موحاریبه‌دن سونرا

ارنست همینگوی   

  اونو ایستی یای آخشام‌لاری‌نین بیرینده پادوُا خسته‌خاناسینا گتیردیلر. چارپاییسی خسته‌خانانین دامیندا یئرلشدیگی اوچون بوتون شهره تاماشا ائده، سمادا اوچان اوزون‌قاناد‌لاری یاخیندان گؤره بیلیردی.    

  هاوا قارالدیقدان سونرا خسته‌خانا حَیطینه ایشیق سالان لامپا‌لار یاندیریلدی. حکیم‌لر آشاغی ائندیلر و گئدرکن ایچکی شوشه‌لرینی ده اؤزلری ایله آپاردیلار. او، اوتاقدا تک قالدیغی لوُزلا بیرلیکده آشاغی ائنمیش حکیم‌لرین ائیواندان گلن سسلرینی ائشیدیردی. سونرا لوُز اونون چارپاییسیندا اَیلشدی. همین گون او، چوخ گؤزل و شوخ گؤرونوردو.      

  لوُز او عسگره گؤره اوچ آی گئجه نؤوبه‌سینده ایشله‌دی. بئله بیر شئیه ایجازه وئریلمه‌سی اونلارین ایکیسینی ده سئویندیریردی. عملیات گونو یئتیشنده یارالی عسگری عملیات ماساسینا دا لوُز حاضیرلادی و کئییدیجی ایینه وورولمازدان اوّل اونلار بیر-بیری‌لری ایله خئیلی ظارافاتلاشدیلار. عسگر، عملیات زامانی سایاقلایاجاغیندان چوخ قورخدوغو اوچون کئییدیجی ایینه وورولمازدان اوّل اؤزونو بونا برک-برک حاضیرلادی. 

ائرمنی میلیّتچی‌لیگی‌نین تام  ناسیونالیزمه چئوریلمه فلسفه‌سی

پروفسور قافار چاخماقلی 

  میلیّتچی‌لیک،  اصلینده  هر بیر میلّتین موختار اولما، بیرلیکده یاشاما، وار اولماسینی ثوبوت ائتمک اوچون ایدئولوژی بیر حرکتی‌دیر. میلّته   " مودرنیست "  یؤندن باخیلسا  میلّی شخصیتی یارادان دا ائله  میلّیتچی‌لیک‌دیر. شخصیت آزادلیغی قازانماسینا و بونلاری داوام ائتدیرمه‌سینه ایستیقامتلی بو  کیمی آنلاییش‌لارین هر بیری 17 و 18. عصرلرده اوروپادا اورتایا چیخان یئنی، فلسفی، تاریخی و آنتروپولوژیک ایفاده‌لردن تؤره‌میشدیر. مثلا،  " شخصیت "  آنلاییشی‌نین دوز بیر شکیلده  " عئینی‌لیک "  (identification) اولاراق باشا دوشونولمه‌سی مومکون‌دور. قروپ منسوب‌لاری بنزر شکیل‌لرده گئیینر،  یئرییرلر، عئینی دیلی دانیشارلار، عئینی عنعنه‌لری قورویارلار؛ بوتون بو باخیم‌لاردان اؤزلرینه منسوب اولمایان فردلردن فرقلی اولدوقلارینی گؤستررلر. بو بنزرلیک – هم ده بنزه مزلیک گؤرونتوسو، میلّی  " شخصیتین "   کسب ائتدیگی معنالاریندان بیری‌دیر. بورادا اینسان‌لارین بیر بویدان،  بیر اتنیک کؤکدن گلیب گلمه‌مه‌سی او قدر ده اهمیتلی دئییل. مثلا، بیر زامان‌لار موغولیستاندا اتنیک باخیمدان موغول اولوب اولماما اهمیتلی دئییلدی، اهمیتلی اولان موغول قانونونو قبول ائتمک ایدی و موغول‌لار کیمی یاشاماقدی. بو بیر چوخ اؤلکه‌لر اوچون ده اوزون زامان یاشاما و فعالیت گؤسترمه پرینسیپی اولموشدور.  

​

زنگه‌زوُر

زنگه‌زوُر — ائرمنیستانین جنوب حیصه‌سینی و آذربایجان اراضی‌لری‌نین کیچیک بیر حیصه‌سینی احاطه ائدن تاریخی ماحال. زنگه‌زوُر ماحالی قافان، گوْروُس، قاراکیلیسا(سیسیان)، مِغری (مِهری) زنگیلان،قوُبادلی و لاچین‌ین بیر حیصه‌سینی احاطه ائدیردی. 20. اول‌لرینده زنگه‌زوُر ماحالیندا 149 تورک، 91 کوردو 81 ائرمنی کندی وار ایدی.[۱]

  توپونیمین سونونداکی «زوُر» تورک دیلینده «دره»، «یارغان» معناسیندا ایشلنن جار (>زار>زوُر -ای.ب) سؤزونون فونِتیک واریانتی‌دیر. اِتنوتوپونیم‌دیر. قورولوشجا مورکّب توپونیم‌دیر.