+0 بگندیم
موحاریبه‌دن سونرا
ارنست همینگوی
اونو ایستی یای آخشام‌لاری‌نین بیرینده پادوُا خسته‌خاناسینا گتیردیلر. چارپاییسی خسته‌خانانین دامیندا یئرلشدیگی اوچون بوتون شهره تاماشا ائده، سمادا اوچان اوزون‌قاناد‌لاری یاخیندان گؤره بیلیردی.
هاوا قارالدیقدان سونرا خسته‌خانا حَیطینه ایشیق سالان لامپا‌لار یاندیریلدی. حکیم‌لر آشاغی ائندیلر و گئدرکن ایچکی شوشه‌لرینی ده اؤزلری ایله آپاردیلار. او، اوتاقدا تک قالدیغی لوُزلا بیرلیکده آشاغی ائنمیش حکیم‌لرین ائیواندان گلن سسلرینی ائشیدیردی. سونرا لوُز اونون چارپاییسیندا اَیلشدی. همین گون او، چوخ گؤزل و شوخ گؤرونوردو.
لوُز او عسگره گؤره اوچ آی گئجه نؤوبه‌سینده ایشله‌دی. بئله بیر شئیه ایجازه وئریلمه‌سی اونلارین ایکیسینی ده سئویندیریردی. عملیات گونو یئتیشنده یارالی عسگری عملیات ماساسینا دا لوُز حاضیرلادی و کئییدیجی ایینه وورولمازدان اوّل اونلار بیر-بیری‌لری ایله خئیلی ظارافاتلاشدیلار. عسگر، عملیات زامانی سایاقلایاجاغیندان چوخ قورخدوغو اوچون کئییدیجی ایینه وورولمازدان اوّل اؤزونو بونا برک-برک حاضیرلادی.
ساغالیب قولتوق آغاجی ایله گزمگه باشلایاندا او، اؤز حرارتینی اؤزو اؤلچوردو و لوُز بوندان یانا اوتوردوغو چارپاییدان قالخمالی اولموردو. همین اوتاقدا اوندان باشقا چوخ آز خسته وار ایدی. بو خسته‌لر ده لوُزلا عسگر آراسینداکی موناسیبتدن خبردار ایدیلر. اونلارین هامیسی لوُزو چوخ ایسته‌ییردیلر. اوزون دهلیزدن کئچیب اوتاغینا قاییتدیغی زامان عسگر، چارپاییسیندا لوُزلا بیرلیکده راحات-راحات اوزانیب صؤحبت ائده‌جگی گونلرین خیال‌لارینی قوروردو.
یئنیدن جبهه‌یه قاییتماق واختی گلنده او، لوُزلا بیرلیکده کیلسه‌یه گئدیب دوعا ائله‌دی. قارانلیق و ساکیت کیلسه‌ده اونلاردان باشقا دوعا ائدن‌لر ده آز دئییلدی. او، لوُزلا ائولنمک ایسته‌ییردی، آما اونلارین نه دوغوم شهادتنامه‌سی وار ایدی، نه ده نیکاح مراسیمی اوچون واخت‌لاری. اصلینده، اونلار اؤزلرینی ار-آرواد کیمی حیسّ ائدیردیلر. آما بیر-بیریلرینی ایتیرمه‌مک اوچون بو ائولی‌لیکدن هر کسین خبری اولماسینی ایسته‌ییردیلر.
لوُز اونا چوخلو مکتوب یازدی، آما ساواش‌لار دایانانا قدر بو مکتوب‌لاردان هئچ بیرینی او اوخویا بیلمه‌دی. مکتوب‌لاردان اون بئشینی جبهه ده او‌لارکن آلمیش و تاریخینه گؤره سیرالادیقدان سونرا اونلاری دیقتله اوخوموشدو. بو مکتوب‌لاردا قیز، خسته‌خانادا کئچیردیگی گونلری تصویر ائدیر، اونو نئجه سئودیگینی، اونسوز یاشایا بیلمه‌دیگینی، گئجه‌لر اوندان اؤترو داریخماغین نئجه عذابلی اولدوغونو یازیردی.
موحاریبه‌دن سونرا عسگر، وطنینه قاییدیب ایش تاپاجاغینی و بئله‌جه اونلارین ائولنه بیله‌جگینی لوُزا دئدی. یاخشی ایش تاپانا قدر لوُز اونون یانینا گلمه‌یه‌جکدی و سونرا اونلار نیویورکدا گؤروشه‌جکدیلر. او، لوُزا سؤز وئردی کی، داها ایچمه‌یه‌جک، آمریکاداکی کؤهنه دوست‌لاری نین هئچ بیری ایله گؤروشمه‌یه‌جک. فیکرینی آنجاق ایشله‌مگه و ائولی‌لیک اوچون پول ییغماغا یؤنلده‌جک.
قاتاردا پادوُادان میلانا گلرکن قیز دا اونونلا بیرلیکده گئتمک ایسته‌دیگینی دئدی، اونلار خئیلی موباحیثه ائتدیلر. ویداع‌لاشماق واختی گلیب چاتاندا میلان دایاناجاغیندا عسگر، لوُزون دوداق‌لاریندان اؤپدو و اونلار اینجیک حالدا ساغوللاشدیلار. لوُزدان بئله آیریلماغی آمریکایا چاتانا قدر اونون اورگیندن داش اولوب آسیلدی.
او، جنوادا قاییغا مینیب آمریکایا یوللاندی. لوُز سئوگیلیسی ایله ویداع‌لاشدیقدان سونرا پوْردوّنونئیه قاییتدی. بیر مودّت سونرا اورادا یئنی بیر خسته‌خانا آچدی. هاوا‌لارین یاغیشلی واختی ایدی. لوُز اؤزونو چوخ تنها حیس ائدیردی و لوُزون اؤزونو چوخ تنها حیس ائتدیگی، یاغیش‌لارین آرا وئرمه‌دیگی همین گونلرده شهره ایتالیان‌لارین " جسور‌لار " باتالیوْنوُ گلدی. همین قیش او یاغمورلو-چامورلو شهرده قرار توتموش باتالیوْنوُن مایورو لوُز ایله موناسیبت قوردو.
لوُز اوّل‌لر هئچ واخت ایتالیان‌لارلا اونسیتده اولمامیشدی و چوخ کئچمه‌دی کی، او، آمریکایا مکتوب یازماغا قرار وئردی. یازدی کی، اونلارین سئوگیسی اصل سئوگی اولماییب، اونلارین سئوگیسی اوشاق‌لیق هوسی اولوب. یازدی کی، بلکه ده او، ایندی بو یازیلان‌لاری آنلایا بیلمه‌یه‌جک، آما نه زامانسا اونو باغیشلایاجاق و اوسته‌لیک ده اونا میننتدار اولاجاق. یازدی کی، اونون گله‌جکده بؤیوک کاریئراسی‌نین اولاجاغینا اینانیر و بو آددیمی دا اونون یاخشی‌لیغی اوچون آتیر. و نهایت یازدی کی، بو باهار اونون تویو اولاجاق، بو باهار او اره گئده‌جک و اونلارین سئوگیسی اوشاق‌لیق هوسی اولسا دا، اونو همیشه چوخ ایسته‌یه‌جک.
نه او باهار، نه او پاییز، نه ده سونرا همین مایور لوُزلا ائولنمه‌دی. بو حاقدا شیکاقویا گؤندردیگی مکتوبا دا لوُز هئچ واخت جاواب آلا بیلمه‌دی. و چوخ کئچمه‌دی کی، مکتوب یازدیغی او آدام، لینکولن پارکیندا تاکسی‌لرین بیرینده ماغازا ساتیجیسی اولان بیر قیزلا کئچیردیگی گئجه‌دن سونرا سوزه‌نک خسته‌لیگینه توتولدو.
اینگیلیسجه دن ترجومه ائدن: توکل زیناللی
کؤچورن: عباس ائلچین
