+0 بگندیم
آغ-قارا گونلریم
علی حیدری آغ اسماعیللی
تندیرین آجی توستوسو اوتاغی بورویوب. نفس چکمکده زولانیرام. بورنوم آجیشیر. آجیقلی-آجیقلی یئریمدن قالخیرام. آناما گئدیرم:
- نه توسسی سالمیسان، بورنوم، بوغازیم یاندی؟!
- وی علی بالام! دوردون یوخودان؟ ها بالامسان گئت چیشینی ائله، گل سنه تاپتاپا یاپیرام..یئری بالامسان، ال-اوزونو یو، قوی یوخون قاشسین.- دئییر آنام.
دئدیگی کیمی ائدیرم. اوزاقدان قیشقیریر:
- کؤپویولونون بالاسی به دئمه‌میشم کردیه یوخ، گئت ایاخ یولونا. اؤزده ایاغ اوسته هن؟!
ایشه‌یرکن گولورم، هر زامانکی کیمی زانباق گوللری‌نین اوستونه! سویون سرینلیگی اوزومو دیشله‌ییر. لاکین داما گیرنده تندیرین ایستیسی اوزومده لذّتلی بیر گیزیلتی یاشادیر. تندیر دامی قاپ-قارا هیس باسمیش بیر اوتاقدیر. اورتالیقدا بیر- بیریاریم مئتر درینلیگینده بیر تندیر وار قیراقدا بیر کوفله‌سی. تاواندا ایسه بیر باجا وار توستونو چکیر. گونون ایشیغی بیر بورو کیمی دامدان یئره دایانیر، ایچینده اینجه-اینجه توز، تورپاقلار قایناشیر. بوینومو اوزادیب تندیرین ایچینه باخیرام. آلما چیرپیلاری او قدر گؤزل یانیر کی! ایستی اوزومو یاندیرسادا کؤزلردن گؤز گؤتوره بیلمیرم. ساعاتلارجا باخیرام. آلاودا چئشید-چئشید رنگلر وار: قیرمیزی، ساری، ماوی، یاشیل؛ بیربیریندن اعلا، آمما بیر ایشیلتیلی تورونج رنگ وار وصفه گلمه‌ین قدر گؤزلدیر.
چؤرکلر تندیرین دیواریندا گئت-گئده دویمه‌له‌نیر سونرا قیزارماغا باشلاییر. واختیندا چیخاریلماسا یانیب کول اولاجاقلار. بیر آندا، آنام سانکی اؤزونو تندیره آتماق ایسته‌ییر کیمی، اَییلیب چؤرکلری بیر-بیر چیخاریب قاریشدا سوفره‌نین اوستونه آتیر.
- آنا به سنین ال-قولون، اوزون یانمیر؟!
- یووخ! باخ الیمه قولچاخ تاخمیشام، اوزومی ده چارقات قویمور یانسین.
- آنا! من ده یاپا بیله‌رم؟
- یوخ سن هله بالاجه‌سن، چکیل قیراغا دوشرسن تندیره!
الینده خیردا بیر کونده‌‌نی یاستیلادیر سونرا کیبریبت قوطوسو ایله اونا ناخیش سالیر، اورتاسینا بیر دلیک قویور. "بو دا بونون گؤبگی"دئییر.
- اوتور اوردا!
قارتوپو (یئرآلما) قویوسونون اوستونده اوتورورام. آمما آیاغیم راحات دورمور؛ کوفله‌نین تیخانجینی آیاغیملا قووزاییرام.
- علی! پیس بالا اولورسان! کوفله‌نی آچیرسان تندیر سووویور، چؤرکلر آخیر تندیره.
سونرا باشلاییر:
- علی بالا! باشماخلارین یاغلارام
علی بالا! اوستونه گول باغلارام
علی بالا! بیر گون بئواخت گلیرسن
علی بالا! دسمال آلیب آغلارام.
بو آنامین سسیدیر. هئچ بیر موسیقی چالینمیر آنجاق قارمان سسیدیر سانکی سیزیلتیسی. بو سس منی هر زامانکی کیمی یوشودور. روحومو اوخشاییر، اورگیمین تام اورتاسیندا اوتورور. او زامانلار بئله سانیردیم بو شئعیرلر تکجه منه عایددیر.
- آنا منه ممه‌لی چؤچه یاپ.
- یاخچی..آخیر تندیرده. ایندی اولماز چؤرکلر قالار...
بیر گؤزوم تاپتاپالاردیر. تندیرین دیواریندا کؤپسه‌ییر، اؤزونو دیواردان قوپارتماق ایسته‌ییر، اوزو قیزاریر. آنام تئز تندیردن چیخاردیب اللری یانا-یانا چؤرکلرین اوستونه آتیر.
- یئری گؤتور.. گؤزله اللرین یانماسین!
تاپتاپانی گؤتوروب کؤینگیمین اتگینه قویوب تندیر دامیندان ائشیگه چیخاندا قاییدیب آناما باخیرام. آلنیندا ترلر مینجیق-مینجیق؛ اوزو قیزاریب عئینی منیم تاپتاپم کیمی. بو قادین نه قدر گوجلو، نه قدر دوزوملو، نه قدر فداکاردیر؟!
بیر تیکه قوپاردیرام. پوفله‌ییب آغزیم یانا-یانا یئمه‌یه باشلاییرام. بیر داد وار آغزیمدا دوشونه بیلمزسینیز! بیر داد کی یالنیز او آنامدا وار؛ اونون بوینونو قوجاقلاییب اوزونو اؤپرکن دؤنه-دؤنه دادمیشام. مکمل بیر داد! عطرلری عئینی، دادی-دوزو عئینی، حتی ایستیسی عئینی، هر ایکیسی ائویمیزین برکتی!
قاپیدا اوتورورام. خیردا-خیردا یئمه‌یه باشلاییرام. ایکی گؤزومده آنامدا.
- علی؟!
- هن!..
- یئری بیر باخ گؤر اوشاخ دورمویوب کی؟
گئدیب باخیرام. قارداشیم تزه اویانیب اویان-بویانا باخیر. چاغیریرام، اوشاق سسیمدن دیکسینب آغلاماغا باشلاییر. آنام تندیرین قیراغیندان چکیلیب بیرآز سوتونو، قابداکی کول اوستونه ساغیر. اورتانجیل باجیم قارداشیمی گتیریر آنام امیشدیرسین.
بؤیوک باجیم خمیرلری کونده‌له‌ییب ایکی تلیسین آراسینا دوزور. آنام دنه-دنه اونلاری گؤتورور نیمدانین اوستونده وردنه ایله آچیر. سونرا ایکی قولونون اوستونده او قدر آتیر، توتور خمیر چؤرک‌یاپانین اندازه‌سی قدر اوزانسین. چؤرک یاپانی تندیره ساللاییب دیوارینا یاپیشدیریر. بو ایش خمیر قورتولانادک دوام ائدیر. سونوندا اون اون‌بئش تاپتاپانین اوزونه یومورتا سورتوب تندیره وورور. بو بیزیم قیش چؤره‌گیمیزدیر.
قارا چایدان تندیرده اؤزونو اؤلدورور. شیش ایله اونو تندیردن چکیر.
- قیز بونا بیر قاشیخ چای سال بیر تیکه ناشتاولیخ یئیخ!
کؤسسوو گؤتورور تندیری قاریشدیریر. قاپی سمتیندن بیر سس گلیر:
- خالا..خالا.. تندیری قالا – کوسسووی گؤتور منی قاوالا!
دالی‌یا باخمامیش سسی تانیرام. معصیم خال‌اوغلودور. یئددی آغاجدان تزه چؤرگین ایگینی آلار. هر چؤرک یاپاندا گلیب تزه چؤرک آپارار. کوپه پنیرینی قویار آراسینا کئیف‌له یئیر.
آنام‌گیل، ناهار چاغی ایشدن قورتولورلار. بیر ساطیل سود قیزدیریب تندیر دامیندا چیمیرلر.
آخشامدیر. آتام ایشدن قاییدیب. هامیمیز تندیره ساللانمیشیق. چای ایچیریک. قوهوم-قونشو بیزده‌دیرلر. سیمیزا خالا باشلاییر:
- بیر گون وار ایدی، بیر گون یوخ ایدی، آللاهدان سئوای هئچ کیم یوخ ایدی. بیر گئچی وار ایدی. اوش دنه بالاسی وار ایدی، شنگولی، منگولی، کوفله گولی....
