوجا

سولیماندان نوحدان قوجا

گووه نیرم من دویونجا

بو شوهره ته شانا، دیلیم

آنادیلیم-آنادیلیم

فیض اله بختیاری (دومان)

اللی دئسن...

آخــــی بیــزیـم دیلیمیـز وار
نـــدن بئـلـه لاللاشیـریق ؟
دونـوخـاراق فیکیـــریمیــــــز
گونوـ گونــــدن کاللاشیریق

اونــوتمــــوشوق اؤزومـــوزو
کول ائتمیشیک کـــؤزوموزو
اویــور قـارغـا گـــؤزومـــــوزو
بـاخا ـ بـاخا، خـوللاشیریق

خالق دونیانیــن هاراسیندا
دردیـن تـاپیب چـاراسینــدا
ایکی ایلــــه اوچ آراسیندا
بیــزلــر هلـه ، دالاشیریــق

گـونش شاخیر آییل ـ آییل
اویـخویـا چـوخ اولما مـاییل
خورنـامـاغین واقتی دئییل
کروان کؤچوب ، آراشیریــق

خالـــق، آیـریلیقــدان داد تپیـر
گـؤزلــرینـدن اولـــدوز سپیــــر
بیرلیک دئیه ، زاغ ـ زاغ اسیـر
بیــزلـر ایسه قـاشلاشیریــق

گؤرمــــــک اوچون گؤزوموز وار
دانــیشماغـا سؤزومـــــوز وار
اللــــی دئسن ، یـوزومـوز وار
اؤلکه لــرده سانــلاشیریــــق

تاریـخ لــرده قــــویموشوق ایز
کؤک آتمیشیق باتی یـا بیــز
کیم گؤروبدو تورک، چؤکه دیز
بیز ، ان بویـــوک آد داشیریق

یئتــر بیـزه بــو شان ، ویـقار
قـورقـود کیمی بـابـامیـز وار
ائـلیمیـــز وار ، اوبـامیـــز وار
گونو ـ گونـدن بـوللاشیریـق

بـوغـازدا فـریـادیمیــــــــــــــــــز وار
بـاغیـــرساق ، امــدادیمیــــــز وار
((ب ، ام ، ت )) آدیـمیـــــــــــز وار
بـو نـه سؤزدو ، سوس یـاشیریق !

ابو طالب اللهیاری "توتقون"

   آنا  دیلی   

  دیل آچاندا ایلک دفعه  « آنا » سؤیله ییریک بیز، 

  « آنا دیلی » آدلانیر بیزیم ایلک درسلیگیمیز. 

  ایلک ماهنیمیز لایلانی آنامیز اؤز سودویله 

  ایچیریر روحوموزا بو دیلده گیله - گیله. 

    

  بو دیل  بیزیم روحوموز، عشقیمیز، جانیمیزدیر، 

  بو دیل  بیر- بیریمیزله عهدی- پئیمانیمیزدیر. 

  بو دیل  تانیتمیش بیزه بو دونیادا هر شئیی، 

  بو دیل  اجدادیمیزین بیزه میراث وئردیگی 

  قییمتلی خزینه دیر…اونو گؤزلریمیز تک 

  قورویوب، نسیللره بیز ده هدیه وئرک. 

    

  بیزیم اوجا داغلارین سونسوز عظمتیندن، 

  یاتاغینا سیغمایان چایلارین حیددتیندن، 

  بو تورپاقدان، بو یئردن، 

  ائلین باغریندان قوپان یانیقلی نغمه لردن، 

  گوللرین رنگلریندن، چیچکلرین ایگیندن، 

  میل دوزونون، موغانین سونسوز گئنیشلیگیندن، 

  آغ ساچلی بابالارین عقلیندن، کامالیندان، 

  دوشمن اوستونه جومان او قیراتین نالیندان 

  قوپان سسدن یاراندین. 

  سن خالقیمین آلدیغی ایلک نفسدن یاراندین. 

    

  آنا دیلیم،  سنده دیر خالقین عقلی، حیکمتی، 

  عرب اوغلو مجنونون دردی سنده دیل آچمیش. 

  اورکلره یول آچان فوضولی نین صنعتی، 

  ائی دیلیم، قودرتینله دونیالارا یول آچمیش. 

  سنده منیم خالقیمین قهرمانلیقلا دولو 

  تاریخی واراقلانیر، 

  سنده نئچه مین ایللیک منیم مدنیتیم، 

  شان- شؤهرتیم ساخلانیر. 

  منیم آدیم- سانیمسان، 

  ناموسوم، ویجدانیمسان! 

    

  بو دیل  تانیتمیش بیزه بو دونیادا هر شئیی، 

  بو دیل  اجدادیمیزین بیزه قویوب گئتدیگی 

  ان قییمتلی میراثدیر، اونو گؤزلریمیز تک 

  قورویوب، نسیللره بیز ده هدیه وئرک! 

    

  ائی اؤز دوغما دیلینده دانیشماغی آر بیلن 

  فاسونلو ادابازلار، 

  قلبینیزی اوخشامیر قوشمالار، تئللی سازلار. 

  بونلار قوی منیم اولسون، 

  آنجاق وطن چؤرگی، 

  بیر ده آنا اورگی.* 

  سیزلره قنیم اولسون. 

بختیار وهاب زاده

*بو میصراعنی س.وورغون علاوه  ائتمیشدیر. 

     دوغما دیلیمیز

بیز واریق وارسا وطن وارایسه دوغما دیلیمیز

اؤیره نیب بیلمه لیدیر    اؤز دیلینی ائللریمیز

آنا تک جاندان عزیزدیر  آنا تورپاق   آنا دیل

حورمتین ساخلا یاشارکن   آنالار قدرینی بیل

وطنین کیملیگیدیر   وارلیغینین    داش تملی

کیملیگین بایراغیدیر هر بالانین  دوغما دیلی

آنا دیلدیر بزه ین   دویغولارین     اویلاغینی

سوسله ین آرزیلاری سئوگی سئوینجین باغینی

بولبول اؤز دوغما دیلیله گوله سؤیلر سؤزونو

هر گول اؤز رایحه سیله  تانیدار  اؤز اؤزونو

آنا دیلدیر داشییان لایلالارین      جان دادینی

آنا دیلدیر یاشادان   ائولادینین        اؤز آدینی

آنا دیلدیر ائلینین تاریخی         آیدین تانیغی

یوردونون اؤلکه سینین آیناسی سؤنمز چراغی

آنا دیلده آنانین سئوگیسی عطری  دادی وار

آنا دیلده    وطنین  شانلی شرفلی    آدی  وار

اسماعیل جمیلی

آنادیلی

بیر گون اسیر دوشموش بیر قهرمانی 

  سورغویا، سوالا چکنده جللاد: 

  - سیزین الینیزده اؤلمرم! - دئدی، - 

  منی زامان- زامان یاشادار حیات. 

  دئدیلر: - گؤزونو اویاریق سنین، 

  گؤره بیلمزسن. 

  دئدی: - یاشارام! 

  دئدیلر: - قولونو قیراریق سنین، 

  سیلاحین، کسرین دوشر الیندن. 

  دئدی: - یاشارام! 

  دئدیلر: - قیچینا کونده ووراریق، 

  گزه بیلمزسن. 

  باشیندا ائله بیر تونقال قالاریق 

  دؤزه بیلمزسن. 

  دئدی: - یاشارام! 

  دئدیلر: - نیین وار آپاراریق بیز،  

  بیر ده کئچمیشینه دؤنه بیلمزسن. 

  دئدی: - یاشارام! 

  دئدیلر: - دیلینی قوپاراریق بیز، 

  دانیشا بیلمزسن، دینه بیلمزسن. 

  سوسدو قهرمان، 

  نه یاشارام دئدی، نه اؤللم دئدی. 

  سؤیله دی: - نه بیلسن ائله، ائی جللاد. 

  دیوان سنیندیر، 

  دؤوران سنیندیر… 

بالاش آذر اوغلو

 

آنادیلیم 

 قالخیب شاهداغینا سؤز ایسته ییرم، 

  چاتسین های- هاراییم دینله ینلره. 

  من نانکور دئییرم، ناجینس دئییرم 

  اؤز آنا دیلینی بیلمه ینلره! 

    

  بو دیل شیرینلیکده شربت کیمیدیر، 

  صافلیغی قورونان سرحد کیمیدیر، 

  آنامیز وطن ده قوربت کیمیدیر 

  اؤز آنا دیلینی بیلمه ینلره! 

    

  دؤیوشده برکیییب ائل پولاد اولور، 

  زیروه یه اوچماغا  دیل قاناد اولور، 

  تورپاغین سئوینجی، دردی یاد اولور 

  اؤز آنا دیلینی بیلمه ینلره! 

  توفیق  بایرام 

 

  ساغ اول ، آنا دیلیم

    یوللاریم سیناندی یاد اؤلکه لرده، 

  نئچه یاد دوداقدا سسلندی آدیم. 

  ساغ اول، آنا دیلیم، منی هئچ یئرده 

  کؤمکسیز قویمادین، یالقیز قویمادین. 

    

  بارماغیم آلتیندا دویمه فیرلانیر، 

  لوندونلا، پاریسله یاناشی باکی… 

  دوغما سؤزلر اوچون داریخان هانی؟ 

  دئیین قوی دینله سین: «دانیشیر باکی!» 

    

  دانیشیر، آچیلیر عؤمرون باهاری، 

  دونیایا من اونون قوینوندان اوچدوم. 

  منیم اورگیمین آنتئنالاری 

  گؤزل آذربایجان دیلینه توشدو. 

    

  دؤیوشده قیلینج تک سییریلدی قیندان، 

  باشیمین اوستونده بایراغیم اولدو. 

  تورپاغیم ایکییه بؤلونن زامان 

  بو دیل بؤلونمه ین تورپاغیم اولدو. 

    

  اوتانسین تاریخه دللاللیق ائدن، 

  تاریخ قاپیسینا آچار سؤزلر وار. 

  پردنی قالدیرسان، بئش-اون کلمه دن 

  قوندارما جیلدلر تار-مار اولار. 

    

  بو دیلده سئوینجیم، غمیم، کدریم 

  تزه اومیدلره آچیلان سحر. 

  بو دیلین رئاکتیو طیاره لری 

  آراز سرحددینی قیران کلمه لر. 

  ایپک نغمه لریم گولـله باتمازدی، 

  قولونو قانداللا باغلاماق اولماز. 

  بو تایدان او تایا آرخایین کئچن، 

  او تایدان بو تایا آرخایین کئچن 

  دیلین سندینی یوخلاماق اولماز، 

  سئوگی نین یولونو ساخلاماق اولماز! 

    

  ساغ اول، آنا دیلیم، آنا اؤیودوم، 

  فوضولی عشقیندن دیوانه دیلیم. 

  اورگیم باشینا نفس درمه دن 

  فیرلانیب کول اولان پروانه دیلیم. 

    

  هانی خانیم چایلار، هانی بی گؤللر، 

  دیللرده جوجرن یوردون ایزیدیر. 

  یوز یول یارالانمیش دوغما کلمه لر 

  خالقیمین دؤیوشلر خریطه سیدیر. 

    

  آلا داغ، قارا داغ…دی سئچ، دی آییر، 

  داغلاری باسیلماز اوردوم سانمیشام. 

  هاردا بیرجه کلمه سؤزوم یاشاییر، 

  اورانی حالالجا یوردوم سانمیشام. 

    

 اوستونه یویوردو قورآن دیللری، 

  پئیغمبر دیللری، قانون دیللری… 

  قاپیلار دالیندا قویدولار سنی، 

  حاق دئدین، داباندان سویدولار سنی، 

  آنجاق محو اولمادین، آنام، جان  دیلیم، 

  اوردولار سارسیدان قهرمان دیلیم! 

    

  عؤمروم قیریلمازدی، یول قیریلسا دا، 

  سنینله همیشه من اوزوآغام. 

  بدنیم تورپاغا تاپشیریلسا دا، 

  روحومو من سنه تاپشیراجاغام. 

      صابیر   روستم خانلی

 

دیلیم         

   فوضولی زیروه لی، واقیف آخارلی، 

  منیم قورقود دیلیم، علسگر دیلیم! 

  عؤمرومون ناخیشی، بختیمین خالی، 

  داددا، شیرینلیکده بال، شکر دیلیم! 

    

  گؤزومون نوروسان، باشیمین تاجی، 

  سن یوللار سوپورن اتک اولمادین. 

  هئچ زامان چکمه دین سؤز احتییاجی، 

  هئچ زامان دیننده پلتک اولمادین. 

    

  دردلی آنالارین باغریندان قوپان، 

  نئچه یول داغلانیب، ازیلن دیلیم. 

  روحوما ایشله ین، قانیما هوپان 

  سازین پرده سیندن سوزولن دیلیم! 

    

  دوشمن دؤندرنده تویلاری یاسا 

  دوروب بویلانماغین یئری واردیمی؟ 

  سنین قودرتینه آرخالانماسا، 

  خطای قیلینجدان یاپیشاردیمی؟! 

    

  بایاتی بئشیگی، لایلا یوواسی، 

  منیم تارلی دیلیم، کامانلی دیلیم. 

  کیم ا سه  همیشه باهار هاواسی، 

  کیم اسه  همیشه دومانلی دیلیم! 

    

  «انا الحق » بایراقلی، « حئیرت » نیدالی، 

  میصری قیلینجیم تک کسرلی دیلیم! 

  نعره لی، لهجه لی، سسلی، صدالی، 

  شعرلی، نغمه لی، اثرلی دیلیم! 

    

  بولوددان سییریلیب، گونشدن چیخیب، 

  گؤیلرین تاختیندان ائنیب گلمیسن! 

  اؤلمز داهیلرین الینی سیخیب، 

  تانری قودرتینه دؤنوب گلمیسن! 

    

  هر گون چیچک آچیب، بار- بهره وئریب، 

  دیلیمدن گوج آلیب ائلیمین کؤکو. 

  ائلیمه، گونومه گؤر نه لر وئریب، 

  سؤزومون شیره سی، دیلیمین کؤکو. 

    

  دونیانین قلبینه یاتان دیلیمین 

  اؤزولو  بیر اؤلمز روحدادی، بلکه؟ 

  بوداغی بو گونه چاتان دیلیمین 

  کؤکو آدمده دی، نوحدادی، بلکه؟ 

    

  فوضولی زیروه لی، واقیف آخارلی، 

  منیم قورقود دیلیم، علسگر دیلیم! 

  عؤمرومون ناخیشی، بختیمین خالی، 

  داددا، شیرینلیکده بال- شکر دیلیم! 

زلیمخان یعقوب

   

  آنا دیلیم

   عصرلرین سیناغیندان 

  متین چیخان موقدسیم، 

  مشققتلی بیر طالعنین 

                                بوللورلوغو، حیات درسیم- 

                                        آنا دیلیم، 

  بوتؤلوگوم،  

  آیدینلیغیم، 

   اعتیقادیم، 

            سیرریم، سِحریم… 

                ییغین- ییغین،   

                                        پرن- پرن، 

                                        داغین- داغین، 

            حیکمت نهریم - 

                       آنا دیلیم. 

            حسن اوغلوم، 

                                        شاه خطاییم، 

                                        میرزه فتعلیم - 

            آنا دیلیم… 

            بیزی مسلک یاشاتسا دا، 

            زامان- زامان 

                                        سؤزوموزو، 

                                        فیکریمیزی، 

                                        نغمه میزی 

            بیز دؤردنالا چاپاممادیق. 

            زامان- زامان حاقسیزلیغین 

                                          پنجه سیندن ساپاممادیق. 

            زامان- زامان 

                                         قوووردولار تورپاغیمی، 

            قورونو دا اله دیلر. 

            زامان- زامان جاهانگیرلر 

            اود یوردومو 

                                    قیزیل قانا بله دیلر، 

             

            فقط 

            یئنه روحومو شاد، 

                                               دیری بیلدیم،  

            آنا دیلیم. 

            مردلیگیندن کوروغلومون 

            ار قوللاری چاتیلسا دا، 

            شفا، 

                                              بوللور قایناغیما 

            یاد آخاری قاتیلسا دا، 

            زامان- زامان  

            بو چئشمه نین صاف سویونو  

                                              دورر بیلدیم. 

            آنا دیلیم. 

            مین ایللیکلر اؤتوب کئچدیک، 

            ایزیم ایتمز ایننن بئله. 

            هلم-  هلم سؤنمز اولدوم، 

            فیکریم بیتمز ایننن بئله. 

            …قورقود قوپوزلو، 

            زردوشت حئیرتلی، 

            جاوانشیر قیلینجلی، 

            وطن غئیرتلی، 

            مؤحتشمیم، اوجام، اولوم - 

            آنا دیلیم. 

    صابیر  آرازلی 

         

   آنادیلیم

   سنی شفق بیلدیم بو جاهاندا من، 

  بعضاً شیمشک اولوب غضبله چاخدین. 

  ایلک دفعه  دونیایا گؤز آچاندا من 

  قلبیمه گونشین اؤزویله آخدین. 

    

  آنا گؤزلریندن سوزن نور کیمی 

  هوپدون اورگیمه سن گیله- گیله، 

  هر کلمه ن، هر سؤزون بزه نمه ییب می؟

  مئهریبان آنامین تبسسومویله؟! 

 

…اوجالیر باغچادان بولبولون سسی، 

  چای سوسور، اسمه ییر، چمنده یئل ده. 

  نه قدر دوغمادیر اونون نغمه سی، 

  بولبول ده ائله بیل اؤتور بو دیلده. 

        نبی  خزری      

تورکون دیلی

تورکون دیلی تک سئوگیلی، ایستکلی دیل اولماز

 اؤزگه دیله قاتسان بو اصیل دیل اصیل اولماز

اؤز شعرینی فارسا - عربه قاتماسا شاعیر

 شعری اوخویانلار ، ائشیدنلر کسیل اولماز

فارس شاعیری چوخ سؤزلرینی بیزدن آپارمیش

  ((صابر))کیمی بیر سفره لی،شاعیر،پخیل اولماز

تورکون مثلی،فولکلوری دونیادا تک دیر

 خان یورقانی، کند ایچره مثل دیر میتیل اولماز

آذر قوشونی ، قیصر رومی اسیر ائتمیش

کسری سؤزودیر بیر بئله تاریخ ناغیل اولماز

چوخ قیسا بوی اولسان اولیسان جین کیمی شیطان

 چوق دا اوزون اولما کی اوزوندا عقیل اولماز

آزاد قوی اوغول عشقی طبیعتده بولونسون

 داغ - داشدا دوغولموش ده لی جیران حمیل اولماز

بو((شهریار))ین طبعی کیمی چیمملی چئشمه

 کوثر اولا بیلسه دئمیرم ، سلسیبل اولماز

                                                                                                                    شهریار

آنا دیلی

سو دئییب دیر آنام اولده منه آب کی یوخ

یوخو اؤیرتدی اوشاقلیقدا منه خواب کی یوخ
 

ایلک دفعه کی چؤرک وئردی منه نان دئمه دی
                
 اولیندن  منه دوزدانه  نمکدان  دئمه دی
 

آنام اختر دئمه ییبدیر منه اولدوز دئیب او
                  
 سو دوناندا دئمه ییب یخدی بالا بوز دئییب او


قار دئیب برف دئمه ییب دست دئمه ییب ال دئیب او

 منه هئچ واخت بیا سؤیله مه ییب گل دئیب او


یاخشی خاطیرلایرام یاز گونو آخشام چاغیلار
 
 باغچانین گون باتانینداکی ایلیق گون یاییلار


گل دئیردی داراییم باشیوی ای نازلی بالام

گلمه سن گر باجینین آستاجا زولفون دارارام


او دئمه زدی کی بیا شانه زنم بر سر تو
                         
 گر نیایی بزنم شانه سر خواهر تو


بلی داش یاغسادا گؤیدن سن اوسان منده بویام
                
 وار سنین  باشقا آنان واردی منیم باشقا آنام


اوزومه مخصوص اولان باشقا ائلیم واردی منیم

 ائلیمه مخصوص اولان باشقا دیلیم واردی منیم


ایسته سن قارداش اولاق بیر یاشایاق بیر لیک ائده ک
           
وئریبن قول قولا بوندان سورا بیر یولدا گئده ک


اولا اؤزگه کولک لره گرک آخمایاسان
         
ثانیا وار لیغیما خالقیما خور باخمایاسان


یوخسا گر زور دئیه سن ملتیمی خوار ائده سن

 گون گلر صفحه دؤنر مجبور اولارسان ... گئده سن

محمد تقی ذهتابی

 

گؤزل تورکجه م آنا دیلیم

گوندوز منیم گونشیمسن

گئجه یاتان اوز قند دیلیم

واز کئچیلمزبیر ائشیم سن

گؤزل تورکجه م آنا دیلیم.

بیر سوکیمی آخیجی سان

دیلبر کیمی یاخیجی سان

هم دادلی سان هم آجی سان

گوزل تورکجه م آنا دیلیم.

ایپک کیمی بوکولور سن

یوماق کیمی سوکولورسن

اینجی کیمی تؤکولورسن

گؤزل تورکجه م آنا دیلیم.

چوخ نازیک سن یارپاق کیمی

موقددس سن تورپاق کیمی

شرفلی سن بایراق کیمی

گؤزل تورکجه م آنا دیلیم.

دنیز قده ر انگین سن سن

آهنگلی زنگین سن سن

منیم بیر تک دنگیم سن سن

گؤزل تورکجه م آنا دیلیم.

سن سیز دونیا حارام منه

سن سیز یاشام – ورم منه

نئشه سئوینج وئرن منه

گؤزل تورکجه م آنا دیلیم.

 

من و آنادیلیم

  گئجه لریم گوندوزه جالاندیقجا تالاندیم، 

  سکسن ایللیک بیر عؤمرون اوجاغیندا قالاندیم. 

  ساحیلده یم،یول اوسته لپه لریم هوجومدا، 

  دایانمیشام داغ کیمی حئیران قالیب هوجومدا. 

  تکلنمیشم ،سئیره لیب همیاشلاریم اجلدن، 

  کؤورلمیشم، باخ بودور افکاریمی گیجلدن. 

  یاشیم اوسته یاش گلیب قالانسادا غمیم کم، 

  هله وارام،دالینجا سوروندوکجه بو کؤلگم. 

  بو گلیملی-گئدیملی دونیامیزدا نه وار کی، 

  نسیللر گلیب گئدیر،نه آخیری نه ایلکی. 

  سن عؤمرونو یاشینلا اؤلچوب،پیچمه آماندیر، 

  گنج یاشیندا قوجالدیم سؤیله مگین گوماندیر. 

  سارماشیقلار دایاقسیز،بویلانسادا اوجالماز، 

  گنجلیغی قوجالیقدا آختارانلار قوجالماز . 

  فلکدنمی گؤروم من طالعین رنگی، 

  ندیر حؤکمو دانماغین بیر دیلین آهنگی؟ 

  یوخ فلکدن دئییل بو، فیرلانسادا ترسینه 

  دامغالاندیق توش اولدوق،دار گؤزلرین ایریثینه. 

  منیم دیلیم، شوخ دیلیم ،شعری دوزلو ،سؤزو تر 

  فوضولی نین حیکمتی چوخ شاهلاری تیتره د ر. 

  اؤز دیلیمدیر عرشیده اولدوزلاری دیندیرن، 

  دار گؤزلری حیسادت یهریندن ائندیرن. 

  دیلیمیزین طالعیی اوینویاجاقمی سانیرسان؟ 

  اؤزونون ناحاقلیقین منه حاقمی سانیرسان؟ 

  ائی منه منلیییمدن یاخین دیلیم، 

  بیر گون گلر آخارسان دوداقلاردان بال دیلیم. 

 

دیلیم

دیلیم یالقیز ، دیلیم یالقیزدیر آی قیز

اوغول شیرین ولی قیز بالدیر آی قیز

آماندیر اوزاق دورما تورکون دیلیندن

اوکی اصلین دانار کال قیزدیر آی قیز


بیزیم تورکون دیلی گول دن ظریف دیر

بوتون دیللر دال اولسا بو الیف دیر

ادب ده علم ده هر بیر هونرده

سیز آللاه تورکلره کیم لر حریف دیر


وارلیقدا بوتون وار یوخوموز شعر و غزل دیر

هر بیر غزلی اللی آرا تورکه مثل دیر

من جعفری ام سؤز یازارام تورکو دیلینده

تورکون بالاسی تورک اولا عالمده گؤزل دیر

هوشنگ جعفری

آنامین دوغما دیلی

سوروشوردوم نه ائده ک کئچمیشیمیز یاددا قالا؟

دئدی یات یوخلا بالا

گؤرمه دین میرزه غلام لار اونودوبدور اؤز ائلین؟

ایتیریب دوغما دیلین؟

یئنه سوردوم: اولاجاقمی دُورا اونلار یوخودان؟

دئدی کی ائتمه گومان

یاتیب اونلار یوخوسوندا ایتیریبدی اؤزونو

داناراق ائل سؤزونو.

من دئدیم: ساتدی اؤزون سؤیله نه یی آلدی اولار؟

اؤلسه کوک بیتکی سولار

قورویوب ساخلامادی دوغما دیلین حرمتینی

آتدی اوز غیرتینی

ایتیریب منلییینی تاپدی نه یی میرزه غلام؟

دئدی وار بوردا کلام:

ائلینین غیرتینی چکمه دی یادلا قاتیلیب

ائل ایچینده ن آتیلیب

ساتیلانلار ساتیلارکن گؤزونه تورپاق اولور

باشینا کول توکولور.

من دئدیم: قلب له "ممّدلی" سئویر دوغما ائلین

اوگؤزل تورکجه دیلین

ائل آذربایجانی نین شانلی بناسین قوراجاق

کئشییینده دوراجاق

وطنیم شاد یاشاییب غیرت ایله ذوق آلاجاق

تاریخه ایز سالاجاق

گئت دئنه: میرزه غلام اؤلمه یه جک آذر ائلی

آنامین دوغما دیلی .

ممدلی

                                                            آنا دیلی

 

 تاریخلارا باخدیم من فیکیر وئردیم

بولبول دن سوروشدوم گول ائی یاخشی دیر

 گوزل سئوسه ز نجابتین آختارین

دئمه یین آغ اوزده تئلی یاخشی دیر

فرهاد اولا بو داغلاری ها دله

کیپریگین اوخ باغرین باشین ها دله

بد اصیل لر الین وئرر یاد ائله

هر کسه نین طایفاسی- ائلی یاخشی دیر

زامبیر قشم دوستون چاغیر هر آیه

طبیب گلر مرهم سالار یارایه

بایرام آیی دئمک اولماز هر آیه

هر کسه نین آنا دیلی یاخشی دیر!

                                                                                                              آشیق قشم

 

                                                                 یاساق                

طالعیمه سن باخ
دوشونجه لریم یاساق
دویغولاریم یاساق
کئچمیشدن سوز آچماغیم یاساق
گله جکدن دانیشماغیم یاساق
آتا- بابامین آدین چکمه ییم یاساق!
بیلیرسن؟
آنادان دوغولاندان بئله
اوزوم بیلمه یه بیلمه یه
دیل آچیب دانیشدیغیم دیلده دانیشماغیمدا یاساق ایمیش، یاساق

                                                                                                                 ب.ق.سهند

                                                            

                  

                                                                              

                                          آنادیلی شئعیرلری دؤرد صحیفه ده: 

                                                                

                                        ANA DİLİ ŞEİRLƏRİ DÖRD SƏHİFƏDƏ       

 

                                                         2 3 4  1

یازان : عباس ائلچین پنجشنبه 1388/11/08 | یوروملار | yorumlar