ائلچین

تورک دیلی و ادبیاتی

عؤمورلوک حسرت

+0 بگندیم

عؤمورلوک حسرت

علی حیدری آغ اسماعیللی

   اوشاقلارین سسی کوچه‌نی بوروموشدو. اؤزومو ساخلایا بیلمه‌ییب تلَسیک ائودن ائشیگه آتیلدیم. هره بیر یانا قاچیردی. بیلر-بیلمز منه‌ ده هیجان ال وئردی.  اوشاقلارا دوغرو قاچدیم. قدرت آتلانیب-دوشه‌رک اویان-بویانا قوشوردو. زورلا اونو ساخلاشدیریب سوروشدوم:

- نه اولوب..نه خبردی؟!

- حاضیرلاشیریق.. گؤله گئدیریک..اورمو گؤلونه. ایندی مینی بوس گلر؛ آتام قارپیز-خیار  آلماغا گئتدی، آنامدا دئییشک پالتارلاریمیزی قویور؛ ناهار حاضیرلاییر...

       قدرت گؤره‌ر-گؤرمز گؤلو ائله تعریفله‌ییردی کی اورگیمده آلاولی ایستک یارادیردی. آمما بیر سؤزو یادیندان چیخارتمیشدی سانکی، یادا منه یاندیق وئرمک اوچون اؤزو بیله-بیله سؤیله‌میردی. گؤله گئتمه سئوینجیندن من کؤکوندن اونودولموشدوم. بو اوزدن، او دئدیکجه منیم  ایچیمده گؤله گئتمگه ایستک آرتیر، اورگیمدن قانلار آخیردی. اونودولدوغومدان اورگیم سیخیلیردی. بیر آز داها دورسایدیم آغلایاجاقدیم. آخی بیزیم هر گونوموز برابر کئچیردی، هر یئره برابر گئدردیک، آناسی هر زامان منه، قدرتدن موغایات اول دئیه تاپشیراردی. بیر گون بیزده، بیر گون اونلاردا ناهار یئیردیک، قارداشدان دا یاخین ایدیک. ایندیسه ندن من یاددان چیخمیشدیم؟! کوسکون-کوسکون قدرتی سئوینجینده بوراخیب ائوه قاچدیم. تاختا قاپیمیزدان، سوواخلی دیوارلارمیزدان، یئردن، گؤیدن زهلم گئتدی. آخی منده گؤله گئتمک ایسته‌ییردیم. آنجاق ایندییه‌دک من شهریمیزین چوخلو یئرینه گئده‌ بیلمه‌میشدیم نه قالسین اورمو گؤلونه! نه آتام ائوده ایدی نه ده آنام. دوشونوردوم؛ نییه منه صاحاب چیخان یوخدور؟ بس منیم ایستکلریم همیشه اورگیمده قالاجاق؟ قورتولوش یولو هایاندادیر؟!

     آتام گونلوک فهله ایدی باغدا ایشله‌ییردی. آنامدا دئدیگی کیمی، قارا گوندن قورتولماق اوچون یاشامدا دده‌مه  دایاق دورماق اوچون یازی-یایی گئدیب چؤلده-باییردا ایشله‌یردی؛ آلاق ائله‌یردی، کدو چیخارداردی، گونه‌باخان چیرپاردی، آلما درَردی... قیشی دا ائولرده ایشله‌یردی، چؤرک یاپاردی، یورغان-دؤشک سیرییاردی.. کؤرپه‌لیگیمدن منی باجیلاریم ساخلایاردی. آنامین سورکلی ایشده اولدوغوندان اوزونه تامارزی ایدیم. آخشامدان آخشاما یاتمامیشدیمسا اونو قیسا بیر زامان گؤره‌ردیم؛ بو گؤروشده دوْیوملوق دئییل دادیملیق ایدی. گؤزومو آچاندان اونو یانیمدا  دویماییب دویونجا قوخوسونو آلمامیشدیم بئله.

     آتا-آنام آخشاملاری آرغین-یورغون ائوه قاییدیردیلار. آنام تئز چای قویاردی. آتامدا ال-آیاغین یویوب حیطده سریلن حصیرین اوستونده اوتوروب پیلله‌لره دایاناردی. چای ایچردی. ایستکانین دیبینده‌کی تیلیفلری یئره سَپردی. تیلیفلر قورویاندان سونرا ائله‌بیل قاریشقا اؤلولری ایدی. چایدان سونرا آنام پیله‌ته‌نین باشینا کئچیب شام حاضیرلاماغا باشلاردی. بو زامان من اؤزومو قوللو-قانادلی حیس ائدردیم. آنام شام قویاندا سیزیلدایا-سیزیلدایا  بایاتی اوخویاردی. هر دیزه‌نین سونوندا ایسه دئیردی: علی بالا. اوخویاندا روحوم دویغو-احساسلا یوغرولور اوشاقلیغیم باشلاردی. اؤزمو گؤسترمگه، ازدیرمگه، آنامی قوخولاماغا فورصت تاپاردیم.

     آنامدان پول آلماقدان اؤترو مین بیر اویون چیخاردیب شیلتاق وئرردیم. اتگینی چکردیم، یایلیغینی آچاردیم، ال-قولونا دولاشاردیم، لامپانی پوفله‌ردیم، سونوندا جانا گلیب منه پول وئرردی. بئش قیرانی آلیب نقدعلی دوکانچییا قاچاردیم. شوکالات، چوبی، چوچه آلاردیم. ساققیزی هئچ سئومزدیم آخی بیر کره چئینرکن دیلیمی دیشله‌میشدیم. آمما کوچه‌ اوشاقلاری هر زامان، هر شئی آلاردیلار؛ دوندورما، کانادا، پوفک.... منیم یانیمدا یئینده اؤزمو گؤرمزلیگه ووراردیم، بویور ائدنده  ایسه بیر شئی آلمازدیم چونکو آنام دئمیشدی: آدام نفسینی ساخلار، باشقالاریندان بیر شئی آلماز! آنام دئیردی: وسایل‌لرین بیر آزینی یئی، بیر آزینی دا ساخلا صاباحا، قالمایاسان! دئدیگی کیمی ائدردیم. آنجاق ایندی مسئله بام-باشقا ایدی. بئش قیرانلا دوزه‌لن ایش دئییلدی.  ماشین سسی منی اؤزومه قایتاردی. گئتمه زامانی چاتمیشدی. قاپینی یاریمچیق آچدیم. بیر گؤزمله اوغرونجا باخدیم. یوخ! بو اولمازدی، کریم ده ماشیندا اوتورموشدو! او کی هر زامان قدرت ایله ساواشاردی! ایندی ندن ایکیسی برابر بیر قولتوقدا اوتورموشدولار؟! دوداقلاریندا، شنلیک، سئوینج، راضی‌لیق گولوشو وار ایدی. بئله بیر شئی هئچ بیر پئیغمبرین کیتابیندا یازیلمامیشدی! بونو من اؤزومه بؤیوک بیر ظولم سایدیم. قدرت‌گیل ایله برابر گئدن اولسایدی یوزده یوز او من ایدیم! آمما بو نئجه بئله اولموشدو؟! باشا دوشموردوم. ماشین یولا دوشنده دوزه‌ بیلمه‌ییب سسسیزجه آغلاماغا باشلادیم. یاش گؤزلریمده گؤل‌له‌نیب سونرا آخیب سئله چئوریلدی. ایچیمی چکرکن بیر الین ایستی‌لیگینی چیگنیمده دویدوم. گؤزلریمی سیلمگه ماجال تاپا بیلمه‌دیم. هله ده کؤینگیمین یاخاسینی دیشیمده سیخیردیم. چؤندوم؛ باجیم ایدی. یوموشاق-یوموشاق دئدی:

- آغلاما! سنی آپارماق ایسته‌سه‌ایدی بئله، آتا-آنا ایذین وئرمگه ائوده دئیلدیلر.. آغلاما! اینشاالله بؤیوینده اؤزون گئدرسن، بلکه منی ده آپاردین..

حرارتلی اللری ایله یاناقلاریمدان یاشلاری سیلرکن من گؤل-گؤل آغلادیم. قولونو بوینوما سالدی:

- گل گئدک، ال-اوزونو یویوم.. شیرین بالا اول هله.

گئده-گئده سوروشدو:

- هئچ گؤزیاشلارین دادمیشسان؟!

- هه! ایندی داددیم شوردو- دئدیم.

-  ائشیتمیشم اورمو گؤلونون سویودا شوردو، هئچ بونو بیلیردین؟- دئیه یئنه سوروشدو.

بو سؤزو خیردالایا بیلمه‌دیم. "یوخ! بیلمیردیم " دئدیم.

     ایندی قیرخ ایلدن سونرا باجیمین سؤزلرینی دوشوندوکده، گؤز یاشی ایله اورمو گؤلونون ایلگیسینی آنلاییرام. ایندی اورمو گؤلو قوروماقدا، یامان حالدادیر. دوشونورم، گؤرسن یئنه آغلاسام گؤلون حالینا فرق ائدرمی؟!

    اوشاقلاریما اورمو گؤلوندن دانیشیرام. ناغیل‌لار دئییرم. ایسته‌ییرم اونلاری آپاریب او دوزلو گؤلده چیمدیرم. او قیزیل ساچلی، گونشلی ساحیل‌لرده گزدیرم. لعل-مرجان قوملاریندا قویلانیب ووجودومو اونا پاپشیرام. اوشاقلیق ایتیکلریمی اوندا آختارام، نیسگل‌لریمین یاراسینی اوندا بیتیرم آنجاق نه یازیق او نازلی گؤلومو ایتیرمیشم.. الویداع دوزلو گؤلوم..الویداع...