ائلچین

تورک دیلی و ادبیاتی

حئیوانلار تارلاسی؛ جورج اورول (رومان)

+0 بگندیم

حئیوانلار تارلاسی

یازان: جورج اورول

چئویرن: عباس ائلچین

 

بیرینجی بؤلوم

              مانور تارلاسی‌نین آغاسی بای جونز، گئجه‌‌له‌‌یین تویوقلارین اینی‌نین قاپیسینی باغلایاندا، اسریکلیکدن باجانی توتماغی اونوتدو.  فنری‌نین ایشیغی  دام دوواردا  اویناقلایارکن ساللانا-ساللانا آولونون  اورتاسیندان گئچه‌رک تارلا ائوی‌نین  قاپیسی‌نین ائشیگینده چکمه‌لرینی چیخاردیب سون بارداغینی دهلیزده‌کی آرپا سویو  کوپوندن ووراندان سونرا  بایان جونزون خورولتوسو گلن اوتاغا گئچدی.

              یاتاق اوتاغی‌نین  ایشیغی سؤنونجه، تارلانین بوتون  یاپیتلارینی جوشقولو بیر قیمیلداما بورودو،گون بویو «آغ قابان» اؤدولونو قازانمیش، قوجا مئیجیرین اؤتن گئجه گؤردوگو ایلگینج یوخوسوندان دانییشیلمیشدیر. قوجا مئیجر یوخوسونو باشقا حئیوانلارا آچیقلایاجاغینی سؤیله‌میشدی. حئیوانلار، بای جونزون گؤزون ایراق گؤرونجه بؤیوک  آمباردا بولوشاجاقلارینی  آنلاشمیشدیلار . قوجا مئیجر( او اسکیدن بری یاراشیقلی مئیجر آدیله تانینمیشدیر) چوخ سایغی‌دگر بیر دونقور ایدی. تارلادا، هرکیمسه، بؤیوکلو- کیچیکلی یوخولاریندان بیر هاویر ووروب اونون سؤزلرینی ائشیتمگه کؤنوللو ایدی. قوجا مئیجر، بؤیوک آمبارین دیبینده ساماندان  قایریلمیش  قالدیریمین اوستونده، تاواندان آسلانمیش فنرین ایشیغی‌نین آلتیندا دایانمیشدی. اونون اون‌ایکی یاشی وارایدی. بو یاخینلاردا آزجا کؤکلسه‌ده، هله‌ده بویوله‌ییجی اسکی گؤرکمینی ایتیرمه‌میشدی. قابان دیشلری‌نین کسیلمه‌دیگینه باخمایاراق او چوخ اوسلو،  سئویملی گؤرونوردو. قیسا بیر سوره ایچینده، حئیوانلار  بیره‌ر- بیره‌ر یئتیشیب اؤز یئرلرینه یئرلشدیلر. اؤنجه اوچ ایت گلدی؛ بولوبئل، جئسی  بیرده پینچئر. سونرا  دونقوزلارچاپاراق گلیب قالدیریمین اؤنونده یئرلشدیلر. تویوقلار آچییشقانین بارماقلیقلاریندا اوتوردولار. گؤیرچینلر پیریلداشاراق چاتی‌نین آلتینداکی تیره قوندولار. اینکلر ایله قویونلار، دونقوزلارین آرخاسیندا آغناییب گَوشه‌مگه باشلادیلار. ایکی آرابا آتلاری؛ کلووئر ایله باکسئر،  باشقا کیچیک حئیوانلاری آیاقلاری آلتیندا آیاقلاماسینلار دئیه یاواش-یاواش آددیملایاراق اوراداکیلارا قوشولدولار.کلووئر، اورتا یاشلارینا یاخینلاشان آناج، سمیز بیر قیسراق ایدی.دؤرد دایچا دوغدوقدان سونرا آرتیق اسکی  بوی بوخونونو ایتیرمیشدی. باکسئر، قوجامان بیر آیغیر ایدی. اون سگگیز قاریش بویو اولوب ایکی آتجا گوجو وارایدی. آلنی‌نین قاشقالیغی اونا مایماقجا بیر بیچیم وئرمیشدی.گئرچکدن‌‌ده چوخ اوسلو بیریسی ساییلمازدی. بونونلا بئله، او چالیشقانلیغی، دؤنمزلیگی ایله، هامی‌نین سایغیسینی قازانمیشدی. آتلاردان سونرا، آغ اوغلاق موریئل  ایله بئنجامین آدلی ائششک گلدیلر. بئنجامین تارلانین ان یاشلی حئیوانی ایدی. او، اتی آجی، دیلی آجی بیر حئیوان ایدی.چوخ چتین دانیشاردی؛ دانیشاندا ایسه کیمسه اونون نه دئدیگینی آنلامازدی.اؤرنگین،او دئیردی: « تانری میلچکلری قووماق اوچون منه قویروق وئریب آنجاق دوزو بوایدی نه قویروق اولاردی نه‌ده میلچک». تارلاداکی حئیوانلارین آراسیندا تکجه او ایدی ایندی‌یه‌دک هله گولمه‌میشدی.ندنینی سوروشوندا ایسه، گولمه‌لی بیرشئیین اولمادیغینی سؤیلردی.   آچیقجا دیله گتیرمه‌‌دیگینه باخمایاراق او باکسئره وورغون ایدی. اونلار سود گونلرینی هئپ بیرلیکده گئچیردیب باخچانین اؤته‌‌سینده‌کی کیچیک اوتلاقدا قونوشمادان یان یانا گزه‌رک اوتلایاردیلار.

              آتلار یئرلرینه آغنادیقدا، یئتیم اؤردک بالالاری اینجارسیز  ویغیلتیلاری ایله آمبارا واریب آیاق آلتیندا قالماماق اوچون اویغون بیر یئر آراماغا باشلادیلار. کلووئر بونو گؤره‌لی اونلارین چئوره‌سینده آیاقلاری ایله بیر دووار اولوشدوردو. بالا اؤردکلر آیاقلارین آراسینا سیغینینجا دوشوب یاتدیلار. بونلارین آردینجا، سیرا بای جونزون فایتون آتی،قوش‌بئیین، آغ قیسراق مولی‌یه یئتیشدی.او بیر پارچا قند آغزیندا چئینه‌یه‌رک گئدیب قالدیرمین لاپ اؤنونده دایاندی. او باشقالاری‌نین ایلگیسینی  آغ یئله‌سینه باغلانمیش آل شیریغا چکمک اوچون اونونلا اویناماغا باشلادی. هامیدان سونرا پیشیک گلدی.هئپ اولدوغو کیمی ان ایستی یئری آراماغا باشلادی. ائنینده-سونوندا باکسئر ایله کلووئرین  آراسینا سیخیشیب شیرین- شیرین خورولداماغا باشلادی. او قوجا مئیجرین سؤیله‌ویندن بیرجه سؤز بئله اولسون ائشیتمه‌دی. قاپی‌نین ائشیگینده، اوجا قارا آغاجین باشیندا یوخلایان قارا قارغا موزئردن باشقا هامی آمباردا ایدی. قوجا مئیجر، حئیوانلارین یئرلرینده دینجله‌شیب اؤزلم دولو بکله‌ییشلرینی گؤرونجه بوغازینی آریتلایاراق سؤزه باشلادی:

-«یولداشلار! سانیرام دون گئجه گؤردوگوم یوخویا گؤره بیر شئیلر ائشیتمیشسینیز.یوخونو آچیقلامادان اؤنجه سیزلره سؤیله‌یه‌جک بیر نئچه سؤزوم وار. دوشونورم، یالنیز بیر نئچه آی سیزین قوناغینیزام. بو ندنله، آرانیزدان کؤچمه‌دن اؤنجه، ایللر بویو قازاندیغیم بیلگیلریمی سیزلره تاپشیرماغی اؤزمه بؤیوک بیر بورج بیلیرم. بیلدیگینیز کیمی من چوخ اوزون بیر سوره‌‌دیر یاشاییرام. من آغیلیمدا یالقیز اولاندا دوشونوب داشینماغا چوخ زامانیم اولوب. سانیرام، یاشامین آنلامینی یئر اوزونده یاشایان بوتون حئیوانلاردان آرتیقراق آنلامیش اولدوغومو سؤیله‌یه بیله‌رم. سیزینله قونوشماق ایسته‌دیگیم قونو ائله بودور. ایندی یولداشلار! دوغوشدان یاشام ندیر؟! قویون آچیقلایالیم. بیزیم بو قیساجیق یاشامیمیز آجیناجاقلی بیر چابالامادان باشقا بیر شئی دئییل.بیز دوغولوروق؛ اؤلمه دیری گئجینیریک؛ گوجلولریمیزین سیرتیندان ایش چکیلیر؛ آیاقدان دوشنده ایسه پاییمیز آجیماسیزجاسینا اؤلدورولمک اولور. هئچ حئیوان اینگلیسده بیر یاشینی گئچه‌لی، سئوینجین یاخود دینجلیشین آنلامینی بیلمیر. هئچ حئیوان اینگیلیسده اؤزگور دئییل.  اینگیلیسده بوتون حئیوانلار موتسوزلوقدا، کؤله‌لیکده یاشاییرلار. بو بیر بایاغی گئرچکدیر.گؤره‌سن بو دوغانین بیر قورغوسودور یوخسا اوزه‌رینده یاشادیغیمیز تورپاقلار چوخ وئریمسیزدیر؟ یوخ یولداشلار! یوخ، یوخ،یوخ! مین کره‌ده سوروشانیزدا یوخ. اینگیلیسین تورپاقلاری چوخ وئریملی‌دیر، هاواسی چوخ یاخشی‌دیر. بو توپراق ایندیکی یاشایان حئیوانلاردان قات قات چوخونو بولون- سولون  یئملندیره بیلر. بیزیم ائله بو کیچیک تارلامیز، اؤزو ، اون ایکی آتی، ییرمی اینگی، یوزلرجه قویونو دوشونمه‌دیک بیر بیچیمده دویا -سییا یاشادا بیلر. اوندا بیز نییه بئله بیر آجیناجاقلی دورومدا یاشاییریق؟... ندنی‌‌ چکدیگیمیز  امکلرین آزقالا هامیسی‌نین اینسانلار وریندن اوغورلانماسی‌‌دیر. یولداشلار ، بیزیم موتسوزلوغوموزون بیرجه ندنی اینساندیر. بیزیم بیریجیک گئرچک دوشمنیمیز  یالنیز اینساندیر . اینسانی اورتادان قالدیرسانیز آجلیغین ، سؤمورولمگین کؤکو سونسوزا‌دک قورویاجاقدیر. اینسان اورتمه‌ین بیر توکه‌تیجی‌دیر. او سود وئرمیر،یومورتلامیر، کوتانی چکمگه گوجو جاتمیر، دووشان دالیسیجا توواراق قاچانمیر.... بونونلا بئله، او بوتون حئیوانلارین آغاسی‌دیر. او حئیوانلارین چکدیگی امگین  یالنیز آزجاسینی اؤلمه‌مک اوچون اونلارا وئریرقالانینی اؤزونه گؤتورور. بیزیم امگیمیزله یئر اکیلیر. بیزیم پئهینیمیزله یئر زنگینله‌شیر.آنجاق هله هله دیر بیر دری، بیر سوموکدن باشقا بیر شئییمیز یوخدور. قارشیمدا دوران اینکلر سیزنله‌یم ، گئچن ایل نئچه مین پوتلوق سود وئریبسینیز؟ ساغلام بیزوولار بسله‌مک اوچون گره‌کلی اولان او سودلرین باشینا نه گلدی؟ سودلرین دامجی دامجیسی دوشمنلریمیزین بوغازیندان آشاغی ائندی. سیز تویوقلار! یومورتلادیغینیز یومورتالار هانی؟ تکجه بیر نئچه‌‌سی  جوجه اولوب قالانی  بازاردا  جونز ایله آداملارینا پول اولوب. سن کلووئر! قوجالیق چاغیندا سنه دایاق اولاجاق اورک توختاقلیغی وئره‌جک دوغدوغون دؤرد دایچان هارادادیر؟ بیر یاشلارینا چاتار چاتماز ساتیلیب سن بیرداها اونلارین اوزونو  گؤرمه‌میشسن.  بونون قارشیلیغیندا، سحردن آخشامادک  تارلادا دوستاقلار کیمی  ایشله‌ییرسن. بو دونیادا قورو سامان ایله بوش بیر آخیردان باشقا  نه‌یین واردیر؟                                                    

              بوآجیناجاقلی دوروم بیر یاندا قالسین، بو اینسانلار  قویمورلار بیزلر اؤز دوغال یاشام سوره‌میزی بئله بیتیرک . من بونو اؤزوم اوچون دئمیرم .سانیرام من حئیوانلارین ان موتلولاریندانام . من اون ایکی ایل یاشاییب دؤرد یوزدن آشقین  چوشقام اولوبدور. بیر دونقوزون دوغال یاشام سوره‌سی ائله بودور. آنجاق یازیقلار اولسون! قان‌تؤکن پیچاقدان قورتولاجیغیمیز اولمایاجاقدیر. اؤنومده اوتوران پوتا چوشقالار سیزنله‌یم! سیز بیر ایلین ایچینده اتچی کؤتوگونون اوستونده باغیراراق جان وئره‌جکسینیز.  بو قورخونج گله‌جک، هامینی؛ دونقوزلاری، اینکلری، قویونلاری، تویوقلاری ....گؤزله‌ییر. آتلار ایله ایتلرین آلین یازیلاری بئله بوندان یاخشیراق اولمایاجاق. سن باکسئر، گوجون بیتیب دیزدن دوشونجه  جونز سنی آت‌کسنه ساتاجاق، اودا  باشین اوزوب  اتیندن ایتلره یئم دوزلده‌جکدیر. ایتلر ایسه  قوجالیب دیشلری تؤکولنده ، جونز بویونلارینا بیر یئله داش باغلاییب ان یاخین گؤلمجده بوغاجاقدیر.

              یولداشلار! یاشامیمیزین اوغورسوزلوغونون قایناغی گئرچکدن اینسان اوغلونون زورباچیلیغی‌دیر. یالنیز اونون الیندن قورتولساق چکدیکیمیز امکلر اؤزوموزونکو اولاجاق. بیز بیر گئجه‌ده  یالنیز بیر گئجه‌ده اؤزگورلوگه، زنگینلیگه قوووشا بیله‌ریک. بئله ایسه نئیله‌مه‌لی‌ییک؟ بللی‌دیر ، اینسان اوغلونون کؤکونو کسه‌نه‌دک جاندان، اورکدن چالیشمالی‌ییق. یولداشلار! منیم بیریجیک ساویم بودور: دئوریم. دئوریم هاچان  باش وئره‌جک بیلمیرم. آنجاق آیاغیمین آلتینداکی سامانی گؤردوگوم کیمی او گونون ائر- گئج  ائره‌جگینه اینانیرام. یولداشلار ! بوقیساجیق یاشامینیزدا قولاقلارینیزی آچیب سؤزلریمی یاخشی دینله‌یین . اوغوللارینیزا ، گله‌جک قوشاقلارینیزا  بو ساویمی یئتیرین: دوشمنی یئنه‌نه‌دک ساواشاجاغیق.

              یولداشلار! اونوتمایین بو یولدا آخسامامالی‌سینیز. بوش دارتیشمالار سیزی آماجینیزدان جایدیرماسین. سیزلره دئییلسه اینسانلار ایله حئیوانلارین اورتاق چیخارلاری وار، بیری‌نین موتلولوغو باشقاسی‌نین  موتلولوغودور ساقین اینانمایین، بو بیر آغ یالاندیر. اینسان اؤزوندن باشقا کیمسه‌‌نین چیخارینی ایسته‌مز.

              ایندی بیز حئیوانلار بو یولدا بیرلشمه‌لی‌ییک بو ساواشدا یولداشلاشمالی‌ییق. بوتون اینسانلار دوشمن‌دیرلر. بوتون حئیوانلار یولداش‌دیرلار.»

              بو سیرادا بؤیوک بیر گورولتو قوپدو. قوجا مئیجر دانیشاندا ، دؤرد یئکه آخسا‌سیچانی یووالاریندان چیخیب آرخا آیاقلاری اوستونده اوتوراراق اونو دینله‌ییردیلر . ایتلر بو گؤرونتونو گؤروب سالدیری‌یا گئچینجه اونلار چار-چابوق یووالارینا سوخولوب جانلارینی قورتاردیلار. قوجا مئیجئر حئیوانلاری سوسدورماق اوچون تویناغینی  قالدیردی.

-« یولداشلار! » او دئدی-« ائله ایندیجه بورادا بیز بیر شئیی آنلاشمالی‌ییق . سیچان ایله دووشان کیمی یابانجیل حئیوانلار یولداش‌دیرلارمی؟ یوخسا دوشمن. گلین اوی وئرک. من "سیچانلار یولداش دیرلارمی؟" سوروسونو اؤنریرم».

 اویلاما دورمادان گئچیریلیب اوی‌بیرلیگی ایله سیچانلارین یولداش اولدوغو آنلاشیلدی. یالنیز دؤرد اوی گئچرسیز ایدی.اوچ ایت ایله  پیشیگین ایکی یؤنلو اوی وئردیگی سونرا بللی اولدو. قوجا مئیجئر سؤزلری‌نین  آردینی توتدو:

-«اوزون سؤزون قیساسی، یئنه دئییرم ، اینسانلار قارشی گؤره‌وینیزی اونوتمامالی‌‌سینیز. ایکی آیاق اوستونده یئریین هر نه وار دوشمن‌دیر . دؤرد آیاقلی ایله قانادلیلار یولداش‌‌دیرلار. اونوتمایین یولداشلار!  اینسانا قارشی ساواشیمیزدا اؤزوموزو اونلارا بنزتمه‌مه‌لی‌ییک. سیز دوشمنی یئنسه‌نیز بئله اونون داورانیشلارینی منیمسه‌مه‌مه‌لی‌سینیز. هئچ حئیوان ائوده یاشامایاجاق، پالتار گئیمه‌یه‌‌جک، ایچکی ایچمه‌یه‌‌جک، توتون چکمه‌یه‌جک، پولا توخونمایاجاق، آلیش وئریشه گیریشمه‌یه‌جک. بو آلیشقانلیقلار کؤتودور. بوندان باشقا  هئچ حئیوان  اؤز سویداشلارینا باسقی یاپمامالی‌دیر.گوجلو یاخود گوجسوز ، اوسلو یاخود اوسسوز، هامیمیز قارداشیق؛ هامیمیز یولداشیق. هئچ حئیوان باشقاسینی اؤلدورمه‌ملی‌دیر . بوتون حئیوانلار ائشیددیرلر.

              ایندی ایسه یولداشلار، دونن گؤرگوم یوخویا گئچک.  اونو آچیقلاماق چوخ چتین دیر. او  یئر اوزوندن اینسان اوغلونون کؤکونون کسیلمه گونونون یوخوسو ایدی.آنجاق او یوخو چوخدان یادیرغادیغیم بیر شئیلری منه آنیمساتدی. نئچه ایللر بوندان اؤنجه چوشقالیق چاغلاریمدا، آنام‌گیل اکین اکنده، یاری-یاریمچیق بیر اسکی ماهنینی اوخوماغا آلیشیق‌ایدیلار.چوشقا ایکن ماهنینی اؤیرندیمسه‌ده اوستوندن چوخ ایللر گئچدیگی اوچون  اونو یادیرغامیشدیم . بونونلا بئله، دونن گئجه یوخودا اونو یئنیدن آنیمسادیم اؤزوده بوتون سؤزلری ایله بیرگه. من بو ماهنی‌نین، ان اسکی حئیوانلارین وریندن  قوشولدوغونا اینانیرام. یولداشلار! ایندی ماهنینی سیزلره اوخویاجاغام. قوجالیب سسیم توتولسادا  اونون هاواسینی سیزلره اؤیره‌ده‌جگم. سونرا اؤزونوز یاخشیراق اوخویا بیلرسینیز. ماهنی‌نین آدی:اینگیلیس حیوانلاری دیر.»

              قوجامئیجئر اؤسکوروب کؤکسونو آریتلادیقدان سونرا  اوخوماغا باشلادی.دئدیگی کیمی سسی توتولموشدو آنجاق بونا باخمایاراق ماهنینی یئترینجه گؤزل اوخودو. ماهنی‌نین هاواسی چوخ اویناق ایدی. سؤزلری بئله ایدی :                  

              یا اوراداسیز  یا بورادا

              داغدا، دوزنده، سودا

              موتلو گونلر  گله‌جک

              اینگیلیسه،  ایرلاندا

 

              ائر-گئچ  بیر گون واراجاق

              اینسان کؤکو سولاجاق

              اینگیلیس تورپاقلاری 

              حئیوانلارین  اولاجاق

 

              بوخوو الدن دوشه‌جک

              یهر  بئلدن  دوشه‌جک                            

              قامچی ووران  آزغینلار

              اوگون دیلدن دوشه‌جک

 

              گونش ایشیق  ساچاجاق

              سرین  سولار  آخاجاق

              تارلادا  اسن یئللر

              اؤزگورلوگو یایاجاق

 

              یونجا، سامان  بیزیمدیر

              آرپا، بوغدا بیزیمدیر

              تارلانین  اورونلری

              یوخو دئییل  بیزیمدیر

             

              اوگون اوچون  چالیشالیم

              سؤنمه‌یه‌لیم  آلیشالیم

              اینگیلیسین حئیوانلاری

              یئر اوزونون حئیوانلاری

              اؤزگورلوگه قاووشالیم

             

      ماهنی‌نین اوخونماسی حئیوانلاری دلیجه‌سینه  جوشقولاندیردی.قوجا مئیجئرین اوخوماسی بیتینجه حئیوانلارین اؤزلری  اوخوماغا باشلادیلار. قیسا بیر سوره ایچینده  حئیوانلارین ان اوسسوزلاری، ماهنی‌نین بیر ایکی پارچاسینی  هاواسی ایله بیرگه  اؤیره‌نه  بیلدیلر. دونقوزلار ایله ایتلر کیمی هوشلو -باشلیلار ایسه یادداشدان اوخوماغی باجاردیلار. بیر آز اؤیرنجه‌دن سونرا  حئیوانلار سس سسه وئره‌ک  تارلانین یاپیتلارینی گور سسلری ایله تیتره‌تدیلر. اینکلر موولایاراق، ایتلر هاولایاراق، قویونلار مله‌یه‌‌رک، آتلار کیشنه‌یه‌رک ، تویوقلار قیدداشاراق،اؤردکلر واغلایاراق ماهنینی بئش کره جوشقو ایله اوخودولار . اوخوشمانی کسن اولماسایدی ماهنی دان یئری سؤکوله‌‌نه‌دک اوخوناجاق ایدی. ایشین ترسلیگیندن، بای جونز گورولتو سسیندن یوخودان دیسکینب آولویا تولکو گیردیگینی ساناراق یاتاغیندان یئره آتلانیب اوتاغین بوجاغینداکی توفنگ ایله قارانلیغا بئش آلتی قورشون سیخدی. قورشونلار آمبارین دووراینا توخونونجا  ییغینجاق داغیلدی.حئیوانلار یاتاق یئرلرینه چکیلدیلر. قوشلار ایسه اوچوشاراق یووالارنینا قوندولار . بیر گؤز قیرپیمیندا تارلا اویوموشدو.

 

ایکینجی بؤلوم

              اوچ گون سونرا، قوجا مئیجئر گئجه یوخودا آیین- شایین اؤلدو. گؤوده‌سی باخچانین آشاغیسیندا قویلاندی. بایرام آییندان باشلایاراق، اوچ آیادک، تارلادا چوخلو گیزلی ائیلملر گئچیریلدی. قوجا مئیجئرین سؤیله‌‌وی، تارلانین اوسلو حئیوانلاریندا، یاشاما یئپ یئنی بیر گؤروش یاراتمیشدی. اونلار، قوجا مئیجرین اؤن گؤردوگو  دئوریمین هاچان باش وئره‌جگینی بیلمیردیلر. ائله‌جه‌ده، دئوریمه تانیق اولوب اولمایاجاقلارینا الده بیر قانیت یوخویدو آنجاق بونونلابئله، اونلار، او گون اوچون یاراقلانماغی اؤزلرینه بؤیوک بیر گؤره‌و سانیردیلار. حئیوانلارین، اؤرگوتله‌مه، اؤیوتلمه ایشلری، حئیوانلارین ان هوشلو باشلیلاری ساییلان دونقوزلارین اوزه‌رینه دوشمه‌سی چوخ دوغال ایدی. دونقوزلارین ایچینده ایسه، ان اوستونلری، ناپلئون ایله اسنوبال آدلی ایکی گنج  دونقوز ایدی.  بای جونز اونلاری ساتماق اوچون بسله‌ییردی. ناپلئون بئرک شاییر دؤلوندن اولان، ایتی باخیشلی،قارا قاباق کؤک بیر دونقوز ایدی. چوخ دانیشمازدی آنجاق باجاریقلی اولدوغونا گؤره اون قازانمیشدی.اسنوبال، ناپلئونا گؤره چوخ گولش قاباق ایدی. آخیجی دانیشیغی وارایدی چوخراق یارادیجی بیر دونقوز ایدی آنجاق کیملیگی ناپلئونجا درین ساییلمازدی. دونقوزلارین قالانی اتلیک ایدیلر. اونلارین ایچینده ان تانینمیشی، اسکوئیلر آدلی، یومورو اوزلو، ایشلداق گؤزلو، گور سسلی،  قیوراق یئریشلی، گومبول بیر دونقوز ایدی. اؤتگون دانیشغی وارایدی. بوروشوق دارتیشمالاردا، قویروغونو بوللاییب گل-گئت ائده‌رک هامینی قاندیرا بیلردی. بو اوچو قوجا مئیجرین اؤیره‌تیلری‌نین اوزه‌ربنده  ایشله‌یه‌رک  "حئیوانلیق"  آدلاندیردیقلاری یئنی دوشونجه دوزه‌نی‌نین تملینی قویدولار. اونلار گئجه‌لری ، بای جونز یاتاندان سونرا  آمباردا گیزلی ییغینجاقلار دوزنله‌‌ییب حئیوانلیغین ایلکه‌لرینی باشقالارینا آچیقلاییردیلار. باشلانغیجدا حئیوانلار ایلگی‌‌سیزلیکله ییغینجاقلارا قاتیلیردیلار.حئیوانلارین بیر بؤلوگو، بای جونزا باغلی اولما گؤره‌ویندن دانیشیب آدینی ایسه "آغا"سیز چکمیردیلر. هردنده «‌‌بای جونز بیزی یئدیردیر، ایچیردیر او گئدیرسه بیز آج- سوسوزلوقدان اؤله‌‌جه‌‌ییک»  کیمی  ایلکل سؤزلر سؤیله‌‌ییردیلر. کیمیلری: «بیز اؤلندن سونرا نه اؤنمی وار نه اولاجاق؟» یاخود «نئجه اولسا دئوریم باش وئره‌جک اوندا بیزیم چالیشیب چالیشمامامیزین نه یاراری وار؟» دئیه سوروشوردولار.دونقوزلار، چوخ چتینلیکله  بوسؤزلرین حئیوانلیق ایلکه‌لرینه آیقیری اولدوغونو، حئیوانلار قاندیرا بیلیردیلر. سورغولارین ان مایماقجاسینی  آغ قیسراق مولی سوروشوردو. اسنوبالدان سوروشدوغو ایلک سورغو بو ایدی:

-« دئوریمدن سونرا یئنه دادلیجا اولاجاق می؟»

-«یوخ»- اسنوبال سرتجه یانیتلادی-«تارلادا ، دادلیجا اورتمک اوچون  آیقیتیمیز یوخدور، اوسته‌‌‌لیک  دادلیجا یئمگه گره‌ک قالمایاجاق دیله‌دیگینیز جه  آرپا-یونجا یئیه بیله‌جک‌سینیز.»

-«من یئنه‌ده  یئله‌مه شیریق باغلایا بیله‌جگم می؟»دئیه مولی سوروشدو.

-«یولداش!» اسنوبال دئدی. « ماراقلاندیغینیز بو شیریقلار ، کؤله‌‌لیک زینجیری‌دیر . اؤزگورلوگون دگری بو شیریقلاردان داها آرتیق اولدوغو آنلایا بیلیرسینیزمی؟»

مولی، اسنوبالین سؤزلرینی اونایلادی آنجاق قانیق اولمادیغی آیدینجا گؤرونوردو.

              دونقوزلارین، ان بؤیوک  اوغراشمالاریندان بیریده،  ائوجیل قاراقارغا موزئرین یایدیغی یالانلارین قارشیسینی آلماق ایدی. او دئییردی: « آنلادیغیما گؤره حئیوانلار  اؤلندن سونرا، دادلی‌‌‌داغ  آدلی بیرگیزلی اؤلکه‌یه کؤچه‌‌‌جکلر. دادلی‌داغ اؤلکه‌سی  بولودلارین اؤته‌سینده یئرله‌شیب. اورادا یئدیجه‌نین باشاباشی دینجلیش گونودور. ایل بویو اورادا یئییلمگه سوتول یونجالار وار. اورادا،  چیغلارین اوستونده، چئشیدلی دادلیجالار، یاغلیجالار، یالاماجالار... بیتیبدیر».

              موزئرین گوه‌زه‌له‌مکدن باشقا بیر ایشی یوخویدو. بونا گؤره حئیوانلار اونو چوخ سئومزدیلر. آنجاق حئیوانلارین چوخو، دادلی داغ اؤلکه‌‌سی‌نین وارلیغینا اینانیردیلار. دونقوزلار چوخلو دارتیشمالاردان سونرا، بئله بیر یئرین اولمادیغینی حئیوانلارا قاندیرا بیلدیلر.دونقوزلارین ان اینانمیش اؤیرنجیلری؛ ایکی آرابا آتلاری؛ باکسئر ایله کلووئر ایدی. اونلار  قونولارین اوزه‌رینده دوشونمکده چتینلیک چکیردیلر آنجاق دونقوزلاری اؤزلرینه اؤیرتمن سئچه‌‌لی  اونلارین سؤیله‌دیکلرینی گؤیده قاپیب آنلاشیلان بیر دیل ایله باشقا حئیوانلارا آچیقلاییردیلار.گؤرونمه‌‌‌میشدی؛ اونلار  آمبارداکی گیزلی ییغینجاقلاری قاچیرسینلار. بوایکیسی ، ییغینجاقلارین سونوندا اوخونان " اینگیلیس حئیوانلاری" ماهنیسی‌نین  آپاراجیلاری ساییلیردیلار.

              قوجا مئیجئرین اؤن گؤردوگو دئوریم هامی‌نین بکلنتیسیندن تئزراق باش توتدو. بای جونزون کؤتو بیر افندی اولماسینا باخمایاراق چوخ باشاریلی بیر اکینچی ایدی. آنجاق سون ایللرده قارا گونلو اولموشدو. او بیر یارغیلامادا چوخلو پولونو الدن وئره‌رک ایچکی ایچمه‌گه دوشوب  باشی سویوق بیریسی اولموشدو. او گونلرینی  ائوده گونده‌لیک اوخویوب چاخیر ایچمکله گئچیریردی. هردن ده چؤره‌ک قیرینتیلارینی آرپا سویونا باتیریب موزئره یئدیردیردی. بو گئدیشدن اونون ایشچیلری اگریگون اولوب یاخشی ایشله‌میردیلر. تارلانی آلاق اوتو باسمیشدی. یاپیتلار اوناریم ایسته‌ییردی. چیغلار داغیلمیشدی. حئیوانلارا یاخشی باخیلمیردی. قیزاران آیی  یئتیشیب  باش‌یونجالار هله بیچیلمه‌میشدی .

              بیرگون آخشام  بای جونز ویلینگدوندا " آل آسلان "چاخیر ائوینه گئدیب چوخ ایچدیگیندن یارین اؤیله‌یه‌‌دک اورادا قالدی. ایشچیلر سحر ائرکن قالخدیقدا اینکلری ساغیب  حئیوانلارا یئم وئرمه‌دن دووشان اوولاماغا گئتدیلر. بای جونز ائوه قاییدینجا یئمک اوتاغیندا، دونیا اولایلاری گونده‌لیگینی اوزونه چکه‌رک قولتوق  اوسته دوشوب یاتدی. قاش قارالدی آنجاق هله حئیوانلار یئملنمه‌میشدی. حئیوانلار آرتیق آجلیغا دؤزنمه‌‌دیلر. اینکلرین بیری بوینوزو  ایله سامانلیغین قاپیسینی سیندیرنجا حئیوانلار تؤکولوشوب قارینلارینی دویورماغا باشلادیلار . سس- کویدن اویانان بای جونز، آز سونرا دؤرد ایشچیسی ایله بیرگه قامچی اللرینده سامانلیغین آغزیندا دایانمیشدیلار. اونلار ساغینا- سولونا قامچیلاماغا باشلادیلار. بو آجلیقدان بتر حئیوانلاری قیزدیردی. اونلار گؤتور- قوی ائله‌مه‌دن سالدیرغانلارین  اوستونه یومولدولار.جونز ایله ایشچیلری بیردن بیره اؤزلرینی هریاندان وورولان بوینوز-تویناقلارین آراسیندا بولدولار. ایپین اوجو اللریندن چیخدی.اونلار ایندییه‌دک حئیوانلاردان بئله بیر داورانیشلار گؤرمه‌میشدیلر.دؤیولوب-سؤیولمگه آلیشمیش بو یاراتیقلارین گؤزله‌نیلمز باش قالدیریسی  اونلاری  لاپ کیریخدیرمیشدی. چوخ چکمه‌دی ، ووروشمادان ال چکیب  قاچماغا  باشلادیلار.  بیرآز سونرا حئیوانلار  ایله بئش کیشی  آنایولا چاتان جیغیردا  قووالا-قاچدیدایدیلار. بایان‌جونز  یاتاق اوتاغی‌نین آچیشقاسیندان باش وئرنلری گؤرونجه بوخچاسینی دویونله‌یه‌رک باشقا بیر یولدان اکیلدی. آغاج باشینداکی موزئز قاریلدایا-قاریلدایا  قاچانلارین آردیجا اوچوردو. حئیوانلار جونز ایله ایشچیلرینی آنا یولادک  قووالایب تارلانین آلا قاپیسینی باغلادیقدا  نه باش وئردیگینی آنلادیلار. دئوریم باشاریلا بیتمیش؛ جونز قوولموش؛ تارلا اؤزلرینکی اولموشدو. حئیوانلار ایلک اؤنجه قاراچوخالاری‌نین اویاندیغینا اینانمادیلار.  اونلار چاش- باشلیقدان چیخینجا  دؤرد نالا  تارلانین دؤرد بوجاغینا قوشاراق  هئچ بیر اینسان اوغلونون اویان بویاندا گیزلنمه‌‌دیگینه آرخایین اولدولار. سونرا جونز دؤنمی‌نین ایرنج ایزلرینی سیلمک اوچون تارلانین یاپیتلارینا گئری دؤندولر. اؤنجه آت آغیلی‌نین دیبینده اولان یاراق اوتاغی‌نین قاپیسینی سیندیریب آچدیلار؛ گملری، بویوندوروقلاری، بوروندوروقلاری، زینجیرلری، بوروق‌‌ائتمه پیچاقلارینی.... قویویا تؤکدولر. یئلین توربالارینی، گؤزاندیرلری، دیزگینلری، ائله‌‌جه‌ده قامچیلاری آولودا یاندیریلان اودون ایچینه آتدیلار. حئیوانلار قامچیلاری  آلاولارین ایچینده گؤرونجه سئوینجدن  اویناقلاماغا باشلادیلار. اسنوبال  مئیدان گونلری  ساتیلان  آتلارین قویروقلارینا- یئله‌لرینه باغلانان  شیریقلاری اودا آتارکن دئدی :

- « شیریقلار  اینسان اوغلونون بیر ایزی کیمی پالتار ساییلمالیدیر  بوندان بئله بوتون حئیوانلار چیپلاق گزمه‌‌لی‌دیرلر.»

باکسئر بونو ائشیدینجه  یای گونلری گؤزلرینی میلچکلردن قورویان کیچیک کولش بؤرکونو تونقالا تولازلادی. قیسا بیر سوره ایچینده حئیوانلار بای جونزون بوتون ایز- توزلارینی آرادان آپاردیلار. سونوندا ناپلئون  حئیوانلاری سامانلیغا چاغیریب هره‌سینه تاخیلدان  ایکی پای یئیه‌جک،  ایتلره ایسه  ایکی دنه چؤچه وئردی. بونون آردینجا حئیوانلار  اینگیلیس حئیوانلاری ماهنسینی  یئددی کز  باشدان باشا اوخویوب سونرا  باشلارینی یئره قویوب ایندییه‌‌‌دک یاتمادیقلارینی  اویخونو اویودولار.

              ائرته‌سی‌‌گون حئیوانلار هر گونکو کیمی اویاندیقدا بیردن بیره  باش وئرن شانلی اولایلاری‌‌ آنیمسادیلار. چیچکلری چاتلادی. بیرلیکده چاییرا ساری قوشدولار. چاییرین آشاغیسینداکی تپه‌دن تارلانین هر یئری گؤرونه بیلردی. حئیوانلار تپه‌نین زیروه‌سینه دیرماشیب دان ایشیغیندا چئوره‌یه گؤز گزدیردیلر. دوغرو ایدی؛  تارلا  اؤزلرینکی اولموشدو. گؤرونن هر نه وار ایدی اؤزلرینکی ایدی. حئیوانلار آرتیق اؤزلرینده دئییلدیلر. آتیلیب دوشوردولر ، فیرفیر فیرلانیردیلار. شئهلی چیمنلرین اوستونده‌ دیغیرلاناراق آغیز دولوسو دادلی یاز اوتلاریندان یئییردیلر. آیاقلاری ایله قارا یئرین تورپاغینی تپیب گؤزل قوخوسونو اییله‌ییردیلر. حئیوانلار اگله‌نیب دینجلدیکدن سونرا تارلانی یوخلاماق اوچون  بیر گزی یاپدیلار. قونوشمادان اؤیونه‌رک، یونجالیغی، اکینلیگی، مئشه‌لیگی، باغچانی، گؤلمجی گؤزدن گئچیردیلر. بو یئرلری ایلک کز گؤرموش کیمی ایدیلر. اینانماز-اینانماز  اؤز اؤزلرینه: « گؤره‌سن بونلاردا بیزیمکی‌دیرمی؟» دئیه دوشونوردولر.حئیوانلار تارلانین یاپیتلارینا دؤندوکده، تارلا ائوی‌نین آستاناسیندا سس‌سیز- سمیرسیز دایاندیلار.تارلا ائوی‌ده اونلارینکی ایدی آنجاق ایچری گیرمکدن قوخوردولار . آز سونرا یئنه اسنوبال ایله ناپلئون چیگینلری ایله چارپیب قاپینی آچدیلار.حئیوانلار، ائوده‌کیلری بیر بیرلرینه قاریشدیرماماق اوچون دوزنله بیر سیرادا ایچرییه گئچدیلر. اونلار هویوخموشدولار. آیاق اوجوندا  اوتاق- اوتاق گزه‌رک ائوین اینانیلماز سوسونو پیچیلداشاراق گؤزدن گئچیریردیلر؛ تئلک یورغان-دؤشکلی یاتاقلار، یون خالچالار، آت توکوندن دوزلمیش قولتوقلار، گوزگولر، یئمک اوتاغیندا دووار اوجاغی‌نین  اوستونه آسیلمیش ویکتوریا‌ خاتونون  گؤرسَلی، هامی‌نین آغزینی آچیلا  قویموشدو.

              حئیوانلار ائودن چیخدیقدا مولی‌نین ایتیلدیگینی آنلادیلار. گئری دؤندوکده اونو یاتاق اوتاغیندا بولدولار. او بایان جونزون پالتار دولابیندان تاپدیغی گؤی بیر شیریغی چیگنینه تاخاراق  گؤزگو قارشیسنیدا اؤزونو سارساقجاسینا اؤیوردو.  حئیوانلار  اونو قینایا-قینایا دیشاری چیخدیلار.

              پیشیرمه اوتاغینداکی آسیلمیش اتلر قویلانماق اوچون گؤتورولدو. ائوین گیریشیده‌‌کی آرپا سویو کوپو  باکسئرین تپیگی ایله سیندیریلدی. ائوده داها بیر نسنه‌یه  توخونولمادی . حئیوانلار  «تارلا ائوی بیر موزه کیمی قوروناجاق» اؤنرگه‌‌سینی اوی‌بیرلیگی ایله  اونایلاییب  کیمسه‌نین اورادا یاشامایاجاغی اوزه‌‌رینده ایسه آنلاشدیلار.

              حئیوانلار دان یئملرینی بیتیره‌لی،  اسنوبال ایله  ناپلئونون گؤستریشی ایله بیر یئره توپلاندیلار. اسنوبال دئدی:

-« یولداشلار! ایندی ساعات آلتی یاریم دیر.  بیر اوزون گون قارشیمیزدادیر. بو گون یونجالیغی بیچه‌جه‌ییک . آنجاق اوندان قاباق بیر باشقا قونویا گؤره دانیشماق ایسته‌ییرم.»                                   

     دونقوزلار بورادا، گئچن اوچ  آیین ایچینده، اؤزلرینی زورا باساراق، چؤپلوگه باسیلمیش  بای جونزون اوشاقلاری‌نین اسکی یازی- پوزو  بیتیگی‌نین اوزوندن اوخوما- یازما اؤیرندیکلرینی آچییب آغارتدیلار.

              ناپلئون بیرینی چؤتکه بویاق دالیسیجا گؤنده‌ره‌رک تارلانین آلا قاپیسینا ساری یؤنلدی. آز سونرا ال یازماسی یاخشی اولان اسنوبال، چؤتکه‌نی ایکی تویناغی‌نین آراسیندا توتاراق آلا قاپی‌نین باشینداکی "مانور تارلاسی"  یازیسینی قارالاییب یئرینه  "حئیوانلار تارلاسی"  یازدی. بوندان بئله تارلانین آدی بو ایدی. سونرا نردیوان بؤیوک آمبارین دووارینا دایاتدیریلدی. دونقوزلارین آچیقلادیقلارینا گؤره؛ اونلار گئچن اوچ آیدا، آپاردیقلاری آراشدیرمالار سونوجوندا حئیوانلیق ایکه‌لرینی یئددی بویروقدا  اؤزتله‌مگی باشارمیشدیلار. دووارا یازلاجاق بو یئددی بویروق  دگیشیلمز اولوب  بوتون تارلا حئیوانلاری سونسوزادک  اونلارا اویمالی ایدیلار.

              اسنوبال چتینلیکله نردیواندان یوخاری چیخدی. اسکوئیلر نئچه باساماق آشاغیدا  بویاق  قوتوسونو توتموشدو. بویروقلار، اوزاقدان اوخونا بیله‌جک یئکه‌لیکده  آغ بویاقلا، قارالانمیش دووراین اوزه‌رینده یازیلدی.

یئددی بویروق:                                                     

1.       ایکی آیاق اوستونده  یئرینلر دوشمن‌دیرلر.

2.       دؤرد آیاق اوستونده یئرینلر ایله قانادلیلار یولداس‌دیرلار.

3.       کیمسه پالتار گئیمه‌مه‌لی‌دیر.

4.       کیمسه یاتاقدا یاتمامالی‌دیر.

5.       کیمسه ایچکی ایچمه‌مه‌لی‌دیر.

6.       کیمسه باشقاسینی اؤلدورمه‌مه‌لی‌دیر.

7.       بوتون حئیوانلار ائشیددیرلر.

           بویروقلار چوخ گؤزل یازیلمیشدی. یازیلیشدا  یولداشی، یولداس یازماقدان باشقا یانلیشلیق گؤزه دَیمیردی. اسنوبال  باشقالاری‌نین یارارلانماسی اوچون بویروقلاری اوجا سسله اوخودو. بوتون حئیوانلار، بویروقلاری باشلاری ایله  اونایلادیلار. ان اوسلو حئیوانلار  بویروقلاری یادداشلارینا تاپشیرماغا باشلادیلار. اسنوبال چؤتکه بویاغی یئره آتاراق دئدی: 

-«ایندی یولداشلار قوشون یونجالیغا ساری. قویون یونجا بیچمکده جونز ایله ایشچیلریندن داها اردملی اولدوغوموزو هامییا گؤسترک.»

              بوآرادا، بایاقدان قیوریلیب آچیلان اوچ اینک اوجا سسله موولاماغا باشلادیلار. گئچن ییرمی دؤرد ساعاتدا ساغیلمایان اینکلرین یئلینلری پاتلاماقدا ایدی. دونقوزلار بیر آز دوشوندوکدن سونرا، دولچا ایسته‌ییب بو ایشه چوخ اویغون اولان تویناقلاری ایله اینکلری ساغماغا باشلادیلار. حئیوانلارین ماراقلی باخیشلاری قارشیسیندا، چوخ چکمه‌دی بئش دولچا خامالی سودله دولدو.

-« بیر بئله سودله  نئیله‌ملی‌ییک؟»دئیه بیریسی سوروشدو.

-«جونز آرا سیرا  بیر آزینی بیزیم بولقوروموزا قاتاردی.» تویوقلارین بیر دئدی.

-« سود- مودو بوراخین!» ناپلئون دولچالارین قاباغینا گئچه‌رک باغیردی. «اونوندا  سیراسی گله‌جک آنجاق ایندی ان اؤنملی ایش یونجالیغی بیچمک‌دیر. یولداش اسنوبال سیزی یؤنلته‌‌‌جک . من آز سونرا سیزه قوشولاجاغام. هایدی یولداشلار ایره‌لی ! یونجالیق سیزی گؤزله‌ییر!»

              حئیوانلار یونجالیغا ساری آخیشیب بیچمَگه باشلادیلار. اونلار آخشام باشی ایشدن قاییداندا سودلردن بیر ایز-توز گؤرمه‌دیلر.                                                                               

اوچونجو بؤلوم

        یونجالیغی بیچمه‌ده نه ترلر تؤکولدو، نه امکلر چکیلدی، بیر یاندا قالسین!  آنجاق ایشین سونوجو حئیوانلارین اومدوقلاریندان داها باشاریلی اولدو.

              تارلاداکی ایش آیقیتلاری‌نین  اینسانلارا قایریلدیغی اوچون  آرخا آیاقلاری اوستونده یئرییه بیلمه‌ین حئیوانلار، اونلاری قوللانماقدا چتینلیک چکیردیلر آنجاق دونقوزلار اوسلاری ایله بو کیمی انگللری قولایلیقلا اوتادان قالدیرا بیلیردیلر. گئرچکدن ده دونقوزلار هوشلو-باشلی اولدوقلارینا گؤره اؤندر ساییلمالی‌ایدیلار. اونلارین تارلادا  یؤنتیم ایله گؤزه‌تیمدن باشقا ایشلری یوخ ایدی.

              آتلارا گلینجه، تارلانین قاریش قاریشینی تانییان کلووئر ایله باکسئر، دئمک اولار  جونزون ایشچیلریندن یاخشیراق اکین-بیچین  ایشینی باجاریردیلار. اونلار گمسیز، دیزگینسیز تارلانی باشدان باشا دؤیکله‌یه‌رک، بیچیب ییغیشدیردیلار . بیر دونقوز ایسه آرخالاریجا دوشوب یئری گلنده  «هوش یولداش!»، «گئری دؤن یولداش!» دئییردی. حئیوانلارین هامیسی یونجانین ییغیب-یغیشدیرماسینا قاتیلمیشدیلار. بؤیوکلو-کیچیکلی ایشین بیر  اوجوندان توتوردو. تویوقلار ایله اؤردکلر، گون بویو گونشین آلتیندا  دیمدیکلری ایله اوفاجیق چؤر-چؤپلری ییغاراق گل-گئتده ایدیلر. سونوندا، حئیوانلار ایکی گون تئزراق بیچین ایشینی قورتاردیلار. بو ایندییه‌دک تارلادا گؤرونن ان بؤیوک بیچینچیلیک ایدی .اوروندن  بیرجه یارپاق ساپی بئله اولسون اؤردکلر ایله تویوقلارین ایتی گؤزلریندن یایینیب یئرده قالمامیشدی. اوسته‌لیک اوروندن بیر آغیزلیق بئله قیرپی- چیرپی اولمامیشدی.

              یایدا ایش ساعات کیمی ایره‌‌‌لی‌‌له‌‌ییردی. ائردیکلری بو موتلولوغون اولاسیلیغینی بئله بئیینلریندن گئچیرمه‌‌ین حئیوانلار، ایندی یئدیکلری یئم آغیزلاریندا باشقا بیر داد وئریردی. گئرچکدن ده بو چکدیکلری امگین یئم ایدی نه دارگؤز آغالاری‌نین قاباقلارینا آتدیغی یئمجیک. آلچاق، سولوک اینسانین گئدیشی ایله گونلوک یئیه‌‌جک بوللاشیب دینجه‌لیش سوره‌سی ایسه آرتمیشدی.

              حئیوانلارین  باشاراتسیزلیغی اونلاری چئشیدلی چتینلیکلر ایله قارشی قارشییا قویوردو. اؤرنگین اونلار تاخیل بیچینیینده کولش دؤین آیقیتی‌نین اولمادیغینا گؤره اسکیکیلر کیمی، پوفله‌یه‌رک دنی ساماندان آریتلاییردیلار. بونلار‌لا بئله، دونقوزلارین اوسو، باکسئرین گوجو  بوتون ایشلری یولونا سالیردی. حئیوانلارین هامیسی  باکسئری آلقیشلاییردیلار. باکسئر جونز چاغیندا دا چالیشقان بیریسی ایدی آنجاق ایندی او اوچ آتجا ایشله‌‌ییردی.هردن ائله گؤرونوردو سانکی تارلانین بوتون ایشلری  باکسئری چیگینلرینه یوکله‌نیب. قاش آغاراندان قارالانادک او چکیب ایته‌له‌مکده ایدی. چتین ایشلرین دویونو یالنیز اونون تویناغی ایله آچیلیردی.  او کؤنوللو اولاراق گونجل ایش باشلامادان  گره‌کن یئرلره ایشله‌مک اوچون  خوروزلارین بیری ایله، گونده یاریم ساعات باشقالاریندان تئز اویادیلماسی اوزه‌رینده آنلاشمیشدی. اونون چیخیلماز دوروملاردا، سؤیله‌دیگی بیر اؤز دئییمی وار ایدی: «من برک چالیشاجاغام».

              تارلادا  هر حئیوان اؤز چیخاریجا ایشله‌ییردی. اؤرنگین :  تویوقلار ایله  اؤردکلر  تاخیل بیچینینده یئره سپه‌لنمیش  دنلردن بئش چووال توپلایا بیلمیشدیلر.                                             

              تارلادا آرتیق کیمسه  اوغورلوق ائله‌میردی، کیمسه یئم پایینا گؤره دئیینمیردی. گئچمیش دؤنمده یایغین اولان دؤیوشمه، سؤیوشمه، تپیشمه، قاپیشما، قیسقاناما کیمی پیس داورانیشلارین ایزی بیر یوللوق اولاراق یاشاملاریندان سیلینمیشدی.

              ایش آلتیندان قاچانلارین سایی لاپ آزالمیشدی.دئییلمه‌لی‌دیر؛ مولی سحرلری گئج قالخیب ایش باشیندا ایسه آیاغینا داش باتدیغینی سؤیله‌یه‌رک تئز چالیشمادان ال چکیردی. پیشیگین داورانیش ایسه بام-باشقا ایدی، او ایش آدی گلنده آرادان یوخ اولوب، ایش بیتنده  یا یئمک یئینده، بیر اولای اولمامیش کیمی تاپیلیب گلیردی. سوروشدورولاندا ایسه، سئویملی-سئویملی میریلداماسی ایله  هامینی ایناندیراجاق یالانلار سؤیله‌ییردی. دئوریمدن سونرا قوجا ائششک بئنجامینین، دگیشمه‌‌دیگی آیدینجا گؤرونوردو. او جونز چاغینداکی کیمی ایشله‌ییردی؛  نه آز، نه چوخ. باخیشی دئوریمین سونوجلارینا گؤره بللی دئییلدی. سوروشاندا: «جونز چاغی موتلومویدون یوخسا ایندی؟» یالنیز  دئییردی: « ائششکلر چوخ اوزون یاشار سیز ایندییه‌دک اؤلو بیر ائششک گؤرموشسونوزمو؟». سوروشانلار بو آنلاشیلماز یانیتلارلا اؤتوشمه‌لی ایدیلر.

              سود گونو، دینجلیش گونو ایدی. دان یئمی گونده‌کیندن بیر ساعات گئج وئریلیردی. یئمکدن سونرا، هر یئددیجه‌ده آخسامادان گئچیریلن تؤرن باشلاییردی. اؤنجه بایراق دالغالاندیریلیردی. بایراق دئدیگین؛ اسنوبالین، بایان جونزون اوتاغیندان تاپدیغی، اوزه‌رینده آغ بویاقلا بوینوز- تویناق  چکدیگی اسکی بیر یاشیل اؤرتوک ایدی. اسنوبالین دئدیگینه گؤره یاشیل، اینگیلیس تارلالاری‌نین سیمگه‌سی، آغ بوینوز- تویناق ایسه یئر اوزوندن ایکی آیاقلیلارین کؤکو کسیلیرکن قورولاجاق حئیوانلار جومهوروسونون گؤسترگه‌سی ایدی. بایراغین قالدیریشی‌نین آردینجا، حئیوانلار گئنل ییغینجاق اوچون  بؤیوک آمباردا توپلاشیردیلار. بورادا گلن یئددیجه‌ده گؤروله‌جک ایشلر بلله‌نیب ایره‌لی سورولن اؤنرگه‌لر اوزه‌رینده دارتیشیلیردی. اؤنرگه وئرنلر یالنیز دونقوزلار ایدی. باشقا حئیوانلار ایسه بیرجه نئجه اوی وئرمگی اؤیرنمیشدیلر. دارتیشمالارین ان آشقین-داشقین اویه‌لری اسنوبال ایله ناپلئون ایدیلار. آنجاق اونلارین آنلاشمادیقلاری هامییا بللی اولموشدو. بیری‌نین وئردیگی اؤنرگه‌یه باشقاسی قارشی چیخیردی. باغچانین آرخاسینداکی کیچیک چیمنلیکده امکلی اولانلارا ائو تیکدیرمک کیمی، یاخشی اؤنرگه‌لره قارشی چیخیلماسادا، امکلی‌لیک یاشی‌نین اوستونده  بوش دارتیشمالار گئدیردی. ییغینجاقلار اینگلیس حئیوانلاری ماهنیسی‌نین اوخونماسی ایله بیتیردی. اؤیله‌دن سونرا  اگلنمه-دینلنمه اوچون بوراخیلمیشدیر.

              دونقوزلار یاراق اوتاغینی اؤزلرینه  باشچیلیق اؤبگی سئچدیلر. اونلار آخشاملار بورادا، جونزون ائویندن گتیردیکلری بیتیکلر اوزوندن دمیرچیلیک ،آغاجچیلیق کیمی گره‌کلی اولان  ال ایشلرینی اؤیره‌نیردیلر. اسنوبال بونلارلا  یاناشی، یورولمادان حئیوانلاری دوزنله‌دیگی چئشیدلی درنکلر ایچینده اؤرگوتله‌مگه  چالیشیردی. او تویوقلارا،" یومورتا اوره‌تنلر درنگی" اینکلره "بیچیملی قویروقلولار بیرلیگی" سیچانلار ایله دووشان کیمی یابانجیل حئیوانلاری ائوجیللشدیرمک اوچون، " یئنیدن اؤیوتمه درنگی" قویونلارا، " آغ یونلولر سوروسو "، آیری  حئیوانلار  ایسه دگیشیک درنکلر اولوشدورماقدا ایدی. او حئیوانلارا یازیب اوخوماق  اؤیرتمک اوچون بیر اوخول آچدی. دوزنله‌نن درنکلرین چوخو باشاریسیزلیغا اوغرادی. اؤرنگین: یابانجیل حئیوانلاری ائوجیللشدیرمه چاباسی هامیدان تئزراق پاتلاق وئردی. یابانجیل حئیوانلارا یوموشاق داوراناندا سیرتیلیر سرت داوراناندا ایسه گئچمیشده کی داورانیشلارینی سوردوردولر.

              پیشیک، " یئنیدن  اؤیوتمه"  درنگینه قاتیلیب اوچ دؤرد گون دایانمادان چالیشدی. گونلرین بیرینده اونون دامدا اوتوروب سئرچه‌لره: « ایندی هامیمیز یولداشیق، ایسته‌سه‌نیز منیم جیرناغیمین اوستونه قونا بیلرسینیز» دئدیگی قوشلارین ایسه اوچوشوب  اوزاقلاشدیغی  گؤروندو.

              اوخو- یازما اؤیره‌تیمی باشاریلی ایدی. دئمک اولار حئیوانلار  هامیسی آز-چوخ  یازی-پوزونو اؤیره‌نه بیلمیشدیلر. دونقوزلارین یازیب اوخوماغی هامیدان یاخشی ایدی. ایتلرین اوخوماغی یاخشی ایدی آنجاق یئددی بویروقدان باشقا بیر یازینی اوخوماغا  ایلگی گؤسترمیردیلر. اوغلاق موریئل ایتلردن یاخشیراق اوخویا بیلیردی. او آخشام چاغلاری، کوللوکدن تاپدیغی  گونده‌لیک جیریقلارینی باشقا حئیوانلارا اوخویاردی. بئنجامین، دونقوزلار کیمی گؤزل اوخوردو آنجاق یئته‌نه‌گینی کیمسه‌یه گؤسترمیردی. اونون سانیسینا گؤره، اوخوماغادگر بیر یازی یوخویدو.  کلووئر الیفبانین هامیسینی اؤیره‌نه بیلمیشدی آنجاق حرفلری بیرلشدیره‌رک سؤزجوک دوزلده بیلمیردی. باکسئر  "د"  حرفیندن ایره‌لی‌یه گئده بیلمه‌دی. او یئکه آیاغی ایله  توز-تورپاغین اوستونده " آ " ، "‌ب " ، " ج " ، " د "  حرفلرینی چیزدیکدن سونرا دوروب ماتدیم- ماتدیم  گؤز تیکیردی اونلارا، قولاقلارینی ساللاییردی، یئله‌سینی سیلکه‌له‌ییردی، قیوریلیب آچیلیردی . نئیله‌ییردی حرفلرین قالانینی آنمیسامیردی. بیر ایکی  کره، " د " ، " و " ، " ز "  ، " گ " حرفلرینی اؤیره‌ندیگینده آنلادی"آ" ، "‌ب" ، "ج"، "د"   حرفلرینی اونودوب.  سونوندا،  او اؤیرندیگی  ایلک دؤرد حرفه یئتیندی. او حرفلری یادیرغاماماق اوچون گونده نئچه یول اونلاری یازاردی. مولی اؤز آدیی‌نین  حرفلریندن باشقاسینی اؤیرنمک ایسته‌میردی. او چالی-چیرپی ایله دوزلتدیگی آدینی، گول-چیچکله بزه‌یه‌رک  اؤیونوب سئوینیردی. حئیوانلارین قالانی "‌آ‌" حرفینده قالدیلار. آچیقجاسی  قویونلار، تویوقلار، اؤردکلر کیمی  بوش‌بئیین حئیوانلار، یئددی بویروغو بئله یادداشدان اوخویا بیلمیردیلر. اسنوبال بو سورونون اوستونده چوخلو دوشوندوکدن سونرا بیلدیردی:

-« یئددی بویروغو قیساجیق بیر دئییمده اؤزتله‌مک اولار: "دؤرد  آیاق یاخشی، ایکی آیاق یامان"  بو حئیوانلیق ایلکه‌لری‌نین اؤز سؤزودور. بوسؤزو سیم-سیخی توتانلار اینسانلیق آغالیغیندان قوروناجاقلار».

ایکی آیاقلیلارا بنزه‌ین قوشلار بوسؤزلره تپکی گؤسترمک ایسته‌دیکده  اسنوبال اوزونو اونلارا توتاراق ائکله‌دی:

-« یولداشلار قوشلارین قانادی بیر ایره‌لی‌له‌مه اؤرگه‌نی‌دیر نه ایشله‌مه.  بونا گؤره  قانادلار آیاق ساییلمالی‌دیر. اینسانی حئیواندان آییران ال‌دیر . او الی‌نین آراجیلیغی ایله کؤتو ایشلره قالخیشیر».

قوشلار اسنوبالین  نه دئدیگینی آنلامادیلار آنجاق اونون آچیقلاماسینی اونایلادیلار.حئیوانلار آلچاق کؤنوللوکله یئنی دئییمی  اؤیرنمگه باشلادیلار. "دؤرد آیاق یاخشی، ایکی آیاق یامان" دئییمی  بؤیوک آمبارین دوواری‌نین اوستونده، یئددی بویروغون  باشیندا، گؤزه چارپان بیر بیچیمده یازیلدی. قویونلار بو دئییمی چوخ سئودیلریندن ، آرخاجدا کورَنش ووروب دینجه‌لنده اوزون سوره هامیسی  بیرلیکده ، یورولمادان: « دؤرد آیاق یاخشی، ایکی آیاق یاما ما ما......مان »دئیه‌رک مله‌ییردیلر.

              ناپلئون اسنوبالین قوردوغو درنکلره، قوروملارا ایلگی گؤسترمیردی. او دئیینه‌رک: «گنجلری اؤیوتمک، یاشلیلارا گؤروله‌جک ایشلردن داها اؤنملی‌دیر.» دئییردی. یونجا بیچیمیندن سونرا، جئسی ایله بولوبئل انیکله‌یه‌رک  بیرلیکده دوققوز ساغلام قوچوق تارلا حئیوانلارینا آرتیردیلار. قوچوقلار سوددن آچیلینجا ناپلئون اونلاری قانجیقلاردان آییراراق  اؤیوتمه- بؤیوتمه‌لرینی اوزه‌رینه آلدی. او قوچوقلاری چاتی‌نین آلتینداکی گؤیرچینلیگه یئرلشدیردی. اورایا تکجه نردیوانلا  یاراق اوتاغیندان چیخیلا بیلردی. قوچوقلار گؤزلردن ایراقلاشینجا حئیوانلار چوخ تئز اونلاری یادیرغادیلار.

              سودلرین هارایا گئدیگی گیزی سونوندا بللندی. اونلار دونقوزلارین نوغالالارینا قاتیلیرمیش. یای آلمالاری یئتیشیب آغاجلارین آلتینا تؤکلمکده ایدی. حئیوانلار آلمالارین ائشید اولاراق آرالاریندا پای-بؤلوش اولاجاقلارینی سانیردیلار. بیر گون آغاج آلتی آلمالارین ییغیشدیریلیب دونقوزلارین یئمه‌سی اوچون، یاراق اوتاغینا داشینماسینا بویروق گلدی. حئیوانلار بونو دویجاق دئیینمگه باشلادیلار آنجاق بیر ایشه یارامادی. بوتون دونقوز لار اؤزللیکله  اسنوبال ایله ناپلئون  بو قونو اوزه‌رینده آنلاشمیشدیلار. گؤندریلن اسکوئیلر، حئیوانلارا گره‌کن آچیقلامالاری یاپدی.

-« یولداشلار!»- او کوکره‌دی. «اومارام، دوشنمه‌یه‌سینیز بیز دونقوزلر بو ایشلری، اؤز منجیللیگیمیزی، اوستونلوگوموزو گؤسترمک اوچون گؤروروک. یوخ! دوغروسونو ایسته‌سه‌نیز، بیزیم چوخوموز آلمانی، سودو سئومه‌ریک. بونلارین آدین ائشیدنده منیم اؤزومون اوره‌گیم بولانار. آنجاق  بیزیم آماجیمیز بونلاری یئمکدن ساغلیغیمیزی قوروماقدیر. یولداشلار! بیلمجیلرین  آراشدیردیقلارینا گؤره  آلما ایله سودون  ایچبنده‌کی تؤز، کسینلیکله  دونقوزلارین ساغلیغینا گره‌کلی‌دیر. بیلدیگینیز کیمی، بیز دونقوزلار بئیین ایشچیسی‌ییک. بوتون تارلانین یؤنتیمی  ایله دئنه‌تیمی بیزه باغلیدیر. بیز گئجه‌لی-گوندوزلو سیزین یاخشی گئچینمه‌نیز اوچون چالیشریق، بیلیرسینیزمی بیز گؤره‌ویمیزده آخساساق نه اولاجاق؟ جونز قاییداجاق. ائله دیر یولداشلار  قوشقوسوز  جونز قاییداجاق».

قویروغونو  بوللایا-بوللایا  گل-گئت ائدن اسکوئیلر دولوقساناراق ائکله‌دی:

-« قوشقوسوز ایچینیزده  جونزون قاییتماسینی ایسته‌ین بیر کیمسه یوخدور!»

      حئیوانلار ایندی تکجه بیر شئیه آرخایین‌ایدیلار اودا جونزون قاییتماماسی ایدی.  سورون چؤزولونجه آغیزلار باغلاندی. دارتیشمادان، سودلرایله آغاج آلتی آلمالارین ائله‌جه‌ده آغاجلارین اوستونده کی یئتیشمیش  آلمالارین دونقوزلار وئریلمه‌سی اوزه‌رینده آنلاشیلدی.                                                                 

دؤردونجو بؤلوم

              یایین سون گونلری ائردیکده، بؤلگه‌نین یاریسی تارلانین اولایلارینی دویموشدو. اسنوبال ایله ناپلئون  دئوریمی یایغینلاشدیریب‌ " اینگلیس حئیوانلاری " ماهنیسینی هامییا اؤیرتمک اوچون گونده  نئچه قاتار اؤیوتولموش گؤیرچین، قونشو تارلالارداکی حئیوانلارین آراسینا گؤندریردیلر.

              بای جونز گونلرینی، ویلینگدونداکی  آل آسلان چاخیر ائوینده گئچیریر، آیاقداشلارینا  بیله‌سینه اولدوغو بؤیوک آجیماسیزلیقدان، وار یوخونون تالانماسیندان، آشاغیلیق بیر بیچیمده قوولماسیندان سیزلایاراق دانیشیردی. باشقا اکینچیلر اوزده اونونلا قایغیداشلیق ائتسه‌لرده دالدا اونون اوغورسوزلوغوندان نئجه یارارلاناجاقلارینی دوشونوردولر.حئیوانلارین اوغوروندان  قونشولوقلارینداکی  فوکسوود  ایله پینچفیلد تارلالاری‌نین  آغالاری  اوزون سوره ایدی بیربیرلری ایله دوشونوشموشدولر. فوکسوود، قوجامان آغاجلارلا بورونموش، چیغلاری سؤکولموش، اوتلاقلاری باخیمسیزلیقدان قوروموش، اوجسوز  بوجاقسیز، اسکی بیچیملی بیر تارلا ایدی.  اونون یییه‌سی؛ بای پیلینگتون، یازینی قیشینی  اوو  اوولاییب بالیق توتماقلا گئچیرن چالیشماز بیر اکینچی ایدی. پینچفیلد آدلان باشقا تارلا؛ یاخشی باخیلمیش ییغجام بیر اکینلیک ایدی. اونون یییه‌سی  بای فیریدریک؛ چوخ سرت، آییق ساییق، بیر آیاغی یارغیلاردا، بازار قیزیشدیران بیر کیشی ایدی. بونلارین بیر بیرلریندن چوخ آجیقلی اولدوقلارینا گؤره  اؤز اورتاق چیخارلارینی  قوروماق اوچون  بیر آنلاشمایا وارمالاری بئله بیله‌لرینه زور گلیردی. بونونلا بئله،حئیوانلار تارلاسی‌نین دئوریمی ایکیسینیده دریندن قورخوتموشدو. اونلار اؤز حئیوانلاری‌نین  آییلماسی‌نین  قاباغینی  آلماغا چالیشیردیلار. اونلار  اؤنجه‌لری، « حئیواندان تارلاچی می اولار؟» دئیه گولوب حئیوانلار تارلاسی‌نین بئش اون گون ایچینده داغیلیب آرادان گئده‌جگینی سؤیله‌ییردیلر. اونلارین  دئدیکلرینه گؤره مانور تارلاسی‌نین حئیوانلاری (اونلار قیسقانجیلیقدان دیللری توتموردو حئیوانلار تارلاسی دئسینلر) بیربیرلری‌نین جانینا دوشوب یاخین گله‌جکده آجلیقدان قیریلاجاق‌ایدیلار. وئریلن سوره‌لر گئرچکلشمه‌یینجه، فیریدریک ایله پیلینگتون تاویرلارینی دگیشه‌رک  حئیوانلار تارلاسیندا یایغینلاشان ایرنج کؤتولوکلردن  دانیشماغا باشلادیلار. اونلار، حئیوانلارین دوغا یاسالاریندان ساپاراق  سویداشلاری‌نین اتلرینی یئمه‌لریندن، بیر بیرلرینی قیزاریلمیش آت نالی ایله اینجیک وئرمه‌لریندن، ائشلری‌نین اورتاق اولماسیندان دانیشیردیلار. بونونلا بئله بو اویدومالار چوخدا اینانیلاسی دئییلدیر.

              ایکی آیاقلیلاری قووولموش، دؤرد آیاقلیلار اگه‌من اولموش، شاشیرتیجی تارلانین سؤیلنتیسی قول-قاناد وئریله‌رک یاییلماقدا ایدی. او ایل آیاقلانما دالغالاری بوتون بؤلگه‌نی آلتینا آلدی. اویسال بوغالار  بیردن بیره ‌ییرتیجی اولدو؛ قویونلار چیغلاری ییخاراق  یونجالیقلاری یئره سورتدو؛ اینکلر تپیکله‌یه‌رک سود بایدالارینی یئره جالادی؛ جیدیر آتلاری، سوروجولرینی انگللردن آتلاتماییب یئره ووردولار. هله اوسته‌لیک اینگلیس حئیوانلاری ماهنیسی هریاندا اینانیلماز بیر بیچیمده یاییلماقدا ایدی. اینسانلار، بو ماهنینی ائشیدنده، ایچریده اود توتوب یانسالاردا اوزده اونو تارتان- پارتان سایاراق اله سالیب گولوردولر . ماهنی اوخویانلارین دورمادان قامچیلاناماسی بئله،  اونون یایغیلاشماسی‌نین قارشیسینی آلانمیردی. چیغ اوستونده قوناق قارانقوشلار، آغاج باشینداکی گؤیرچینلر سس سسه وئره‌رک ماهنینی اوخویوردولار.آرتیق دمیرچی دوکانی‌نین دمیرلری، کندین کیلیسه‌سی‌نین زنگلری ، ماهنی‌نین هاواسی ایله دؤیولوب زانقیلداییردی. اینسان اوغوللاری ، ماهنینی ائشیدجک  اسمگه دوشوب آلینلاری‌نین قارا یازیسی گؤزلری‌نین اؤنونده  جانلانیردی.

              خزل آی‌نین ایلک گونلرینده ؛ حئیوانلار  بیچیلیب تایالانمیش تاخیللاری  دؤینده، ایکی قاتار گؤیرچین ، یابانجیل بیر جوشقو ایچینده پیریلداشاراق  آولونون اورتاسینا قوندولار.

              جونز ایله ایشچیلری، بیرده بئش آلتی کیشی  فوکسوود ایله پینچفیلد تارلاسیندان، آلاقاپیدان گئچه‌رک جیغیر یولو ایله آولویا گیرمکده ایدیلر. ایره‌لی‌ده گلن الی توفنگلی جونزدان باشقا هامیسی اللرینده چوماق داشیییردیلار. اونلارین تارلانی گئری آلماغا گلدیکلری بللی ایدی . باسقینین گؤزلندیگی اوچون گره‌کن اؤنلملر چوخداندان آلینمیشدی. اسنوبال تارلا ائویندن تاپدیغی  ژولیوس سئزار  بیتیگی‌نین اوزوندن  ساوونما چیزگه‌سینی چکمیشدی. اسنوبالین فیتی ایله بوتون حئیوانلار بیر گؤز قیرپیمیندا اؤز گؤره‌و  یئرلرینه یئرلشدیلر.آداملار، تارلا ائوی‌نین قارشیسینا چاتارکن اسنوبال  سالدیری‌نین بیرینجی  آشاماسینی  باشلاتدی. اوتوز بئش گؤیرچین؛ هامیسی بیرلیکده آداملارین باشی‌نین اوزه‌رینده  اوچوشاراق  زیلله‌مگه باشلادیلار. آداملار گؤیرچینلرله اوغراشالی چیغ آرخاسیندا گیزلنمیش قازلار اوستلرینه یومولاراق بالدیرلارینی دیمدیکدن گئچیردیلر. بو آداملارین آلایین پوزماق اوچون جایدیریجی بیر چاتیشماایدی. آداملار چوخ تئز چوماقلاری ایله قازلاری قووا بیلدیلر. اسنوبال بورادا سالدیری‌نین ایکینجی آشاماسینا گئچدی. بئنجامین، موریئل بیرده بوتون قویونلار، ‌اسنوبالین اؤندرلیگی ایله دؤرد یؤندن آداملارین اوستونه آخیشاراق ووروشماغا باشلادیلار. بئنجامین آرخاسینی آداملارا چئویره‌رک سونجوق آتیردی. آداملارین چوماقلاری ایله  ناللانمیش چکمه‌لری دؤیوشو حئیوانلارا آغیرلاشدیرینجا اسنوبال چیغلیغی ایله گئری چکیلمه بویروغونو وئردی. حئیوانلار دؤنوب آولویا ساری گئری  چکیلدیلر. آداملار  حئیوانلارین قاچدیغینی ساناراق، سئوینجدن های باسیب دوزنسیزجه قاچانلارین آردینا دوشدولر. اسنوبالین گؤزله‌دیگی یالنیز بو ایدی. آز سونرا آداملار  آولونون اورتاسیندا ایدیلار. اینکلیکده پوسقودا یاتان اوچ اینک، اوچ آت بیرده دونقوزلارین قالانی بیردن بیره اورتایا آتیلاراق آداملارین قاچما یولونو کسدیلر . اسنوبال ایره‌لی بویورغونو وئره‌رک  اؤزو دوز جونزون  اوستونه  یومولدو.  جونز اونون سالدیردیغین گؤرونجه توفنگین تتیگینی سیخدی. توفنگین آچیلیشی ایله قورشونون اسنوبالین کوره‌گینی سییریب بیر قویونا دَیه‌رک اؤلدورمه‌سی بیر اولدو. اسنوبال بونا باخمایاراق دوراقسانمادان اللی باتمانلیق گؤوده‌‌سینی جونزون آیاقلاری‌نین اوستونه آتدی. جونز کؤمه‌‌لنمیش پئئهینلرین اوستونه ییخیلینجا توفنگ فیرلانیب الیندن چیخدی. توققوشمانین ان قورخونج گؤرونتوسونو باکسئر یاراتدی. او قیزمیش آیغیر کیمی آرخا آیاقلاری  اوستونده قالخاراق ناللانمیش تویناقلاری ایله  باسقینچیلاری ووروب یئره سریردی. اونون ایلک تپیگی فاکسفودلو بیر  ایشچینی اؤلولر کیمی چامورون ایچینه اوزاتدی. آداملار بونو گؤرجک  چوماقلارینی یئره آتاراق قاچماغا اوز قویدولار. اونلار آولودا  فیرفیر فیرلانیردیلار. جانلارینا قورخو دوشموشدو. اونلار بوینوزلانیر، تپیکله‌نیر، قاپیلیردیلار. بوتون حئیوانلار باجاردیقجا اسکی آجیقلارینی اونلاردان آچیردیلار. پیشیگین پیشگی بئله بیردن بیره دامدان  ناخیرچیلارین بیری‌نین چیگنینه آتیلاراق جیرناغینی  اونون بوینونا سوخوب  قورخولو باغیرتیسینی گؤیه قالدیردی.

              قاچیش یولو آچیلینجا آداملار سئوینه‌رک آولودان  آنا یولا دوغرو قاچدیلار. باسقینچیلار گلدیلری یولدان قاچماقدایکن، بیر سورو  قاز  دیمدیکله‌یه‌رک اونلاری یولا سالماقدا ایدی.

              آداملارین بیریندن باشقا هامیسی قاچمیشدی.  باکسئر اوزو قویولو، چامورلارین ایچینه اوزانمیش اوغلانی آیاغی ایله آرخاسی اوسته چئویرمگه چالیشیردی. اوغلان ترپنمیردی.

-« او اؤلوب! »-  باکسئر اوزونتو ایله دئدی-« من بونو یاپماق ایسته‌میردیم دمیر نال ووردوغومو اونوتموشدوم. اینانیرسینیزمی ؟ من بونو بیله‌رک اؤلدورمه‌دیم.»

-«یولداش چوخ دویغوساللانما!» یاراسیندان قان سیزان اسنوبال کوکره‌دی-«ساواش، ساواشدیر.  ان یاخشی اینسان اؤلموش اینساندیر.»

-«من کیمسه‌نین جانینا قیماق ایسته‌میرم ایستر  او اینسان اولسون.»باکسئر دولوخساناراق ائکله‌دی.

-« مولی هاردادیر؟ » بیریسی قیشقیردی.

دوغرودور؛ مولی ایتمیشدی. اولاغان‌اوستو دوروم بیلدیریلدی. چوخ قورخولویدو. مولی قاچیریلمیش، یوخسا اؤلدورولموش‌موایدی؟ کیمسه بیلمیردی. چوخلو آرامالاردان سونرا او آغیلیندا باشینی آخیرداکی یونجالارین آلتینا سوخموشکن  بولوندو. قورشون آچیلینجا او قورخودان قاچیب گیزلنمیشدی. حئیوانلار مولی‌نین آختارماسیندان قاییداندا  اؤلموش اوغلاندان بیر ایز-توز گؤرمه‌دیلر . دوغروسو، اوغلان باییلمیش‌ایمیش، آییلینجا ایسه دوروب قاچمیشدی. حئیوانلار یئنیدن توپلاشدیلار. هر کیم جوشقو ایله ساواشداکی ایگیدلیکلریندن دانیشیردی. سوروندورمه‌دن ، اوتقو شؤلنی قورولدو. بایراق دالغالاندیریلیب اینگیلیس حئیوانلاری ماهنیسی نئچه کره اوخوندوقدان سونرا اؤلدورولموش قویونون  باسدیرما تؤره‌‌نی گئچیریلدی. قویلاغین باشیندا  بیر آغ تیکان دالی اکیلدی. اسنوبال قویلاغین قیراغیندا قیسا بیر دئمجده: « گره‌کیرسه بوتون حئیوانلار تارلا اوغروندا جانلاریندان گئچه‌جکلر» دئیه قونوشدو.

     حئیوانلار اوی‌بیرلیگی ایله  قهرمان حئیوانلارا وئریله‌‌جک قیوانج اؤدولونون  یارانماسی اوزه‌رینده آنلاشدیلار. قیوانج  اؤدوللری، یاراق اوتاغیندان تاپیلمیش، بوروش آت پولجوقلاری ایدی. سود گونلری ایله دینجلیش گونلری تاخیلاجاق  بیر درجه‌لی ایگید حئیوان اؤدولو اسنوبال ایله باکسئره وئریلدی. ائله‌‌جه، ایکی درجه‌لی ایگید حئیوان اؤدولو  اؤلدورولموش قویونا سونولدو.

ساواشین آدی‌نین  اوزه‌رینده چوخلو  دارتیشما گئتدی سونوندا ، ووروشمانین اینکلیکدن باشلادیغی اوچون اونا  " اینکلیک ساواشی" آدی وئردیلر.

    حئیوانلار، چامورلارین ایچینه دوشموش جونزون توفنگین تاپدیقدا تارلا ائوینده ساخلانمیش فیشنگلرین یئرینی ده بولودولار. اونلار توفنگی توپ کیمی  بایراغین آلتینا قویاراق ایلده ایکی کز، بیر یول خزل آیی‌نین اون ایکیسینده ؛ اینکلیک ساواشی‌نین ایل دؤنومونده ، بیر یولدا، یایین اورتاسیندا دئوریم گونونون ایل دؤنومونده  آتاجاقلارینی آنلاشدیلار.

 

بئشینجی بؤلوم

              قیش گلدیکده، مولی گونو گوندن آرتیقراق بیخدیریجی اولوردو. « یوخویا قالمیشدیم » دئیه  ایش باشینا گئج گلیردی. یئییب ایچمه‌سی‌نین یاخشی اولدوغونا باخمایاراق  آنلاشیلماز آغریلاردان سیزلداییردی. هردن بیر باهانا ایله ایشدن ال چکه‌رک  گؤلمجین  باشینا گئدیب  سارساقجاسینا  سوداکی یانسیماسینا گؤز تیکیردی. بونلاردان اؤنملیسی اونا گؤره سؤیله‌نن  سؤیله‌نتیلر ایدی.

              بیر گون مولی، آولودا سکیره-سکیره قاچیب اویناقلایارکن کلووئر اونایاخینلاشیب دئدی:

-«« مولی سنینله قونوشمالی‌‌یام. سحر چاغی سنی  فوکسفود تارلاسی‌نین آویریندا، چیغلارین  اوستوندن بویلانارکن گؤردوم. پیلینگتونلو بیر کیشی چیغین اوتاییندا دورموشدو.آرانین چوخ اولدوغونا باخمایاراق من بو ایکی  گؤزومله گؤردوم او سنین بورنونو تومارلایا- تومارلایا سنینله دانیشیردی.بونلارین آنلامی ندیر؟»

- « یوخ ، او ائله یاپمادی، من دئییلدیم! بو دوغرو دئییل!» مولی قیوریلیب آچیلاراق آیاغینی یئره تاپدایا- تاپدایا چیغیردی.

-« مولی اوزومه باخ . سن آند ایچیرسنمی آدام سنین بورنونو اوخشامادی؟»

-« بو دوغرو دئییل! »-  مولی یئنه قیشقیردی آنجاق  کلووئرین اوزونه باخمادی.آز سونرا  او  دؤرد نالا قاچیب تارلانین ایچینده گؤزدن ایتدی. کلووئرین ایچینه قورد دوشدو. کیمسه‌یه بیر سؤز دئمه‌دن مولی‌نین آغیلینا گئدیب آخیرینداکی سامانلاری اندر- دؤندر ائده‌رک  آلتیندا بیر ییغین  دادلیجا  ایله نئچه رنگلی شیریق بولدو.

              اوچ گون سونرا مولی یوخ اولدو.  گونلر گئچسه‌ده کیمسه  اونون  هارادا اولدوغونو بیلمیردی. سونوندا گؤیرچینلر  سالیغینی ویلینگتونون  یان یؤوره‌سینده توتدولار. او آلا- بولا بویانمیش بیر فایتونا قوشولوب چاخیر ائوی‌نین قارشیسیندا دایانمیشدی. چاخیرچیلارا بنزه‌ین قیرمیزی‌بنیز  بیر کیشی اونا دادلیجا  وئره‌رک بورنونو  اوخشاییردی. مولی یئنیجه قاشاولانیب یئله‌‌سینه آل شیریق تاخیلمیشدی. گؤیرچینلرین دئدیگینه گؤره او موتلو گؤرونوردو.  بوندان بئله اونون آدینی چکن اولمادی.

              چیلله‌نین گلیشی ایله هاوالار سرتلشدی. ‌یئر دمیر کیمی دونوب  گؤروله‌سی بیر  ایش یوخویدو. نئچه ییغینجاق بؤیوک آمباردا گئچیریلدی. دونقوزلار گلن اوچ آیدا گؤروله‌جک  ایشلر اوزه‌رینده اوغراشیردیلار. دونقوزلارین هوشلو- باشلی اولدوقلارینا گؤره حئیوانلار آنلاشاراق  بیر پارا  قوشوللارلا تارلانین یؤنتیم- دئنتیم  ایشلرینی  اونلارا تاپشیرمیشدیلار. اونلارین وئردیکلری قرارلار گره‌ک اوی بیرلیگی ایله اونایلاناردی. اسنوبال ایله  ناپلئون بوش دارتیشمالاری اولماسایدی بو آنلاشی یئترینجه  یارارلی اولاجاق ایدی. اونلارین  بیر سورون اوزه‌رینده  اویوشمالاری اولاناقسیز ایدی. بیریسی اکینلیکده آرپا اکمگی اؤنرسه‌ایدی قوشقوسوز  او بیریسی بوغدا اکمگی  ایره‌لی چکه‌‌جکدی.  بیری  بیر یئری  یالنیز کلم اکمک اوچون اویغون گؤرسه ایدی باشقاسی اورانین  یئر کؤکو اکمکدن باشقا بیر ایشه یارامایاجاغینی سؤیله‌یه‌جکدی. بونلارین یانداشلاری آراسیندا  ایسه قیزغین دارتیشمالار گئدیردی. ییغینجاقلاردا  اسنوبال آخیجی دانیشیغی ایله چوخونلوغون  اویونو قازانا بیلیردی. ناپلئون  ایسه، ییغینجاقلار آراسی  حئیوانلارین  اؤزللیکله قویونلارین آراسیندا دولاشاراق اؤزونه یانداش ییغماقدا باشاریلی ایدی.

              بیر سوره سونرا قویونلار یئرلی- یئرسیز ملشمه‌لری ایله ییغیینجاقلاری بیربیرینه وورماغی اؤیرندیلر. اونلار، اسنوبالین دانیشیغی‌نین اؤنملی یئرلرینده  « دؤرد آیاق یاخشی، ایکی آیاق یامان» نی ملشه‌رک   اونون سؤزلرینی آغزیندا قویوردولار.

              اسنوبال ، تارلا ائویندن تاپیلمیش "یئنی اکینچیلیک ایله داوارچیلیغا دوغرو" درگیسی‌نین گئچمیش ساییلارینی اوخویاراق، بیلگینجه‌سینه، دوزه‌له‌جک سو یوللاریندان، آیاق یوللاریندان، سیلولاردان دانیشیردی. اونون  اوستونده ایشله‌دیگی بیر بوروشوق دوزگه‌ده؛ حئیوانلار، گونده تارلانین دگیشیک یئرلرینده  اؤزلرینی یونگوللتمکله  پئهین داشیما ایشینی آزالتاجاقدیلار.

              ناپلئون اؤزونه اؤزگو بیر گؤرونجه‌سی یوخویدو.  او اسنوبالین  ایشلرینی واختی سورتوب اؤزونو ساریماق بیلیردی. اونلارین آنلاشمازلیقلاری‌نین ان آجیسی  دوزه له‌جک یئل دگیرمانی‌نین اوستونده گئدیردی.

           اوتلاقداکی تپه‌جیک، تارلانین یاپیتلارینا یاخین اولان، ان یوکسک  یئر ایدی. اسنوبال آلانی گوزدن گئچیرتدیکدن سونرا، اورانی  تارلانین قیویل گوجونو ساغلایاجاق یئل دگیرمانی‌‌نین تیکیلمه‌سی اوچون ان اویغون یئر اولدوغونو بیلدیردی. اوره‌تیله‌جک  قیویللا، آغیللارین ایشیغی، سرینلیگی، ایستیلیگی ساغلانیب  اوت دوغرایان ، کولش دوین، یونجا بیچن، سودساغان کیمی آیقیتلار ایسه ایشه دوشه‌‌‌جکدی. تارلانین اسکی بیچیملی اولدوغونا گوره، حئیوانلار ایندیه‌‌دک بئله بیر شئیلر نه ائشیتمیش نه‌ده گورموشدولر. اونا گوره شاشقینلیقلا اسنوبالین سویله‌دیکلرینه قولاق آسیردیلار. اسنوبال درگیلرده‌کی دوشسل  آیقیتلارین  چیزگیلرینی حئیوانلارا گؤستره‌رک دئییردی:

-« سیزلر آیین-شایین اوتلاقدا اوتلایاندا یاخود آلقیلارینیزی گلیشدیرمک  اوچون  یازیب  اوخوماقدا اولاندا ، بو آیقیتلار سیزین یئرینیزده  چالیشاجاقلار.»

بئش اون گونون ایچینده، اسنوبالین ایشله‌دیگی یئل دگیرمانی‌‌نین چیزگه‌لری سونوجلاندیردی. اسنوبال گره‌کن بیلگیلری، جونزون " ائوده گؤروله بیلن مین بیر یارارلی ایش" ، " کرپیچ هؤرمه " ، " ایلکللر اوچون ‌‌‌قیویل گوجو" بیتیکلریندن  آلمیشدی. اسنوبال آراشدیرمالارینی، پورزسوز آغاج دؤشمه‌سی چیزگی چکمگه ال وئریشلی اولان؛ گئچمیشده جوجه چیخارتماق اوچون قوللانیلان  ائوجیکده یاپیردی.

              اسنوبال گونون چوخونو ائوجیکده گئچیریردی. او آچیلی بیتیکلر دورد یانیندا، بیر پارچا گچ تویناغیندا، سوره‌‌کلی وار- گئت ائده‌رک جیزیغی جیزیق دالیجا چکیر هردن ایسه دایانیب سئوینجیندن چیغلیق قوپاریردی. دؤشه‌مه‌‌نین یاریسیندان چوخونو توتان چیزگه‌لر گئت گئده گلیشیب  باشقا حئیوانلارا  آنلاشیلماز آنجاق ائتگیله‌ییجی اولان بیر ییغین چارخ ایله قولا دؤنوشوردو.

              حئیوانلار گونده آزی بیر یول گلیب اسنوبالین چیزدیقلارینا باخیردیلار. تویوقلار ایله اؤردکلر چیزگه‌لری آیاقلاماسینلار دئیه  قاپی‌‌نین آغزیندان  بویلانیردیلار. یاخینا گلمه‌ین بیرجه  ناپلئون ایدی . او باشلانغیجدان یئل دگیرمانینا قارشی چیخدیغینی بیلدیرمیشدی. او بیرگون  گؤزله‌نیلمه‌دن چیزگه‌لری یوخلاماغا گلدی. او آغیر- آغیر چیزگه‌لرین باشینا  دولاناراق  بوتون آیرینتلاری یاخیندان بیر ایکی یول  اییله‌یه- اییله‌یه  گؤزدن گئچیردیکدن سونرا بیر آز دایانیب گؤز اوجو ایله اونلارا باخاراق دوشونجه‌یه دالدی. بیردن بیره  او دینمز- ائله‌‌مز آیاغینی قالدیریب  چیزگه‌لرین اوستونه ایشه‌مگه باشلادی. ایشی بیتینجه  یئنه بیر سؤز سؤیله‌مه‌دن  دیشارییا چیخدی.          

              تارلا، یئل دگیرمانی اوستونده دریندن ایکی‌یه بؤلونموشدو. اسنوبال دگیرمان تیکمه‌‌نین چتین بیر ایش اولدوغونو دانمیردی. بو ایش اوچون اونجه اوجاقدان داش چیخاریلیب دووار  هؤرولمه‌‌‌لی ایدی. بونون آردینجا  یئل دگیرمانی‌‌نین یئلکنی دوزلمه‌‌لی ایدی سونوندا ایسه اوره‌تج  ایله کابلین آلماسی گره‌کیردی. اسنوبال بونلارین نئجه ساغلاناجاغینا گؤره  بیر شئی سؤیله‌میردی آنجاق اونون بیر ایلین ایچینده بیته‌‌جگینی ساوونوردو.  بو یاندان اسنوبال: « یئل دگیرمانی‌‌نین  یولا دوشمه‌سیله  حئیوانلارین ایشله‌مه‌سی یئددیجه‌ده  اوچ گونه آزالاجاق.»دئییردی. اویاندان ناپلئون: « ایندی‌‌لیکده تارلانین ان بؤیوک گره‌کسینیمی  اوره‌‌تیله‌جک یئیه‌جگین چوخالماسی‌‌دیر. واخت  یئل دگیرمانی تیکمکله  سورتولورسه هامی آجلیقدان اؤله‌‌‌جکدیر.» دئییردی.

              بئله‌لیکله  اسنوبال ایله ناپلئونون یانداشلاری  "آز ایش" ایله "توخ قارین" آدلی ایکی بؤلوک اولوشدوردولار. بئنجامین  بؤلوکلره قاتیلمایان بیرجه حئیوان ایدی. اونون اینامیجا، نه یئیه‌جک چوخالاجاق ایدی نه‌ده دگیرمان ایشی آزالتاجاق ایدی.  دگیرمانین اولوب اولماماسی  حئیوانلارین دوروموندا بیر دگیشیکلیک  یاراتمایاجاق ایدی.

              یئل دگیرمانی‌نین اوستونده گئدن دارتیشمالارلا یاناشی بیر باشقا سورون، تارلانین ساوونماسی ایدی. آداملارین اینکلیک ساواشیندا یئنیلمه‌لرینه باخمایاراق تارلانی گئری آلیب جونزو قایتارماق اوچون سرت بیر گیریشیمه قالخیشاجاقلاری اولاسی‌ایدی. آداملارین یئنیلگیسی‌نین چاوی بؤلگه‌ده یاییلاندان بری، قونشو تارلالارداکی حئیوانلار ، گؤرولمه‌دیک بیر بیجیمده قودورغانلاشمیشدیلار. بو ندنله  آداملارین  ال- ال اوستونه قویوب دورمایاجاقلاری سئزیلمیشدیر.  بو قونو اوزه‌رینده  یئنه اسنوبال ایله ناپلئون آنلاشمازلیق ایچینده ایدیلر.

 ناپلئون دئییردی: « اؤزوموزو قوروماق اوچون بیرجه یولوموز توفنگ اله آلیب ساواشماقدیر.»

اسنوبال دئییردی: « بیز باشقا  تارلالارداکی حئیوانلاری  آیاقلاندیرماق اوچون داها چوخ ساوجی گؤیرچین گؤندرمه‌لی‌ییک.»

بو چیغیریردی: « بیز اؤزوموزو ساوونماساق یئنیله‌‌جه‌‌ییک».

او باغیریردی: « دئوریم بوتون یئرلرده باش وئرسه  ساوونماغا گره‌ک قالمایاجاق».

              حئیوانلار اؤنجه  ناپلئونا سونرا  اسنوبالا باخیردیلار آنجاق هانکیسی‌نین دوغرو سؤیله‌‌دیگینی آنلامیردیلار. دوغروسو، اونلار، چوخراق  دانیشماقدا اولانین سؤزلرینی دوغرو بولوردولار.

              اسنوبالین چیزگه‌لری سونوندا  بوتونلشدی. سود گونو ییغینجاغیندا، ‌یئل دگیرمانی‌نین تیکیلیب تیکلمه‌مه‌سی اویلاناجاقدی.

              اویلاما گونو، حئیوانلار  بؤیوک آمباردا توپلاشدیقدا، اسنوبال آیاغا قالخیب قویونلارین آرا- سیرا ملشمه‌لرینه باخمایاراق یئل دگیرمانی‌نین  گره‌کلی اولماسینی  یاخشیجا  قانیتلادی. سیرا ناپلئونا گلینجه او دیکله‌‌نیب  چوخ یوموشاقجا، یئل دگیرمانی‌نین آنلامسیز لیغینی وورغولایاراق بوتون حئیوانلاردان اونا اوی وئرمه‌‌سینی ایسته‌‌دیکدن سونرا چابوق یئرینده اوتوردو. اونون باشقالارینی ائتگیله‌‌مگه اؤنم وئرمه‌‌دیگی قیساجیق قونوشماسیندان بللی ایدی. اسنوبال بونو گؤره‌‌‌لی یئنه یئریندن سیچراییب ملشمگه باشلایان قویونلارین باشینا چیمخیراراق، آشقین داشقینلیقلا یئل دگیرمانی‌نین یارارلارینی سایماغا باشلادی. اسنوبالین یاتیملی دانیشیغی، از اؤنجه  اوی باخیمیندان دوز ایکی‌‌یه  بؤلونموش حئیوانلاری قوشقودان چیخارتدی. اسنوبال اوستالیقلا، تارلادا آغیر ایشین  حئیوانلارین سیرتیندان گؤتوروله‌‌‌‌‌جک گونون گؤرونتوسونو چکدی.اونون دوشلری آرتیق کولش‌‌دؤین ایله اوت‌دوغرایان  کیمی آراجلاردان دا اؤته‌یه گئتدی. اونون دئدیگینه گؤره: قیویل گوجو ؛ ساپان، تاپان، اکن، بیچن، ییغان آیقیتلارینی چالیشدیرماقدان باشقا بوتون آغیللاردا  قیشی-یایی،  ایستی-سویوق  سو ساغلایاجاق ایدی. آرتیق اویلامانین سونوجو ایندی‌دن بللی ایدی. اسنوبالین سؤیله‌‌وی بیتینجه ناپلئون آیاغا قالخیب اونا ترس-ترس  باخاراق ایندی‌یه‌دک ائشیدیلمه‌‌دیک بیر  یابانجیل قیها چکدی. بیردن باییردان  قورخونج هوروشمه سسلری دویولدو. آز سونرا، دوققوز  بوروش چنگللی  هئیوه‌ره کؤپک آمبارین  ایچینه   آتلانیب دوز اسنوبالین اوستونه  یومولدولار.  اسنوبال  ال- آیاق ائله‌ییب یئریندن  سیچراماسایدی کسینلیکله قاپیلاجاق ایدی. بیر گوز قیرپیمیندا ، او اؤزنو قاپیدان ائشیگه تولازلادی. کؤپکلر اونون دالیسیجا دوشدولر.  قورخوب هویوخموش حئیوانلار، قاپی‌نین آستاناسینا  ییغیشاراق قووالامایا  گؤز تیکدیلر. اسنوبال، آنا یولا اولاشان  جیغیردا قاچماقدا ایدی. او بیر دونقوزون قاچا بیله‌‌جگی  توودا  قاچیردی. کؤپکلر گئتدیکجه اونون توپوقلارینا یاخیلاشیردیلار. بیردن اونون آیاغی قایدی. حئیوانلار گؤزلرینی یوماراق  ایشین بیتدیگینی ساندیلار. آنجاق او  اؤزونو ییغیشدیریب  اؤنجه‌‌کیندن توواراق  قاچماغا باشلادی.  کؤپکلر یئنه اونا چاتماقدایدیلار. کؤپکلرین بیری اسنوبالین قویروغوندان توتدو  آنجاق او دارتیناراق اونو قورتارا بیلدی. ائنینده-سونوندا او اؤزونو  چیغداکی بیر دلیگه سوخوب گؤزلردن ایتدی. حئیوانلار بونوگؤرونجه سس‌سیزجه  آمبارا گئری دؤندولر. چوخ چکمه‌دی، کؤپکلر هوروشه-هوروشه قایتدیلار. کیمسه  بو یاراتیقلارین  هاردان گلدیگینی بیلمیردی. آز سونرا سورون چؤزولدو. بونلار، ناپلئونون انیکلیکده آنالاریندان آییریب بویوتموش قوچوقلار ایدی. اونلار یاشلاریندان داها ایری گؤرونوردولر. اونلارین قورخونج گؤرکملری قوردلارا بنزه‌‌ییردی. کؤپکلر ناپلئونون باشینا ییغیشاراق‌، گئچمیشده ایتلرین بای جونزا قویروق بولادیقلاری کیمی، اونا قویروق بولاماغا باشلادیلار. ناپلئون کؤپکلرله بیرگه، قوجا مئیجرین سؤیله‌و  یاپدیغی  سامان  قالدیریما چیخاراق  بوندان بئله سود گونلرینده، ییغینجاقلارین گئچیریلمه‌یه‌جگینی بیلدیردی. او بو ایشلری بوشونا واخت سورتمک آدلاندیراراق آرتیردی؛ گله‌جکده تارلا ایشلری ایله ایلگیلی بوتون سورونلار  اونون باشچیلیغی آلتیندا، دونقوزلاردان اولوشان  اؤزل بیر قورولدا چؤزوله‌‌‌‌‌جکدیر. حئیوانلار سود گونلری یالنیز بایراغا سایغی دوروشو  اوچون توپلاشیب  اینگیلیس حئیوانلاری  ماهنیسینی  اوخودوقدان سونرا  گؤروله‌سی ایشلری‌نین بویروغونو  دارتیشمادان آلیب داغیلاجاقلار.

              اسنوبالین قووولماسیندان سارسیلان حئیوانلار بو بیلدیریش ایله لاپ قورخویا دوشدولر. اونلارین دارتیشما حاقلاری اولسایدی کسینلیکله  دیلله‌نه‌جک ایدیلر. بو آرادا باکسئر بئله  آنلاشیلمازجاسینا داریخدی. او قوللاقلارینی شوشله‌ییب یئله‌سینی بیر ایکی یول سیلکه‌له‌‌دی، بیرشئی سؤیله‌مک ایسته‌‌ییردی؛ آنجاق عاغلینا بیر شئی  چاتمیردی. تارلانین دونقوزلاری‌نین آراسیندا دیللی-باشلی اولانلارین سایی آز دئییلدیر.  اؤن جرگه‌ده اوتورموش دؤرد پوتا چوشقا، دیللنیشلرینی بیلدیرمک اوچون  چیغیر-باغیر سالاراق یئرلریندن داشلانیب هئپ بیرلیکده دونقولداماغا باشلادیلار؛ آنجاق ناپلئونون چئوره‌سینده دایانمیش کؤپکلر دیش قیجیردیب میریلداماغا باشلایینجا سس‌سیزجه یئرلرینده اوتوردولار. بونون آردینجا قویونلارین اون بئش دقیقه‌لیک قولاق باتیرجی  "دؤرد آیاق یاخشی ، ایکی آیاق یامان"  ملشمه‌لری هر چئشید دارتیشمایا سون وئردی.

              اسکوئیلر یئنی دوزه‌‌نی  باشقا حئیوانلارا آچیقلاماق اوچون  تارلانین دؤرد بوجاغینا گؤندریلدی.

-«یولداشلار! »  اودئدی. « اینانیرام ،سیز یولداش ناپلئونون  بو  اؤز وئریسینی؛ بو آغیر گؤره‌وی  اوزه‌رینه  گؤتورمه‌سینی اولدوقجا یاخشی دگرلندیریرسینیز. یولداشلار! سانمایین  اؤندرلیک  خوشا گلیم بیر ایشدیر. یوخ ، او چوخ  آغیز، چوخ چتین بیر یوکوملولوکدور. کیمسه یولداش ناپلئون کیمی حئیوانلارین ائشید اولماسینا اینانمیر. او چوخ سئوینر سیز اؤز ایشلرینیزه اؤزونوز قرار وئره‌سینیز آنجاق سیز بیر گون یانلیش بیر قرار وئرسه‌‌‌‌نیز بیلیرسینیزمی نه اولاجاق ؟ دوشونون سوچلولوغو آنلاشیلان اسنوبالین ساچما ساپانلارینا اینانیب دالیسیجا دوشسه‌ایدینیز نه  اولاجاق ایدی؟»

-« او اینکلیک ساواشیندا چوخ اوره‌کلی  ایدی.»دئیه کیمسه دیللندی.

-« اوره‌کلی‌لیک چوخ اؤنملی دئییل.  اؤنملی اولان  باغلیلیق، سؤزه باخماقلیقدیر.  اینکلیک ساواشینا گلینجه، من اینانیرام بیز  بیرگون اسنوبالین ساواشداکی پایی‌نین قابارتیلدیغینی آنلایاجاغیق. یولداشلار! بیزیم بو گونکو گره‌گیمیز دوزه‌ن‌دیر دوزه‌ن!...سیخی دوزه‌ن . بیر یانلیش آددیم بیزی دوشمنلرین  آیاغی‌نین آلتینا آتا بیلر. بیر یانلیش آددیم   جونزو  گئری قایتارا بیلر.  دوغرودان سیز جونزون گئری دؤنمه‌سینی می  ایسته‌ییر‌سینیز؟ »

               یئنه سورغو یانیتسیز ایدی. گئرچکدن حئیوانلار  جونزون قاییتماسینی ایسته‌‌میردیلر. سود گونو دارتیشمالاری  جونزو  قایتاراجاقدیرسا  اوندا بو دارتیشمالارا سون وئریلمه‌لی ایدی.  بو سوره‌ده دوشونوب داشینماغی باجاران  باکسئر حئیوانلارین  گئنل دویغوسونو  بو دئییشله  دیله گتیردی: «یولداش ناپلئون نه دئسه دوزدور». بوندان بئله او، اؤزونه اؤزگو اولان « من برک چالیشاجاغام» دئییمینه، یئنی منیمسه‌دیگی « ناپلئون نه دئسه دوزدور» دئییمینی‌ده ائکله‌دی.

              هاوالار دوشونجه، یاز اکینی باشلاندی. اسنوبال ایشله‌‌ین ائوجیگین قاپیسی قاپاتیلدی. هامی دوشه‌مه‌ده‌کی چیزگه‌لرین سیلیندیگینی سانیردی. سود گونلری، سحر ساعات اوندا  حئیوانلار، گلن یئدیجه‌نین  بویروقلارینی آلماق اوچون  بؤیوک آمباردا  توپلاشیردیلار. قوجا مئیجرین  قافا‌تاسی قویلاغیندان چیخاردیلاراق سیلینیب بایراغین آلتیندا، توفنگین یانینا قویولموشدو. حئیوانلاردان ایسته‌نیلمیشدیر: بایراغی قالدیردیقدان سونرا، بؤیوک آمبارا گیرمه‌دن اؤنجه  قافا‌‌تاسی‌نین اؤنوندن، سایغیلی بیر بیچیمده سان گئچسینلر. حئیوانلار بو گونلر‌، گئچمیشده کی کیمی بیر بیر‌لرینه یاوونموردولار. ناپلئون، اسکوئیلر بیرده قوشوق  قوشماقدا، ماهنی  یازماقدا  اولاغان اوستو یئتنگی اولان مینیموس آدلی بیر دونقوز گلیب قالدیریمین اؤن بؤلومونده، کؤپکلرین  اولوشدوردوغو یاریم دگیرمی‌نین اورتاسیندا اَیلشیردیلر. باشقا دونقوزلار بونلارین آرخاسیندا اوتوروردولار. حئیوانلارین قالانی، بونلارین قارشیسینداکی گئنیش آلاندا آیاقدا دایانیردیلار. ناپلئون، چیریکسل بیر بیچیمده، گلن یئدیجه‌نین  بویروقلارینی اوخویوردو. حئیوانلار "اینگیلیس حئیوانلاری" ماهنیسینی اوخودوقدان سونرا داغیلیشیردیلار.

              اسنوبالین قوولماسی‌نین  اوچونجو یئدیجه‌سینده، حئیوانلار ناپلئونون: « یئل دگیرمانی تیکیله‌‌‌‌‌جک»  بیلدیریسی‌نین ائشینمه‌‌سیندن شاشیردیلار. ناپلئونون دوشونجه‌‌سی‌نین دگیشمه‌‌سی‌نین ندنلری آچیقلانمادی،‌ناپلئون بیلدیرسینده «دونقوزلارین اؤزل قورولونون آپاردیغی  اینجه‌له‌مه‌لرگؤستریر؛ یئل دگیرمانی‌نین  تیکیشی ایکی ایل چکه‌جک بو داها چوخ ایشله‌مک دئمکدیر. بونا گؤره، گره‌کیرسه گونلوک یئیه‌جک  آزالاجاق» دئیه حئیوانلاری اویارمیشدی.

              آخشام، اسکوئیلر ، قاپالی بیر اوتورومدا حئیوانلارا آچیقلادی:

- « ناپلئون ، ایندی‌یه‌دک، نه تکجه  یئل دگیرمانینا قارشی چیخماییب  بلکه  بؤلگه‌ده  اونو اؤنه‌رن  ایلک کیمسه‌ده  ائله او اولموشدور. اسنوبالا  گلینجه، ‌او ائوجیکده‌کی چیزگه‌لری، ناپلئونون یازیلاری‌نین  ایچیندن  اوغورلامیشدی. »

- « ندن ناپلئون  ائله سرتلیکله  اسنوبالا قارشی چیخیردی»دئیه بیریسی  سوروشدو.

اسکوئیلر اونا بیج-بیج باخاراق دئدی:

-« بو یولداش ناپلئونون اوستالیغی ایدی. اونون  یئل دگیرمانینا قارشی چیخماسی  یالنیز بیر  مانئور ایدی آزغین  اسنوبالین کؤتو ائتکیسیندن قورتولماق اوچون. ایندی اسنوبالین قاچماسییلا انگللر اورتادان قالخیب. آرتیق یئل دگیرمانی‌نین تیکیلمه‌سینده  بیر ساقینجا یوخدور.»

              اسکوئیلر  قویروغونو  بوللایا-بوللایا اویان بو یانا گئده‌رک گوله-گوله ائکله‌‌‌‌دی:

- «بونا اؤنلم دئیرلر یولداشلار اؤنلم!»

              حئیوانلار، اؤنلمین نه اولدوغونو بیلمیردیلر آنجاق اسکوئیلرین قاندیریجی دانیشیغی، یانینداکی اوچ کؤپگین  دیش قیجیرتمالاری، اونلاری  بو آچیقلامالاری دارتیشمادان  اونایلاماغا  زورلادی.

 

آلتینجی بؤلوم

              حئیوانلار  او ایل اللریندن گلنی اسیرگه‌مه‌ییب کؤله‌لر کیمی ایشله‌دیلر. اونلار موتلویدولار چکدیکلری امگین یاراری اؤزلرینه، گله‌جک قوشاقلارینا توخوناجاق نه بیر سورو انگل، ایشسیز اینسان اوغوللارینا.  اونلار یئدیجه‌ده آلتمیش ساعات ایشله‌ییردیلر. قویروق‌دوغان آییندان ناپلئون بیلدیردی: «سود گونلری، اؤیله‌دن سونرا حئیوانلارکؤنوللو اولاراق  ایشله‌یه بیلرلر.» آنجاق ایشه گلمه‌‌‌ینلرین گونلوک یئیه‌جگی  یاری اولدو.  بونلارلا بئله یئنه ایشلرین چوخو گؤرولمه‌میش قالدی. اورون بیلدیرکینه گؤره آزالمیشدی. یای گیرنده، یئر کؤکو اکیله‌‌‌‌‌جک ایکی اکینلیک ، واختیندا شوخوملانمادیغی اوجون اکیلمه‌میش قالدی. قیشین سرت گئچه‌جگی ایندی‌دن سئزیلیردی.

              یئل دگیرمانی‌نین  تیکیلیشی حئیوانلاری گؤزلنمه‌دیک  چتینلیکلرله اوز اوزه قویدو. تارلاداکی کیرج اوجاغیندان  چیخاریلاجاق داشلار ایله یاپیتلارین  یانیندا باشینا بوراخیلمیش قوم-سیمینت ایله  یئل دگیرمانی تیکیله بیلردی.آنجاق حئیوانلارین باشلانیشدا چؤزه‌بیلمه‌دیکلری سورون  بؤیوک داشلاری نئجه سیندیرماق ایدی. حئیوانلار  آرخا  آیاقلاری اوسته دورا بیلمه‌دیکلری اوچون بو ایشه گره‌کلی اولان  قازمانی، قالدیرغاجی قوللانا بیلمیردیلر. حئیوانلار نئچه یئددیجه بوشو بوشونا چابالادیقدان سونرا بیریسی‌نین بئینیه  یئر چکیمی‌نین گوجوندن  یارارلانماق یئتیشدی.  کیرج  اوجاغی‌نین یاتاغیندا، ایشه گلن بؤیوک سال داشلار وارایدی. حئیوانلار داشلاری کندیرله باغلادیقدان سونرا  اوجاغین یوققوشوندا دوشه-قالخا، یاواش- یاواش یوخارییا چکیب زیروه‌‌دن آشاغییا  دیغیرلاداراق قیریردیلار.  بو ایشه کندیر چکه بیلن بوتون حئیوانلار؛ آتلار، اینکلر، قویونلار ائله جه‌ده چتین دوروملاردا دونقوزلار بئله قاتیلردیلار.

              قیریلمیش داشلارین داشیماسی او بیری ایشلره گؤره چوخ قولای ایدی.  آتلار آرابا ایله ، بئنجامین ایله موریئل  بیر اسکی داشیرغا ایله، قویونلار ایسه  سوروتله‌یه‌رک داشلاری چکیردیلر. یایین سون گونلرینده  یئترینجه داش توپلاندیقدا، تیکینتی ایشی دونقوزلارین گؤزه‌‌تیمی آلتیندا باشلاندی.

              ایش چوخ  آغیر ایره‌لی‌له‌‌ییردی. هردن  بیر داشین تپه‌نین باشینا آپاریلماسی بیرگون چکیردی. ایشلر باکسئرسیز یاپیلمیردی. اونون گوجو بوتون حئیوانلارین گوجو ایله ائشید‌ایدی. هردن داشلار قاییب حئیوانلار دره‌یه دوشمه قورخوسوندان  اومود‌سوز جاسینا چیغریشیب باغیراندا او باکسئر ایدی قاباغا آتلانیب داشی دایاندیریردی. باکسئر جومجولوق قان-تر ایچینده، تؤوشه‌یه‌رک، تپینه‌رک تپه‌یه  چیخماسی ایله، هامی‌نین  آلقیشینی قازانیردی.  کلووئر هردن  باکسئری، اؤزونو چوخ یورماماق اوچون اویاریردی آنجاق او سؤزه باخان دئییلدی. اونون آنلایشینا گؤره بوتون چتینلیکلر‌ین بیرجه چؤزوم یولو  « من برک چالیشاجاغام»  ایله  «ناپلئون هر نه دئسه دوزدور» اؤز دئییملری ایدی.  او آنلاشما یاپدیغی خوروزدان ایسته‌میشدی اونو یاریم ساعات یئرینه قیرخ بئش دقیقه تئز اویاتسین.  او بوش واختلاریندا تک باشینا  داش اوجاغینا گئدیب قیریلمیش داشلاردان توپلایاراق  یئل دگیرمانی تیکیلن یئره  گؤتوروردو.

              یایی، حئیوانلارین دورومو  ایشلرین چتین  اولدوغونا باخمایاراق  پیس دئییلدی. یئیه‌جک جونز چاغینا گؤره چوخ اولماسادا آز دئییلدی. حئیوانلارا  بوتون سیخینتیلاردان اؤنملی اولان شئی، چکدیکلری امگین بیر سورو انگل اینسانین قارنینا گئدمه‌مه‌سی ایدی.  حئیوانلارین اؤزلرینه اؤزگو ایش یؤندملری اولدوغوندان ایشلر خئیلک آزالمیشدی.  اؤرنک اولاراق حئیوانلار  تارلانین باشاباشینی  اینسانلارا  اولاناقسیز اولان بیر بیچیمده  -اوتلایاراق- آلاق  ائیله‌یه بیلیردیلر. یاخود  حئیوانلارین قیرپی-چیرپی ائله‌مه‌دیکلری اوچون آرتیق  اکینلیکله اوتلاغین آراسیندا چیغ چکمگه  گره‌ک قالمامیشدی.  بونلارلا بئله یای بیتینجه، حئیوانلار بکلنمه‌دیک  چتینلیکلرله قارشی قارشییا گلدیلر.  تارلادا اوره‌تیله بیلمه‌‌ین؛ چیراغ‌یاغی، چیوی، ایپ، ایت‌یئمی، آت نالی‌نین چاتیشمازلیغی؛ توخوم‌، کیمیاسال گوبره‌نین یئترسیزلیگی، یئل دگیرمانی‌نین  آیقیتلاری‌نین  یوخلوغو  هامینی دوشوندوروردو آنجاق  کیمسه  اونلارین نئجه ساغلاناجاغینی بیلمیردی.

              ناپلئون سودگونو توپلانتیلاری‌نین بیرینده، تؤره‌نن چتینلیکلرله ایلگیلی یئنی قرارلار وئردیگینی بیلدیره‌رک  دئدی:

-« بوندان بئله، تارلانین، اؤزلیکله  یئل‌دگیرمانی‌نین گره‌کسینملرینی  گئدرمک اوچون  قونشو  تارلالارلا  آلیش وئریش  یاپیلاجاقدیر. بو آل-وئر یالنیز دگیش‌‌- توخوش  بیچیمینده اولوب  پاراسال  نیته‌‌‌لیک داشیمایاجاقدیر.  بو ایش بوغدا، یونجا  ساتیش ایله باشلاییب  گره‌کیرسه   ویلینگتوندا سیجاق بازاری اولان ، یومورتادا ساتیلاجاقدیر. بونا گؤره  تویوقلاریمیز، یئل دگیرمانی  اوغروندا یاپاجاقلاری بو اؤز وئریلریندن موتلولوق  دویمالیدیرلار.»

              ناپلئونون بو سؤزلری، یئنه حئیوانلاری بلیرسیزجه‌سینه کوووشدوردو. اونلار جونزو قووالایاندان سونرا ایلک ییغینجاقلاریندا، اینسانلارلا آلیش وئریشه گیریشمه‌مه‌یه‌جکلری، پارا قوللانمامایاجاقلاری اوزه‌رینده آنلاشمامیشدیلارمی؟ بوتون حئیوانلار بونلاری آنیمسادیلار یا آنمیسادیقلارینی ساندیلار.

              گئچمیشده ناپلئونون قاداغالارینا دیلله‌نن دؤرد دونقوز قورخا- قورخا  دئیینمگه  باشلادیلار آنجاق کؤپکلرین قورخونج دیش قیجیرتمالارینی  گؤرونجه  سسلرینی کسدیلر. آز سونرا قویونلارین  آرالیقسیز « دؤرد آیاق یاخشی، ایکی آیاق یامان» ملشمه‌لری حئیوانلارین دارغیلیغینی  اورتادان قالدیردی.                             

              ناپلئون حئیوانلاری  سوسدورماق اوچون تویناغینی قووزایاراق :

-«حئیوانلارین، اینسانلاردان چکیندیگینی گؤز اؤنونه آلاراق ایشلر ائله یولونا قویولوب  آرتیق  اوز-اوزه گؤروشمگه گره‌ک قالمایاجاق  بونا گؤره، ویلینگتونلو  وامپئر آدلی بیر دانیشمانلا آنلاشیلیب بیز ایله دیش دونیانین  آراسیندا آرا بولوجولوق  یاپسین بونونلا ایلیشکین  او دوز گونلری بویروقلاریمیزی آلماق اوچون بورایا گله‌جک »- دئدی.

              ناپلئون سؤیله‌وینی  هئپ اولدوغو کیمی « یاشاسین حئیوانلار تارلاسی » هارایی ایله بیتیردی.حئیوانلار « اینگیلیس حئیوانلاری»‌ ماهنیسینی اوخویوب داغیلدیلار.  بونون آردینجا  اسکوئیلر  تارلانی  گزه‌رک  حئیوانلاری آلیش-وئریش ایله پارا قوللانماغا قارشی، نه آنلاشما یاپیلدیغینیا نه‌ده اؤنریلدیگینیه آرخایین ائله‌دی. او بیر نئچه حئیوانین  قوشقودان چیخمادیغینی  گؤره‌رک  قورنازجاسینا  اونلاردان  سوروشدو :

-« یولداشلار سیز آرخایین سینیزمی بونلاری یوخودا  گؤرمه‌میش سینیز؟ الینیزده  بیر بلگه وارمی‌دیر؟  بو آنلاشما بیر یئرده یازلیب می؟»

              وامپئر دوز گونلری، آنلاشییا گؤره تارلایا گلیردی.  او تولکویه اوخشار، جووللاغی بیر کیشی ایدی. او کیچیک بیر دانیشمان اولسا دا تارلایا هرندن آرتیق، گؤزه‌گلیم گلیری اولاجاق  بیر آراچی‌نین  گره‌کدیگینی یاخشی باشا دوشموشدو. حئیوانلار قورخو ایله اونون گل-گئدینه  باخیردیلار. بونونلا بئله ایکی آیاقلی وامپئرین، دؤرد آیاقلی ناپلئونون  قارشیسندا دوروب  بویروق آلماسی حئیوانلاری اؤیوندورور یئنی دوزله اوزلاشدیریردی. حئیوانلارین ایلیشکیسی دیش دونیا ایله  یوموشالدیقجا اینسانلارین تاویری گلیشمکده اولان حئیوانلار تارلاسینیا گؤره سرتلشمیشدی.  اینسانلارین دئدی قودولاری‌نین سونو یوخویدو. اونلارین هامیسی، حئیوانلار تارلاسی‌نین ائر- گئج  سینقین  چیخیب داغیلاجاغینا، یئل دگیرمانی‌نین باشا چاتمایاجاغینا اینانیردیلار. اونلار گئنل یئرلرده بولوشاندا یئل دگیرمانی‌نین چؤکه‌جگیندن، چؤکمه‌سه‌ده قوللانیلماز بیر دوروما گله‌جگیندن دانیشیردیلار.  اینسانلار بیر یاندان دا- ایسته‌مه‌سه‌لر‌ده-حئیوانلارین تارلاچیلیق یئته‌نه‌گینی  ائیله‌یه بیلمیردیلر  آلقیشلاماسینلار. اونلارین گئده‌رک اویدوردوقلاری  مانور تارلاسی آدیندان ال چکیب اونو گئرچک  آدی؛ حئیوانلار تارلاسی آدیله سسله‌مه‌لری بونو گؤستریردی. اونلار آرتیق، تارلانی گئری آلماقدان  اومودونو کسیب اؤلکه‌نین اوجقار بیر بوجاغینا قویوب گئدن جونزدان  ال اوزموشدولر.

              تارلا ایله دیش دونیانین  ایلیشکیسینی ساغلایان، هله‌لیک وامپئر ایدی. آمما دئییلنلره گؤره ، ناپلئون ال آلتیندان  فاکسفود یا پینچفیلد تارلاسی ایله ایش‌بیرلیک آنلاشماسی یاپماقدا ایدی.  بو چکیش بکیشده، دونقوزلار بیردن بیره  تارلا ائوینه داشینیب اورادا اوتوراق ائیله‌دیلر.  یئنه حئیوانلار ائوده  یاشاماماق اوزه‌رینده آنلاشدیقلارینی  آنیمسادیقدا یئنه اسکوئیلربئله بو آنلاشی‌نین یاپیلمادیغینی حئیوانلارا  قاندیرا بیلدی.اسکوئیلردئییردی: « تارلانین بئیینلری ساییلان دونقوزلارا ، ایشله‌‌مک اوچون  بیر دینج یئرین گره‌کدیگی آیدیندیر. اوسته‌لیک  اولو اؤندریمیزین، دونقوزلوق یئرینه، ائوده یاشاماسی داها اویغون گؤرونور. » (سون گونلرده ، ناپلئونا ، اولو اؤندر آدی وئریلمیشدیر).

              بیر نئچه گون سونرا، حئیوانلارین بیر سوروسو ، دونقوزلارین  پیشیرمه اوتاغیندا یئمک یئمه‌لرینی، قوناق اوتاغیندا  اگلنمه‌لرینی، هله اوسته‌لیک  یاتاقدا  یاتمالارینی دویجاق لاپ قاریشدیردیلار. باکسئر «ناپلئون هئپ حاقلیدیر» دئیه بونون اوستوندن گئچدی. کلووئر یاتاقدا یاتماغا  قارشیت بس بللی یاسا گئچدیگینی آنیمسایاراق  دالغین-دالغین بؤیوک آمبارین دیبینه گئدیب دووارا یازیلمیش یئددی بویروغو اینجه‌له‌مگه  باشلادی. آنجاق حرفلری بیرلشدیره‌رک اوخویا بیلمه‌دیگینی گؤرونجه گئدیب  موریئلی گتیردی.

-« موریئل » او دئدی. « دؤردونجو  بویروغو اوخو . او یاتاقدا یاتماغین یاساق اولدوغونو سؤیله‌میرمی؟»

موریئل زیققانا زیققانا اوخودو:

-« اؤرتوک ایله کیمسه یاتاقدا یاتمامالی دیر.»

              کلووئر دؤردونجو بویروقدا، اؤرتوک سؤزجوگونو آنیمسامادیغیندان چوخ شاشیردی. آنجاق  او دووارا یازیلمیشدیسا، اؤیله  اولمالی ایدی. بو سیرادا  بکلنمه‌دن اورادان گئچن اسکوئیلر سورونو چؤزدو.

-« یولداشلار، بیلدیگینیز کیمی، بیز دونقوزلار، تارلا ائوینده  یاتاقدا یاتیریق ندن ده یاتمایاق! سیز یاتاقدا  یاتماغا قارشیت  بیر یاسا گئچدیگینی‌می دوشونورسوز؟ یاتیلان یئره یاتاق دئییلیر. اوستونده  یاتیلان بیر ییغین ساماندا یاتاقدیر. یئددی بویروقدا  قاداغان  ائدیلن اؤرتوکدور.  بیز ایسه یاتاقلاردان اؤرتوکلری گؤتوره‌رک  یورغان-دوشکده یاتیریق.  یولداشلار  سیز بیلمه‌لی‌‌سینیز  بونلار چوخ یاتمالی اولسالاردا بیز بئیین ایشچیلرینین بوتون گره‌کسینیملرینی قارشیلامیرلار. دوغرودان سیز بو دینجه‌لیشی بیزلره چوخ گؤرمکله، گؤره‌‌ولریمیزده آخساماغیمیزی‌می ایسته‌ییر‌سینیز؟  گئرچکدن سیز جونزون قاییتماسینی‌می ایسته‌‌ییر‌سینیز؟»

              حئیوانلار، دورمادان اسکوئیلری، دونقوزلارین یاتاقدا یاتما قونوسوندا بیر داها قونوشمایاجاقلارینا  آرخایین ائله‌دیلر. بو اوزدن نئچه گون سونرا  دونقوزلارین بوندان بئله هامیدان بیر هاویر گئج اویاناجاقلاری بیلدیریشینه  کیمسه دیللنمه‌دی.

              گوزو، حئیوانلار آرغین-یورغون اولسالاردا  موتلویدولار. اونلار قارا بیر ایل گئچیرمیشدیلر. یونجانین- تاخیلین ساتیشی ایله آزوغا آمباری  بوشالمیشدی. آمما  یئل دگیرمانی بوتون  چاتیشمازلیقلارین یئرینی دولدوروردو. او یارییادک  دوزلمیش ساییلیردی. چؤل ایشلری بیتینجه، هاوالاری ایلیق گؤرن  حئیوانلار یئل دگیرمانی‌نین تیکیشینی سوردوردولر. اونلار ایشلرینده  ان کیچیک ایره‌لی‌له‌ییشه بئله، یوکسک دگر وئریردیلر. باکسئر، گئجه‌لری یئل دگیرمانینا گئدیب  تک باشینا  آی ایشیغیندا ایشله‌ییردی. حئیوانلار بوش زامانلاریندا یاریمچیلیق دگیرمانین باشینا دولاناراق اونون دووارلاری‌نین دیکلیگینی، دایاناقلیغینی آلقیشلاییب زورلانمادان بئله بیر یاپیت تیکدیکلریندن  شاشیریردیلار. یئل دگیرمانی‌نین تیکیلیشیندن جوشقولانمایان بیرجه قوجا بئنجامین ایدی. او گئچمیشده‌کیلر کیمی، گؤروشونو بولماجایا بنزه‌ر « ائششکلر اوزون یاشار» دئییشی ایله دیله گتیریردی.

              قیروو‌آیی، گونئی دوغو سازاقلاری ایله بیرگه باشلادی. سویوقدان سیمینت توتولمادیغینا گؤره ایش دایاندیریلدی.

بیر گئجه، گؤرولمه‌دیک بیر بورانلیق اولدو. اسن کولک  ائوی یئریندن اویناداراق  آمبارین دامینا دوزلموش  ساخسیلاری یئره تولازلادی. تویوقلار قیدداشاراق قورخو ایله  یوخودان داشلاندیلار. اونلار ، اوزاقلاردا، قورشون آچیلما سسی ائشیتمیش کیمی ایدیلر.

              حئیوانلار سحر آغیللاریندان باییرا چیخارکن  گؤزلری یئره دوشموش بایراق دیره‌گی ایله  تورپ کیمی کؤکوندن چیخاریلمیش قارا آغاجا ساتاشدی. کیریخمیش حئیوانلار اؤزلرینه گله‌لی اومودسوزجاسینا چیغیریشدیلار. قورخونج بیر گؤرونتو گؤزلری‌نین اؤنونده سرگیلنمیشدی.  یئل دگیرمانی ییخیلمیشدی.

              حئیوانلار هامیسی بیرلیکده اولای یئرینه قوشدولار. یئهین یئریمه‌سی گؤرونمه‌ین ناپلئون هامیدان قاباقدا قاچیردی. دوغرو ایدی.یئل دگیرمانی چؤکموشدو، بوتون  چابالامالارین سونوجو خیمیندان ییخیلمیشدی. مین بیر چتینلیکله سیندیریلیب گتیریلن داشلار چئوره‌یه داغیلمیشدی. حئیوانلار دوروب اوزونتو ایله سپه‌لنمیش داشلارا گؤز تیکدیلر. دیللری توتولموشدو، ناپلئون  سوسقون- سوسقون گل-گئت ائدیب آرا سیرا یئری اییله‌ییردی. شوشلنمیش قویروغونون اسمه‌‌سی دالغینلیغینی گؤستریردی. او بیردن بیره دایاندی . سانکی بیر سونوجا وارمیش کیمی ایدی.

-« یولداشلار » اوفیسیلدادی.«سیز بیلیرسینیزمی بو کیمین ایشی دیر؟ سیز گئجه‌له‌یین گلیب بیزیم یئل دگیرمانیمیزی ییخان  دوشمنی تانی‌ییرسینیزمی؟»

              او بیردن بیره ایلدیریم کیمی شاخدی:        

-«اسنوبال! بو اسنوبالین ایشیدیر. بو یاراماز آزغین ! چیزگه‌لریمیزده پوزغونلوق چیخارتماقلا قویروغونون یولونماسی‌نین آجیغینی آچماق ایسته‌میش. بو ساتقین، گئجه‌نین قارانلیغیندان یارارلاناراق گیزلیجه  بورایا سیزیب بیزیم بیر ایللیک امگیمیزی آرادان آپاریب، ‌یولداشلار من  ایندی بورادا اونون اؤلدوروش بویروغونو وئریرم. اونو اؤلدوره  بیلن حئیوانا « ایکی درجه لی ایگید حئیوان» اؤدولو  بیرده  یاریم باتمان آلما  وئریله‌‌‌‌‌جک. اونو ساغ اولاراق قولاقلایب گتیره‌نین اؤدولو ایسه بیر باتمان  آلما اولاجاق»

              اسنوبالین سوچلولوغو حئیوانلاری لاپ هویوخدورموشدو. قیزغینلیقدان قودورموش حئیوانلار، اسنوبال قاییدیرسا نئجه اونو توتوقلایاجاقلارینی دوشونوردولر. آز سونرا، تپه‌نین  یاخینلیغیندا، شئهلی اوتلارین  اوزه‌رینده، بیر دونقوزون آیاق ایزلرینی بولدولار. آیاق ایزلری چیغین یانینداکی بیر کؤهولده قورتولوردو. ناپلئون آیاق ایزلرینی دریندن اییله‌یه‌رک اونلارین اسنوبالینکی  اولدوغونو بیلدیردی. ناپلئونون دوشدوندوگونه گؤره ، اسنوبال فاکسفود  تارلاسیندان گلمیش اولمالی ایدی.

-« یولداشلار، گئجیکمه‌یه‌‌لیم»- ناپلئون  آیاق ایزلرینی اینجه‌‌له‌دیکدن سونرا دئدی.« گؤروله‌‌‌‌‌جک چوخ ایشلریمیز وار. بیز ائله بوگوندن، یئل دگیرمانی‌نین یئنیدن تیکمه‌سینه باشلایاجاغیق. هاوا ایستر  گونشلی اولسون ایستر بولودلو.  بیز بو آلچاق ساتقینا، چیزگه‌لریمیزی پوزانمایاجاغینی گؤستره‌جه‌‌ییک. یولداشلار اونوتمایین کیمسه بیزی یولوموزدان چؤنده‌ره بیلمز. بو ساواشدا بیز قازانمالی‌ییق ! هایدی یولداشلار ایره‌لی! یاشاسین  یئل دگیرمانی! یاشاسین حئیوانلار تارلاسی!»

 

 یئددینجی بؤلوم

              قارا بیرقیش ایدی. قار کولگین آریندان گلن شاختالیق، دونداران آیی‌نین سونونادک سوردو. حئیوانلار باجاردیقجا یئل دگیرمانی‌نین اوزه‌رینده چالیشیب چابالاییردیلار. حئیوانلار دیش دونیانین گؤزلری اونلاردا اولدوغونو، یئل دگیرمانی‌نین گونونده بیتمه‌سه  اینسانلارین قازانیب سئوینه‌جکلرینی یاخشی بیلیردیلر.

     اینسانلار، آجیقدان اؤزلرینی او یولا ووروب اسنوبالین یئل دگیرمانیندا پوزغونلوق چیخاردیغینا اینانمیر، «دووارلار اینجه‌‌لیکدن  ییخیلیب » دئیه  لاققیرداشیردیلار. حئیوانلار بو سؤزلرین دوغرو اولمادیغینی بیلیردیلر آنجاق بونونلا بئله، یئنی دگیرمانین دووارلاری‌نین قالینلیغینی بیر آددیم یئرینه اوچ آددیم گؤتوردولر. بو داها چوخ داش توپلاماق دئمک ایدی.  داش اوجاغی‌نین قار آلتیندا قالدیغینا گؤره، اوزون سوره بیر ایش گؤروله بیلمه‌یه‌جکدی.  آیاز هاوالاردا  ایشده ‌آزاجیق  ایره‌له‌ییش اولسادا، ایشین آغیرلیغی  گئتدیکجه حئیوانلارین اوره‌گینی اوشودوردو. آجلیق، سویوقلوق، یورغونلوق حئیوانلاری آیاقدان سالماقدا ایدی. اومودلارینی ایتیرمه‌ینلر یالنیز کلووئر ایله باکسئر ایدیلر. باکسئر دایاناقلیغی، دیلدن دوشمه‌ین «من برک چالیشاجاغام»  اؤز دئییشی، ‌‌اسکوئیلرین اودلو دئمجلریندن آرتیق حئیوانلاری ائتگی‌له‌‌‌ییردی. بایرام آییندا  یئیه‌جک چاتیشمازلیغی اؤزونو گؤستردی. گونلوک تاخیل یئیه‌‌جگی‌نین یئتمه‌‌دیگینه گؤره  یئرآلما پایلاناجاغی سؤیله‌ندی آنجاق چوخ تئز اوزوجو بیر اولایین اوستو آچیلدی: یئر آلمالارین اوستو یاخشی باسدیریلمادیغیندان یاریسیندان چوخونو سویوق آلمیشدی. آرتیق سامان ایله چوخوندوردان باشقا یئیه‌جک یوخویدو. آجلیق دوشه‌جگی  گؤزله‌‌نیردی. بو گئرچگی دیش دونیادان گیزلتمک گره‌کیردی.  یئل دگیرمانی‌نین چؤکمه‌‌سیندن اورکله‌‌نن اینسانلار،حئیوانلار تارلاسینا گؤره یئنی یالانلار اویدورماغا باشلادیلار. یئنه حئیوانلارین  آجلیقدان اؤلمه‌‌سی، آلیزلیقدان قیریلماسی، بالا اؤلدورمه‌‌‌سی ،  سویداش اتی یئمه‌‌‌سی  سؤیلنتیلری دیللره دوشدو. ناپلئون یئیه‌جک چاتیشمازلیغی‌نین آچیقلانماسی‌نین کؤتو سونوجلارینی بیله‌رک دیش  دونیانی آلداتماق اوچون وامپئری قوللاندی. دئمک اولار حئیوانلار ایندییه‌دک وامپئرین  یئددیجه‌‌‌لیک گؤروشلرینده اونونلا اوز اوزه  گلمه‌میشدیلر.آمما ایندی، قویونلار باشدا اولماق اوزه‌‌‌ره، حئیوانلارین بیر نئچه‌‌‌سی سئچیله‌رک اؤیوتولدو وامپئر گلنده  یالاندان اونا توش گلیب  گونلوک یئیه‌‌جگین قات-قات آرتدیغینی  اونا ائشیتدیرسینلر. بونونلا یاناشی ناپلئون  بوش قابلاری تورپاق ایله دولدوردوب  اوزونو تاخیل ایله  اؤرته‌رک  وامپئرین  گؤزونه  ساتاشدیرماسینا  گؤستریش وئردی. بئله‌‌‌لیکله آلدانیلمیش وامپئر ، حئیوانلار تارلاسیندا  چاتیشمازلیغین اولمادیغینی دیش  دونیایا چاتدیردی.

              سون گونلرده، ناپلئون چوخ آز  باییردا گؤرونوردو. او گونلرینی،‌ قاپیلاری قیزغین باخیشلی کؤپکلرله قورونان تارلا ائوینده  گئچیریردی.  او هردن تؤرنسل بیربیچمده ، آلتی قودورغان کؤپگین قوروماسی آلتیندا دیشارییا چیخیردی.  او آرتیق سودگونو توپلانتیلارینا بئله گلمیردی. اونون بویروقلاری چوخراق  اسکوئیلرین آراجیلیغی ایله گؤندریلیردی. سودگونلری‌نین بیرینده اسکوئیلر بیلدیردی:

-«تارلانی  چتین قوشوللاردان قورتاریب  یای گیره‌نه‌دک آزوغاسینی ساغلاماق اوچون، یولداش ناپلئون  یئددیجه‌ده دؤرد یوز یومورتانین ساتیش اوزه‌رینده  وامپئر ایله  آنلاشیب. بونا گؤره تویوقلار ایله  یئنی  یومورتلاماغا باشلایان  فریکلر یومورتالارینی وئرمه‌لی‌دیرلر.»

              تویوقلار بونو ائشیده‌لی قورخونج بیر سسله قیدداشلاماغا باشلادیلار. اونلار گئچنلرده  بیر کره یومورتادان گئچمه  اولاسیلیغینا گؤره اویاریلمیشدیلار آنجاق  اونون باش وئره‌جگینه اینانمامیشدیلار. یازدا کوت یاتماغی دوشونن تویوقلار، یومورتالاری‌نین آلینماسینی بیر قانلی ایش اولاراق نیته‌لندیریب برک دیللندیلر.جونزون قوولماسیندان بری، ایلک کز اولاراق تویوقلار، اوچ قارا بئچه‌نین اؤندرلیگی ایله باش قالدیراراق ناپلئونون بویروقلاریندان چیخدیلار. اونلار بو ایش اوچون  چاتی‌نین آلتینداکی آغاجین اوستونده یومورتلایاراق یومورتالاری سالیب سیندیریردیلار. ناپلئون بونو گؤردوکده دوراقسانمادان آجیماسیزجاسینا تویوقلارین گونلوک یئیه‌جگینی‌نین کسیلمه بویروغونو وئردی. بویروقدان چیخیب تویوقلارا بیرجه دنه بئله اولسون یاردیم ائدنلر، اؤلوم جزاسینا چاتدیریلاجاقلار ایدی. کؤپکلر بویروقلارین اویغولانماسینا  گؤز اولدولار.

              تویوقلار بئش گون سونرا دیره‌نیشدن ال چکیب اینلرینه، فالالاری‌نین اوستونه قاییتدیلار. بو سوره‌ده دوققوز تویوق اولموشدو.  اؤلنلرین  گؤوده‌سی  باغچادا قویلاندی. تویوقلارین چؤمبلن آلیزلیغیدان قیریلدیقلاری بیلدیریلدی. اولوب  بیتنلر وامپئرین قولاغینا چاتمامیشدی. ایشلر یولوندا ایدی. بیر چرچی یئددی‌ده بیر گلیب  توپلانمیش یومورتالاری آپاریردی.

              اوزون بیر سوره ایدی اسنوبالدان بیر ایز-توز  یوخویدو. اونون  قونشو قاکسفود یادا پینچفیلد تارلاسیندا  گیزلندیگی سؤیله‌‌نیردی. تارلانین آولوسوندا، کیمسه‌نین اؤنمسه‌مه‌دیگی، اون ایل بوندان قاباق تؤکولموش  بیر ییغین  ساتیلمالی کرن آغاجی وار ایدی. وامپئر، ناپلئونا آغاجلارین ساتماسینی اؤنردی. پیلینگتون ایله فیریدریک ایکیسیده  آغاجلاری آلماق ایسته‌ییردیلر. ناپلئون هن-هون ائده‌رک بو ایکیسیندن بیرینی سئچمک ایسته‌ییردی  آنجاق بیر یئره چاتانمیردی. او فیریدیریک ایله آنلاشاندا، اسنوبالین پینچفیلد تارلاسیندا گیزلندیگی سؤیله‌نیردی.  پیلینگتون ایله آنلاشییا گئچنده ایسه  اسنوبالین فوکسفود تارلاسیندا دالدالاندیغی  بیلدیریلیردی.

              یاز گلدیکده‌، قورخونج بیر اولایین اوستو آچیلدی. اسنوبال گئجه‌لری  گیزلیجه تارلایا گلیرمیش. دئییلنلره گؤره، او گئجه قارانلیغیندان یارارلاناراق تارلایا گیریب اولمایان قالمایان ایشلردن چیخیرمیش؛ او بوغدالاری اوغورلاییر،‌ سود دولچالارینی یئره جالاییر، یومورتالاریسیندیریر، جوجرن توخوملاری آیاقلاییر، یئمیش آغاجلاری‌نین قابیغینی گمیریرمیش. آرتیق تارلادا بوتون ترسلیکلر اسنوبالین بوینونا آتیلیردی. تارلادا بیر شوشه قیریلسایدی یا آیاق یولو توتولسایدی کسینلیکله  او ایشده اسنوبالین الی اولدوغو سؤیله‌نه‌جک ایدی. بیر گون  آزوغا آمباری‌نین آچاری ایتیلدی. حئیوانلار، ‌آرخایین ایدیلار اسنوبال اونو قویویا آتیب. ان شاشیلاسی، ایتیلمیش  آچارین بیر بوغدا تایی‌نین آلتیندان تاپیلماسینا باخمایاراق حئیوانلارین  قاباقکی سؤزلری‌نین اوستونده  دورماسی ایدی. ساغمال اینکلر« اسنوبال گئجه‌لر بیز یاتارکن گلیب  سوتلریمیزی ساغیر» دئیه دئیینیردیلر. ایشده، قیشی چتینلیکلر تؤرتمیش سیچانلاریندا، اسنوبال ایله ال بیر اولدوقلاری سؤیله نیلیردی. ناپلئون، اسنوبالین ائیلملری ایله ایلیشگین، گئنیش بیر آراشدیرما آپاریلماسینی ایسته‌‌دی. او اؤزو باشدا اولماق اوزه‌ره ، ایتلرله بیرگه، تارلادا گزه‌رک هر یئری گؤزدن گئچیردی. باشقا حئیوانلار، بیر آز آرالی، سایغی ایله  اونلاری ایزله‌ییردیلر. ناپلئون  اسنوبالین ایزلرینی تاپماق اوچون آددیم باشی دایانیب «‌قوخولاماق ایله هر نه‌‌یی آنلایا بیله‌رم » دئیه اگیله‌رک یئری اییله‌ییردی. دئمک اولار او هریئرده؛ نینده، کردیده، باغچادا، اسنوبالدان بیر ایزلر تاپا بیلیردی. او هردن فیسیلدایا-فیسیلدایا  باشینی قووزاییب  قورخونج بیر سسله: «اسنوبال بورادایمیش اونون اییینی آلا بیلیرم » دئیه قیشقیریردی. کؤپکلر اسنوبالین آدینی ائشیده‌‌لی دیشلرینی قیجرداراق میریلداییردیلار.حئیوانلارین جانلارینا قورخو دوشموشدو. سانکی اسنوبالین  گؤزه گؤرولمز قارالتیسی اونلاری تورلو تورلو  یامانلیقلارلا  هده‌له‌ییرمیش کیمی ایدی.

              آخشام باشی، تدیرگین گؤرونن اسکوئیلر: « چوخ اؤنملی بیر قونو اوزه‌رینده دانیشمالی‌ییق » دئیه  حئیوانلاری  توپلادی.

-«یولداشلار» او قیوریلیب آچیلاراق قیشقیردی.« چوخ قورخونج بیر گیزین اوستو آچیلیب . اسنوبال تارلامیزی الیمیزدن چیخارتماق اوچون اؤزونو پینچفیلد تارلاسی‌نین آغاسی فیریدریکه ساتیب. او سالدیرغانلارین قیلاووزلوغونو اوزه‌رینه گؤتوروب. هله بونلار بیر یاندا قالسین  بیز اؤنجه‌لری دوشونوردوک  اسنوبالین باش قالدیریسی، اونون منجیللیگیندن ، آد- سان دوشگونلوگوندن قایناقلانیر آنجاق یولداشلار بیز یانیلمیشدیق! دوغرودان سیز بیلیرسینیز نییه او بو ایشلری یاپیر؟ اسنوبال باشلانغبجدان جونز ایله ال بیر ایدی. او ایندییه‌دک جونزون گیزلی گؤز قولاغی ایمیش! بونلاری اسنوبال قاچارکن آردینجا  بوراخدیغی -یئنیجه بولدوغوموز-  بلگه‌لر قانیتلاییر.یولداشلار! بیزجه هر شئی آچیق آیدیندیر.اینکلیک ساواشیندا بیزی یئنیلگییه اوغراتماق  اوچون اونون-اوغوروموزدان باش توتمایان-چابالارینی گؤزوموزله گؤرمه‌دیکمی؟»

              حئیوانلار چاش-باش اولدولار .اسنوبالین بو ایشی اونلارا یئل دگیرمانی‌نین ییخیلماسیندان آغیر گلدی. آنجاق اسکوئیلرسؤزلرینی سیندیرمک چتین ایدی.اونلار اینکلیک ساواشیندا اسنوبالین نئجه هامیدان ایره‌لی‌ده قوشدوغونو، سورو داغیلارکن نئجه حئیوانلاری یئنیدن توپلاشدیریب اوره‌کلندیردیگینی آنیمساییب یا آنیمسادیقلارینی دوشوندولر. اونلار اسنوبالین جونز یانلیسی اولدوغونو بئیینلرینه یئرلشدیره بیلمیردیلر. آیامدا-سایامدا سورغو سوروشان  باکسئر  بئله قاتمیشدی. او دوشونجه‌لرینه چکی-دوزن وئرمک اوچون یئره آغناییب گؤزلرینی یومدو.

-«اینانمالی دئییل»-باکسئر سونوندا دیله گلدی.«اسنوبالین اینکلیک ساواشیندا ایگیدجه‌سینه ووروشماسینی من بو ایکی گؤزومله گؤردوم. بیرده  بیز ساواش بیتر- بیتمز اونا بیردرجه لی ایگیدحئیوان اؤدولو وئرمه‌دیکمی؟»

-«یولداش یانلیشلیق بیزدن ایدی. ایندی بیز  بولدوغوموز یازیلی بلگه‌لرین اوزوندن اونون حئیوانلاری توزاغا سالماق اوچون چالیشدیغینی آنلامیشیق . »دئیه اسکوئیلر یانیت وئردی.

-« آخی او یارالانمیشدی.بیز هامیمیز اونو تیلیت قان ایچینده قوشارکن گؤردوک»

اسکوئیلر قویروغونو بولایاراق هایقیردی:

-« بو اونون فیریلداغی‌نین  بیر بؤلومویدو. اوخویا بیلسه‌ایدینیز من بونو اونون اؤز یازیلاری‌نین اوزوندن سیزه گؤستره بیلردیم. اسنوبال ساواشین قیزغین چاغیندا سورونو گئری چکدیره‌رک آلانی دوشمنه بوراخماق ایسته‌ییردی. منجه اولو اؤندریمیز یولداش  ناپلئون اولماسایدی کسینلیکله او بو ایشی باشاراجاق ایدی.جونز ایله آداملاری آولویا سوخولدوقدا  اسنوبال بیر سورو حئیوانی  دالیسینا سالاراق قاچدیغینی اونوتدونوزمو؟

سانیرام‌ سیز، حئیوانلارین، بو قاچیشدان قورخویا قاپیلیب اوتوزدوقلارینی ساندیقدا، یولداش ناپلئونون «اینسانلیغا اؤلوم»هارایی چکه‌رک اورتایا آتیلیب دیشینی جونزون آیاغینا  باتیردیغینی اونوتمامیشسینیز»

              اسکوئیلر، اولایلارین گؤرونتوسونو، بوتون آیرینتیلاری ایله آچیقلایینجا حئیوانلار اولانلاری،  اؤزه‌لیکله ساواشین چکیش- بکیشینده اسنوبالین قویوب قاچدیغینی یاواش-یاواش آنیمساماغا باشلادیلار.آمما باکسئر هله‌ده دارغین گؤرونوردو.  او سونوندا دیله گلیب دئدی:

-«اسنوبالین باشلانیشدان بیر ساتقین اولدوغونا اینانا بیلمیرم. اونون سون گونلرده یاپدیغی ایشلر بام-باشقادیر  آنجاق  منجه او اینکلیک ساواشیندا چوخ  یاخشی بیر یولداش ایدی.»

اسکوئیلر سرتجه: « یولداشیم ! اولو اؤندریمیز یولداش  ناپلئون، آچیق سئچیک  اولاراق، اسنوبالین باشلانیشدان  ائله‌جه‌ده دئوریمدن چوخ-چوخ قاباق، جونزون نؤکری اولدوغونو سؤیله‌ییر!» دئدی.

-« هه ! بو بیر باشقا مسئله ! » باکسئر دئدی.: « بونو یولداش ناپلئون دئییرسه قوشقوسوز  دوز اولمالی‌دیر.»

-« یولداش گئرچکدن بئله دیر.» اسکوئیلر قییق گؤزلری ایله باکسئره باخاراق  کوکردی.آنجاق اونون باکسئره سالدیغی ایرنج باخیشی کیمسه‌نین گؤزوندن یایینمادی.

              اسکوئیلر  دؤنوب گئدرکن  بیر آن دوراقسانیب چوخ ائتکیله‌ییجی بیر بیچیمده آرتیردی:

-«الده ائدیلن بلگه‌لر، اسنوبالین  گیزلی بویروقچولاری‌نین آرامیزدا دولاشدیغینی گؤستریر. بونا گؤره تارلاداکی بوتون  حئیوانلار گؤزلرینی آچیب آییق-ساییق اولمالیدیرلار.»

              دؤرد گون سونرا حئیوانلار ناپلئونون  بویروغو ایله آولودا توپلاشدیلار. آز سونرا  قوشا میدالینی تاخمیش ناپلئون- او سون گونلرده  اؤزونه بیر درجه‌‌لی و ایکی درجه‌لی قوچاق حئیوان اؤدولونو سونموشدو- دوققوز جان گودن  کؤپگی ایله بیرگه، ائشیگه چیخدی. کؤپکلرین آتیلیب دوشه‌رک میریلداییب دیش قیجیرتمالاری، حئیوانلارین توکلرینی بیز-بیز ائتدی. اونلار  اورکه-اورکه یئرلرینده دایانیب جینقیرلارینی بئله چیخارتمیردیلار. قورخونج بیر اولایین باش وئرجگینی گؤزله‌ییرمیش کیمی‌ایدیلر. ناپلئون بکله‌یینلری قاش قاباقلا گؤزدن گئچیردیکدن سونرا، آنلاشیلماز بیر چیغلیق قوپاردی. کؤپکلر بیر گؤز قیرپیمیندا  قاباغا آتیلیب دؤرد پوتا دونقوزو قولاقلادیندان توتوب چیغیردا-چیغیردا ناپلئونون آیاقلاری‌نین آلتینا تولازلادیلار. دونقوزلارین قولاقلاریندان قان آخیردی. داماقلارینا قان دادی چیخان کؤپکلر چیلدیرماقدایدیلار.

              حئیوانلارین بؤیوموش گؤزلری‌نین قارشیسیندا، اوچ کؤپک  باکسئرین اوستونه یومولدولار. باکسئر کؤپکلرین سیچراییشینی گؤرجک سونجوقو ایله بیرینی یئر ایله گؤیون آراسیندا ووروب یئره سره‌له‌دی. ایکی باشقا کؤپک بونو گؤردوکده قویروقلارینی باچالاری‌نین آراسینا سوخوب اکیلدیلر. یئره چوللانمیش کؤپک یازیق-یازیق  باکسئره گؤز تیکدی. باکسئر باخیشلاری ایله  ناپلئوندان، آیاغی آلتینداکی کؤپگی تپیکله‌یه‌رک اؤلدوروب یوخسا  بوراخماسینی  سورودو. ناپلئون قاشلارینی چاتاراق سرتجه باکسئردن  کؤپگین بوراخماسینی  ایسته‌دی. باکسئر آیاغینی قالدیرینجا  سونجوقلانمیش کؤپک زینگیلده‌یه-زینگیلده‌یه  ایتیلدی گئتدی.

              قارغاشالیق چوخ تئز سونا ائردی. سوچلولوقلاری، اوزلریندن بللی اولان دؤرد دونقوز  تیتره‌شه‌رک گؤزله‌ییردیلر. ناپلئون اونلاردان، سوچلارینی بویونلارینا آلمالارینی ایسته‌دی. اونلار سود گونو  ییغینجاقلاری‌نین یاساقلانماسینا قارشی چیخان دونقوزلار ایدیلار.

              اونلار، اسنوبال قوولاندان بری ، گیزلیجه اونونلا ایلیشگی ده اولدوقلارینی، یئل دگیرمانی‌نین ییخیلماسیندا  اونونلا امکداشلیق ائتدیکلرینی، تارلانی فیریدیکه وئرمک اوزه‌رینده اونونلا  آنلاشمایا گئچدیکلرینی  بویونلارینا آلدیلار. دونقوزلار: « اسنوبال ایللر بویو جونزا جاسوسلوق ائله‌دیگینی  اؤرتولو اولاراق بیزلره سؤیله‌میشدی.» دئیه سؤزلرینی بیتیردیلر. دونقوزلار سوچلارینی بویونلارینا آلینجا، کؤپکلر اونلاری بوغازلایاراق  اؤلدوردولر. ناپلئون قورخونج بیر سسله: «سوچونو دیله گتیرمک ایسته‌ین باشقا بیر کیمسه  وارسا  اؤزو قاباغا گلسین» دئدی.

              یومورتا آیاقلانماسینا باشچیلیق ائدن اوچ قارابئچه ایره‌لی گلیب یوخودا اسنوبالین سؤزلرینه قورشالاناراق ناپلئونون بویروقلارینا قارشی چیخدیقلارینی بویونلارینا آلدیلار. اونلار دا قانا بلندیلر. بئچه‌لرین آردینجا  بیرقاز، گئچن ایل، آلتی بوغدا باشاغینی اوغورلاییب گئجه‌له‌یین یئدیگینی آنلاتدی. سونرا بیر قویون، ‌اسنوبالین باسقیسی آلتیندا سو گؤلمجینه  ایشه‌دیگینی دیله گتیردی. ایکی قویون ایسه ناپلئونون وورغونو اولان بیر قوجا قوچو آرخالاریجا قوشدوراراق اؤسکورکدن اؤلدوردوکلرینی بویونلارینا آلدیلار. بوتون سوچلولار دورمادان اؤلدورولدولر. قانلی‌ یارغیلاما سونا ائرینجه  دونقوزلار ایله کؤپکلردن  باشقا هامی داغیلیشدی.

           حئیوانلار سارسیلمیشدیلار. آنلایا بیلمیردیلر بونلار هانکیسی داها قورخونجدور: اؤلنلرین اسنوبال ایله ال بیر اولوب دؤنوکلوک یاپمالاری یوخسا ایندیجه تانیق اولدوقلاری بو آجیماسیزجاسینا یارغیلاما؟ قانلی آسیب کسمه‌لره تانیش اولان حئیوانلار بو قورخونجولوقدا گؤرونتولری، جونز چاغیندا بئله گؤرمه‌دیکلرینی دوشونوردولر. جونز گئدندن بری، کیمسه بیر سیچانی بئله اولسون  اؤلدورمه‌میشدی. حئیوانلار یوللارینی تپه‌ده‌کی؛ یاریمچیلیق قالمیش یئل دگیرمانینا ساری اگدیلر. زیروه‌ده ، بیربیرلرینی ایستماق ایسته‌ییرمیشلر کیمی قیسیلیشیب اوتوردولار. پیشیکدن باشقا هامی اورادا ایدی.کلووئر، باکسئر، موریئل، بئنجامین، اینکلر، قویونلار، تویوقلار ، قازلار.(حئیوانلار ناپلئونون بویروغو ایله آولودا توپلاشاندا، پیشیک بیردن بیره آرادان یوخ اولموشدو) بیر سوره کیمسه دینمه‌دی. بیرجه باکسئر آیاق اوسته ایدی. او قیوریلیب ‌ آچیلاراق گل-گئت ائدیر فیشیلتی ایله  قویروغونو ساغا- سولا یئلله‌ییر هردنده  چاشقین-چاشقین کیشنه‌ییردی. سونوندا دیله گلیب:

-« من بونو باشا دوشمورم. من بئله بیر اولایلارین تارلامیزدا باش وئردیگینه اینانانمیرام. بیز بیر یئرده یانلیش یاپمیش  اولمالی‌ییق. منجه بو دورمدان چیخماغین تکجه یولو برک ایشله‌مکدیر. من یاریندان بیر ساعات تئز اویانیب  آرتیق  چالیشاجاغام.»-دئیه‌رک ، دؤرد نالا داش  اوجاغینا قوشوب  گون باتانادک  ایکی آرابا داش، یئل دگیرمانینا داشیدی.

              حئیوانلار دینمز-سؤیله‌مز کلووئرین باشینا توپلاشدیلار. اوستونده دوردوقلاری تپه  بؤلگه‌نین  گئنیش بیر گؤرونتوسونو گؤزلری‌نین اؤنونده سرگیله‌میشدی؛ آنایولادک اوزانان بؤیوک اوتلاق، یونجالیق‌، مئشه‌لیک، سوگؤلمجی، شوخوملانمیش اکینلیکده یئنیجه جوجرمیش یاشیل بوغدالار، بورولاریندان بوروق- بوروق  توستو چیخان  قیرمیزی داملی تارلا ائولری حئیوانلارین گؤزلرینی اوخشاییردی. آچیق بیر یاز آخشامی ایدی. تارلا گونشین ساچاقلاریندان  پار- پار پاریلداییردی. او ایندییه‌دک حئیوانلارین گؤزلرینده بیر بئله گؤزل گؤرونمه‌میشدی.حئیوانلار  بیردن بیره  شاشقینلیقلا، بو اوجسوز-بوجاقسیز تارلانین  قاریش -قاریشینی اؤزلرینکی اولدوغونو آنیمسادیلار. کلووئر یاماجلارا باخارکن  گؤزلری یاشاردی. او دوشوندوکلرینی دیله گتیره بیلسه ایدی کسینلیکله «حئیوانلارین آماجی ، آیاغا قالخیب  اینسانلاری قووماقدان بو دئییلدی» دئیه‌جکدی. کلووئر یئنه دوشونجه‌یه دالدی. قوجا مئیجر او گئجه حئیوانلاری دئوریمه چاغیراندا  اونلار  بو قانلی قورخولو گؤرونتولری آختارمیردیلار. اونلار، قوجا مئیجرین  اؤن گؤردوگو، قامچی اولمایان، آجلیق اولمایان، هامی ائشید اولاراق یاشایان، هره اؤز چیخاریجا چالیشان، گوجلولری گوجسوزلره دایاق اولان ( قوجا مئیجر دانیشارکن  او یئتیم  اؤردک  بالالارینا  دایاق اولدوغو کیمی) بیر توپلوم دالیسیجا ایدیلار.آنجاق ایندی اونون  یئرینه-او بیلمیردی نییه- ناپلئونون هر یئرده  سوموسونن ایتلری‌نین قورخوسوندان  کیمسه  اؤز دوشونجه‌لرینی آچیب آغارتماغا  اورک ائله‌میر، یولداشلاری گؤز گؤره‌سی  بوش یئره سوچلاناراق دیدیلیب داغیدیلیر. قوشقوسوز اونون بئینیدن دؤنوکلوک-مونکلوک گئچمیردی. نئجه اولسا، او ایندی گئچینه‌جکلری‌نین جونز چاغیندان یاخشیراق اولدوغونو آنلاییردی. هله اوسته‌لیک او، اینسانلارین قاییدماسینا قارشی گؤره‌ولرینی ده اونوتمامیشدی. او هر دورومدا، دئوریمه، ناپلئونا باغلی قالاجاغینی، وئریلن بویروقلاردان  بویون قاچیرمایاجاغینی ، ایشلرینده چالیشقان اولاجاغینی  یاخشی بیلیردی. آنجاق او هله‌ده « آماجیمیز جونزون قورشونلارینا سینه گرمکدن، چابالایاراق یئل دگیرمانی تیکمکدن  بو دئییلدیر» دئیه دوشونوردو.  او بو دوشونجه‌لری بئینینده  تپ چئویر ائدیردی نه ایسه سؤیله‌مگه بیر سؤزجوک تاپا بیلمیردی. سونوندا  او دورومو بئله گؤرونجه  هر نه‌یین یئرینه  اینگیلیس  حئیوانلاری ماهنیسی‌نین اوخوماغینی  اویغون گؤردو. چئوره‌سینده اوتورموش حئیوانلار اونونلار سس-سسه وئره‌رک  ماهنینی اوچ کره  ایندییه‌دک  اوخومادیقلاری بیر بیچیمده چوخ اویوملو اولاراق یاواش-یاواش سیزیلدادیلار. حئیوانلار ، ماهنینی اوچونجو  دؤنه اولاراق بیتیردیکلرینده اسکوئیلر ایکی کؤپگین ائشلیگینده ، ایلته‌جک  اؤنملی بیر بیلدیری وارمیش کیمی یاخینلاشاراق:

-« یولداش ناپلئونون  اؤزل تاپشیریغی ایله بوگوندن  اینگیلیس حئیوانلاری ماهنیسی‌نین اوخونماسی یاساقلانیر» دئدی.

موریئل بریلده‌یه‌رک: « ندن؟» دئدی.

اسکوئیلر سرتجه: «آرتیق اونو اوخوماغا گره‌ک یوخ یولداش! او دئوریم دؤنه‌می‌نین ماهنیسی ایدی. ایندی ایسه دئوریم سونوجلانیب، ساتقینلارین اؤلدوروشو ایله بو گون دئوریمیمیز  سون آشاماسینا چاتدی. آرتیق  ایچ  و دیش  دوشمنلریمیزین ایکیسیده یئنیلگییه اوغرامیش دورومدادیر. بیر اینگیلیس  حئیوانلاری ماهنیسینی اوخوماقلا یاراناجاق  اوستون توپلومون موشتولوغونو  وئریردیک. ایندیسه بیز اؤزله‌دیگیمیز او اوستون توپلومو قورموشوق . بونا گؤره، اونون اوخونماسی‌نین آنلامسیز اولدوغو آی کیمی آیدیندیر.»

              قویونلارین  اوزون سورن ، یئرسیز « دؤرد آیاق، یاخشی ایکی آیاق یامان » ملشمه‌لری اولماسایدی کسینلیکله،‌ قورخدوقلارینی اونوتموش بیر نئچه حئیوان بو اویغولامایا  دیلله‌‌نه‌جک ایدی.

              اینگیلیس حئیوانلاری ماهنیسی داها اوخونمادی. قوشوقچو مینی موس اونو یئرینه  آیری بیر ماهنی قوشدو:

              موتلویوق،  موتلویوق ،   حئیوانلار تارلاسیندا

              قارداشیق،  یولداشیق، حئیوانلار تارلاسیندا

              قورخونون،  یوخلوغون،  آنلامینی بیلمه‌ریک

              اؤزگوروک، اؤزگوروک،    حئیوانلار تارلاسیندا

              بئله‌لیکله، یئنی ماهنی  سودگونلری، سحر  بایراغین قالدیریشیندان سونرا اوخوتدورولوردو. آنجاق حئیوانلار ، بو ماهنی‌نین نه سؤزلرینی  نه‌ده هاواسینی اینگیلیس حئیوانلاری ماهینیسیجا سئومیردیلر.

 

سککیزنجی بؤلوم

              اؤلدوروشلردن تؤره‌نن  قورخولار یاتیشینجا، حئیوانلارین بیر نئچه‌سی  بویروقلارین آلتینجی  بؤلومونده « کیمسه  باشقاسینی  اؤلدومه‌ملی‌دیر» دئیه یازیلدیغینی آنیمسادیلار یا آنیمسادیقلارینی  ساندیلار. اونلار دونقوزلارین یانیندا  بو قونویا توخونماق ایسته‌مه‌سه‌لرده، اؤلدوروشلرین بو بویروقلا اوزلاشمادیغینی دوشونوردولر.  بونونلار ایلیشکین، کلووئر بئنجامیندن آلتینجی بویروغون اوخونماسینی ایسته‌دی. بئنجامین هئپ اولدوغو کیمی‌، بئله ایشلره قاریشمادیغینی ایره‌لی چکه‌رک  اوخوماقدان چکینینجه کلووئر گئدیب موریئلی گتیرملی اولدو. موریئل بویروغو  اوخودو: « ندنسیز کیمسه باشقاسین اؤلدورمه‌ملی‌‌دیر.» بویروغون باشینداکی  سؤزجوک  ندنسه حئیوانلارین یادداشیندان سیلینمیشدی. بئله‌لیکله  اونلار بویروقلارین پوزولمادیغینی گؤردولر. ساتقینلارین  اسنوبال ایله ال بیر اولماسی اونلارین  اؤلدورمه‌سینه  یاخشی بیر ندن ساییلا بیلردی.

              او ایل حئیوانلار اؤتن ایللردن چوخراق ایشله‌دیلر. گونلوک چؤل ایشلری ایله یاناشی یئل دگیرمانی‌نین  دووارلارینی ایکی قات ائنیلیراق هؤرمک لاپ بئللرینی بوکموشدو. اونلار هردن جونز چاغیندان  چوخراق چالیشیب آزراق یئدیکلرینی دوشونوردولر. اسکوئیلر، سود گونلری تویناغیندا  اوزونسوو بیر کاغیذ توتاراق اونون اوزوندن چئشیدلی یئیه‌جکلرین اوره‌تیمی‌نین گئچمیشه گؤره یوزده ایکی یوز، یوزده اوچ یوز  یا یوزده بئش یوز  آرتدیغینی بیلدیریردی. الده بیر قانیت یوخویدوحئیوانلار اسکوئیلرین سؤزلرینه اینانماسینلار.  اؤزه لیکله اونلار، آرتیق  جونز دؤنمی‌نین  نئجه‌لیگینی ده آیدینجا آنیمسامیردیلار. هردن حئیوانلارین اوره‌گیندن: « کئشگه  بو سایلارین، یوزده‌لرین آرتیشی یئرینه  بیر آز گونلوک یئیه‌جگیمیز آرتاردی!» گئچیردی.

  ایندی ناپلئونون بوتون تاپشیریقلاری دونقوزلارین بیری‌نین-اؤزه لیکله اسکوئیلرین-آراجیلیغی ایله  چاتدیریلیردی. ناپلئون اون بئش گونده بیر آنجاق گؤرونوردو.  باییرا چیخاندا ایسه، قورجو کؤپکلردن باشقا، بیر قارا خوروزدا جارچیلار کیمی قاباغیندا  یورویه‌رک  قوققولو قوسو ایله  گلیشینی بیلدیریردی.

              ناپلئونون تارلا ائوینده باشقالاریندان آیری اولاراق  اؤزونه اؤزگو بیر اوتاقدا قالدیغی سؤیله‌نیلیردی. او یئمکلرینی  قوناق اوتاغی‌نین دولابیندان گتیریلمیش  چینی قاب-قاجاقدا  یئییردی. یئمک یئیرکن ایسه  ایکی کؤپک اونا قوللوق ائدیردیلر. بیلدیریلمیشدی؛ بوندان بئله  هر ایل ناپلئونون دوغوم گونو، دئوریم تؤره‌نلری کیمی  توفنگ آتیلاجاقدی.

              حئیوانلار آرتیق  ناپلئونو تؤرنسل  یولداشیمیز، اؤندیمیز  آدلاری ایله سسله‌ییب آدینی یالین اولاراق چکمیردیلر. دونقوزلار گونده اونا « حئیوانلارین آتاسی »، « اینسانلاری ییلدیران»، «قویونلارین چوبانی »، «اؤردکلرین  آرخاداشی » کیمی یئنی تاخما آدلار قوشوب  قوندارماقدان یورولموردولار. اسکوئیلر  توپلانتیلاردا، گؤزلری‌نین یاشی یاناقلاریندان یووارلانارکن، ناپلئونون اوسوندان، اوره‌گی‌نین کؤور‌کلیگیندن، بوتون حئیوانلارا ( اؤزلیکله  باشقا تارلالاردا کؤله کیمی یاشایان موتسوزحئیوانلارا) اولان درین سئوگیسیندن دانیشیردی. آرتیق تارلادا بوتون باشاریلار اونون آدینا یازیلیردی. اؤرنک اولاراق بو گونلر ایکی تویوغون دانیشماسیندا: «من اؤندریمیز ناپلئونون گؤستریشی ایله آلتی گونده بئش دؤنه یومورتلامیشام» و یا ایکی اینگین سو ایچرکن قونوشماسیندا: « بو گون باشچیمیزین کؤلگه‌سی آلتیندا سو نه ایچملی‌دیر» کیمی سؤزلری چوخ ائشیتمک اولاردی. مینی موس تارلاداکی گئنل دویغونو « یولداش ناپلئون» باشلیقلی قوشقوسوندا بئله دیله گتیردی:

              اؤکسوزلرین آتاسی‌سان

              موتلولوغون قایناغی‌سان

              اورکلرین  آغاسی‌سان                           

              یاشا  یاشا  جان ناپلئون                         

              تارلامیزا  شان ناپلئون

 

              بیز یاتارکن سن سن اویاق

              آج قالیرسان  بیزلر دویاق                       

              سن سن بیزه  آرخا، دایاق

              یاشا،  یاشا  جان ناپلئون                        

              تارلامیزا      شان ناپلئون

             

              یارین  بیر یاوروم اولاجاق                      

              بؤیویوب یاشا دولاجاق                         

              دونیایا  هارای سالاجاق

              یاشا یاشا جان ناپلئون

              تارلامیزا  شان ناپلئون

ناپلئون قوشقونو بگنیب تاپشیردی اونو بؤیوک آمبارین دوواریندا، یئددی بویروغون قانشاریندا یازسینلار. اسکوئیلر قوشقونون یانیندا آغ بویاقلا ناپلئونون یاناکی بتیمینی‌ ده چکدی.

              بو آرادا ناپلئون وامپئرین آراجیلیغی ایله قونشو تارلالارلا یاریمچیق قالان دانیشیقلارینی  بیر یانلیق  ائله‌مگه چالیشیردی. آغاجلار هله ساتیلمامیشدی. فیریدریک پیلینگتوندان چوخراق آغاجلاری آلماغا ماراقلی ایدی. آنجاق اؤنردیگی فییَت چوخ دوشوک ایدی. بو سیرادا فیریدریکین، حئیوانلار تارلاسینا سالدیری دوزنله‌مکده اولدوغو  سؤیلنتیسی یئنیدن دیللره دوشدو. اسنوبالین پینچفیلد تارلاسیندا گیزلندیگی سؤیله‌نیلیردی. یایین اورتالاریندا  اوچ تویوق اسنوبالا قورشالاناراق ناپلئونو اؤلدورمک ایسته‌دیکلری بیلدیریلدی. تویوقلار دورمادان اؤلدورولدولر. ناپلئونون ساغلیغینی قوروماق اوچون  یئنی اؤنلملر آلیندی. او یاتارکن دؤرد کؤپک یاتاغی‌نین دؤرد بوجاغیندا کئشیک چکیردیلر. پینکای آدلی بیر چوشقا ایسه، ‌ناپلئونو آغیلاماسینلار دئیه اونون یئمکلری یئمه‌دن اؤنجه دادماغا گؤره‌و‌لندیریلدی. بوسوره‌ده ناپلئونون  آغاجلاری ویلینگتونا ساتاجاغی ائله‌جه‌ده بیر پارا اورونلری دگیش توقوشو اوزه‌رینده فاکسفود  تارلاسی ایله قالارغی بیر آنلاشییا گئچه‌جگی آچیقلاندی. ناپلئون ایله پیلینگتونون  ایلیشگیلری وامپئرین آراجیلیغی ایله ایلیملاشماقدا ایدی. حئیوانلار  ویلینگتونا بیر اینسان اولدوغو اوچون اینانمیردیلار آنجاق اونو قورخوب ایگرندیکلری فیریدریکدن یاخشی سانیردیلار. یایین سون گونلرینده یئل دگیرمانی‌نین تیکیشی بیتدیکجه  فیریدیریکین گؤزله‌نیلن آزغینجا  سالدیریسی‌نین  سؤیلنتیسی‌ده گئت‌گئده  گوجله‌‌نیردی. دئییلیردی: « فیریدریک ییرمی الی‌توفنگلی کیشی باشینا ییغاراق تارلایا سالدیرماق ایسته‌ییر. او قاباقجادان  شهرین یوکسک یارغیلیق- گوونلیک  گؤره‌و‌لیلری‌نین بوغونو یاغلاییب  تارلانی اله گئچیرسه کیمسه اونو یییه‌ لیک بلگه‌‌سی قونوسوندا سوروشدورماسین». بونلارلا یاناشی فیریدریکین حئیوانلار یاپدیغی آجیماسیزجاسینا  داورانیشلاریندان  قورخونج اؤیکولر پینچفیلددان دیشارییا سیزماقدا ایدی: « فیریدریک قوجا بیر آتی قامچی آلتیندا اؤلدورموش. او اینکلری آجلیقدان قیرماقدادیر. او بیر ایتی دیری دیری اوجاغا  آتیب یاندیرمیش. او آخشاملار  خوروزلارین آیاقلارینا اولگوج باغلایاراق دؤیوشدوروب اگلنیر».  حئیوانلار  یولداشلاری‌نین باشینا گلنلری ائشیدنده  اؤفکه‌دن قانلاری  قایناماغا  باشلاییردی. اونلار چیغیر باغیر سالاراق یولداشلارینی اینسانلارین الیندن قورتارماق اوچون پیچفیلد تارلاسینا سالدیرماق بویروغو ایسته‌ییردیلر. آنجاق اسکوئیلر اونلارا: « دوشونجه سیز ایشلره قالخیشمایین، یولداش  ناپلئون هر نه‌‌یی  یولونا قویاجاق »دئیه اویاریردی. فیریدرکه قارشی اولومسوز دویغولار گئتدیکجه آرتماقدا ایدی. بیر گون  ناپلئون  بؤیوک آمباردا بولوناراق ، آغاجلاری  فیریدریکه ساتماغی ایندییه‌دک بئینیدن بئله گئچیرمه‌‌دیگینی دیله گتیره‌لی دئدی: «‌فیریدریک  کیمی آلچاق بیریسی ایله  آلیش وئریش کیشیلیکدن اوزاق بیر ایشدیر». او سؤزلری‌نین سونوندا دئوریم ساوجیلاری گویرچینلره بوندان بئله فوکسفود تارلاسینا وارمامالارینی، « اینسانلارا اؤلوم» یئرینه ایسه، بوندان بئله « فیریدریکه اؤلوم»  هارایی چکمه‌لرینی  ایسته‌‌دی.

              یایین سون گونلرینده اسنوبالین  باشقا بیر قورغوسونون اوستو آچیلدی. بوغدالیغی آلاق اوتو باسمیشدی. اسنوبال گئجه‌له‌یین گلیشلری‌نین بیرینده اکیله‌‌‌‌‌جک بوغدالارا آلاق اوتو  توخومو قاتمیش ایمیش. آغیلدا بؤیورتلن دنه‌سی اوداراق  اؤزونو اؤلدورن بیر ائرکک قاز، بوگیزلی ائیلمده اسنوبالا یاردیم ائتدیگینی، اؤزلجه  اسکوئیلره سؤیله‌‌میشدی. یئنه صاندیقلار آچیلیب  پامبیقلارتؤکولدو: « اسنوبالین اینکلیک ساواشیندا، بیر درجه‌لی قوچاق حئیوان اؤدولو  آلماسی  اونون اویدوردوغو بیر یالان ایمیش. داها دوغروسو او-چوخلاری‌نین ساندیقلارینا قارشین- نه تکجه  اؤدول آلمامیشدی ترسینه ساواشدا گؤستردیگی قورخاقلیق اوزوندن قینانمیشدی بئله». یئنه حئیوانلارین بیر سوروسو بونو ائشیده‌لی تومدولار آنجاق اسکوئیلر چوخ تئز یانیلدیقلارینی اونلارا ایناندیرا بیلدی.

              گوزون گلیشی ایله اوساندیریجی چابالامالار سونوجلاندی. یئل دگیرمانی‌نین تیکیشی، چؤلون ییغیب ییغیشدیرماسی ایله بیرگه باشا چاتدی. بوتون چتینلیکلره، باجاریقسیزلیقلارا، آراجلارین ایکللیگینه، ایشلرین دوزگلمزلیگینه، اسنوبالین آزغینلیغینا باخمایاراق  یئل  دگیرمانی دئییلن  گونونده  بیتیب  یالنیز آیقیتلارین قوشوشدورلماسی قالیردی. وامپئر  آیقیتلاری آلماق اوچون دانیشیق آپارماقدا ایدی. حئیوانلار یورولسالاردا؛ اؤیونوردولر. اونلار یاراتدیقلاری بو باش یاپیتین  باشینا فیرلاناراق آلقیشلاییجی گؤزلرله اونو سوزوردولر. یئل دگیرمانی گؤزلرینه قاباقکیندان قات قات گؤزل گؤرونوردو. دووارلارین ائنلیلیگی اؤنجه‌کیندن ایکی قات آرتیق ایدی. ایندی بونو، پارتلاییجی ماده‌دن باشقا بیر شئی ییخا بیلمزدی. حئیوانلار نئجه اللشدیکلرینی، نه انگللر آشدیقلارینی آنیمسادیقدا، اوره‌‌تج ایشله‌‌ییب یئلکن فیرلانینجا  یاشاملاریندا نه دگیشیکلیکلر یاراناجاغی دوشوندوکده، یورغونلوق جانلاریندان چیخیب، آتیلیب دوشه‌رک یئل دگیرمانی‌نین باشینا دولانیب  سئوینجدن  قیشقیریق سالدیلار. ناپلئون  اؤزو، جارچی خوروزو ایله قوروجو  کؤپکلرینی یانینا سالاراق ایشین بیتیشینی  گؤزدن گئچیرمک اوچون یئل دگیرمانیا گلدی. او حئیوانلارین باشاریسینی  قوتلایاراق  یئل دگیرمانینا ناپلئون آدی وئریله‌جگینی بیلدیردی.

              ایکی گون سونرا، حئیوانلار  اؤزل بیر اوتوروم اوچون  بؤیوک آمبارا چاغیریلدیلار. اونلار، ناپلئونون آغاجلاری فیریدریکه ساتماسینی  ائشیدینجه گؤزلری  بؤیودو. فیریدریکین داشیرغالاری یارین  آغاجلاری آپارماغا  گله‌جکدی. ناپلئون  اوزده ویلینگتونلا ایلگیله‌نیرکن دالدا  فیریدیکله گیزلی آنلاشما یاپماقدا ایمیش!

              بوتون باغلانتیلار فوکسفود تارلاسی ایله کسیلیب ویلینگتونا اولمایان قالمایان  یامان-یوووزلار گؤندریلدی. گؤیرچینلرین پینچفیلد تارلاسینا گئتمه‌لری یاساقلانیب تاپشیریلدی؛ بوندان بئله «‌‌فیریدریکه اؤلوم» هارایی یئرینه  ««ویلینگتونا اؤلوم» هارایی تپسینلر. ناپلئون سوره‌‌نی ایتیرمه‌دن حئیوانلاری فیریدریکین تارلایا سالدیرما  اؤیکوسونون  باشدان باشا  یالان اولدوغونا، حئیوانلاری ایله کؤتو داورانما سؤیلنجه‌‌‌سینه بؤیوک اؤلچوده  قول قاناد وئریلدیگینه  ایناندیردی. بوتون  بو سؤیلنتیلر، اسنوبال ایله بویروقچولاری وریندن یاییلمیش اولمالی ایدی. سونوندا  اسنوبالین نه تکجه پینچفیلد تارلاسیندا گیزلنمه‌‌دیگی  ترسینه  ایللر بویو ویلینگتونون  نؤکری اولاراق  فوکسفود تارلاسیندا-دئییلنلره گؤره -سود گؤلونده یاشادیغی آیدینلاشدی. ناپلئونون بو قورنازلیغیندان  دونقوزلارین چیچکلری چاتلاییردی. ناپلئون اوزده  ویلینگتونلا آرا سازلاماسی، فیریدیکی  آغاجلارین فییتینی  اون ایکی لئره  قووزاماغا  زورلامیشدی. اسکوئیلر آرایا گئچه‌رک:

-« یولداش ناپلئونون  کیمسه‌یه اینانماسی-ایستر بئله فیریدرک اولسون-  اونون اولاغان اوستو اوسونو گؤستریر. فیریدریک  آغاجلارین پولونو چئک دئییلن قورو بیر کاغیذلا  اؤده‌مک ایسته‌ییر‌دی آنجاق یولداش ناپلئون  آییقلیقلا آغاجلاری  آپاریلمادان  اؤنجه پوللاری-بئش لئره‌لیک اولاراق-قاباقجادان  آلاجاغینی سؤیله‌‌دی. ائله او دئین کیمی ده اولدو. ایندیسه یئل دگیرمانی‌نین بوتون آیقیتلارینی آلماغا  یئترینجه پولوموز وار.» دئیه  سؤیله‌دی.

           بو اولایین آردینجا، آغاجلار  توواراق  تارلادان بوشاتیلدی. آغاجلار آپاریلدیقدان سونرا، پوللاری حئیوانلارا گؤستر‌‌‌مک اوچون بؤیوک آمباردا  اؤزه‌ل بیر اوتوروم گئچیریلدی.

           قوشا میدالینی تاخمیش ناپلئون، گولومسه‌یه‌رک  قالدیرمین  اوستونده کی سامان یاتاقدا اوتوراراق  اؤزنله چینی بوشقابا دوزلموش  پوللاری قاباغینا قویموشدو. حئیوانلار  بیره‌‌ر- بیره‌ر گلیب  بوشقابا بیر  گؤز آتیب گئچیردیلر. باکسئر  بورنونو  پوللارین آراسینا  سوخوب ایله‌‌مک ایسته‌‌دیکده سولوغوندان  اسکناسلار تیتره‌‌‌‌شیب خیشیلدادیلار.

              اوچ گون سونرا تارلادا اینانیلماز بیر قارغاشا قوپدو. اوزونه  اؤلوم توزو قونموش  وامپئر قوشا تکرینی قووا- قووا  جیغیردان آولویا  گیردی. او آولونون اورتاسیندا قوشا تکرینی یئره تولازلایاراق  تله‌‌سیک  تارلا ائوینه ساری قوشدو. آز سونرا  ناپلئونون  اؤفکه‌لی  بوغونوق باغیرتیسی  اوتاغیندان  ائشیدیلدی. اولانلارین چاوی  یانغین کیمی هر یانی بورودو. پوللار قوندارما ایمیش!  فیریدریک آغاجلاری هئچه آلمیشدی.

              ناپلئون تلم-تله‌‌‌سیک حئیوانلاری چاغیریب توتوق بیر سسله فیریدیکین اؤلدوروش بویروغونو وئردی: «فیریدریک توتوقلانینجا دیری- دیری قازاندا  قایناتیلاجاقدیر.» او یئنه حئیوانلاری  اویاراراق آرتیردی:

-« بوندان بئله، بو آزغینلیقدان کؤتوسونو ده گؤزله‌‌ملی‌ییک . فیریدریک ایله قولداشلاری هر آن تارلایا  سالدیرا بیلرلر.»

              بونون آردینجا، تارلانین گیریش  یئرلرینده گؤزتچیلر  یئرله‌‌شدیریلدی. اوسته‌لیک  دؤرد گؤیرچین  پلینگتونون کؤنلونو آلیب یئنیدن باغلانتی قورماق اوچون فوکسفود تارلاسینا گؤندریلدی. ائرته‌‌سی گون حئیوانلار  دان یئملرینی  یئیرکن گؤزتچیلر توواراق گلیب  فیریدریک ایله قولداشلاری‌نین  آلا قاپیدان ایچرییه گیردیکلرینی بیلدیردیلر. حئیوانلار  قورخمادان  باسقینچیلاری قارشیلاماغا قوشدولار. اوتقو بو کز  اینکلیک  ساواشینداکی  کیمی قولای گؤرونموردو. فیریدریک‌‌گیل  آلتیسی توفنگلی اولاراق  اون بئش کیشی ایدیلر. اونلار حئیوانلارین اللی آدیملیغینا چاتجاق اود یاغدیرماغا باشلادیلار. حئیوانلار آچیلان قورشونلارین قورخونج پارتلاییشلارینا دایانانماییب-ناپلئون ایله باکسئرین چابالارینا  باخمایاراق- چابوق گئری چکیلدیلر. حئیوانلارین بیر نئچه سی یارالانمیشدی.

              حئیوانلار تارلا یاپیتلارینا سیغیناراق  اوغرون-اوغرون دلیک-دئشیکدن  باییرا گؤز تیکدیلر. بوتون اوتلاق  ائله‌جه‌ده یئل دگیرمانی دوشمنین الینده ایدی. ناپلئون اؤزونو ایتیرمیشدی. او قونوشمادان  آشاغی-یوخارییا گل-گئت ائده‌رک شوشلنمیش  قویروغونو سگیریردی. اومان گؤزلر  فوکسفود تارلاسینا تیکیلمیشدی .ویلینگتونون آداملاری یاردیمدا بولونسایدیلار اونلارین قازانمالاری اولاسی‌‌ایدی. بو سیرادا  دونن فوکسفود تارلاسینا گؤندریلن  گؤیرچینلر گئری دؤندولر. بیری‌نین آیاغیندا  ویلینگتوندان بیر ساو وار ایدی: « باشینیزا هر نه گلسه آزدیر.»

              بو آرادا فیریدریک ایله قولداشلاری یئل دگیرمانینا چاتمیشدیلار. حئیوانلار  اومودسوزجاسینا  اونلارا باخیردیلار.  ایکی کیشی  توخماق ایله دلگچ گتیردیلر. اونلار یئل دگیرمانینی  ییخماق ایسته‌ییردیلر.

-« اولاناقسیزدیر. » ناپلئون باغیردی.« قورخمایین یولداشلار! بیز  دووارلاری  چوخ  قالین  تیکمیشسک  اونو یئددی-سگگیز گونه بئله ییخا بیلمزلر.»

              بئنجامین  کیشیلرین یاپدیقلارینی اؤزنله گؤزدن گئچیرمکده ایدی. اونلار توخماق-دلگچله  دگیرمانین  خیمیندا  بیر دلیک دلدیلر. بئنجامین  آغیز-بورنونو اگیشدیره‌رک: « منده  بئله دوشوندوردوم. نه ائدیکلرینی گؤرمورسونوز مو؟ ‌آز سونرا  دلیگی  باروت ایله دولدوراجاقلار.»دئدی.

              حئیوانلار قورخا- قورخا بکله‌ییردیلر. سیغیناجاقدان دیشارییا چیخماق قورخولو ایدی. آز سونرا آداملارین  دؤرد یانا قاچدیقلاری گؤروندو. بونون آردینجا قولاق باتیریجی بیر گورولتو یئری گؤیو سیلکه‌له‌دی.‌‌‌‌گؤیرچینلر گؤیه اوچوشدولار.  ناپلئوندان باشقا بوتون حئیوانلار  اؤزلرینی  اوزو قویولو یئره آتیب  آیاقلاری ایله  اوزلرینی گیزلتدیلر...

               حئیوانلار  اؤزلرینه گلدیکده  یئل دگیرمانی اولان  یئردن  قارا دومان قالخماقدا ایدی. سونوندا  آغیر- آغیر اسن  یئل توستو بولودونو سوپوروب آپاردی. یئل دگیرمانی یوخ اولموشدو. حئیوانلار  بو گؤرونتونو گؤره‌لی قانلاری قایناماغا باشلادی. آز اؤنجه اومودسوزلوغا، قورخویا قاپیلان حئیوانلار  بو آشاغیلیق داورانیشدان  قودوردولار. اونلار باغیر- باغیر باغیراراق  بویروق آلمادان  هامیسی بیرلیکده  اؤج آلماق  اوچون  دوس- دوغرو  دوشمنه ساری یومولدولار. اونلار آرتیق یاغدیریلان  قیزیل  قورشونلاری اؤنمسه‌میردیلر. بو بیر اؤلوم-دیریم ساواشی ایدی. بارماقلاری تتیکدن چکلمه‌ین  آداملار حئیوانلارلا گؤیوس-گؤیوسه گلینجه  دگنکله، آغیر چکمه‌لری ایله دؤیمگه  باشلادیلار. بیر اینک، اوچ قویون، ایکی قاز اؤلدورولدو. یارالانمایان کیمسه- دئمک اولار- یوخویدو. آرخا سیرادان سالدیرینی  یؤنه‌تن  ناپلئون بئله، قویروغونون اوجوندان قورشونلاناراق یارالانمیشدی. آداملارا گلینجه اونلاردا ساغ بوراخیلمامیشدیلار؛ اوچونون باشی باکسئرین تپیکلری ایله یاریلمیشدی. بیر باشقاسی‌نین قارنی ایسه  اینکلرین بیری‌نین بوینوز ایله ‌ییرتیلمیشدی. جئسی ایله بولوبئل  بیر کیشی‌نین تومانینی اگنیندن سیییریب چیخارتماق  اوزه‌ره ایدیلر.              

              ناپلئونون گؤستریشی ایله چیغین یانیندا بوسقودا یاتمیش دوققوز کؤپک آنسیزین  سالدیرینجا آداملارین  اوره‌گینه قورخو دوشدو.  اؤزلرینی قوشاتیلمانین  بیر آددیملیغیندا گؤردولر. فیریدریک: « جانینی گؤتورن قاچسین» دئیه قیشقیرینجا، اؤدلک دوشمنلر اکینلیگین دیبینه ساری قاچدیلار. اونلار  تیکانلی چیغی آشانادک  سون  دورتمه-تپیکلری  حئیوانلاردان یئدیلر.

              حئیوانلار یورغون-آرغین ایدیلار؛ آنجاق قازانمیشدیلار. تارلایا ساری  دؤننده  اوتلارین  اوزه‌رینه سریلمیش  اؤلدورولموش یولداشلاری‌نین گؤرونتوسونو گؤرونجه چوخلاری‌نین گؤزلری  یاشاردی. یئل دگیرمانیندا  اوزگون-سوسقون دوراقساندیلار . دوغرو ایدی؛ یئل دگیرمانی یوخ اولموشدو. او خیمیندان داغیلمیشدی. آرتیق اونو یئنیدن تیکمک اوچون  گئچمیشده‌کی کیمی  تؤکولن داشلاردان  یارارلانماق اولمازدی. داشلار بئله یوخ اولموشدو. پارتلاییشین گوجو داشلاری  یوزلر آددیم  اوزاقلارا تولازلامیشدی. سانکی بورادا  باشلانیشدان  یئل دگیرمانی یوخویموش!

              حئیوانلار تارلا ائوینه یاخینلاشارکن ساواش سوره‌سینده آنلاشیلماز ندنلره گؤره آرادا-بره‌ده  گؤرونمه‌ین  اسکوئیلر قویروغونو  بوللایاراق  گولومسه‌یه-گولومسه‌یه  قاباقلارینا قاچدی. بو سیرادا تارلا  ائولریندن  تؤرنلرده  آتیلان توفنگین سسی ائشیدیلدی.

-« نه اوچون  توفنگ آتیلیر؟» باکسئر سوروشدو.

-« باشاریمیزی قوتلاماق اوچون یولداش!» اسکوئیلر دوشونو قاباغا وئره‌رک گورلادی.

ساواش سیراسیندا  نالی دوشموش، تویناغی یاریلمیش، دیزلری قانامیش، بالدیرینا قیزیل قورشونلار سانجیلمیش  باکسئر  شاشاراق یئنه سوروشدو:

-« سیز هانسی باشاریدان دانیشیرسینیز؟»

-« بیز دوشمنی  توپراغیمیزدان، بو قوتسال حئیوانلار تارلاسیندان قوومادیق می؟»

-« آمما اونلار بیزیم ایکی ایللیک امگیمیزی، یئل دگیرمانیمیزی  دارماداغین ائتدیلر.»

-« بونون نه  اؤنمی وار بیز بیر باشقاسینی تیکه‌ریک .بیزیم کؤنلوموز ایسته‌سه  بیری‌نین  یئرینه آلتیسینی بئله تیکه بیله‌ریک . یولداش سیز گؤردوگوموز بو بؤیوک ایشین دگرینی آنلایابیلمه‌ییرسینیزمی؟ دوشمن  اوستونده دوردوغوموز بو توپراغی  الیمیزدن آلمیشدی.  اؤندریمیز یولداش ناپلئون ساغ اولسون!  اونون چاباسی ایله  ایندی بیز  تورپاغیمیزین قاریش قاریشینی  گئری آلمیشیق.»

-« بئله‌لیکله  ایندی بیز  اؤزوموزونکو اولانلاری یئنه  اؤزوموزه قایتارمیشیق»

-« بئله دیر یولداش ! بو بیزیم  ان بؤیوک  باشاریمیزدیر.»

              حئیوانلار دوشه-قالخا آولویا واردیلار. باکسئرین  یارالاری برک سیزیلداییردی. او یئل دگیرمانی‌نین یئنیدن تیکمه‌سینی گؤزلری‌نین اؤنونده جانلاندیراراق  ایندیدن  اؤزونو بو آغیر ایشه  گؤره‌‌ولندیریردی؛ آنجاق ایلک کز اولاراق اون بیر یاشینا واردیغینی، داها گئچمیشده کی کیمی  یاخشی ایشله‌یه بیلمه‌یه‌‌‌جگینی  آنلاییردی.

              حئیوانلار یاشیل تویناق-بوینوزلو بایراغین دالغالانماسین گؤردوکده ، توفنگین یئددی دؤنه  آچیلیشین ائشیتدیکده، ناپلئونون  قوتلاما دئمه‌جین دینله‌دیکده  نه بؤیوک  باشاری  قازاندیقلاری  آنلاماغا باشلادیلار.

              ساواشدا اؤلدورولموش حئیوانلارین  قویلاما تؤره‌نی گئچیریلدی. باکسئر ایله کلووئر اؤلو آراباسی یئرینه قوللانیلان  داشیرغانی چکیردیلر. ناپلئون  اؤزو لاپ اؤن سیرادا یورویوردو.

              حئیوانلار ایکی گون بایرام توتدولار. اونلار بو سوره‌ده چالدیلار، اوخودولار، توفنگ آتدیلار. اؤدول اولاراق  مال-داوارین هره‌سینه بیر آلما، قانادیلیلارا  بیر سخیم بوغدا، ایت- پیشیگین هره‌‌سینه ایسه اوچ دنه‌ چؤچه وئریلدی. وورشمایا « یئل دگیرمانی ساواشی » آدی وئریلدی. ناپلئون  یئنیجه چیخارتدیغی یاشیل بایراق میدالینی  اؤزونه سوندو. ایکی گونلوک  اگلنجه‌لر، شؤلنلر، چال- چاغیرلار  اوغورسوز  قوندارما پوللار اولایینی بیر یوللوق  یادلاردان چیخارتدی.

               نئچه گون سوووشدوقدا، دونقوزلار  تارلا ائوی‌نین آلت اوتاغیندا، ائوی آلارکن  گؤزلردن یاییینمیش بیر صاندیق  ایچکی تاپدیلار. او گئجه تارلا ائویندن گلن اینگلیس حئیوانلاری قارشیقلی ماهنیلارین سسی بوتون باییرداکیلاری شاشدیردی. ساعات دوققوزلاردا  جونزون اسکی  بؤرکونو قویان  ناپلئونون، تارلا ائوی‌نین دال قاپیسیندان چیخدیغی، آولودا  بیر سوره آتیلیب دوشه‌رک  قوشدوغو، سونرا فیرلانیب یئنه ایچرییه گیردگی آچیق -سئچیک گؤروندو.

              ائرته‌سی گون، دان یئری‌نین سؤکولدوگونه باخمایاراق تارلا ائوینی سوسقونلوق بورویوب باییرا چیخان یوخویدو. ساعات دوققوزدا  اسکوئیلرین دبرجه‌له‌نه-دبر‌جه‌له‌نه  دیشارییا چیخدی. اونون گؤزلری شیشمیش، قویروغو ساللانمیش، اؤزوده برک سایری ایمیش کیمی گؤرونوردو. او حئیوانلاری توپلاشدیراراق  اوزوجو  بیر اولایین اوستونو آچدی:

-« یولداش ناپلئون اؤلور».

              حئیوانلار  ایچین-ایچین آغلاشدیلار. سس-کوی اولماسین دئیه تارلا ائوی‌نین ائشیگینه سامان دؤشه‌نیب  حئیوانلار بارماق اوجوندا گل -گئت ائدیردیلر. اونلار دولوقساناراق بیر بیرلریندن  سوروشوردولار:

-« یولداش ناپلئون اؤلورسه بیر نه ائتمه‌لی‌ییک؟»

              یاییلان بیر سؤیلنتییه گؤره، اسنوبال سونوندا، ناپلئونو آغیلاماغین یولونو تاپمیشدی. گون اورتا چاغی  اسکوئیلر  ناپلئونون سون سؤزلرینی ایلتمگه گلدی:

-« ایچکی ایچن کیمسه گره‌ک اؤلدورولسون».

              آخشام چاغی  ناپلئونون دورومو بیر آز یاخشیلاشدی. ائرته‌سی گون اسکوئیلر ناپلئونون ساغلیغینی الده  ائتدیگینی سؤیله‌دی. اؤیله سونراسی  ناپلئون ایشی‌نین باشینا قایتدی. بیریسی گون  ناپلئونون، وامپئره، ویلینگتون بازاریندان اونا « آرپا سویو چکمه» بیتیگی آلماسی‌نین  تاپشیردیغی  اؤیره‌نیلدی.

              یئددی گون سونرا، ناپلئونون گؤستریشی ایله امکلی اولاجاق حئیوانلارین اوتلاماسی، دینجلمه‌سی اوچون آییرت  ائدیلمیش، باغچانین اؤته‌سینده کی چیمنلیک سورولدو. چیمنلیگین  کؤده‌لشدیگینه گؤره اورانین یئنیدن اکیله‌جگی  بیلدیریلدی آنجاق  چوخ چکمه‌دی اورادا ناپلئونون  آرپا اکمک ایسته‌دیگی آنلاشیلدی.

              حئیوانلار بیر گون، باش چیخارتمادیقلاری، شاشیرتیجی بیر اولایا  تانیق اولدولار. اونلار گئجه ساعات اون ایکیده، آولودان گلن خاریلتی سسیندن، آغیللاریندان ائشیگه تؤکولدولر. آی ایشیغی ایدی. بؤیوک آمبارین دوواری‌نین آیاغیندا، یئددی بویروق یازیلان یئرده ، اسکوئیلر باییلاراق ایکی‌یه بؤلونموش نردیوانین اوزه‌رینه سریلمیشدی. هنده‌ورینده  بیر فنر، بیر چؤتکه، بیرده یئره جالانمیش آغ بویاق قوتوسو وارایدی. کؤپکلر تله‌سیک اسکوئیلری چنبره آلیب  آیاق اوسته دورا بیلینجه اونو تارلا ائوینه گؤتوردولر. بئنجامیندن  باشقا کیمسه  باش وئرنلرین آنلامینی قانا بیلمه‌دی؛ آنجاق اودا  بیر شئی سؤیله‌مه‌ییب  یالنیز باشی توولاماغا یئتیندی.

              نئچه گون سونرا ،  موریئل  یئددی بویروغو گؤزدن  گئچیریرکن  بئشینجی بویروغو  یانلیش اؤیرندگینی باشا دوشدو.  او بئشینجی بویروقدا: « کیمسه ایچکی ایچمه‌ملی‌دیر» دئیه یازیلدیغینی دوشونوردو؛ آنجاق  یادیرغانمیش بیر سؤزجوک وارایمیش. بئشینجی بویروغون دوزو بئله ایدی:

« اؤلچوسوز  کیمسه ایچکی ایچمه‌ملی‌دیر.»

 

 دوققوزونجو بؤلوم

              باکسئرین یاریلمیش تویناغی‌نین توختاماسی اوزونا چکدی. حئیوانلار، ایکی گونلوک اوتقو تؤرنی بیتینجه، یئل دگیرمانی‌نین یئنیدن تیکمه‌سینه باشلادیلار. آغریلارینی باشقالاریندان گیزلتمگی اؤزونه قیوانج سایان باکسئر، بیرگون بئله اولسون ایشله‌مکدن ال چکمک ایسته‌‌میردی. او آخشاملاری، تویناغی‌نین برک آجیدیغینی  کلووئرین قولاغینا پیچیلاداییردی. کلووئر یارانین سیزیلتیسینی کسمک اوچون اوستونه چئننمیش اَم اوتو قویوردو. بئنجامین ایله کلووئر، باکسئری چوخ چابالادیغینا گؤره قیناییردیلار. کلووئر: «اؤزونو قورومالیسان، آتلارین آغ جیگرلری چوخ دایاناقسیز اولور» دئیه‌ اونو اویاریردی؛ آنجاق بو سؤزلره قولاق آسمایان باکسئر: « بیرجه دیله‌گیم، امکلیک یاشیما چاتمادان اؤنجه، یئل دگیرمانی‌نین یولا دوشمه‌سینی گؤرمک‌دیر.» دئییردی.

              حئیوانلار تارلاسی‌نین  یاسالاری اولوشاندا، امکلیلیک یاشی، آتلار ایله دونقوزلارا اون ایکی، اینکلره اون‌دؤرد، ایتلره دوققوز، قویونلار ایله گئچیلره یئددی، تویوقلار ایله قازلارا ایسه بئش ایل کسیلمیشدی. بوندان باشقا  امکلیلره وئریله‌‌‌‌‌جک گؤزه‌گلیم آیلیق اوزه‌رینده ایسه دانیشلمیشدیر. ایندییه‌دک کیمسه گئرچکدن امکلی اولوب  آیلیق آلمامیشدی. بوناگؤره  سون گونلرده  بو قونو اوزه‌رینده سیجاق دارتیشمالار گئدیردی.  باغچانین اؤته‌سینده‌کی  کیچیک چیمنلیکده  آرپا اکیلدیگینه گؤره  بؤیوک اوتلاغین بیر بوجاغینا چیغ چکه‌رک امکلیلره  اوتلاما-دینجلمه یئری اولاراق آیریلاجاغی سؤیله‌نیلیردی. دئییلنلره گؤره: امکلی  اولان آتلارا، آیدات اولاراق  یایدا گونده  بیر باتمان تاخیل، قیشدا  ییرمی بئش باتمان  یونجا ایله بیردنه یئرکؤکو، گئنل دینجلیش گونلرینده ایسه-اولسا- بیردنه آلما وئریله‌‌‌‌‌جک ایدی. باکسئر گلن ایل، یایین سون آییندا اون ایکی یاشا دولاجاق ایدی.

              گئچینه‌جک یئنه چتینلشمیشدی. قیشین سویوغو بیلدیرکیجه ایدی ایسه، یئیه‌جک بیلدیرکیندن آز ایدی. دونقوزلار ایله ایتلردن باشقا بوتون حئیوانلارین گونلوک یئمی بیر داها آزالمیشدی. اسکوئیلر گونلوک یئمین ائشید اولاراق  بؤلوشدورمه‌سینی حئیوانلیق‌ ایلکه‌لرینه آیقیری اولدوغونو آچیقلایاراق چتینلیک چکمه‌دن گؤز گؤره‌سی یئم  چاتیشمازلیغی‌نین اولمادیغینی  حئیوانلارا  قاندیرا بیلدی. او هئپ آزالتماق سؤزجوگو یئرینه  ساهمانا سالماق سؤزونو ایشله‌دیردی. او جونز چاغینا گؤره  تارلانین  گلیشمی‌نین چوخ  گؤزه‌گلیم اولدوغونو وورغولایاراق قورو سسله ویر-ویر اوخودوغو سای ساییش اوزوندن تاخیل، یونجا، یئرکؤکو کیمی اورونلرین آرتدیغینی، آز ایشله‌دیکلرینی، ایچدیکلری سویون نئجه‌لیگی‌نین یاخشیلاشدیغینی، یاشام سوره‌سی‌نین آرتدیغینی، کؤرپه اؤلوم ایتیمی‌نین آزالدیغینی، آغیللاردا دؤشه‌مه‌ده‌کی  سامانلارین آرتدیغینی، میغمیغا- میلچکلرین  اینجیک وئرمه‌لری‌نین آزالماسینی  آیرینتیلاری ایله  حئیوانلارا قانیتلاییردی. حئیوانلار اسکوئیلرین بوتون دئدیکلرینه اینانیردیلار. داها دوغروسو، جونز دونمینده‌کی دورومون  نئجه‌لیگی آرتیق اونلارین یادداشیندان سیلینمیشدی. اونلار  ایندی بیرجه گونلری‌نین آغیر گئچدیگنی،گون چیخاندان گون باتانادک ایشله‌‌دیکلرینی، هئپ اوشویوب آج قالدیقلارینی آنلاییردیلار. بونونلا بئله، اونلار دوشونوردولر؛ قوشقوسوز جونز چاغیندا گونلری بونداندا  قارایمیش ایمیش. اسکوئیلرین سؤیله‌دیگی کیمی اونلار  او دؤنمده کؤله‌لر کیمی  یاشاییرمیشلار آنجاق ایندی اؤزگور ایدیلر.

              گوزده، یئنی آغیزلار یئم یئمگه آچیلدی. دؤرد دونقوز  بیر گونده، چوجوقلایاراق بیرلیکده  اوتوز بیر چوشقا  تارلا حئیوانلارینا آرتیردیلار.  چوشقالار تارلانین  بیریجیک ائرکک دونقوزو ناپلئون کیمی آلا-بولا ایدیلار. بوناگؤره هانکی بئلدن گلدیکلرینی هزیر وورماق چتین دئییلدی. ناپلئون آغاج-کرپیچ آلیناندا تارلا ائوی‌نین باغچاسیندا  چوشقالارا اوخول  تیکه‌جگینی بیلدیردی. آنجاق اوخول آچیلانادک اؤزو  چوشقالاری پیشیرمه اوتاغیندا اؤیوته‌جکدی. چوشقالارین  باشقا گنج حئیوانلارلا اویناماسی  یاساقلانیب گونلرینی  باغچادا  ایدمان یاپماقلا گئچیریردیلر. بو سیرا دا  یئنی یاسالانان  گل-گئت قوراللارینا گؤره حئیوانلار ایله دونقوزلار  یولدا-یولاقدا توشلاشاندا حئیوانلار دایانیب دونقوزلارا یول وئرملی‌ایدیلر. بیرده دونقوزلار هانکی گؤره‌و‌ده اولورسا اولسونلار ، آیریجالیق اولاراق  سود گونلری قویروقلارینا  یاشیل شیریق باغلایا بیلردیلر.

              تارلا باشاریلی بیر ایل گئچیرسه‌ده پول چاتیشمازلیغی هله‌ده اؤزونو گؤستریردی. اوخول تیکیشی اوچون قوم، کرپیچ، کیرج آلینمالی ایدی. ائله‌جه‌ده یئل دگیرمانی‌نین اوره‌تجینی الده ائتمک اوچون  ایندیدن پول بیریکدیرمک گره‌کیردی. بونلاردان باشقا گره‌ک چیراغ یاغی، موم، ناپلئونون میزی‌نین اوستونه قویولماسی اوچون قند آلیناردی. (ناپلئون  قندین کؤکلدیجی اولدوغونا گؤره یئمه‌سینی باشقا دونقوزلارا  قاداغان ائله‌میشدی.) بیریانداندا، توکتیلمیش نال، ایپ، کؤمور، تئل، چیوی، ایت چؤچه‌سی  کیمی شئیلرین یئری یئنیدن دولدورولمالی ایدی. گره‌کسینیملری  گئدرمک اوچون  بیر تایا یونجا ایله یئرآلما اورونون بیر بؤلومو ساتیلدی. یومورتا ساتیشی یئددیجه‌ده آلتی یوزه یوکسلدی (بونا گؤره تویوقلارین  تؤره‌مه‌سی‌نین قاباغی آلیندی). چیراغ یاغی‌نین توکنمه‌مه‌سی اوچون آغیللاردا فنر یاندیرما  یاساقلاندی. بونلارا باخمایاراق دونقوزلارین یئترینجه دینجلیک ایچینده یاشادیقلاری اوزاقدان بللی‌ ایدی. اونلارین گونو گوندن شیشمانلاشدیقلاری بیر بایاغی گئرچک ایدی. دونداران آیی‌نین سون گونلری‌نین بیرینده، آخشام اوستو  حئیوانلارین  ایندییه‌دک بورونلارینا دگمه‌‌دیگی، آغیز سولاندیریجی بیر قوخو، جونز چاغیندان قاپالی قالمیش  پیشیرمه  اوتاغی‌نین یاپیشیغینداکی چاخیر چمکه دامیندان  یاییلماغا باشلادی. حئیوانلارین بیریسی آرپا پیشیریلدیگینی سؤیله‌دی. حئیوانلار آج گؤزلوکله  هاوانی قوخولایاراق  گئجه ایستی آرپا نوغالاسی   یئیه‌جکلرینی  ساندیلار؛ آنجاق اومدوقلاری  بوشا چیخدی. ائرته‌سی گون بیلدیلدی: بوندان بئله باغچانین اؤته‌سینده‌کی چیمنلیکده آرپا اکیلیب اورونو ایسه دونقوزلارا آییرت  ائدیله‌‌‌‌‌جکدیر. چوخ چکمه‌دی دونقوزلارین گونده بیر بارداق ، ناپلئونون ایسه بیر قاب آرپاسویو ایچدیگی آنلاشیلدی.

              آرتیق یاشام دوزه‌یی‌نین گئچمیشه گؤره چوخ یوکسک اولدوغونو حئیوانلارین باشینا چالماقلا هر چئشید یوکو اونلارین بئلینه یوکله‌مک اولوردی. بوتون چاتیشمازلیقلارا قارشین ماهنی اوخومالار، دئمجلر، گؤستریلر چوخالمیشدی. ناپلئونون  بویروغو ایله حئیوانلار قازاندیقلاری اوغورلاری قوتلاماق اوچون یئددی ده بیر کؤنوللو  اولاراق  گؤستری یاپمالی ایدیلار. اونلار  بللی بیر ساعاتلاردا ایشلریندن ال چکه‌رک  چیریکسل بیر  بیچیمده، تارلانین  آلانیندا  یورویوش یاپیردیلار. سورونون  اؤن سیراسیندا  دونقوزلار، اونلارین آردینجا ایسه آتلار، اینکلر، قویونلار، تویوقلار  یئرله‌شیردیلر. سورونون ساغیندا سولوندا گودوکچو کؤپکلر، باشیندا ایسه ناپلئونون قارا بئچه‌سی یورویوردو. باکسئر ایله کلووئر سورونون اورتاسیندا بوینوز- تویناقلی یاشیل بایراق ایله « یاشاسین  یولداش ناپلئون » یازیسینی داشیییردیلار. یورویوش بیتینجه، ناپلئونون اونورونا قوشولان قوشقولار سؤیله‌نیلیردی. تؤره‌نین سونوندا اسکوئیلر اورونلرین آرتیشی‌نین یوزده‌لرینی اوخویوردو. تؤره‌نده آرا-سیرا  توفنگده آتیلیردی. گؤستریلرین ان بؤیوک وورغونلاری قویونلار ایدی. کیمسه-دونقوزلارین گؤزوندن ایراق-بو بوش یئره  سویوق دایانمالارا دیلنسه ایدی اونلار قولاق باتیریجی: «دؤرد آیاق یاخشی، ایکی آیاقلی یامان» مرهه‌مرلری  ایله  سسینی  بوغاردیلار. بو تؤره‌ن حئیوانلارین چوخونون بگنیسینی قازانمیشدی. حئیوانلار، اؤزلری  اؤز آغالاری اولدوقلارینی، سومورولمادیقلارینی آنیمسادیقدا ایچلری دینجلیردی. بیر یانداندا، ماهنی اوخومالار، یورویوشلر، اسکوئیلرین سای ساییشلاری، قورشونلارین آچیلیشی، بایراغین دالغالانماسی، قارا بئچـه‌نین بانلاری قیسا بیر سوره‌ده اولسا، قارینلاری‌نین آج اولدوغونو  اونلارا  اونوتدوروردو.

              گولن آییندان حئیوانلار تارلاسی‌نین جومهوری اولدوغو بیلدیریلدی. بونا گؤره  جومهور باشقانی سئچیلمه‌لی ایدی. بو گؤره‌وین  بیریجیک آدایی، ناپلئون،  اوی‌بیرلیگی ایله باشقان سئچیلدی. سئچکی گونو اسنوبال ایله جونزون ایلیشکیلری‌نین آیرینتیلارینی آیدینلاشدیران یئنی بلگه‌لرین بولوندوغو سؤیله‌ندی. بو بلگه‌لرده، اسنوبالین  اینکلیک ساواشیندا، تارلانی دوشمنلرین الینه گئچیرمک اوچون دوزنله‌دیگی قورغودان باشقا، وورشمانین قیزغین چاغیندا، « یاشاسین اینسانلیق» هارایی چکه‌رک  اینسانلارین قولونا  قاتیلیب حئیوانلارا قارشی سالدیریا گئچدیگی، اونون بئلینده کی یارالار ایسه ناپلئونون دیشلری‌نین ایزی اولدوغو آچیقلاندی.

              یایین اورتالاریندا قارا قارغا موزئر، نئچه ایلدن سونرا  یئنه تارلایا قایتدی. او ایگنه اوجو بئله دگیشمه‌میشدی. گئچمیشده‌‌کی کیمی  گوه‌زه‌له‌مکدن باشقا  ایشی یوخویدو. او یول اوستونده کی کؤتوگون  اوستونه قونوب قارا قانادلارینی بیربیرینه چالاراق  گلیب گئدنلره، یئکه دیمدیگی ایله گؤیو گؤستره‌رک  ایناملا دئییردی:

-«اورادا، یولداشلار دوز اورادا، گؤردوگونوز او قارا بولودون آرخاسیندا، دادلی داغ اؤلکه‌‌سی یئرله‌شیب، بیز قارا گونلو حئیوانلار، جانیمیز بو آجیناجاقلی  یاشاییشدان قورتولاندا،  سونسوزادک موتلولوق ایچینده اورادا دینجه‌‌له‌جه‌ییک»

              مؤزئر یوکسک اوچوشلاری‌نین بیرینده، بیر کره اورا گئدیب یاخیندان هر یئرده چؤچه، دادلیجا سپه‌لندیگینی، چیغلارین اوستونده سوجوق بیتدیگینی اؤز گؤزلری ایله  گؤردوگونو  سؤیله‌ییردی. حئیوانلارین چوخو  اونون سؤیلنجه‌لرینه اینانیردیلار. اونلار یاشادیقلاری آجیناجاقلی دورما باخدیقدا  باشقا بیر یئرده   بوندان یاخشیراق  بیر دونیانین  اولماماسینی  بؤیوک بیر اینصافسیزلیق ساییردیلار. بو آرادا  ان آنلاشیلماز شئی، مؤزئرله ایلگیلی، دونقوزلارین توتومو ایدی. دونقوزلار بیر یاندان دادلی داغ اؤلکه‌سینی لاغا قویوب اونون یالان اولدوغونو سؤیله‌ییردیلر  بیر یانداندا  گونده موزئره  بیر پای آرپا سویو وئریب قویوردولار ایشله‌مه‌دن تارلادا وورنوخسون.

              باکسئرین تویناغی ساغالینجا او داها قاتیراق ایشه یاپیشدی. گئرچکدن او ایل حئیوانلار کؤله‌لرکیمی ایشله‌ییردیلر. گؤنده‌‌‌لیک چؤل چالیشمالاری، یئل دگیرمانی‌نین یئنی‌دن‌تیکمه ایشلری ایله یاناشی، بایرام آییندان  چوشقالارین  اوخولونون تیکینتیسده باشلانمیشدی. ایشین آغیرلیغینا، یئیه‌جگین آزلیغینا قاتلانان بیرجه باکسئر ایدی. او گوجونون  توکنمکده اولدوغونو آچیب آغارتماسادا گؤرکمی‌نین دگیشدیگی هرنه‌یی آچیقلاییردی. اونون ساغریسی بوزوشوب  دریسی اسکیسی کیمی پاریلدامیردی. حئیوانلار، یاز اوتلاری چیخینجا اونون دیرچه‌له‌جیگینی اوموردولار؛ آنجاق یاز گلدی‌ده اونون قیریشلاری آچیلمادی. هردن او گوجه‌نَرک داشلاری  اوجاغین یوققوشوندا  یوخاری چکدیگینده  توتقودان باشقا اونو آیاقدا ساخلایان بیر شئیین اولمادیغی سئزیلیردی. او زیققانا-زیققانا ایشله‌یرکن  دوداغیندا «من برک چالیشاجاغام» اوخونوردو آنجاق‌ سسی چیخمیردی. بئنجامین ایله کلووئر  یئنه اونو ساغلیغینی قوروماق اوچون اویاردیلار آنجاق او یئنه سؤزه باخمادی. باکسئرین دوغوم گونون اون ایکی ایللیگی یاخینلاشیردی آنجاق اونون یئل دگیرمانینا یئترینجه داش توپلاماقدان باشقا  بیر دوشونجه‌‌سی یوخویدو.

              بیرگون آخشام چاو دوشدو؛ باکسئر یئل دگیرمانیندا اوه‌ده‌یه دوشوب قالخانمیر. او تک باشینا داش داشیماغا گئدیگی اوچون سؤیله‌ننلر دوغرو اولمالی ایدی. آز سونرا  ایکی گؤیرچین  یئل کیمی گلیب  باکسئرین بؤیرو اوسته ییخیلیب قالخانمادیغینی سؤیله‌دیلر. حئیوانلارین آز قالا هامیسی تپه‌یه ساری قوشدولار. باکسئر ، آرابانین ایکی قولو آراسینا دوشموشدو. بوینونون یئره دوشدوگوندن باشینی قووزایانمیردی. گؤزلری سؤنوک، گؤود‌ه‌سی جومجولوق تر ایچینده ایدی.جَوجیگیندن قان آخیردی. کلووئر یانیندا دیزه چؤکه‌رک هؤنگورتو ایله :

-«باکسئر نولوب ؟» دئیه سوروشدو.

-«کؤکسومدور...» باکسئر بوغوق سسله فیسیلدادی. « اؤنملی دئییل، منجه سیز منسیزده یئل دگیرمانینی بیتیره‌بیلرسینیز، یئترینجه داش توپلانیب، نه ایسه من بیر آی سونرا امکلی اولاجاغام،دوزونو ایسته‌سن امکلیلیگیمیده گؤزله‌ییردیم،آرتیق بئنجامینده قوجالیب کئشگه  اونودا امکلی ائده‌لر  اوندا منده داریخمارام.»

کلووئر: «بیز یاردیم آلمالی‌ییق؛ بیری قاچیب  اولانلاری  اسکوئیلره آنلاتسین» دئیه باغیردی. حئیوانلار دورمادان  سورو ایله  تارلا ائوینه ساری آخیشدیلار. باکسئرین  یانیندا کلووئر ایله بئنجامیندن باشقا کیمسه قالمادی. بئنجامین  اوزون قویروغو ایله اونون  میلچکلرینی  قوووردو. اون بئش دقیقه سونرا اسکوئیلر گلیب چیخدی. او اوزگون، دارغین گؤرونوردو. او باکسئرله قایغیداشلیق ائده‌رک دئدی:

-« یولداش ناپلئون، تارلانین ان ایلقارلی ایشچیسی، باکسئرین  بو گتیرمزلیگیندن  چوخ اوزولوب اونو ساغالتماق اوچون  پیلینگتوندا سایری ائوینه گؤندرمگی دوزنله‌ییر.»

              حئیوانلار بونو دویجاق بیر آز سیخیلدیلار. ایندییه‌دک مولی ایله اسنوبالدان باشقا کیمسه تارلادان آیریلمامیشدی. اونلار سایری یولداشلارینی  اینسانلارین  اللرینه سالماق ایسته‌میردیلر. اسکوئیلر قولایلیقلا: «ویلینگتونداکی بایتال باکسئری بیزلردن یاخشیراق  ساغالدا بیلر » دئیه حئیوانلاری قاندیردی.

              بیر بوچوق ساعات سونرا، باکسئر  بیر آز  اؤزونه گلدیکده  گوجلولوکله آیاغا قالخیب  آخسایا- آخسایا آغیلینا گئدیب کلووئر  ایله بئنجامینین  ساماندان دوزلتدیکلری یاتاغین اوزه‌رینه  اوزاندی. باکسئر ایکی گون آغیلدا قالدی. کلووئر گونده ایکی یول یئمدن سونرا اونا دونقوزلارین یویونما اوتاغیندان تاپیب گؤندیکلری آلا چالان  سیوی اَمدن  ایچیردیردی. آخشاملار ایشدن سونرا کلووئر  باکسئرین باشی اوسته اوتوروب  اونونلا قونوشوردو. بئنجامین ایسه دینمز سؤیله‌مز   قویروغو ایله اونون میلچکلرینی قوووردو. باکسئر باشینا گلن اولایدان چوخدا اوزلمه‌دیگینی دیله گتیره‌رک دئییردی: «بیرآزجیق توختاسام اومود وار بیر ایکی داها یاشایام» او دؤزومسوزلوکله  بؤیوک  اوتلاغین بیر بوجاغیندا  گئچیره‌جگی  دینج گونلری گؤزله‌ییردی. او ایلک کز اولاراق  اوخوماغا، اؤیرنمگه، بئینینی گلیشدیرمگه بوش واخت تاپاجاقدی.  او بو سوره‌ده  الیفبانین قالان ییرمی دؤرد  حرفینی  اؤیرنمگی  دوشونوردو.

              ایکی گون سونرا، گون اورتا چاغی،  بیر آت آراباسی باکسئری آپارماغا گلدی. حئیوانلار چؤلده بیر دونقوزون گؤزه‌تیمی  آلتیندا یئر کؤکولری آلاق ائتمکده ایدیلر. اونلار بئنجامینین  آنقیراراق دؤردنالا تارلا ائولری یؤنوندن گلدیگینی گؤرونجه شاشیردیلار. حئیوانلار ایلک کز اولاراق  اونون  جوشقولاندیغینی گؤرودولر.

-« تلسین ! تلسین! باکسئری آپارییرلار.»  او باغیردی.

              حئیوانلار گؤزتچی دونقوزدان گؤستریش آلمادان  ایشلریندن ال چکیب  تارلا ائوینه ساری قوشدولار.آولودا  اوستو اؤرتولو، یانلاری یازیلی، ایکی آتلی بؤیوک بیر آرابا دایانمیشدی. آرابانین اوتوراجاغیندا تولکویه بنزه‌ر  یاستی بؤرکلو بیر کیشی اگلشمیشدی. باکسئر آغیلیندا دئییلدی. حئیوانلار  آرابانین باشینا ییغیشاراق: « اسن قال باکسئر! اسن قال باکسئر! گوله گوله» دئیه سسلشدیلر.

-«آنلامازلار! قانمازلار! » بئنجامین  اوفاجیق  تویناقلارینی  یئره  زیپلایاراق  آرابانین باشینا فیرلانا-فیرلانا آنقیردی: «مایماقلار! آرابانین  اوستونده نه یازیلدیغینی گؤرمورسونوزمو؟»

موریئل سؤزجوکلری  هوججوله‌مگه باشلایینجا  بئنجامین  اونو قیراغا ایته‌له‌ییب اوخودو: «

                                               آلفئرد سیمونون آت کسرگه‌سی

                   ویلینگتوندا : چریش، دری، سوموک توزو، ایت پیشیک یئمی اورتیجیسی  

آنلاییرسینیزمی بو نه دئمکدیر؟  باکسئری  اؤلدورمگه آپاریرلار»

حئیوانلار قورخودان چیغیریشدیلار. بو آندا سوروجو  کیشی آتلاری قیرمانجلادی. آربا یئریندن  اوزولوب آولودان چیخماغا تلسدی. حئیوانلار وار گوجلری ایله هارای سالاراق  آرابانین دالیسیجا دوشدولر. آرابا تووا دولدو. کلووئر چتینلیکله شیشمان  گؤوده‌سینی حئیوانلارین آراسیندان چیخارداراق آرابایا یاناشیب:

-« باکسئر! باکسئر!» دئیه قیشقیردی.

باکسئر سانکی  سسلری ائشیدمیش ایمیش اونجه قاشقا آلنینی سونرا ایسه باشینی آرابانین آرخا آچیشقاسیندان  گؤستردی.

- «باکسئر!»  کلووئر یئنه قورخو ایله باغیردی.« تئز اول دوش،  ائن آشاغی، سنی اؤلدورمگه آپاریرلار» . بوتون حئیوانلار  بیرلیکده چیغیردیلار:

-«باکسئر ائن آشاغی ! باکسئر ائن آشاغی!»

آرابا توواراق  حئیوانلاردان اوزاقلاشماقدا ایدی. باکسئرین  هارایلاری دویوب دویمادیغی  بللی دئییلدی.آنجاق سون آنلاردا قاشقا آلینینی آچیشقادان چکینجه  گورولتولو  تپیکله‌مه سسلری آرابانین  ایچیندن ائشیدیلدی. او آرابانی سیندیریب چیخماغا چالیشیردی. بیر زامانلار باکسئرین بیر تپیگی بو آرابانی دارماداغین ائده بیلردی. آمما نه یازیق ایندی اونون گوجو توکنمیشدی. تپیکله‌مه سسلری گئتدیکجه آزالاراق کسلیدی. اومودلارینی اوزموش حئیوانلار  بو دؤنه  آرابانی دایاندیرماق اوچون اونو چکن آتلارا یالوارماغا باشلادیلار:

-« یولداشلار! یولداشلار!  نولور قارداشینیزی اؤلومه آپارمایین!»

آنجاق  یئل بئیین آتلار، نه باش وئردیگینی آنلامادان،‌ قولاقلارینی ایتیلدیب داها  توواراق قاچماغا باشلادیلار. باکسئری باشی داها آچیشقادان گورونمه‌دی. ائنینده سونوندا بیری‌نین بئینینه  قاچیب آلا قاپینی باغلاما یئتیشدی آنجاق چوخ  گئج اولموشدو. آرابا قاپیدان چیخیب توزلارا قاریشمیشدی. باکسئری بیر داها گؤرن اولمادی.

     اوچ گون سونرا، باکسئرین، ویلنگتونون سایری ائوینده، بوتون باخمالارا، یئتیشمه‌لره قارشین اؤلدوگو  بیلدیریلدی. اسکوئیلر بو قارا ساوی  ایلتمگه گلدی. او تویناغی ایله گؤزلری‌نین یاشینی سیله‌رک دئدی: « باکسئر سون سولوغونو آلانادک من باشی‌نین  اوستونده ایدیم. او ایندییه‌دک گؤردوگوم ان دویغوسال گؤرونتو ایدی. باکسئر دانیشماغا اینجاری قالمادیغی اوچون قولاغیما پیچیلدایاراق دئدی: « یولداش تکجه یئل دگیرمانی‌نین بیتیشینی گؤرمه‌دیگیم اوچون اوزولورم» . یولداشلار!  اونون اؤلورکن سؤزلری بو ایدی: « ایره‌لی یولداشلار ایره‌لی ! دئوریم آدینا ایره‌لی ! یاشاسین یولداش ناپلئون ! یاشاسین حئیوانلار تارلاسی! ناپلئون هرنه دئسه دوزدور».

بورادا  اسکوئیلرین تاویری بیردن بیره دگیشدی.او بیر سؤز دئیه‌جکمیش کیمی بیر آز سوساراق  بالاجا هیز گؤزلرینی  قوشقو ایله اویان بویانا آخیتدی.

-« ائشیتدیگیمه گؤره  باکسئری سایری ائوینه آپاراندا حئیوانلارین  آراسیندا  سارساقجا  بیر سؤیلنتی یاییلمیش. حئیوانلارین بیر نئچه‌سی  باکسئری داشییان آرابانین اوستونده کی « آت کسرگه‌سی » یازیسینی گؤره‌لی  دوشونمه‌دن  اونو اؤلدورمگه گؤتورولدوگونو سؤیله‌میشلر. بو ایناناسی دئییل . بئله دوشونن گئرچکدن بوش بئیین اولمالی‌دیر. کسینلیکله حئیوانلار  سئویملی اؤندرلرینی  یاخشی تانیییرلار. او بئله ایشلره  قالخیشماز» اوسکوئیلر قویروغونو  بوللایاراق بیر آشاغی بیر یوخاری گئدیب  باغیردی.« آرابانین اوستونده کی یازیلارا گلینجه سایری ائوی‌نین بایتالی اونو یئنیجه بیر آت کسندن آلدیغی اوچون  هله گیره‌وه تاپانماییب  اونون اسکی آدی‌نین اوستونو بویاتدیرسین.»

حئیوانلار بونو ائشیده‌لی ایچلری دینجلدی. اسکوئیلر باکسئری اولاغان اوستو یئتیشمه‌لر آلتیندا اولدوغونو ، ناپلئونون دگرینه باخمادان  اونا آلدیغی باهالی املری بیربیر سایینجا حئیوانلارین بوتون  قارامسارلیغی بیر یوللوق اولاراق سیلینیب گئتدی. یولداشلاری‌نین دینجلیک ایچینده اؤلدوگو  دوشونجه‌سی اوزونتولرینی یاتیشدیردی. ناپلئون سود گونو توپلانتیسیندا بولوناراق  باکسئرین اونوروندا قیسا بیر سؤیله‌و  یاپدی. او باکسئرین  اؤلوسونون  تارلایا گتیریب گوممه‌سی‌نین اولاناقسیز اولدوغونا توخوناراق  تارلا ائوی‌نین  باغچاسنداکی چیچکلردن  هؤرولوب قویلاغی‌نین  اوستونه قویماسی اوچون  بویروق وئردیگینی آچیقلادی. او بیرنئچه گون سونرا دونقوزلارین، باکسئرین اونورونا  بیر آنما شؤلنی گئچیره‌جکلرینی بیلدیردی. اوحئیوانلاری باکسئرین یولونو توتماغا چاغیراراق  سؤزلرینی  اونون « من برک چالیشاجاغام ، یولداش ناپلئون  نه دئسه دوزدو» اؤز دئییملری ایله بیتیردی.

              شؤلن  گونو، سحر چاغی ویلینگتوندان گلن بیر چرچی آراباسی، تارلا ائوینه  بؤیوک بیر آغاج صاندیق  بوراخدی. او گئجه قوناقلیق، چالیب اوخوماق سسی ایله باشلاندی، چیغیر باغیر سسی ایله سوردو، بارداقلارین چاققیشدیرما سسی ایله  سونا ائردی.

              یارین ،گون اورتایادک تارلا ائوینده  بیر قیمیلداما گؤرونمه‌دی. دونقوزلارین  بللی اولمایان بیر یئردن  ایچکی آلماق اوچون  پول اله گتیردیکلری سؤیله نیلیردی.

 

 اونونجو بؤلوم

              گون دولاندی، آی دولاندی، ایللر گئچدی. آرتیق حئیوانلار تارلاسیندا  کلووئر، بئنجامین، قاراقارقا موزئر، بیر ده نئچه دونقوزدان باشقا کیمسه دئوریم گونلرینی آنیمسامیردی. دئوریم چاغی‌نین حئیوانلاری‌نین چوخو اؤلموشدو. مؤریئل اؤلموشدو، بلوبئل، جئسی، پینچئرده اؤلموشدولر. جونزدا اؤلموشدو . او بؤلگه‌نین  اوجقار بیر بوجاغیندا اسریکلرین  دینجلیش  ائوینده، اجل شرابینی ایچمیشدی. اسنوبال اونوتولموشدو. باکسئری بیر ایکی یاخین  یار یولداشیندان باشقا کیمسه تانیمیردی. کلووئر قوجامان بیر قیسراق اولموشدو. گؤزلرینه قارا سو گلیب  سوره‌کلی قول قیچ آغریسیندان سیزیلداییردی. ایکی ایل اؤنجه امکلی اولاجاقدی آنجاق ایندییه‌دک تارلادا کیمسه گئرچکدن امکلی اولمامیشدی. امکلی حئیوانلارا  بؤیوک اوتلاغین بیر بوجاغیندا آیریلاجاق  یئرین سؤز ساوی  چوخدان ایدی بوشلانیلمیشدی.

              ناپلئون ایندی اللی باتمانلیق ، اولغون بیر قابان اولموشدو. اسکوئیلرین چوخ کؤکلدیگیندن گؤزلری چتینلیکله گؤرونوردو. تارلادا بیرجه بئنجامین چوخ دگیشمه‌میشدی. اونون یالنیز آغیزی بورنو بیر آز  بوزارمیشدی.او باکسئر اؤلندن سونرا هئپ دارغین، دالغین گؤرونوردو.

              دئوریم چاغیندا، حئیوانلارا، تؤره‌مه‌لری‌نین آرتاجاغینا گؤره وئریلن  سؤز گئرچکلشمه سه‌ده، یئنه‌ده تارلادا چوخلو یاراتیق یاشاییردی. دئوریم، گنج حئیوانلارا آغیزدان آغیزا  ائشیدیکلری آنلاشیلماز بیر اؤیکو ایدی. آلینمیش حئیوانلار  تارلایا گلمه‌دن اؤنجه  بئله شئیلری نه ائشیتمیش نه‌ده گؤرموشدولر. تارلانین ایندی کلووئردن باشقا  اوچ‌ آیری آتی وار ایدی. اونلار گئرچکدن دوزگون، چالیشقان، سئویملی آتلار ساییلیردیلار آنجاق چوخ مایماق ایدیلار. اونلارین هئچ بیری الیفبانین اؤیرنمه‌سینده « ب» حرفیندن ایره‌لییه گئدنمه‌دیلر. اونلار دئوریمه‌، حئیوانلار ایلکه‌لرینه گؤره ائشیتدیکلری  بوتون سؤزلری، اؤزللیکله  آنالیقلای ساییلان کلووئرین سؤزلرینی  دوشونمه‌‌دن منیمسه‌ییردیلر. آنجاق  بو اؤیره‌تیلری یاخشیجا قاورادیقلاری بللی دئییلدی.

              تارلا، ایندی دگیشیب، گلیشیب یاخشی یؤنتیلیردی. پیلینگتوندان آلینان ایکی اکینلیکله  تارلانین سینیرلاری بئله گئنیشلنمیشدی. یئل دگیرمانی‌نین سونوندا  باشاری ایله باشا چاتمیشدی. ایندی تارلانین  بیر کولش دؤین بیرده یونجا بیچن آیقیتی وار ایدی. تارلا  ائولرینه  یئنی یاپیتلار ائکلنمیشدی.  وامپئر اؤزونه بیر فایتون  آلمیشدی. یئل دگیرمانی  تاخیل اویوتمکله  تارلایا  یاخشی گلیر ساغلاییردی. قیویل گوجو اورتمک اوچون حئیوانلار  قان تر تؤکه‌رک بیر باشقا  یئل دگیرمانی تیکمکده ایدیلر. دئییلنلره گؤره قیویل اوره‌تَجی بو دگیرمانا قوشولاجاقدی. آرتیق اسنوبالین  اؤن گؤردوگو  یئددیجه‌ده اوچ گون‌ ایشله‌مکدن کیمسه دانیشمیردی. ناپلئون: «بو دوشونجه‌لر حئیوانلیق ایلکه‌لرینه آیقیری‌دیر» دئیه حئیوانلاری اویارمیشدی. اوگئرچک موتلولوغو، چوخ اوره‌تیب آز توکتمکده بیلیردی. تارلانین وارسیللاشدیغینا قارشین دونقوزلار ایله ایتلردن باشقا  بوتون حئیوانلارین یوخسوللاشدیغی گؤزه چارپیردی. بونون بیر ندنی‌ده  دونقوزلار ایله ایتلرین سینیرسیزجا بالالامالاری اولا بیلردی. بو یاراتیقلارین ایشله‌مه‌دیکلرینی سؤیله‌مک اولمازدی. اونلار اؤزلرینه اؤزگو بیر بیچیمده چالیشیردیلار. اونلار- اسکوئیلرین هئپ سؤیله‌دیگی کیمی-  تارلانین بیتمز توکنمز  گؤزه‌تیم، دئنه‌تیم ایشلری ایله  اوغراشیردیلار. اسکوئیلر  دونقوزلارین  چالیشمالاریندان باش چیخارتمایان  حئیوانلارا دئییردی:

-« دونقوزلار  گونده قان ترین ایچینده  بلگه‌لیکلر، یازدیجلار، بیلدیرگه‌لر، آندیجلار آدلی گیزسل  شئیلرین  اوزه‌رینده ایشله‌ملی‌دیرلر»

بو گیزسل شئیلر، آی بویوجا جیزماقارا ایله دولدورولان  اوزون سوو کاغیذلار ایدی. بو کاغیذلار آی باشی اوجاقدا یاندیریلیردی. اسکوئیلر تارلانین موتلولوغو اوچون گره‌کلی  اولان بو شئیلرین یوکسک  اؤنمینی حئیوانلارا آچیقلامیشدی.

              دوزنقوزلارین یئییب ایچمه‌لری‌نین سؤزو یوخویدو آنجاق هله‌کی‌هله ایدی اؤز یئیه‌جکلرینی اوره‌ته بیلمیردیلر. باشقا حئیوانلارین گئچینه‌جکلری ائله گئچمیشده‌کی‌لر کیمی ایدی؛ سوره کلی آج قالیردیلار؛ سامان اوستونده یاتیردیلار؛ گؤلمجین سویوندان ایچیردیلر؛ قیشی سویوقدان، یایی ایستیدن، میغمیغا- میلچکدن اینجیییردیلر. یاشلی حئیوانلار هردن  بللکلری‌نین  قارانلیق  قاتمانلارینی قورتدالایاراق ایندیکی دوروملارینی جونز چاغی ایله توتوشدورماق ایسته‌ییردیلر آنجاق بیر شئی آنیمسامیردیلار. بیر یاندان دا  ایکی دؤنمی  قارشلاشدیرماق اوچون حئیوانلارین اللرینده  دورومون گونو گوندن یاخشیلاشدیغینی گؤسترن اسکوئیلرین آردی کسیلمه‌ین سای ساییشلاریندان باشقا بلگه یوخویدو. حئیوانلار سونوندا  بو سورونون چؤزولمز اولدوغونا ایناندیلار؛ بیریانداندا اونلارین باشلاری ایشدن آیینمیردی اوتوروب بو قونو اوزه‌رینده دوشونسونلر. تکجه بئنجامین اؤتن ایللری بوتون آیرینتیلاری ایله آنیمسادیغینی ایره‌لی چکه‌رک دئییردی: «حئیوانلارین گئچینه‌جکلری نه بوندان یاخشی اولوب نه‌ده بوندان یاخشی اولاجاق. اومودسوزلوق، سیخینتی حئیوانلارین یاشامی‌نین آیریلماز بیر بؤلومو اولدوغو دوغانین دگیشیلمه‌ین بیر یاساسی‌دیر.» بونلارلا بئله حئیوانلار هله‌ده اومودلارینی اوزمه‌میشدیلر. اونلار هله‌ده حئیوانلار تارلاسیندا یاشاماغی اؤزلرینه بیر آیریجالیق ساناراق  اوندان قیوانج دویدوردولار. حئیوانلار تارلاسی  اؤلکه‌نین باشا باشیندا حئیوانلارین الی ایله یؤنتیلن  بیریجیک تارلا ایدی. بو ان گنج حئیوانلاردان توتوب لاپ اوزاق یئرلردن  گتیریلمیش حئیوانلاری بئله شاشیریردی. یاشلی حئیوانلار، توفنگ آتیلاندا، بایراق  دالغالاندیرلاندا دؤشلرینی قاباغا  وئره‌رک  ایگیدلیک چاغلاریندان ، جونزو قووان گونلردن ، یئددی بویروغو یازان گونلردن ، اینسانلارین باسقیسینی سیندیران گونلردن دانیشیردیلار.اونلار هله‌ده اسکی دوشلرینی اونوتمامیشدیلار. اونلار هله‌ده  قوجا مئیجئرین اینسانلارین آیاغی  یاشیل تارلالاردان کسیلینجه قورولاجاق  اینگیلیس حئیوانلاری جومهوروسونا اینانیردیلار. اونلار هله‌ده  او گونون ائر-گئج گله‌جگینه، اؤزلری گؤرمه‌سه‌ده  اوشاقلاری‌نین تانیق اولاجاغینا  آرخایین ایدیلار.  بونا گؤره  اونلار اینگیلیس حئیوانلاری ماهنیسینی گیزلیجه میزیلداییردیلار. حئیوانلارین هامیسی  ماهنینی  اؤیرنمیشدیلر. آنجاق اونو  اوجا سسله اوخوماقدان  قورخوردولار. حئیوانلار گئچینه‌جکلری‌نین آغیر اولدوغونو،  آماجلاری‌نین گئرچکلشمه‌دیگینی بیلیردیلر آنجاق بونونلا یاناشی  باشقا حئیوانلارکیمی اولمادیقلارینی دا آنلاییردیلار. اونلار آج اولسالاردا آرتیق امکلری  بیر سورو قولدور اینسانی دویورموردو. اونلار چوخ ایشله‌سه‌لرده اؤزلرینه ایشله‌ییردیلر. اونلارین آراسیندا کیمسه ایکی آیاق اوسته یئریمیردی. اونلارین آراسیندا کیمسه  باشقاسی‌نین آغاسی دئییلدی. بوتون حئیوانلار ائشید ایدیلر.

              یایین ایلک گونلری‌نین بیرینده اسکوئیلر قویونلاری دالیسیجا سالاراق  تارلانین اوجقار بیر بوجاغینا، قایین آغاجلاری مئشه‌سینه آپاردی. قویونلار آخشامادک  آغاجلارین  یاپراقلاریندان یئدیلر. قاش قارالاندا اسکوئیلر تارلا ائوینه قاییدارکن هاوانین ایستی اولدوغونا گؤره قویونلاردان ایسته‌دی اورادا قالسینلار. قویونلار یئددی گون اورادا قالدیلار. بو سوره‌ده اسکوئیلردن باشقا کیمسه اونلاری گؤرموردو. او گونونون  چوخونو قویونلارلا گئچیریردی. او دینج بیر یئرده قویونلارا  یئنی بیر ماهنی اؤیرتدگینی  سؤیله‌ییردی.

              قویونلار آغیللارینا قاییدیقدان بیر نئچه گون سونرا حئیوانلار  ایشدن تارلا ائولرینه دؤنرکن آولودان گلن قورخونج کیشنرتی سسیندن هویوخدولار. سس کلووئرین سسی ایدی. او یئنه کیشنه‌‌دی. آولویا چاتدیقدا کلووئرین گؤرنلرینی اونلاردا گؤردولر. بیر دونقوز ایکی آیاق اوستونده یئریییردی. دونقوز اسکوئیلرین اؤزو ایدی. او بیر آز باجاریقسیز گؤرونوردو؛ دئیه‌‌سن آغیر گؤوده‌‌سینی بو بیچیمده ترپتمگه  آلیشمامیشدی. بونونلا بئله  دنگه‌‌سینی قورویاراق آولودا دولانیردی. حئیوانلار ماتدیم-ماتدیم  بو گؤرونتویه باخدیقدا تارلا ائوی‌نین قاپیسیندان  آرخا آیاقلاری  اوستونده  یئریین  بیر سورو دونقوز  باییرا چیخدی. اونلارین بیر  بؤلوگو باشقالاریندان یاخشیراق یورویوردولر. بیر ایکیسی ایسه چتینلیکله  دوروش گتیریب قولتوق آغاجینا سؤیکنمیش کیمی گؤرونوردولر. دونقوزلار آولویا آخیشاراق دولانماغا باشلادیلار. بو آرادا  کؤپکلرین  قورخونج اولاشماسی ایله قارا خوروزون بانلاما سسی ناپلئون گلدیگی  بیلدیردی. ناپلئون دیم-دیک آغالار کیمی دیشارییا چیخدی.او تویناغیندا بیر قامچی داشییر؛ کیچیمسه‌‌ییجی باخیشلارینی چئورده گزدیریردی. کؤپکلر دؤرد یانیندا  وورنوخوردولار. بوغوجو بیر سوسقونلوق هر یانی بورودو. هویوخموش حئیوانلار بیربیرلرینه  قیسیلاشاراق قورخو ایله  سیرا-سیرا گزیشن دونقوزلار گؤز تیکدیلر. سانکی ائورن باشلارینا  کؤچموشدو. آز سونرا، ایللر بویو جینقیرلارینی چیخارتماماغا آلیشان حئیوانلار کوووشمه‌‌دن چیخدیلار. اونلار کؤپکلردن قورخدوقلارینی اونوداراق  آغیزلارینی دیلنمگه آچدیقدا قویونلار قولاق باتیریجی سسلری ایله ملشمگه  باشلادیلار: «دؤرد آیاق یاخشی، ایکی آیاق یاخیشراق. دؤرد آیاق یاخشی.....»

قویونلارین بئش دقیقه‌لیک آرالیقسیز ملشمه‌لری بیتدیکده دونقوزلارین  تارلا ائوینه دؤندوکلری اوچون آرتیق دیللنیش گیره‌وسی حئیوانلارین الیندن چیخمیشدی.

              بئنجامین چیگنی‌نین بورونلاندیغینی دویدو. دؤندوگونده کلووئری گؤردو. گؤزلری  هر زامانکیندان بتر بولانلیق گؤرونوردو. او قونوشمادان  بئنجامینین یئله‌سیندن یاپیشاراق بؤیوک آمبارین دیبینه، یئددی بویروق یازیلان یئره چکدی. اونلار گؤزلرینی  قارالانمیش دووارین  اوزه‌رینده یازیلان  آغ یازیلارا تیکدیلر. سونوندا کلووئر دیله گلدی: «  بئنجامین! گؤزلریمین ایشیغی آزالدیغیندان  دوواردا یازیلانلاری اوخویا بیلمیرم؛ دوغروسونو ایسته‌سن گنج ایکن  بئله اورادا نه یازیلدیغینی اوخویا بیلنمزدیم آنجاق ایندی منه ائله گلیر  سانکی دوواردا یازیلانلار بیرآز دگیشیب. باخ گؤر یئددی بویروق یئرینده دیرمی؟»

بئنجامین ایلک کز اولاراق قوراللارینی سیندیریب  دوواردا یازیلانلاری اوخودو. بویوروقلار یئرینده ایدی یالنیز بیری دگیشمیشدی: «بوتون حئیوانلار ائشیتدیرلر آنجاق بیر سوروسو باشقالاریندان  ائشیدراقدیرلار.»

              او گوندن سونرا تارلا ایشلرینی گؤزتله‌‌ین دونقوزلارین تویناغینداکی قامچیلار داها آنلاشیلماز گؤرونموردو. حئیوانلار آرتیق دونقوزلارین رادیو آلمالاریندان، تئلفون چکدیره‌جکلریندن، چئشیدلی گونده‌‌‌لیکلره، درگیلره آلاغان اولدوقلاریندان شاشیرمیردیلار. حئیوانلار آرتیق ناپلئونون چوبوق چکه‌رک باغچادا گزمه‌سیندن یا دونقوزلارین بای جونزون پالتارلارینی دولابدان چیخاردیب گئیمه‌سیندن  اورکموردولر.

ناپلئون اؤزو سودگونلری بای جونزون قارا کوت- شالواری ایله گؤن باشماقلارینی گئیه‌رک بایان جونزون ایپک پالتارلارینی گئیمیش سئوگیلیسی ایله  قول قولا باییرا چیخیردی.

              بیرگون، گون اورتا چاغی بیر نئچه قایتون تارلایا گلدی. بونلار تارلانی گزمگه ، گؤرمگه  گلن  قونشو تارلالاردان  چاغیریلمیش قوناقلار ایدی. اونلار تارلانی  اؤزللیکله یئل دگیرمانینی چوخ بگندیلر. قوناقلار گلنده حئیوانلار یئرکؤکولری آلاق ائتمکده‌ایدیلر. اونلار باشلارینی آشاغی سالیب جاندان اورکدن ایشله‌ییرکن دونقوزلاردان می چوخراق قورخدوقلارینی یوخسا گؤروشچولردن می؟ دئیه دوشونوردولر.

              آخشام چاغی، تارلا ائویندن چالیب  اوخوما سسلری  یوکسلدی. حئیوانلار بیردن بیره  بو قارماقاریشق سسلردن  برک ماراقلاندیلار. گؤره‌سن نه اولوب؟ دونقوزلار ایله اینسانلار ایلک کز اولاراق ائشیدجه بیربیرلری ایله بولوشوردولار. حئیوانلار اویوشما ایچینده باغچایا ساری آخیشدیلار. باغچانین قاپیسیندا بیر آز دوراقسانما اولدو. حئیوانلار قورخوردولار ایچرییه گیرسینلر.کلووئر ایچرییه سوخولونجا حئیوانلار قوشقودان چیخیب آیاق اوجوندا ائوه گئچدیلر.اوجا بویلولار یئمک اوتاغی‌نین آچیشقاسیندان ایچرییه بویلاندیلار. آلتی کیشی، آلتی دونقوز بیرماسانین چئوره‌سینده اوتورموشدولار. ماسانین  باشیندا ناپلئون اگلشمیشدی. دونقوزلارین یئرلری‌نین یوموشاق اولدوغو اوزاقدان بللی ایدی. آیاقداشلارین باشلاری قاراخال اویونونا قیزیشمیشدی. بیر هاویردان  اویوندان ال چکدیلر. دئیه‌سن بوغازلارینی یاشلاتماق ایسته‌ییردیلر. بؤیوک بیر بایداق الدن اله گزه‌رک  بارداقلاری آرپا سویو ایله دولدوردو. کیمسه آچیشقادان باخان  ماراقلی اوزلری  اؤزنسه‌میردی. فاکسفود تارلاسی‌نین  آغاسی  بارداق الینده  آیاغا قالخاراق  دئدی:

-« آغالار!  بارداقلارینیزی قوناقلارین ساغلیغینا قالدیرمادان اؤنجه بیر نئچه سؤز سیزلره سؤیله‌ملی‌یم. منجه بو اوزون سورن گوونسیزلیک، آنلاشمازلیق چاغی‌نین سونا ائرمه‌سی بو گون بیزیم اوچون  گئرچکدن سئویندیریجی بیر اولای‌دیر. بیر زامانلار حئیوانلار تارلاسینا دوشمنلیک گؤزو ایله  دئمه‌سکده قوشقو گؤزو ایله باخیلیردی. بو باخیشلار یانلیش دوشونجه‌لر تؤره‌ده‌رک آجی اولایلارا ندن اولدو. دونقوزلارین تارلا یؤنتمه‌سی اولاغان‌دیشی گؤستریله‌رک  قونشو تارلالارا کؤتو  ائتگی  بوراخاجاغیندان دانیشیلدی. اکینچیلرین چوخو دوشونوب داشینمادان بؤلگه‌ده  اؤزباشینالیغین، دوزنسیزلیگین  یاییلاجاغیندان قوشقولانیردیلار. اونلار حئیوانلاری‌نین هابئله ایشچیلری‌نین  ائتکیلنمه‌‌سیندن  قورخوب سینیرله‌نیردیلر. آنجاق  بو گون بوتون قارامسارلیقلارین یئرسیز اولدوغو  آنلاشیلدی. بیز بو گون حئیوانلار تارلاسی‌نین قاریش قاریشنی گزه‌رک باشقا تارلالارا اؤرنک اولمالی یئنی یؤنتملی، سیخی‌دوزنلی،گلیشمیش بیر تارلا ایله قارشیلاشدیق. منجه بوراداکی قارا حئیوانلار  بیزیمکی‌لردن چوخراق  ایشله‌ییب  آزراق یئییرلر.  بیز بو دئنمه‌لری تارلالاریمیزا قاییدینجا  اؤز  حئیوانلاریمیزین  اوزه‌رینده  اویغولامالی‌ییق.»

پیلینگتون سؤزلری‌نین سونوندا حئیوانلار تارلاسی ایله قونشو  تارلالار آراسیندا یاشاییب یاشایاجاق دوستجا دویغولارا توخوناراق  ائکله‌‌دی:

-« دونقوزلار ایله اینسانلارین آراسیندا چیخار چلیشکیسی  یوخدور، اولمامالی دیردا.  اوغراشدیغیمیز بوتون سورونلار هر یئرده بیردیر: ایشچی امگی. اؤیله دئییلمی؟»

بورادا پیلینگتون بیر گولمه‌جه سؤیله‌یه‌جکمیش کیمی گؤرونوردو آنجاق  چوخ جوشقولاندیغیندان سؤزلری بوغازیندا تیخیلدی قالدی. او بیر  آز قیزاریب بوزاراندان  سونرا  اوزونو دونقوزلارا توتاراق دئدی :

-« سیزین سورنونوز قارا حئیوانلاردیر  بیزیمکی ایسه قارا ایشچیلر.»

پیلینگتونون بوسؤزوندن هامی گولوشدولر. او دونقوزلاری، حئیوانلاری‌نین آز یئییب چوخ ایشله دیکلری اوچون، سیرتیق بار گتیریلمه‌‌دیکلری اوچون بیر داها قوتلاییب « ایندی ایسه بارداقلاریمیزی حئیوانلار تارلاسی‌نین ساغلیغینا قالدیرالیم.» دئیه سوزلرینی بیتیردی. بورادا ناپلئون آیاغا قالخیب هئپ اولدوغو کیمی  سؤزونو اوزاتمادان  آنلاشمازلیق چاغی‌نین  باشا گلمه‌‌سیندن موتلولوق دویدوغونو دیله گتیره‌رک  دئدی:

-« اوزون سوره بیزیم تانینمیش آزغین دوشمنیمیز، سانکی  منله امکداشلاریم قونشو تارلالاردا پوزغونلوق چیخارتماق  دوشونجه‌ سینده‌ییک دئیه یالانلار اویدورموشدو. بوندان یئکه یالان اولمازدی. بیزیم دیلگیمیز ایندی‌ده گئچمیشده‌ده ، قونشو تارلالارلا باریش ایچینده  یاشاماق  هابئله  ایکی باشلی  آلیش وئریش  ایلیشکیلری قورماق اولوب.»

ناپلئون سؤزلری‌نین آردیندا باشچیلیق ائتدیگی  تارلانین اورتاقسال بیر تارلا اولوب بوتون دونقوزلارین  ایش بیرلیگی ایله یؤنتیلدیگینی آچیقلایاراق  ائکله‌دی:

-«من اسکی آنلاشمازلیقلاردان بیر ایزین قالمادیغینا اینانیرام بونونلا بئله آرتیقراق گوونج ساغلاماق اوچون  بو یاخینلاردا تارلانین گونجل ایشلرینده بیر پارا دگیشیکلیکلر یاراتمیشام. اسکیدن بری تارلا حئیوانلاری گولونج بیر تؤره‌یه گؤره  بیربیرلرینی  یولداش دئیه سسله‌ییردیلر. بو ایش دایاندیریلیب. ائلجه‌ده  قایناغی بللی اولمایان باشقا بیر تؤره‌یه  گؤره  اونلار سود گونلری باغچانین دووارینا چیویلنمیش  بیر قافاتاسی‌نین  قارشیسندان  سان گئچیردیلر. بو ایشه ایسه یاساقلانیب  قافاتاسی دا قویلانیب دیر. سئویملی  قوناقلاریمیز تارلانی گزه رکن  باخسایدیلار بایراغیمیزین اوزه‌رینده اولان  بوینوز-تویناغین سیلیندیگین  گؤره‌جکدیلر. بوندان بئله تارلانین بایراغی  یالنیز  یاشیل رنگده  اولاجاق. من  بورادا بای پیلینگتونون  گؤزل دئمه‌‌جینه بیر اللشدیریم وار.  بای پیلینگتون  دانیشیغیندا سوره‌کلی اولاراق حئیوانلار تارلاسی آدینی چکیردی. قوشقوسوز  سایین دوستوموز حئیوانلار تارلاسی  آدی‌نین اورتادان قالدیریلدیغینی بیلمیرلر- ناپلئون بونو ایلک کز اولاراق  بورادا بیلدیردی- بوندان بئله منیم اینامیجا  تارلا اؤز گئرچک آدی، مانور تارلاسی  آدی ایله سسلنملی دیر.»

ناپلئون سؤزلری‌نین سونوندا دئدی: « ایندیسه ایچیریک سیزین  ساغلیغینیزا، بیر باشقا دئییشله، ایچیریک مانور تارلاسی‌نین  باشاریلاری ساغلیغینا»

              یئنه بارداقلار دولوب بوشالدی. یئنه اسریکسل  چیغیریشلار ، باغیریشلار گؤیه یوکسلدی. بو گؤرونتویه باییردان گؤز تیکن حئیوانلارا ائله گلیردی سانکی  اورادا آنلاشیلماز بیر شئیلر  باش وئرمکده دیر. دونقوزلارین  اوزونده  نه ایسه  بیر شئیلر دگیشمکده ایدی. کلووئر دومانلی گؤزلرینی بیر اوزدن  باشقا اوزه دولاندیریردی. دونقوزلارین  کیمی‌نین  بئش بوخاغی کیمی‌نین دؤرد بوخاغی کیمی‌نین ایسه اوچ بوخاغی وارایدی. اوزلرده  اریییب  دگیشن نه ایدی؟

              اؤیونمه-سؤیونمه سونا ائرینجه آیاقداشلار یاریمچیلیق قالمیش اویونلارینی یئنیدن اویناماغا باشلادیلار. حئیوانلار بونو گؤره‌لی سسسیزجه گئری دؤندولر. اونلار ییرمی  اوتوز آددیم اوزاقلاشمامیش تارلا  ائویندن  اوجالان چیغیریشما سسینه آیاق ساخلادیلار. تله‌سیک دؤنوب آچیشقانین  قاباغینا قاچدیلار. ایچریده آغیز قاوقاسی قیزیشمیشدی. اونلار یوموروقلارینی ماسایا تاپداییر چیغیریشیر، قوشقو دولو گؤزلرله باخیشیر، بیربیرلری‌نین سؤزلرینی قیزغینجا یالانلاییردیلار. ناپلئون ایله پیلینگتون  ایکیسیده بیر آندا قارا خال چیخارتمیشدیلار.

              چیغیریشان اون ایکی سس بیربیرینه بنزه‌ییردی. آرتیق ایندی دونقوزلارین اوزلرینده نه‌یین دگیشدیگی  سورولموردو.  باییرداکی یاراتیقلار بیر دونقوزلار بیر اینسانلارا باخدیلار. سونرا دؤنوب یئنه  بیر اینسانلارا بیرده دونقوزلارا باخدیلار. آرتیق اونلاری بیربیریندن سئچمک اولموردو.

                                                               سون

                                                            پاییز 1386

                                                         عباس ائلچین