+0 بگندیم
میدال آلان ائششک
عزیز نسین
کؤچورن: عباس ائلچین
اوّل زامان ایچینده، قلبیر سامان ایچینده، دوه دللک‌لیک ائدیر اسکی حامام ایچینده، مملکتده بیر پادشاه وارمیش. تانری گؤسترمه‌سین، آنلادیلماز بیر قیتلیق باش گؤسترمیش. بیر زامانلار یئدیگی قارشیسیندا، یئمه‌دیگی آردیندا، بیر الی یاغدا بیر الی بالدا اولان اینسانلار، بیر پارچا قورو چؤره‌یه مؤحتاج اولموشلار.
پادشاه باخمیش کی قیتلیق خالقی قیریب کئچیره‌جک، بونو اؤنله‌ییجی بیر چیخیش یول آختارمیش. سونوندا، مملکتین دؤرد بوجاغینا، کوچه-کوچه،جارچیلار سالمیش. جارچیلار پادشاه فرمانینی بئله قیشقیریرمیشلار:
- ائی اهالی!.. ائشیتدیک ائشیتمه‌دیک دئمه‌یین!... هر کیمین دؤولته بیر خیدمتی، وطنه بیر فایدالیغی اولموشسا، قاچیب سارایا گلسین! پادشاهیمیز، افندیمیز اونلارا میداللار وئره‌جک!..
اینسانلار، آجلیغی، یوخلوغو، دردی، بورجو، خرجی اونودوب، پادشاهدان میدال آلماق سئوداسینا دوشموشلر.
پادشاهدا ائدیلن خیدمتین بؤیوکلوگونه گؤره، چئشید-چئشید میداللار وارمیش. بیرینجی درجه‌دن قیزیل زرلی میدال، ایکینجی درجه‌دن قیزیل سویونا باتمیش میدال، اوچونجو درجه‌دن گوموش اؤرتمه میدال، دؤردونجو درجه‌دن دمیر میدال، بئشینجی درجه‌دن قالایلی میدال، آلتینجی درجه‌دن چینقو میدال، یئددینجی درجه‌دن تنکه میدال...
گلن گئدن میدال آلیرمیش. آرتیق ائله اولموش، ائله اولموش کی، میدال قاییرماقدان پادشاهین مملکتینده دمیر،دومور،چینقو، تنکه قالمامیش. چرچی قاتیری‌نین بویونداکی زینقیلتی ایله یئللنن شوشه مونجوقلار نئجه‌سه، کؤروک کیمی شیشیریلن سینه‌لر اوزرینده ده میداللار، ایشده ائله یئللنمگه باشلامیش.
اینسانلارین سینه‌لرینده زینقیلتی ایله میداللارین یئللندیگی، پادشاهین کیم گلیرسه میدال پایلادیغینی ائشیدن بیر اینک ده،
- "میدال اصل منیم حاقّیم!" دئیه‌رک بیر میدال آلماغی بئینینه سالمیش.
آجلیقدان بیر دری بیر سوموک، بؤیرو بؤیرونه چؤکموش، قابیرغاسی اونورغاسینا کئچمیش اینک قاچا-قاچا سارایین قاپیسینا گلمیش. قاپیچی‌یا،
- پادشاها خبر وئرین! دئمیش. بیر اینک بیله‌سینی گؤرمک ایسته‌ییر. باشلاریندان سووماق ایسته‌میشلرسه ده،
- پادشاهی گؤرمه‌دن، بو قاپیدان بیر آددیم آتمارام!... دئیه بؤیورمگه باشلایینجا، پادشاها،
- افندیمیز، قوللارینیزدان بیر اینک حوضورونوزا چیخماق ایسته‌ییر... دئمیشلر.
پادشاه،
- گلسین باخاق، بو دا نئجه بیر اینکمیش... دئیه اینگی حوضورونا چاغیریب،
- بؤیور باخاق، نه بؤیوره‌جکسن؟... دئیه سوروشموش،
اینک ده،
- سولطانیم، دئمیش، ائشیتدیگیمه گؤره میداللار داغیدیرمیشسان. من ده میدال آلماق ایسته‌ییرم.
پادشاه،
- هانسی حاقلا؟ دئیه قیشقیرمیش. سن نه ائتدین. مملکته نئجه بیر فایدالیلیغین توخوندو کی سنه میدال وئرک؟...
او زامان اینک،
- افندیمیز! دئیه سؤزه باشلامیش. منه میدال وئریلمه‌سین ده کیملره وئریلسین؟ من داها اینسانلارا نه ائله‌ییم؟ اتیمی یئیرسینیز، سودومو ایچیرسینیز، دریمی گئییرسینیز. گوبره‌می بئله بوراخماز ایستیفاده ائدرسینیز. تنکه بیر میدال اوچون، داها نه ائله‌ییم؟
پادشاه، اینگین ایستگینی حاقلی حساب ائتمیش. اینگه ایکینجی درجه‌دن بیر میدال وئریلمیش. بویوندا میدالی، اینک سئوینجدن اوینایا-اوینایا سارایدان دؤنرکن قاتیرلا قارشیلاشمیش.
- سالام اینک قارداش!
- سالام قاتیر قارداش!
- ندیر بو سئوینجین؟ هارادان گلیرسن بئله؟ اینک هر شئیی بیر-بیر آچیقلامیش. پادشاهدان میدال آلدیغینی دا سؤیله‌یینجه قاتیر دا جوشموش.
او جوشغونلوقلا دوغرو دؤردنالا سارایا وارمیش.
- پادشاهیمیز افندیمیزی گؤره‌جگم!.. دئمیش.
- اولماز!.. دئمیشلر.
آمّا، آتادان قالما عینادچیلیغی ایله قاتیر آرد آیاقلارییلا سارای قاپیسیندا دیره‌نینجه، پادشاها دورومو چاتدیرمیشلار. پادشاه،
- گلسین باخاق، قاتیر قولوم دا... دئمیش.
قاتیر حوضورا وارینجا، بیر قاتیر سالامی وئریب، ال اتک اؤپدوکدن سونرا، میدال ایسته‌دیگینی سؤیله‌میش پادشاه سوروشموش:
- سن نه ائتدین کی میدال ایسته‌ییرسن؟
- آ هونکاریم، داها نه ائدیم؟ دؤیوشده توپونوزو، توفنگینیزی کورگیمده داشییان من دئییلم می؟ باریشدا اوشاق-موشاغینیزی آرخامدا آپاران من دئییلم‌می؟ من اولمازسام، ایشینیز زایدیر.
قاتیری دا حاقلی گؤرن پادشاه،
- قاتیر قولوما دا بیرینجی درجه‌دن بیر میدال وئریلسین!... دئیه فرمان ائیله‌میش.
قاتیردا بیر سئوینج بیر سئوینج، دؤردنالا سارایدان دؤنرکن ائششکله قارشیلاشمیش. ائششک،
- سالام قارداش اوغلوم!... دئمیش. قاتیر،
- سالام عمی‌جان!.. دئمیش.
- هارادان گلیب، هارا گئدیرسن؟ قاتیر باشیندان کئچنلری آچیقلایینجا،
- دایان ائله ایسه، پادشاهیمیزا گئدر، بیر میدال دا من آلارام!.. دئیه دؤردنالا سارایا قاچمیش.
سارای قورویوجولاری، دئه دئمیشلر، چوش دئمیشلر، ائششگی هئچ جور سوووشدورا بیلمه‌یینجه پادشاها واریب،
- ائششک قولونوز گلمیش، حوضورا چیخماق ایستر! دئمیشلر. ائششگی قبول بویوران پادشاه،
- نه دیله‌یرسن ائی ائششک قولوم؟.. دئیینجه،
ائششک ده دیله‌دیگینی بیلدیرمیش. پادشاه، جانی بورنونا گلیب کوکره‌میش:
- اینک اتی ایله، دریسی ایله، گوبره‌سییله بو مملکت، بو میلّته خیدمت ائتدی. قاتیر دئسن دؤیوشده، باریشدا یوک داشیدی، بو وطنه خیدمت ائتدی. آ ائششک، یا سن نه ایش گؤردون کی، بیر ده قالخمیش ائششک‌لیگینه باخمادان میدال ایسته‌ییرسن؟.. اوتانمادان بیر ده قارشیما گلمیشسن. سؤیله، نمنه ائله‌میشسن؟
او زامان ائششک کئفیندن دیشینی آغارداراق،
- آمان پادشاهیم افندیم، دئمیش، سیزه ان بؤیوک خیدمتی ائششک قوللارینیز ائتمیشدیر. اگر منیم کیمی مینلرله ائششک قوللارین اولماسایدی، هئچ بیر تاخت اوزرینده اوتورا بیلرمی ایدین؟ سلطنت سوره بیلرمی ایدین؟ دوعا ائت بیز ائششک قوللارینا کی، بیزیم کیمی ائششکلر وار دا، سن ده بئله سلطنت سورورسن.
پادشاه، قارشیسینداکی ائششگین، ائله هر ائششک کیمی تنکه میداللا گؤزو دویمایاجاغینی آنلامیش،
- ائی ائششک قولوم، حاقلیسان سنین سایه‌نده من بو مقامدایام دئمیش. سنین بو چوخ یوکسک خیدمتینی قارشیلایا بیله‌جک بیر میدالیم یوخ. سنه اؤلَنه قدر دربار آخیریندان هر گون آرپا، یونجا، سامان و قیش آیلاریندادا کؤمور، باغلادیم..
یئ، یئ سلطنتیم اوچون دایانمادان آنقیر! . .
