+0 بگندیم
تورپاغا قاریشان قان
آرتیق اوچ گون ایدی کی، ائرمنی‌لر کندی آتش آلتیندا ساخلاییردیلار. بونونلا دا کیچیک و ایری‌چاپلی سیلاح‌لاردان آتیلان گولله‌‌لرله دینج اهالینی واهیمه‌یه سالماغا چالیشیردیلار. هله ایکی آی بوندان اول، یعنی 2020-جی ایلین ژوئیه آییندا ائرمنی‌لر طرفیندن سرحد‌لریمیزه ائدیلن هوجوم نتیجه‌سینده گئدن بئش‌گونلوک ساواش دا عئینی سناریو ایله باشلانمیشدی. دوشمن مسافه‌جن قاراباغدان چوخ اوزاقدا اولان سرحد کند‌لریمیزی آتشه توتموش، بیر نئچه دینج ساکین‌لریمیزین ائو‌لرینی بومبالامیشدی. بونون نتیجه‌سینده اؤز حَیطینده آغاج‌لاری سولایان قوجامان کند ساکینی 76 یاشلی عزیز کیشی‌نین ائوینه غفلتاً دوشن بومبانین قلپه‌‌لری اونون حیاتینا سون قویموش، حَیطده کی توت آغاجینا هؤروکلنمیش بیر ساغمال اینگینی و پیه‌ده اولان سککیز قویونونو، حَیط-باجادا هرلنن یوزه یاخین تویوق-جوجه‌سینی یئره سرمیشدی. قونشویا یوخا سالماغا کؤمگه گئتمیش نیسه آرواد پارتلاییش سسینی ائشیدن کیمی ال‌لری اونلو حالدا اؤزونو حَیط‌لرینه یئتیرنده آرتیق گئج اولدوغونو، اللی ایل‌لیک عؤمور-گون یولداشی‌نین باشیندان و سینه‌سیندن آلدیغی قلپه نتیجه‌سینده جانسیز حالدا تورپاغا یاییلان قان ایچینده یئرده اوزاندیغینی گؤرموشدور. او، یاواش-یاواش آلوولانان، اوچوب-داغیلمیش ائوینه باخاراق اری‌نین مئیدی‌نین یانیندا یئره چؤکموش، سون دفعه " سنی یاناسان ائرمنی! " ایفاده سینی هایقیراراق ساچلارینی یولماق اوچون ال‌لرینی یوخاری قالدیرماق ایسته‌دیگی آندا آلدیغی قلب حمله‌سیندن ائله یئرینده‌جه دونیاسینی دَییشمیشدی ...
یایدا اولان بو حادیثه‌دن آرتیق ایکی آی کئچمه‌سینه باخمایاراق ائرمنی‌لر طرفیندن آتیلان آتش‌لر هله ده داوام ائدیر. اونلار بونونلا کند اهالیسینده ناراحات‌لیق و تلاش یاراتماغا چالیشیر‌لار. او زامان اوردوموز ائرمنی تخریباتی‌نین قارشیسینی آلسادا، دوشمن پاییزین سون هفته‌سینده یئنیدن ایشغال اولونموش تورپاق‌لاردان دینج اهالی‌نین یاشادیغی کند‌لری آتشه توتماغا، بومبا‌لار یاغدیرماغا باشلادیلار. بونونلا دا اونلار بیر داها اینسان‌لار آراسیندا خوف یاراتماغی و اهالینی یئنیدن اؤز دوغما کند‌لریندن پرن-پرن سالماغی دوشونور‌لر. لاکین اونلار بونا نایل اولا بیلمه‌یه‌جکلرینی گؤروب، بو دفعه توپ آتش‌لریندن داها چوخ ایستیفاده ائدیر‌لر. ائرمنی‌لر سنگر‌لرده اونلارلا اوزبه‌وز دایانان رشادتلی اوردوموزلا دؤیوشمگه دئییل، عسگر‌لریمیزین باشی اوزریندن جبهه خطدیندن بیر نئچه یوز متر آرالیدا یئرلشن کند‌لرین دینج اهالیسینی آغیر توپ قورغو‌لاریندان یوغون بیر شکیلده آتیلان بومبا آتشینه توتماغا اوستون‌لوک وئریر‌لر. ائرمنی‌لرین تخریباتی نتیجه‌سینده ساواشین یئنیدن باشلاندیغی اوچ گون عرضینده کندین بیر چوخ ائو‌لرینه، ماغازایا، مکتبه، اوشاق باغچاسینا، پوست شؤعبه‌سی‌نین و کند ایجرا نوماینده لیگی‌نین ایداری بینا‌لارینا دوشن بومبا‌لاردان آرتیق سککیز دینج ساکینیمیز دونیاسینی دَییشمیش، اون ایکی نفریمیز ایسه موختلیف درجه‌لی قلپه یاراسی آ‌لاراق خسته‌خانا‌لارا یئرلشدیریلمیشلر. یارالانان‌لاردان ایکیسی‌نین وضعییتی چوخ آغیر اولدوغوندان موعالیجه اوچون اونلاری گئجه ایله پایتاختین مرکزی کلینیکاسینا کؤچورولموشلر. اهالی آراسیندا ان هیدّت یارادان مقام ایسه اؤلن ساکین‌لریمیز آراسیندا ایکیسی‌نین کؤرپه مکتبلی اوشاق‌لارین اولماسی ایدی. آما بوتون بونلارا باخمایاراق کند اهالیسی ائو‌لرینی ترک ائتمک حاقیندا دوشونمور، دده-بابا تورپاق‌لاریندان، یورد-یووا‌لاریندان کئچیجی ده اولسا آیریلماغی هئچ عاغیل‌لارینا بئله گتیرمیر‌لر. اونلار اوردوموزا گوونه‌رک گونده‌لیک عادی حیات‌لارینی یاشاییر، اکین-بیچینله، حئیواندارلیقلا مشغول اولور، تصروفات‌لارینی اینکشاف ائتدیرمکده داوام ائدیر‌لر...
ایل‌لردیر کی، ایلک خوروز بانی اولمامیش یوخودان اویانان ، بو دفعه ایسه سحره قدر آتیلان گولله سسلریندن اونسوز دا یوخوسو عرشه چکیلن یاقوب یاتاغیندان قالخیب حَیطه چیخدی. سرین پاییز هاواسینی بیر نئچه دفعه دریندن سینه‌سینه چکیب گرنشدی، ال-قول آتاراق ایدمان حرکت‌لری ائدیرمیش کیمی بیر-ایکی دفعه اوتوروب-دوردوقدان سونرا، بئش یاشلی اوغلو نامیقین دونن آخشامدان حَیطین اورتاسیندا قالمیش رئزین توپونو آیاغی ایله چیله‌مگه باشلادی. سونرا توپا ائهلماجا بیر تپیک ووروب اونو چپره ساری یؤنلتدی و تلسمه‌دن تؤوله‌یه طرف آددیملادی. حئیوان‌لاری کندین نوبات سوروسونه قاتماق اوچون تؤوله‌نین قاپیسینی آچیب اونلاری چؤله بوراخدی. هر سحر اولدوغو کیمی، یئنه ده دریندن نفس آ‌لاراق، آستا سسله اؤز-اؤزونه " آللاه عالی باش کوماندانیمیزی و رشادتلی اوردوموزو قوروسون! " دوعاسینی پیچیلدادی. او، بئله دوعا‌لاری ائتمکله یاناشی، دؤولتین اونا یاراتدیغی بو گونکو شراییطینه گؤره آللاها شوکور ایعاده ائتمکدن ده یورولموردو. هر دفعه سورونو قاباغینا سالیب نوباتا اؤتورنده " ماشاللاه، آللاه برکت وئرسین! آللاه پیس گؤز‌لردن قوروسون! " دوعا‌لارینی تئز-تئز و بیر نئچه دفعه سؤیله‌ییردی. بو آرتیق اوندا بیر عادت حالینی آلمیشدی. هله دؤرد-بئش ایل بوندان قاباق ایشغالدان آزاد اولونموش کند‌لرینه قاییداندا قاپیسیندا بیر تویوغو بئله اولمایان یاقوبون، بو گون آرتیق حَیطینده یوز‌لرله یومورتلایان تویوق-جوجه‌سی، 50 باش قویونو، آلتی باش ایری‌بوینوزلو مالقاراسی واردی. دؤولت اونون عاییله‌سینی دده-بابا محله‌سینده، اوچوب-داغیلمیش ائو‌لری‌نین یئرینده یئنی تیکیلمیش موعاصیر، تام تعمیرلی اوچ اوتاقلی، کورسولو ائوه کؤچورمکدن باشقا، حؤکومت اونا شخصی تصروفاتینی اینکشاف ائتدیرمکدن اؤتری دامازلیق اوچون تمناسیز او‌لاراق 10 باش قویون و یانی بالالی بیر ساغمال اینک ده وئرمیشدیر. بو ایل‌لر عرضینده او، تصروفاتینی خئیلی اینکیشاف ائتدیرمیش، حئیوان‌لاری‌نین سایینی آرتیرمیشدیر. اوشاق‌لاری‌نین کؤرپه اولماسینا باخمایاراق بو ایشده اونا حیات یولداشی دا باجاردیغی قدر کؤمک‌لیک گؤستریردی. اوشاق‌لارین قایغیسینا قالماق، ائو ایشلرینی گؤرمکدن باشقا، حئیوان‌لاری ساغماق، اونلارین سودوندن پئندیر، یاغ توتماق آروادی‌نین عؤهده‌سینه دوشوردو. حئیوان‌لاری راهلاماق، هر گون تؤوله‌نی تمیزله‌مکله، ایل بویو اونلارین یئملنمه‌سینی تأمین ائتمک اوچون اوت تداروکونو گؤرمک، هفته ده بیر دفعه اولماقلا کندین نوبات نؤوبه‌سینه گئتمک، حَیطیانی باغیندا اکدیگی مئر-مئیوه‌نی، تره‌وزی، ائله‌جه ده یومورتا، سود، قاتیق، پئندیر و یاغ محصول‌لاری‌نین ساتیشینی رئالیزه ائتمک یاقوبون صلاحیت‌لرینه عایید ایدی. آروادی پری‌نین شهرده دوغولوب بؤیومه‌سینه باخمایاراق او، گلین گلدیگی بو بئش-آلتی ایلده چتین کند شراییطینه چوخ تئز اؤیرشمیش، هر هانسی بیر ایشده هاندا اؤزوندن دئییب دؤشونه دؤین کند قیز‌لاریندان هئچ ده گئری قالمیردی. سککیز آیلیق سودامر قیزی نایله‌نین، بالاجا اوغلو نامیقین قایغی‌لاری دا اونا اؤز ایشلرینی گؤرمه‌سینده مانع اولا بیلمیردی. ان باشلیجاسی ایسه او، بوتون بونلاری چوخ هوسله گؤرور و هئچ واخت ایشین آغیرلیغیندان و یا چوخلوغوندان شیکایت ائتمیردی. هردن یاقوب دا اونون بوتون بو قدر ایشلری واختدیندا و کئیفیتله نئجه باشا چاتدیرماسینا حئیران قالیردی. ظارافاتلامی و یا گئچکمی، هردن صؤحبت اثناسیندا پری ارینه دئییردی کی، قوی هله بو ساواش قورتارسین، اوردوموز بو منفور ائرمنی قونشو‌لاریمیزی تورپاق‌لاریمیزدان قوووب چیخارداندان سونرا، تصروفاتیمیزداکی قویون‌لارین سایینی 200 باشا چاتدیرماسام، هئچ آتامین قیزی دئییلم. آنامین ایشله‌دیگی اوشاق باغچاسینی اؤز عؤهده‌مه گؤتوروب، اونلاری تمناسیز او‌لاراق کند تصروفاتی محصول‌لاری ایله تأمین ائده‌جم...
هینین قاپیسینی آچیب، تویوق‌لارین یئم یئرینه بیر وئدره دن سپه‌ندن، قاب‌لارینا سو تؤکندن سونرا یاقوب داروازانی آچاراق حئیوان‌لاری قاباغینا قاتیب کند یولونا طرف سوردو. کندین او باشیندان گلن نوبات سوروسو اونسوزدا گلیب اونون یانیندان اؤته‌جکدی دئیه، همیشه کی کیمی یئنه ده ائله بورادا گؤزله‌مگی قرارا آلدی. بو واخت اونون موبیل تلفونو زنگ چالماغا باشلادی. پئنجگی‌نین جیبیندن چیخارتدیغی تلفونوندا باکیدا یاشایان بالدیزی‌نین آدی‌نین یازیلدیغینی گؤرنده ناراحات‌لیقلا دویمه‌نی باسدی:
-آلو! ائشیدیرم گولپری! سالام!
-سالام، یاقوب! یوخودان اویاتمادیم کی؟
-یوخ، یوخ، ائوده دئییلم، حئیوان‌لاری نوباتا اؤتورورم. نه ایشدی؟ سحرین گؤزو آچیلمامیش خئییر اولا، زنگ ائله‌میسن؟ ناراحات اولدوم.
-ائله بیز ده دونندن چوخ ناراحاتیق. بوتون گئجه نی یاتمامیشیق. آخشام حربی کومیسارلیقدان ائوه زنگ وورموشدو‌لار کی، ناظیم دؤیوش‌لرده آغیر یارالانیب، موعالیجه اولونماق اوچون بو گون آخشاما قدر اونو باکی‌یا گتیره‌جک‌لر. بونو ائشیدندن سونرا آنامی هله ده ساکیت‌لشدیره بیلمیریک. دئییر کی، یقین اوغلوم اؤلوب، بونلار دا منی آلدادیر‌لار. آتام دا دئییر کی، آنامی آنجاق پری ساکیت‌لشدیره بیلر. چاغیرین پرینی، اوشاق‌لاری دا گؤتوروب گلسین باکی‌یا.
یاقوب هیجانلا سوروشدو:
-نئجه یعنی، کیم دئدی کی، ناظیم اؤلوب؟
-دئمه‌دیلر ائی اؤلدوگونو، آنام اؤزوندن بئله دوشونور. جبراییل رایونو اوغروندا گئدن شیدّتلی دؤیوش‌لری تلویزیون کانال‌لاریندان ایزله‌یندن سونرا آرواد اؤزو بئله نتیجه‌یه گلیب. آنادیر دا، بلکه ده اورگینه ...
یاقوب گولپری‌نین سؤزونو بیتیرمه‌سینه ایمکان وئرمه‌دی:
-یوخ، یوخ، قطعی او‌لاراق ائله دوشونمه‌یین! من ائله بیر-ایکی ساعاتا پرینی اوشاق‌لارلا بیرلیکده شهره یولا سا‌لارام. لاکین بئله وضعیتده من ده اونلارا قوشولوب شهره گله بیلمه‌رم، دوز باشا دوشون، کندین بو گونونده ائل آدامی قینایار. آتیشما بیر بالاجا سنگیین کیمی اؤزوم ده گله‌جم. آما بیلمیرم بو خبری پری‌یه نئجه دئییم؟
-بیلمیرم، بیر تهر دئ، باشا سال کی، گئتمه‌لیسن، قارداشین آغیر یارالی‌دیر. سن اؤزون ایسه هله‌لیک گلمه، آما اوشاق‌لاری موطلق گؤندر! ائشیدیرسن منی، سن اؤزون گلمه، اوشاق‌لاری گؤندر! - بونو دئییب گولپری تلفونو سؤندوردو.
بیر دقیقه کئچمه‌میش یئنیدن یاقوبون تلفونونا زنگی گلدی. زنگ ائدن و بایاقکیندان فرقلی او‌لاراق بو دفعه آغلایاراق هیچقیرا-هیچقیرا دانیشان یئنه ده گولپری ایدی:
-یاقوب، ناظیم حاقیندا حقیقتی تکجه من بیلیرم و بونو آخشامدان سینه‌مده گیزلی ساخلاییرام. سنین خطرینی تک یئزنه کیمی یوخ، هم ده بؤیوک قارداش کیمی نه قدر چوخ ایسته‌دیگیمی بیلمه‌میش دئییلسن. اونا گؤره ده هر شئیی سنه آچیق دئیه‌جم. اورگیم پارتلاییر... آخشام زنگیندن سونرا اورگیم چوخ ناراحات ایدی. زنگ ائدن حربی کومیسارلیغین نوماینده‌سیندن ناظیمین نئجه و هاراسیندان یارالاندیغینی سوروشدوقدا اونون منه جاواب وئرمکده چتین‌لیک چکدیگینی حیسّ ائتدیم. بونا گؤره ده اؤزوم گئجه ساکیتجه حَیطه چیخیب حربی حیصه‌یه زنگ ائده‌رک ناظیمین کومادیری ایله تلفونلا علاقه ساخلادیم و نه قدر چتین و آغیر اولسا دا حقیقتی ائشیتمگه حاضیر اولدوغومو اونا سؤیله‌دیم. او، دؤیوش‌لرده قهرمان‌لیق گؤسترن ناظیمین ائرمنی کسکین نیشانچی طرفیندن اورگیندن وورو‌لاراق اؤلدورولدوگونو سؤیله‌دی. ائشیدیرسن منی؟.. ناظیم یوخدور آرتیق، قارداشیم شهید اولوب!..
تلفون یاقوبون الیندن سوروشوب آیاغی‌نین آلتینداکی گؤلمچه‌نین ایچینه دوشدو و دئیه‌سن اونون هئچ بوندان خبری ده اولمادی. ائله بو واخت کندین نوبات سوروسونو اؤروشه آپاران چوبان اونون یانیندان اؤترکن سالام وئرسه ده سالامی ائشیتمه‌دیگیندن یاقوب هئچ قیمیلدانمادی دا. چوبان بیر سؤز دئمه‌ییب چیگین‌لرینی اویناداراق یاقوبون قویون‌لارینی نوبات سوروسونه قاتیب، فیت چالا-چالا اونلاری دره آشاغی چمن‌لیگه طرف سورمگه باشلادی. بیر نئچه دقیقه بئله‌جه یئرینده دایانیب سورونون آرخاسینجا باخان، دوشمن طرفین آتدیغی مرمی سسیندن دیکسینه‌رک اؤزونه گلن یاقوب، کندین او بیری باشیندا یاشایان تاکسی شوفری بهمنین ائوینه ساری یوللاندی. بئله وضعیتده اونون کؤمگینه آنجاق بهمن گله بیلردی. ترتر – باکی یولونو سو یولونا دؤندرن ایکی قروپ ساواش علیلی اولان بهمن، اؤز کؤهنه " مرسدس " ماشینی ایله هر گون جاماعاتی رایوندان شهره و عکسینه داشیماقلا اونلارا تاکسی خیدمتی گؤستریردی. هله 1992-جی ایلده تورپاق‌لاریمیز اوغروندا گئدن دؤیوش‌لرده سول آیاغینی ایتیرمیشدی. یئریینده آیاغی‌نین بیری‌نین پروتِز اولماغی آزاجیق بیلینیردی. بوتون بونلارا باخمایاراق عومومی‌لیکده صحتی اونا ماشین سوره‌رک تاکسی فعالیتی ایله مشغول اولماغا هئچ بیر چتین‌لیک یاراتمیردی. داروازایا یاخینلاشان یاقوب بهمنین آلاقاپیسینی دؤیمکله کیفایت‌لنمه‌ییب، اونو آدی ایله ده سسله‌مگه باشلادی. آلاقاپینی اؤزو آچان بهمن یاقوبون آغارمیش صیفتینی گؤروب اونونلا ظارافات ائتمک ایسته‌دی:
-صاباحین خئییر. نه اولوب، آ قاغا؟ ائله هایلاییرسان کی، ائله بیل کندیمیزین بومبالانماسینی ایلک دفعه گؤرورموش کیمی هیجانلاناراق، منه خبر وئرمگه گلمیسن؟!
-یوخ، یوخ اشی. نئچه ایل‌لردیر سنگیمک بیلمه‌ین آتیشما‌لاری، ائرمنی‌لرین کنده آتدیقلاری بومبا‌لاری اونسوز سن ده ائشیدیب گؤرورسن. ائرمنی‌لرین مولکو اهالی‌یه قارشی تؤرتدیکلری بو تخریبات‌لارین ایلک دفعه دئییل کی شاهیدی اولوروق. اوّلکی ایل‌لر دئییل ائئ، آرتیق قورخماغا هئچ بیر اساس یوخدور، اوردوموزون عسگر‌لری ائرمنی‌لرین وحشی‌لیک‌لری‌نین قارشیسینی قطعیتله آلیر‌لار و بوندان سونرا دا آلاجاقلار. من باشقا مسله اوچون گلمیشم. سن بو گون باکی‌یا گئده‌جکسن‌می؟
-هه، گئده‌جم، آما قاباق اوتوراجاقدا گئده‌جک بیر نفر موشتریم وار. آرخایا یئرلشرسینیزمی؟
-هه، یئرلشر‌لر. من گئتمیرم، اوشاق‌لاری گؤندریرم. نه واخت یولا دوشه‌جکسن؟
-چؤرگیمی یئییم، یاریم ساعاتا ترپنه‌جم. بو قاریشیق‌لیقدا اوشاق‌لاری شهره یوللاماغین خئییردیرمی؟ یوخسا...
-یوخ، یوخ، خئییر دئییل! پری‌نین قارداشی دونن جبراییل رایونو یاخین‌لیغیندا گئدن دؤیوش‌لرده شهید اولوب. بو آخشام اونون مئیدینی دفن ائتمک اوچون شهره گتیره‌جک‌لر. هله بو باره ده هئچ پری‌نین اؤزو بیلمیر. سن ده یولدا اونا هئچ نه بیلدیرمه. اونو " قارداشین آغیر یارالانیب " آدی ایله ائو‌لرینه یولا سالاجام، هر شئیدن باکیدا خبر توتسا یاخشی‌دیر. آللاه تورپاق اوغروندا اؤلن بوتون شهید‌لریمیزه رحمت ائله‌سین! من گئدیم، سن ده حاضیرلاش. سنی ائوده گؤزله ییرم، داروازانین یانینا چاتاندا سیقنال وئررسن، چیخاریق. تئز گئدیم کی، اوشاق‌لار دا یولا حاضیرلاشسینلار...
یاقوب داروازانین آلاقاپیسینی آچیب حَیطه گیرنده پری ساماواری قاینادیردی. آرمود آغاجی‌نین آلتینداکی استولون اوستونده سحر یئمگی اوچون هر شئی دوزولموشدو. یاقوبون یئمگه ایشتاهاسی اولماسادا آروادی ایله سالاملاشاراق استولا یاخینلاشیب اَیلشدی. پری‌نین قاینار ساماواردان اونا سوزموش اولدوغو پوررنگی چایلا دولو آرمودو استکانی قارشیسینا چکدی. حادیثه‌نی پری‌یه نئجه سؤیله‌مه‌سی اوچون اویغون مقام آختاردیغی بیر آندا، آتاسی‌نین سسینی ائشیدیب یوخودان اویانان نامیق الینده شالوارینی و کؤینگینی گتیره‌رک گئییندیرمک اوچون آناسینا یاخینلاشدی. بو زامان ایچری اوتاقدان کؤرپه نایله‌نین سسی ائشیدیلدی. او، آغلاماقلا یوخودان اویاندیغینی و آج اولدوغونو آناسینا سانکی بو یوللا خبر وئرمگه چالیشیردی. پری اونا ساری گلن اوغلونو گؤتوروب اری‌نین قوجاغینا اوتوزدوردو:
-قوربانین اولوم، یاقوب، سن نامیقی گئییندیر، من ده نایلیله مشغول اولوم. اونون پامپسینی دَییشدیریب، امیزدیرمه‌سه‌م، قیز ساکیت‌لشن دئییل. قوی اونو راهلاییم، سونرا گلرم بیرلیکده چؤرگیمیزی یئیریک. – بونو دئین پری تله‌سیک ائوه ساری یوللاندی...
بهمن دئدیگی واختدا ماشینینا اوتوروب ائودن چیخان زامان ائرمنی‌لر یئنیدن کندین آشاغی ایستیقامتینه داها بیر بومبا مرمیسی آتدیلار. دوشمن طرفیندن آرا بیر پولیمیوت‌لاردان کنده ساری آتیلان گولله‌‌لرین سسی ده آچیق-آیدین ائشیدیلیردی. اوردوموزون عسگر‌لری دوشمنین توپ و پولیمیوت‌لارینی سوسدورماغا چالیشسا‌لاردا، یاغیشدان سونرا زهرلی گؤبلک‌لر کیمی عمله گلن ائرمنی‌لر، سانکی یئنیدن مئیداندا اولدوقلارینی بیلدیریرمیشلر کیمی، دینج اهالی‌نین یاشادیغی کنده آتش آچماقدا داوام ائدیردیلر. بهمن ماشینی احتیاطلا سوره‌رک کندین باش یولوندان دؤولت طرفیندن تیکیلن یئنی محله‌‌لره طرف دؤندرنده اینسان‌لارین کوچه بویو قاچدیغینی گؤروب سورعتی آزاجیق آرتیردی. او، بیر تایی آشاراق کنارا دوشموش، قلپه‌‌لردن دئشیک-دئشیک اولماقلا آش‌سوزه‌نی خاطیرلادان دیگر تایی هله ده آرام-آرام یئللنه‌رک جیریلدایان داروازانین قاباغینداکی ائوه یاخینلاشیب ماشینی ساخلادی. ماشیندان ائنیب حَیطه یاخینلاشاندا گؤز‌لرینه اینانمادی. بیر نئچه دقیقه بوندان قاباق حَیطه دوشموش بومبانین پارتلاماسی نتیجه‌سینده تورپاقدا بؤیوک دلیک عمله گلمیشدیر. ائوین اؤن دیواری‌نین داغیماسی ایسه تاوانین چؤکمه‌سینه سبب اولموشدور و بو دا ایچریده کیملرینسه ساغ قالماسینا گومان یئری قویموردو. قونشو‌لاردان کیمسه حَیطده کی مئیید‌لرین اوزرینه آغ ملفه سرمیشدی. اوستو اؤرتولموش مئیید‌لردن بیری‌نین اوشاق اولدوغو آرالیدان بیلینیردی. بهمن اطرافا توپلانمیش قونشو‌لارین یانیندان کئچیب مئیید‌لره یاخینلاشدی. باشینی قالدیریب غضب و تأسوفله ائوه ساری بویلاندی. بو واخت اوچموش ائوین قالیق‌لاری آلتیندان سانکی ضعیف اینیلتی ائشیدیب تئز اورا یاخینلاشدی. کند آدام‌لاری‌نین کؤمگی ایله تئز بیر زاماندا اوچموش ائوین تاوانی آلتیندان قوجاغیندا کؤرپه‌سینی سیخیب ساخلایان، باشی‌نین بیر طرفی داغیلمیش وضعیتده اولان قادین مئیدینی چیخاردیب حَیطه اوزاتدیلار. قادینین اؤز بالاسینی امیزدیررکن باشیندان آلدیغی قلپه یاراسیندان اؤلدوگو بیلینیردی. آنانین قانلی دؤشو هله ده کؤرپه قیزجیغازین آغزیندا ایدی. اونون باشیندان آخان قان ایسه ضعیف بیر شیریملا سوزوله‌رک کؤرپه‌نین صیفتینه، اورادان دا آخیب تورپاغا قاریشماقدا داوام ائدیردی.
یازان: عارف ارشد 04-10-2020-جی ایل / کؤچورن: عباس ائلچین
