+0 بگندیم
میللی شاعیر - بختیار واهابزاده
بختیار علییئو
آغجابدیع پداقوژی کالجینین دیرکتورو
آذربایجان ادبیاتینین پارلاق سیمالاریندان بیری اولان بختیار واهابزاده خالقیمیزین یادداشیندا تکجه بؤیوک شاعیر کیمی دئییل، هم ده دوشونن، اویادان و یول گؤسترن بیر فیکیر آدامی کیمی قالیب. اونون پوئزییاسی – ایستیقلال، وطن، آنا دیلی، آزادلیق و اینسانلیق ایدئیالارینین سسیدیر. هر بیر میصراعسیندا هم عاغیل، هم اورک، هم ده ویجدان دانیشیر.
واهابزادهنین شعرلری ساده جه بدیعی سؤز ییغینی دئییل، روحون ترجومهسیدیر. اوخوجو اونون میصراعلاریندا هم دوشونور، هم دویور، هم ده روحن صافلاشیر. شاعیر سانکی سؤزه جان وئریر، اونو نفسلی، دویغولو بیر وارلیغا چئویریر.
بختیار واهابزادهنین پوئزییاسی آذربایجان خالقینین آغریلی تاریخینی، میللی فاجیعه لرینی و قهرمان روحونو اؤزونده یاشادیر. شاعیرین " گولوستان " پوئماسی ایکی یئره بؤلونموش آذربایجانین دردینی تکجه تاریخی فاکت کیمی یوخ، میللی ویجدانین یاراسی کیمی گؤستریر. واهابزاده اوچون وطن سادهجه تورپاق دئییل – دیلدیر، مدنیتدیر، تاریخدیر، اینسانین اؤز وارلیغیدیر. او یازیردی کی، بیر خالقین جوغرافیاسی بؤلونسه ده، روحو بؤلونمهملیدیر.
شاعیرین یارادیجیلیغیندا آنا دیلینه محبت خوصوصی یئر توتور. اونون مشهور " آنا دیلی " شعری یالنیز دیل حاقیندا دئییل، میللی کیملیک و معنوی یادداش حاقیندا پوئتیک بیر اعتیرافدیر. او، دیلی سادهجه اونسیت واسیطه سی یوخ، خالقین روحو، یادداشی و غورورو حساب ائدیردی. " ایلک دفعه اوشاق " آنا " دئییر، دیلین موقدسلیگی ده اورادان باشلاییر " ، – دئیه یازان واهابزاده دیل سئوگیسینی میللی اؤزونودرکین تملی کیمی گؤروردو.
آنجاق دَیرلی شاعیریمیز، تکجه وطن و دیل مؤوضولارینا توخونموردو. واهابزاده هم ده اینسانین داخیلی عالمینه، وارلیق و زامانین فلسفه سینه ائنیردی. " اؤلوم اولمور ابدی " دئیرکن او، اینسانین بدنجه یوخ اولا بیله جگینی، آما خاطیره لرده یاشادیقجا اؤلمه دیگینی سؤیله ییردی. اونون فلسفی شعرلری اوخوجونو دوشونمه یه وادار ائدیر: بیز کیمیک، هارا گئدیریک، نئجه یاشامالیییق؟
بختیار واهابزاده هم ده دراماتورق و پوبلیسیست ایدی. " ایکینجی سس " پیئسینده او، اینسانین ویجدانی ایله قورخوسو آراسینداکی گیزلی موباریزهنی اوستالیقلا آچیر. بو اثر سادهجه صحنه اوچون دئییل، حیاتین اؤزو اوچون یازیلمیشدی. واهابزاده گؤستریردی کی، اینسان بعضاً دوغرونو بیلیر، آما قورخودان سوسور. لاکین ویجدان سوسمور – او، ایچیمیزده دایم دانیشان " ایکینجی سس " دیر.
خالق شاعیری بختیار واهابزاده ادبیاتیمیزا خلقیلیک، سادهلیک و صمیمیت گتیردی. اونون دیلی خالق دانیشیق دیلینین آیدینلیغی و طبیعیلیگی ایله زنگیندیر. هر کس شاعیرین شعرلرینده اؤزونو، اؤز دویغوسونو تاپا بیلیر.
هم ده جسارتلی ضیالی اولان بختیار واهابزاده میلت وکیلی کیمی فعالیتی دؤورونده ده خالقین دیلی، مدنیتی و حوقوقلاری اوغروندا موباریزه آپاریردی. اونون چیخیشلاری تکجه ادبی یوخ، ایجتیماعی چاغیریش کاراکتری داشیییردی. واهابزاده اینانیردی کی، ضیالی سوسمامالیدیر – خالقین دردینی دئمک، سؤز دئمک، یؤن گؤسترمک اونون بورجودور.
بختیار واهابزاده نین یارادیجیلیغی میللی پوئزییامیزدا وطنداشلیق روحونون، ایستیقلال دوشونجهسینین و معنوی اوجالیغین سیموولونا چئوریلمیشدیر. اونون میصراعلاری بو گون ده خالقی دوشوندورور، اویادیر، بیرلشدیریر. بیر وطن موحاریبه سی ایشتیراکچیسی کیمی دئیه بیلرم کی، بو غلبه نین قازانیلماسیندا گوجلو ایداره چیلیگین، گوجلو اوردونون نه قدر بؤیوک رولو وار ایدیسه، سؤزون گوجو، سؤزون قودرتی ده ظفرین الده اولونماسیندا آز رول اوینامامیشدی. اوچرنگلی بایراغیمیز آزاد اولونان تورپاقلاردا دالغالاندیقجا بختیار واهابزاده نین هله ایللر اول ازبرله دیگیمیز میصراعلارینی سؤیله مهمک الده دئییلدی :
اوچرنگلی بایراغین کؤلگه سینده من
قاراجا تورپاغی وطن گؤرموشم.
ظفر گوللرینی دؤوری-قدیمدن
بایراق ایشیغیندا بیتن گؤرموشم.
بایراق منلیگیمدیر، بایراق کیملیگیم،
بایراق – اؤز یوردوما اؤز حاکیملیگیم!
بلی، ایللر کئچهجک، زامان اؤته جک، آما ساغ ایکن خالقینین یانیندا اولان بختیار واهابزاده کیتابلاردا، میصراعلاریندا، اینسانلارین قلبینده هر زامان یاشایاجاق . اونون سؤزلری ایله بؤیوین نسیللر وطنین معناسینی، دیلین دَیرینی، ویجدانین گوجونو اؤیره نیرلر. شاعیر اؤزو بو دونیادان کؤچسه ده، فیکیرلری ابدیدیر. چونکی او، سؤزون ایچینده هم روح، هم عاغیل، هم ده ویجدان یاشادا بیلمیشدی.
کؤچورن: عباس ائلچین
