+0 بگندیم
حیاتین بئش هدیه‌سی
مارک تواین
بیرینجی فصیل
عؤمرون ایلک چاغلاریندا خئییرخواه بیر پری اؤز بوخچاسییلا آدامین یانیندا پئیدا اولدو و دئدی:
- بو بوخچادا منیم هدیه‌لریم وار، گؤتور اونلاردان بیرینی، قالان‌لارینا دَیمه! و سئچیمینی ده دوزگون ائت، عاغیللی و مودریک اول! چونکی بو هدیه‌لردن یالنیز بیری حقیقتاً چوخ دَیرلی و قیمتلی‌دیر.
بوخچادا بئش هدیه واردی: شؤهرت، سئوگی، وار-دؤولت، حظ، اؤلوم.
جاوان آدام گؤتور-قوی ائتمه‌دن دئدی:
- چوخ فیکیرلشمگه احتیاج یوخدو، البته، حظ!
او درحال حظی سئچدی و بو گئن دونیادا گنجلیگین خوشلادیغی اَیلنجه‌لری آختارماغا باشلادی. لاکین بوتون حظ و اَیلنجه‌لر بیر-بیری نین آردینجا اؤتری، بوش و معناسیز اولدو، بو فانی‌لیک اونو چوخ مأیوس ائتدی. اَیلنجه‌لردن هر بیری سوووشوب گئدرکن اونا ریشخندله گولدو. نهایت، آدام دئدی:
بو ایللری یئله وئردیم، بوشونا اوچوب گئتدی ایلک جاوانلیق چاغلاریم. اگر یئنیدن سئچیم ائتمک ایمکانیم اولسایدی، داها عاغیللی سئچیم ائدردیم.
ایکینجی فصیل
بو زامان همین سحیرلی پری یئنه پئیدا اولدو.
- بوخچادا دؤرد هدیه قالیب، - دئدی، - بیرینی یئنه سئچ گؤتور... هه، باخ، اونوتما، واخت تئز اوچور، هدیه‌لردن یالنیز بیری چوخ قیمتلی‌دیر.
آدام خئیلی دوشوندو، سونرا سئوگینی سئچدی؛ بو دفعه خئییرخواه پری‌نین گؤزلری یاشاردی، اوغلان او پاریلدایان یاش دامجی‌لارینی سئزمه‌دی.
بو حادیثه‌دن چوخ ایللر اؤتدو؛ آدام تک قالمیشدی، بومبوش ائوده تابوت اؤنونده اوتوروب کدرلی-کدرلی خیالا دالمیشدی، اؤز-اؤزونه دئییردی:
- اونلار بیر-بیری‌نین آردینجا حیاتدان کؤچوب منی ترک ائتدیلر؛ بو دا منیم سئویملی، عزیز، سون سئوگیمدی، تابوتون ایچینده اوزانیب. آغیر ایتکی‌لر منیم حیاتیمی آلت-اوست ائتدی. یالانچی و حیله‌گر سئوگی منه ساتدیغی خوشبخت‌لیگین هر آنی اوچون سونسوز کدر وئردی. او سئوگییه ایچیمدن گلن لعنت‌لر یاغدیریرام!
اوچونجو فصیل
- بیر ده سئچ هدیه‌نی، - دئیه پری سسلندی. - یاشادیغین ایللر سنه چوخ شئی اؤیرتدی، شوبهه‌سیز، ایندی سن مودریک‌لشمیسن. هله اوچ هدیه‌میز قالیب. یاددان چیخارتما، اونلاردان یالنیز بیری قیمتلی‌دیر، سئچیمینده دیقتلی اول!
آدام خئیلی دوشونوب-داشیندی، سونرا شؤهرتی سئچدی؛ پری ایسه آه چکیب گؤزدن ایتدی.
ایللر اؤتدو و سحیرلی پری یئنه گلیب پئیدا اولدو؛ گؤردو کی، آدام یئنه یالقیزدیر، غملی-غملی اوتوروب، فیکیرلی‌دیر. پری اونون نه دوشوندوگونو آرتیق بیلیردی.
"منیم آدیم بوتون دونیانی دولاشدی، دیللر ازبری اولدوم، منه تعریف‌لر یاغدیردیلار؛ منه ائله گلیردی کی، بوتون بونلار گؤزلدی، آما او آنلارین عؤمرو نئجه ده قیسایمیش! سونرا حسد آپاردیلار منه، پاخیل‌لیق ائتدیلر؛ دالینجا غئیبت، دئدی-قودو گلدی، داها سونرا بؤهتان، حقارت، تعقیب‌لر؛ سونرا دا آجی و زهرلی ریشخندلر... بو دا سونون باشلانغیجی! آخیردا دا پئشمان‌چیلیق، تأسوف حیسی! بو ایسه شؤهرتین دفنی دئمکدی! آه، مشهور اولماغین سونو نئجه ده آجی و میسکین ایمیش! شؤهرتین زیروه‌سینه چاتاسان، سنی چیرکابا بولاشدیرسینلار، سنه بؤهتان‌لار یاغدیرسینلار، ائننده ده حقارت گؤره‌سن، سونرا دا سنه یازیق دئسینلر!"
دؤردونجو فصیل
- دی یاخشی، یئنه بیرینی سئچ، - پری‌نین سسی گلدی. - ایکی هدیه قالیب. غم یئمه، آخی سنه دئمیشدیم کی، هدیه‌لردن یالنیز بیری قیمتلی‌دیر، هله او بوخچادادیر.
- وار-دؤولتی گؤتورجم، وار-دؤولت گوجدو، حاکیمیتدی! - آدام تردّود ائتمه‌دن بیلدیردی. - گؤر من نئجه ده کور اولموشام! آخیر کی منیمچون ده یاشاماغین دَیری اولاجاق! زیبیل کیمی پوللاریم اولاجاق، سپله‌یه‌جم، پوللا هامی‌نین گؤزونو توتاجام! کیم کی منه حقارت ائدیردی، کیم کی منی مسخره‌یه قویوردو، هامیسی دیزین-دیزین سورونه‌جک قاباغیمدا، من اونلارین حسدییله آجیمیش کؤنلومو توخداداجام! حیاتین بوتون دادینی چیخاراجام، دبدبه‌لر، راحات‌لیق‌لار، کؤنلومدن کئچن بوتون ایستک‌لر منیم اولاجاق، بدنیمین بوتون احتیاج‌لارینی ایسته‌دیگیم کیمی اؤده‌یه‌جم؛ من آلیش-وئریشه گئده‌جم، هر شئی آلاجام، اؤزومه هر شئی آلاجام، آلاجام! حؤرمتی، عیزتی، تعریفی - حیاتین بوتون گؤزل‌لیک‌لرینی آلاجام! منه ایطاعت ائده‌جکلر، ساختا، پاریلتیلی دونیادا نه وارسا، هر شئیی آلاجام! من چوخ واخت ایتیرمیشم، هر دفعه ده سئچیمیمده سهولر ائتمیشم؛ قوی بونلارین هامیسی کئچمیشده قالسین! او زامان من نادان ایدیم، یالنیز گؤرونتونو، ظاهیراً جلب‌ائدیجی اولان شئیلری سئچه بیلیردیم.
اوچ ایل بیر گؤز قیرپیمیندا اؤتوب کئچدی؛ ائله بیر گون گلدی کی، آدام میسکین بیر چارداقدا اوتوروب سویوقدان تیتره‌ییردی، بنیزی آغارمیش، گؤزلری چوخورلانمیش، اوست-باشی جیر-جیندیر ایچینده ازگین-یورغون حالدا اوتورموشدو؛ او، قوروموش چؤرک قیرینتی‌لارینی چئینه‌یه-چئینه‌یه دونقولدانیردی:
- جهنم اولسون بوتون دونیا نعمت‌لری! اونلار ساختادیر، دونیا فانی‌دیر! حیاتدا هر شئی قیزیل سویونا چکیلیب، پاریلتی‌دیر؛ اونلار هدیه دئییل! اونلار سنه بورج وئریلیر، مووقتی ایستیفاده اوچوندو... او هدیه‌لرین هامیسی یالانچی آد داشیییر: حظ، سئوگی، شؤهرت، وار-دؤولت حیاتین اصل و ابدی سیمالارینی - آغرینی، کدری، عئیبلری و کاسیب‌چیلیغی ساده‌جه مووقتی اؤرت-باسدیر ائتمک اوچوندو؛ پری دوغرو سؤیله دی - بوتون بو هدیه‌لردن یالنیز بیرجه‌جیگی چوخ قیمتلی‌دیر! اونون دَیری اؤلچولمز! آه، من نئجه ده قانماز اولموشام! بو بئش هدیه آراسیندا او یئگانه، قیمتلی شئی نئجه ده سئویملی گؤرونور! او چوخ شیریندی، مرحمتلی‌دی، خئییرخواه‌دی، عزیزدی، بیزه دایم یوخو گتیریر، شیرین یوخو! بیز او زامان یوخو گؤرموروک؛ او بیزی عذاب-اذیتدن، ایضطیرابدان، مشقتدن قورتاریر، شوعوروموزو و قلبیمیزی یئین، گمیرن گوناه‌لاریمیزی، غوصه‌لریمیزی یویوب آپاریر. آه، اونو منه گتیر! وئر منه اونو، دینجله‌جم، یورولموشام!"
بئشینجی فصیل
پری یئنه گلدی، یئنه هدیه‌لردن دؤردونو گتیردی، آما اونلارین آراسیندا اؤلوم یوخ ایدی.
- اونو بیر آنانین سئویملی کؤرپه‌سینه وئردیم، - دئدی پری، - کؤرپه هله هئچ نه آنلامیردی، منه ایناندی، خواهیش ائله‌دی کی، اونون عوضینه سئچیم ائدیم. سنسه مندن بونو خواهیش ائله‌مه‌دین.
آه، من نئجه ده بدبختم! بس منه نه ساخلامیسان، هه؟
سنین هئچ لاییق اولمادیغین شئیی - قوجالیغین معناسیز حقارتلی دونقولتولارینی!
(اینگیلیسجه‌دن کامران نذیرلی چئویریب)
کؤچورن: عباس ائلچین
