ائلچین ELÇİN

تورک دیلی و ادبیاتی

نسیمی و فولکلور

+0 بگندیم


İMADƏDDİN NƏSİMİ

نسیمی و فولکلور

پروفسور مدد چوبانوف

دونیانین بوتون صنعتکارلاری کیمی کلاسیک آذربایجان یازیچی‌لاری دا تاریخاً فولکلورلا عوضوی صورتده باغلی اولموشلار. اونلار اؤز یارادیجیلیق‌لاریندا شیفاهی خالق ادبیاتیندان گئنیش ایستیفاده ائده‌رک همین اثرلرین اوخوناقلی اولماسینا چالیشمشلار.

عمادالدین نسیمی ده شیفاهی خالق ادبیاتیندان گئنیش ایستیفاده ائتمیشدیر. اونون یارادیجیلیغیندا شیفاهی خالق ادبیاتی - آتالار سؤزلری اؤزونو پارلاق شکیلده گؤستریر. بونون باشلیجا سببی، شوبهه‌سیز، بیرینجی آتالار سؤزونون چوخ ییغجام، درین معنالی و هامی طرفیندن آنلاشیقلی؛ دیگر طرفدن ایسه اونون صنعتکار اوچون میثیل‌سیز تصویر و ایفاده واسیطه‌لری اولماسی‌دیر.

نسیمی اکثر حاللاردا آتالار سؤزونو شوعورلو صورتده دَییشدیریر، ایختیصار ائتمکله برابر اونا موعین علاوه لر ده ائدیردی. بئله لیکله، اونون اثرلرینده آتالار سؤزو یئنی معنا، مضمون و ماهیت داشیییردی. نسیمی بونلاردان اؤز یئرینده و مهارتله ایستیفاده ائتمگی باجاریردی.



آردینی اوخو/ Ardını oxu

آچار سؤزلر : عمادالدین نسیمی, ادبیات,

آذربایجان شعری‌‌نین غریب صحیفه‌لری - حوروفی شاعیر رفیعی

+0 بگندیم
Refîî’nin Gencnâme’sinin ilk iki sayfası (İbrahim Olgun özel kütüphanesi)

آذربایجان شعری‌‌نین غریب صحیفه‌لری - حوروفی شاعیر رفیعی

سعادت شیخی‌یئوا

فیلولوژی اوزره فلسفه دوکتورو

اورتا چاغین ایجتیماعی، علمی و دینی دوشونجه ساحه‌لری ایله یاخیندان باغلی اولان، دؤورونون تاریخی-سیاسی پروسه‌لری، ادبی تخیّولو، فلسفی تفکّورو، دینی باخیش و موسیقی زؤوقونو نوماییش ائتدیرن و آذربایجان خالقی‌‌نین میلّی-معنوی دَیرلری‌‌نین ایفاده‌چیسی اولان کلاسیک ادبیاتین اؤیرنیلمه‌سینده باخیش بوجاق‌لارینی یئنیلمه و قلیب‌لنمیش یانلیش‌لارین فیکری آسیلی‌لیغیندان آزاد اولماغا احتیاج یارانمیشدیر و بو، آرتیق زاما‌‌نین طلبی‌دیر. چونکی یالنیز دؤورون طلبینه اویغون پریزمادان باخیلارسا، کلاسیک ادبی ایرثین ایندیه‌دک قارانلیق‌لارا بورونموش بیر سیرا مقام‌لارینا ایشیق سالینا بیلر. بیر چوخ باخیمدان مادی مدنیتیمیزین گؤستریجیسی اولان آبیده‌لرله عینی ایستاتوسدا اولان معنوی-فیکری میراثیمیزین – کلاسیک ایرثین قورونماسی اولدوقجا واجیب‌دیر. چونکی بو اثرلرده خالقیمیزین میلّی، معنوی، اخلاقی، ادبی، فلسفی و دینی دوشونجه‌سی، بوتون بو سادالادیق‌لاریمیزین جمعیندن یارانان وارلیغی اؤز ایفاده‌سینی تاپمیشدیر. بو اثرلر ساده‌جه فردی بدیعی تخیولون دئییل، کولکتیو ذهنیتین ده محصولو کیمی درک و قبول اولونور. اصلینده میلّی-معنوی ثروتیمیزین چکیسی، سرحدلری و یارادیجی‌‌لاری سیخلیقلا گوند‌مه گلن و آکتوال‌لیغینی ایتیرمه‌ین مسئله‌لردن‌دیر. اما بو ساحه‌‌‌نین تدقیقی آرتیق فرقلی موستوی‌یه کئچمه‌لی، یئرسیز شیشیرتمه و ضررلی تحریف‌لردن آریناراق جدی تدقیقات‌لارین اوبیئکتی اولمالی، بئین‌الخالق علمی عالمده آذربایجان تورک‌لری‌‌نین زنگین معنوی-اخلاقی دَیرلری‌‌نین گؤستریجیسی اولاراق تقدیم اولونمالی، دیگر اؤلکه‌لرین بیر چوخ تفکّور صاحب‌لری‌‌نین بو دوشونجه مرکزیندن فایدالاندیغی سیستملی شکیلده اساس‌لاندیریلمالی، تکجه آذربایجا‌‌نین دئییل، دونیا ادبیاتی ایچریسینده حقیقی مؤوقعئیی موعین‌لشدیریلمه‌لی‌دیر. بو ایشین گؤرولمه‌سینده کورتبیی‌لیک یول‌وئریلمز، مرکزلشدیریلمیش آراشدیرمالار ایسه آرتیق تاریخی ضرورت‌دیر.



آردینی اوخو/ Ardını oxu

آچار سؤزلر : آذربایجان, عمادالدین نسیمی, حوروفیه, ادبیات,

میصیرده نسیمی‌نین آذربایجان دیلینده الیازمالاری تاپیلدی

+0 بگندیم

میصیرده نسیمی‌نین آذربایجان دیلینده الیازمالاری تاپیلدی 

   میصیرین پایتاختی قاهیره‌ده یئرلشن "میصیر کیتابلار ائوی"-نده (دار الکتب المصریه) آذربایجانین داهی شاعیری و موتفکّیری عمادالدین نسیمی‌نین الیازمالاری اورتایا چیخاریلیب. الیازمالار "وطنپرور" – آذربایجانین میصیرده دیاسپور تشکیلاتلاری بیرلیگی‌نین صدری، تدقیقاتچی-عالیم سئیمور نصیرووون آپاردیغی تدقیقاتلار اساسیندا آشکارلانیب.تدقیقاتچی الیازمالارین آذربایجان و فارس دیللرینده اولدوغونو بیلدیریب. 
   آذربایجان دیلینده اولان الیازمانین اوزرینده "نسیمی کولّیاتی" یازیلیب. بو کولّیات شعر و نثردن عیبارتدیر. شعرلرین چوخو روباعی و مثنوی اوسلوبوندادیر. آراسیندا غزل ده وار. نثرلر ایسه، اساسن، اؤیود-نصیحت و پئیغمبرین اهلی بئیتیندن بحث ائدیر. 
   س.نصیرووون ان چوخ دیقّتینی چکن ایسه عرب الیفباسی‌نین سیراسینا اویغون اولاراق، آیری-آیری سونو عئینی حرفله بیتن شعرلرین اولماسی اولوب. الیازما 254 ورقدن عیبارتدیر. کیچیک حرفلرله نستعلیق خطی ایله یازیلیب. هیجری تاریخی ایله 941-جی ایلده (میلادی 1535-جی ایل)، پیر احمد ایسکندر اوغلو طرفیندن نسخ اولونوب. 
   فارس دیلینده اولان الیازما ایسه نیسبتاً کیچیک حجمده‌دیر و ساده‌جه، شعرلردن عیبارتدیر. آدی "دیوان نسیمی"دیر. شیکسته خطینه بنزه‌ین نستعلیق خطی ایله یازیلیب. الیازمانین ورقلری‌نین ائنی 11 س‌م، اوزونلوغو 16 س‌م و سایی 86-دیر. 
   سئیمور نصیروو 20 ایلدن چوخدور کی، عرب منبعلرینده آذربایجانلا باغلی تدقیقاتلار آپاریر، 250-دن چوخ آذربایجانلی عالیم حاقیندا ایکی کیتابین، میصیرله آذربایجان آراسیندا تاریخی و مدنی علاقه‌لرله باغلی اونلارلا مقاله‌نین مؤلیفیدیر. قئید ائدک کی، "میصیر کیتابلار ائوی" (دار الکتب مصریه) دونیانین ان مشهور کیتابخانالاریندان بیریدیر.

قایناق: simsar.az

ائلچین کتاب




آچار سؤزلر : عمادالدین نسیمی,