+0 بگندیم
تبریزین گؤزو یولدادیر...
لطیفه طالب
سانیردیم، یازمیشام قلبیمده نه وار...
عؤمور بوداغیندان قوپان ناغیل‌لار،
سئحیرلی میضراب‌لار سیم اوسته جوشار،
نغمه‌یه چئوریلر کؤورک میصراع‌لار
حودودلاری کئچر، سرحدلر آشار.
کؤچوبدور کاغیذا ان تمیز حیسّلر،
وطن بولبولونون شوخ ترانه‌سی،
الوان چیچک‌لرین تر راییحه‌سی.
سانیردیم، یازمیشام دونیادا نه وار،
سوسوب آتیشمالار... سوسوب سیلاح‌لار...
سن دئمه، توختامیر قان آخیدان‌لار،
سن دئمه، قورومور تؤکولن قانلار.
آلوولار ایچینده یانان اوکراینا...
بیر گؤزو آغلایان، بیر گؤزو گولن
دونیادا بیتمه‌ین چیله‌لر وارمیش.
هله یازمادیغیم گؤر نه‌لر وارمیش...
گونئیده چیرپینیر آرازین باغری،
یولدادیر تبریزین گؤزو، یولدادیر .
گونئی حسرتیله آذربایجانین
او تایلی-بو تایلی غوباری وارمیش.
باشی آغ چالمالی، داغ ساوالانین
گؤر نئچه چیلله‌سی، باهاری وارمیش.
یئنه آلوولانسا، یئنه آلیشسا،
غضبی، قهری پوسکوروب جوشسا...
آمان، ساوالانین دردی یامانمیش،
بو دردله قوورولان آذربایجانمیش...
سانیردیم، یازمیشام روحومدا نه وار،
دونَنیم پاییز-قیش، بو گون یای-باهار.
یئنه ده آچیلار آیدین صاباح‌لار،
قیریب بوخوولاری، بویوندوروغو،
بیرلشر تورک گوجو، قوزئی یومروغو،
یازیلار سالنامه، داستان یئنیدن،
ظفر بیزیمله‌دیر، اینانیرام من!
