+0 بگندیم
عاصف آتا - اینسانلیغا یئتن و یئتیرن
اوجاق گون‌سیراسی ایله ۲۵ آتا آیی، ۴۷-جی ایل (۲۵سپتامبر ۲۰۲۵-جی ایل) موطلقه اینام فلسفه‌سی‌نین یارادیجیسی، روحسال اوجاق آتاسی، داهی آذربایجان فیلوسوفو عاصف آتانین (اینام آتا) ۹۰-جی ایل‌دؤنومودور/
اورگینیزده آتا گونشی اولسون!
او، ساده‌جه یاشاماق اوچون دوغولمامیشدی. اونون عؤمرونون معناسی اولوسونون ویجدانی، بشرین روحسال سسی اولماق ایدی.
قوتسال بیتیق‌لری نین، ائولادلاری‌نین- اوجاغی‌نین آتاسی اولدو. سونرالار اولوس دا، بشریت ده اونا آتا دئیه‌جکدی.
او، عاصف آتادیر (اینام آتا) - گئرچکدن پئیغمبرلیک اولایی‌دیر؛ عاقیبتینی اؤزو یارادیب، وار اولوب. وار ائدیب: عؤمورلر، طالع‌لر یارادیب.
*
اوشاقلیق چاغی‌نین فاجیعه‌وی اولای‌لارینی یاشینا اویوشمایان فیطری موشاهیده‌چیلیکله کئچدی. گؤردوگو دهشت‌لری " عؤمروم-گونوم " اثرینده بنزرسیز ایفاده ائدیب: ۳۰-جو ایللر رپرسیاسی‌نین اینسان‌لارین طالعیینده یاراتدیغی بیتمه‌ین آجی‌لار، محو اولان عؤمورلر، موحاریبه‌نین گتیردیگی فاجیعه‌لر - یوخسوللوق، آدام فورصتجی‌للیگی، اؤلومون عادی‌لشمه‌سی، خیانت‌لر...
همین فاجیعه‌وی منظره‌دن اوستون، آنجاق اونون گؤره، ایفاده ائده بیلدیگی چای‌کندین ایلاهی طبیعتی - گونشی، چایی، گؤیو، یوللاری، صمد قایاسی، مئشه‌سی، بولاق‌لاری دئییردی کی، دونیا، حیات، اینسان تکجه گؤرونن دهشت‌لردن عیبارت دئییل.
کیتاب اونون ایلک دوستو، قلم ایسه سیلاحی اولدو. سووئت قلیب‌لری روحونو سیخماق ایستسه ده، او، همین قلیب‌لری سیندیرماق اوچون دوغولموشدو.
*
گنج عاصف سوروشوردو:
- نییه اینسان هم اوجالیر، هم ده آلچالیر؟ نییه اولوس (خالق) اؤزونو ایتیریر؟ نییه بشر یولونو آزیر؟ نییه اینسان وار اولا بیلمیر؟
بو سوال‌لار اونون روحونو دایم اویادیب، عؤمرو بویو آختاریشدا ساخلادی. جاواب تاپماق اومیدیله او، تحصیلینی داوام ائتدیرمک اوچون موسکوا- ادبیات اینستیتوتونا اوز توتدو. آنجاق اورادا دا اورگینده‌کی سوال‌لارین جاوابینی تاپا بیلمه‌دی. اینستیتوتون موعلیم‌لری اونا ایسته‌دیگینی وئره بیلمیردیلر.
بئله‌جه، گنج عاصف اؤزونو کیتابخانادا تاپدی. بورانی ائوی ساییردی. هر سؤز، هر سطیر اونو دوشوندوروردو. تئزلیکله باشا دوشدو کی، حقیقی یول گؤستریجیسی یالنیز ایچی‌نین سسی‌دیر. بورادا دا او، اوخودوقلاری‌نین ائتکی‌سینه دوشمه‌دی، اونلاردان اوستون دوشونجه یؤنو یاراتدی.
آتا وطنه قاییتدی، باکی دؤولت بیلیم‌یوردو-ندا، سلاویان اونیورسیته‌سینده، میلی کونسرواتوریادا موعلیم‌لیگه باشلادی. اونون موعلیم‌لیگی اینسان‌لاری اومیدلندیریردی، هئچ کسین موعلیم‌لیگینه اوخشامیردی. طلبه‌لری اونون درسلرینده یالنیز بیلیک تاپمیر، هم ده روحانی انرژی‌یه قوووشور، موعلیم‌لرینی هم ده سئویملی اینسان، دوست اولاراق قبول ائدیردیلر.
۱۹۷۵-۷۷-جی ایللرده باکی دؤولت بیلیم‌یوردو-ندا یاراتدیغی " اتیک و استتیک تربییه کلوبو " مینلرله اینسانین روحونو اویاتدی. آتا یازیر: " دانیشیق‌لاریما گلیردیلر: دالغا-دالغا، سئل-سئل! گؤروشومه گلیردیلر: دالغا-دالغا، سئل-سئل! یاتاقخانایا گلیردیلر: دالغا-دالغا، سئل-سئل! کیتابخانایا گلیردیلر: دالغا-دالغا، سئل-سئل! "
۱۹۷۹-جو ایلده ایسه اوجاغینی قالادی. تعقیب‌لر، قاپانمالار، تهلوکه‌لر قارشیسیندا گئری چکیلمه‌دی. اثرلری‌نین چوخونو او دؤنمده یازدی: " موطلقه اینام " ، " موطلق لشمک وار اولماق " ، " موطلقی‌لیک " ، بدیعیات " ، " صداقت " ...
آتا دوشونجه لرین، معنویاتین، اینسان روحونون یول‌گؤسترن ایشیغی ایدی.
*
عاصف آتا عؤمرونو آمالینا حصر ائتدی. مقصدی اینسانی خیلاص ائتمک ایدی.
ایسته‌دی کی، اینسان‌لار یاشاسینلار، وار اولسونلار.
" اینسانلاشماق
زمانه اینامینی - اینام‌سیزلیق سایدیم. اینام یاراتدیم.
زمانه ایدراکینی - ایدراک‌سیزلیق سایدیم. ایدراک یاراتدیم.
زمانه معنویاتینی - معنویات‌سیزلیق سایدیم. معنویات یاراتدیم. زمانه ایراده‌سینی - ایراده سیزلیک سایدیم. ایراده یاراتدیم.
زمانه آمالینی - آمال سیزلیق سایدیم. آمال یاراتدیم.
زمانه عملینی - عمل‌سیزلیک سایدیم. اوجاق قالادیم.
تعقیب‌لره یوکسلدیم. آتا چاغیریلدیم. بشرین نیجاتی - اینسانلاشماقدادیر. اینسانلاشین - اینسانلاشدیرین...
(شؤعله آیی، ۷-جی ایل. باکی (ژوئن ، ۱۹۸۵-جی ایل) " .
*
آتا ایدئیالاری
موطلقه اینام - ازلی، ابدی، سونسوز، کامیل معنایا اینام. موطلق، دونیانین، حیاتین، اینسانین داخیلینده کی اؤزوملوکدور.
کامیل اینسان - اینام، ایدراک، معنویات و ایراده موستقیل‌لیگینه یئتن.
اینسان اؤزونده موطلقی‌لیک، یعنی ازلی، ابدی، سونسوز، کامیل معنا گزدیریر، بو سببدن ماهیتجه شراییطدن، موحیطدن، جمعیتدن اوستوندور. اینسان – موطلقی‌لیگه مئیل ائدن و موطلق‌لشمه یه قادیر روحانی وارلیقدیر.
*
موستقیل وطن
عاصف آتا موستقیل‌لیگی بئله گؤرور:
" دونیادان آسیلی اولمادیغین درجه ده موستقیلسن.
دونیایا گرک اولدوغون درجه ده موستقیلسن.
اؤزگه‌دن آسیلی اولمادیغین درجه ده موستقیلسن.
تجریده قابیل اولدوغون درجه ده موستقیلسن.
قیوم‌لاردان و حاکیم‌لردن آزاد اولدوغون درجه ده موستقیلسن.
تقلیددن آزاد اولدوغون درجه ده موستقیلسن.
بهره‌لنمگین بهره‌لندیرمگینه برابر اولدوغو درجه ده موستقیلسن.
اؤیرنمگین اؤیرتمگینه برابر اولدوغو درجه ده موستقیلسن.
اؤزوملشدیگین درجه ده موستقیلسن.
اینسانلاشدیغین درجه ده موستقیلسن " .
*
روحانی بیرلیک (جمعیت) - اینسانین اینسانی اوجالتدیغی مکان. آتانین فیکرینجه، بشر آشاغیداکی دایره‌لرده ایلیشیب قالیب:
سیاسی دایره – دموکراسی و توتالیتاریزم دایره سی
ایجتیماعی دایره - کاپیتالیزم و سوسیالیزم دایره سی
دین-آتئیزم دایره سی.
عاصف آتانین روحانی (اینسانی) جمعیت ایدئالیندا فرد عؤمرونون، طالعیی نین، ایراده سی‌نین یییه‌سی‌دیر.
اؤزوملو شرق ایدئیاسی شرقی اؤزونه - ازلی موعلیم‌لیگینه قایتارماغی هدفله‌ییر.
لیاقتلی بشر - بشرین روحسوزلوق، زوراکی لیق، اخلاق‌سیزلیق و مادیات حریص‌لیگیندن آزاد اولماسی دئمکدیر.
*
آتا اوچون تورکچولوک ساده‌جه میلی ایدئیا دئییلدی، بشری معنویاتین دیرچلدیجی گوجو ایدی. او، تورک روحونو دونیانین ایتیردیگی لیاقتین برپاسی، اینسانلیغی اوجالداجاق معنوی دایاق‌لارین اؤزولو کیمی گؤروردو.
عاصف آتا حساب ائدیر کی، گونئی آذربایجان مسله‌سی آذربایجانین ان اساس سیاسی مسله‌سی‌دیر. اونون فیکرینجه، قوزئی و گونئی آذربایجانین بیرلشمه سی یالنیز جوغرافی و سیاسی اینتقراسیا دئییل، هم ده میللی گوج، روحانی‌لیک و دؤیوشکن‌لیک عنعنه‌لری‌نین بیرلشمه‌سی‌دیر. واحید آذربایجان ایدئیاسی میلی ایراده‌نی گوجلندیریر و بین الخالق سویه ده آذربایجانین سیاسی مؤوقئعیینی یوکسلدیر.
آتانین فیکرینجه، روحون دؤرد جهتی وار: اینامین اؤزولو – موطلقی‌لیکدیر. ایدراک - حقیقتی گؤرمک گوجودور. معنویات – ویجدان‌چیلیق، تمناسیزلیق، فداکارلیق دئمکدیر. ایراده نین اؤزولو - منلیکدیر.
*
عاصف آتا دئییر:
" اینسانلاشین، اینسانلاشدیرین - بشرین قورتولوشو اینسانلاشماقدادیر! "
آتا اینسانلاشماغا، اینسانلاشدیرماغا چاغیریر. اینسانی بیرلیک اؤنجه اینسانین ایچینده قورولور.
اینام آتانین (عاصف آتانین) ایدئیالاری یاشاییر، چونکی بو ایدئیالار ابدیتین سوراقچیسی‌دیر.
آتامیز وار اولسون!
یازان: دوزگون آتالی
کؤچورن: عباس ائلچین
