ائلچین

تورک دیلی و ادبیاتی

عصبی آدام

+0 بگندیم

عصبی آدام

عزیز نسین

     عصبدن الی – آیاغی تیر – تیر تیتره‌ین ضعیف، قوجا آدامی ایته‌له‌یه‌رک پولیس بؤلمه‌سیندن ایچری سالدیلار.

 - بو آدامدان شیکایتچی‌ییک رئیس بی، بیزی تحقیر ائتدی. ان باشداکی، ایری‌تهر جاواندان رئیس سوروشدو:

- نه دئدی؟

 - چوخ آغیردی رئیس بی، آتامی قاریشدیرماسایدی، وئجیمه آلمازدیم. آما رحمتلیک آتامی دا قاریشدیردی.

قوجا آتیلدی:

-بلی… ائششک اوغلو، ائششک، – دئدیم. دانیشیم، لاییقدی یا یوخ، سیز دئیین. مارشروُت تاکسی‌سیندیم. بو جاوان دا آلتین باققالدا ماشینا میندی. تاکسیم‌ده دوشمه‌دیمی؟ دؤزه بیلمه‌دیم، یاخاسیندان توتدوم. "ماشاللاه، ائششک بویدا آدامسان! گنجسن، گوجون – قوو­ّتین یئرینده‌دی، آلتین‌باققاللا تاکسیم آراسینداکی مسافه‌نی اؤلچسن بئش یوز آددیم اولماز. اینسان بو قدر یئر اوچون مارشروت تاکسی‌سینه مینرمی آی ائششک اوغلو ائششک!.." – دئدیم. عئینیله بئله دئدیم. -اینانمیرسینیز، سوروشون اؤزوندن!

 اوزون بویلو، قاپی تایی قدر گئنیش کورکلی جاوان، قوجانین سؤزونو تصدیقله‌دی.

نؤوبه‌ده ساغدان ایکینجی شیکایتچی:

-بو گنج تحقیره لاییق ایدی، – دئدی، آما بو آدام منه ده سؤیدو…

 رئیسین سوروشماغینی گؤزله‌مه‌دن قوجا دانیشماغا باشلادی:

 -اونا دا "ائششک اوغلو"! – دئدیم، آما لاییق ایدی، اؤزو ایسته‌دی… بو آدام دا تاکسیم‌ده مارشروت تاکسی‌یه میندی. آغا مسجیدینه چاتانا قدر ایکی سیقارئت چکدی. بس دئییلمیش کیمی بیرینی یئنه یاندیردی. سیقارئتین بیرینی سؤندوروب بیرینی یاندیریر. سیقارئت دومانیندان مار­شروتون ایچینده گؤز – گؤزو گؤرمور. ایچریده بوغولاجاقدیق. هئچ اولماسا پنجره‌نی آچیم، – دئدیم. بو دفعه ده "هاوا سویوقدو، پنجره‌نی آچما"! دئمزمی؟ باخ، او واخت دؤزه بیلمه‌دیم. مادام کی، هاوا سویوقدو پنجره‌نی آچماغا ایمکان وئرمیرسن، یوْووُزون باجاسی کیمی دایانمادان بورنوندان دومان سووورورسان، مارشروت تاکسی‌ده اوست – اوسته سیقارئت چکیلرمی، آی ائششک اوغلو ائششک.."! – دئدیم.

 اوچونجو شیکایتچی:

 -آدامین آللاهی وار، لاییق ایمیش، – دئدی، بئله حؤرمتسیزلره من ده عصبی‌لشیرم.

 رئیس بو آدامدان سوروشدو:

 - سیزین شیکایتینیز؟

 - افندیم، منه ده… چوخ آغیر، دیله گتیرمه‌یه اوتاندیغیم شئیلر دئدی.

قوجا:

-سؤیله‌دیم، – دئدی، البتته دئیرم. بو آدام قالاتاسارایدان مارشروت تاکسی‌یه میندی. سانکی قیرخ ایل‌لیک تانیشیق کیمی باشلادی دانیشماغا. دؤرد آدام ایکی اوتاقلی بیر ائوده کرایه‌نیشینلرمیش. آروادی آغزینیزا لاییق چوخ یاخشی لوبیا شورباسی بیشیریرمیش. قیزینی کئچن ایل ائولندیریب، آما کورکنی خئییرسیز چیخیب. آروادی دؤردونجو اوشاغینی قئیصریییه عملیاتی ایله چوخ چتین دونیایا گتیریب. ایندی ده بئشینجیسینه حامیله ایمیش. گؤره‌سن اوشاق اولماماسی اوچون بیر تدبیر بیلیرممی؟ -آرتیق قان بئینیمه سیچرادی. "افندی، افندی" -دئدیم، – "باشیندا ساچ، آغزیندا دیش قالماییب، مندن بئتر اولموسان. آروادین هله ده اوشاق دوغورسا، تدبیری سن یوخ، قونشو جاوانلاری، یولداش – دوست گؤرسون… اینسان یاتاق اوتاغیندا باش وئره‌نی مارشروت تاکسیده راستلاشدیغی یادلارا دانیشارمی، آی ائششک اوغلو ائششک"! -دئدیم.

نؤوبه‌ده‌کی شیکایتچیلردن بیری:

 - چوخ یاخشی دئمیسن، – دئدی، بئله‌لرینه من چوخ عصبی‌لشیرم.

 - سیزین شیکایتینیز؟ – دئیه رئیس او آدامدان سوروشدو.

 - رئیس بی، بو آدام منی ده تحقیر ائتدی…

قوجا سورغو-سوالسیز:

-ائتدیم، – دئدی، البتته ائدرم. بو آدام تپه‌باشیندا مارشروت تاکسییه میندی. مینن کیمی هوْچکیس ماکینالی توفنگلری کیمی هئچ دایانمادان آسقیرماغا باشلادی. "هاوالاردان زؤکم اولموشام" -دئدی. هم ده آسقیرارکن نیشان آلیر کیمی آختاریب – تاپیب، اینسانین صیفتی یانغین سؤندورن شلانقی کیمی پوسکورور. بیر دفعه اوزومو توپورجک ایچرئیسینده بوراخاندا داها دؤزه بیلمه‌دیم: "مادام کی، زؤکم اولدون، هئچ اولمازسا آسقیرارکن آغزینا دسمال توت، دسمالین یوخدورسا الینله آغزینی باغلا. اینسانین صیفتینه آسقیریلارمی؟ آی ائششک اوغلو ائششک"! – دئدیم. –اؤزو مجبور ائتمه‌ییبمی رئیس بی؟..

 بئشینجی شیکایتچی:

-آی آغزینی اؤپوم، بئله‌لرینه دئمه‌لی البتت… – دئدی.

رئیس بو آداما:

 - سیز نه ایسته‌ییرسینیز؟ – دئدی.

 - منه ده دیله گتیریلمه‌سی مومکون اولمایان سؤزلر دئدی.

 قوجا:

 -سؤیله‌دیم، – دئدی، – هم ده "ائششک اوغلو ائششک"! – دئدیم. بو آدام شیش‌خانادا ماشیندان دوشدو. باشلادی جیبلرینی قاریشدیرماغا… هئچ جور پولو قویدوغو یئری تاپا بیلمیر. گئدیش – گلیش واختی… آرخامیزدا تراموایلار، آوتوبوسلار، یوک ماشینلاری، آوتوموبیللر ییغیشدی. یول پولیسی فیت چالیر، واقون سورنلر، سوروجولر قیشقیریر. بو آدام هئچ وئجینه آلمیر. آغیر – آغیر جیبلرینی قاریشدیریر. قاریشدیردی، قاریشدیردی. پالتوسونون، ژیلئتینین، ژاکئتینین، شالوارینین جیبلرینه باخدی. سونرا "هه تاپدیم، بورادایمیش"! دئیه ایچ جیبیندن بیر یوز لیره‌لیک چیخاریب سوروجویه اوزاتمازمی؟ صبریم توکندی: "اینسان مارشروت تاکسییه میندیمی، پولونو اولجه‌دن حاضیرلایار، بو قدر میلّت یولوندان ساخلانیلماز. اللی قپیک اوچون ده سوروجویه یوز لیره خیردالاتمازلار آی ائششک اوغلو ائششک!" – دئدیم.

 سوروجو درحال آتیلدی:

 -آغزین درد گؤرمه‌سین، یاخشی کی دئدین، یئردن گؤیه قدر حاقلیسان!- دئدی.

 رئیس سوروجویه طرف چئوریلدی:

 - سیز؟

 - من شیکایتچی‌یم بو آدامدان. تحقیر ائتدی.

قوجا:

-ائتدیم، – دئدی، – "ائششک اوغلو، ائششک"!.. – دئدیم. بو سوروجو ماشینیندان دوشن بیر قادین پول وئردیکده، "ساغ اول، باجیم"! – دئدی. باشقا بیر قادینا، "بویور، آنام"!- دئدی. موشتریلردن بیرینه "عمی" ،بیرینه "دایی" ،بیر گنجه "قارداش" – دئدی. بیر جاوانا "اوغلوم" ،بیر آداما "بی بابا" – دئدی. هئچ بیرینه سس چیخارتمادیم. ماشینیندان دوشرکن پولونو اوزاتدیم، منه ده "ساغ اول بابالیق!" دئمزمی؟ داها دایانماق اولارمی، سؤزون نؤوبه‌سی گلدی. "تورک دیلینده بای، بایان، خانیم، بی کیمی بیر سؤز واردیر، بیلمیرسنمی؟ من سنین آنانی تانیمیرام، آروادینی تانیمیرام، هاردان آتان اولورام" ماشینینا مینن بوتون موشتریلر سنین قوهوموندورمو، آی ائششک اوغلو ائششک" – دئدیم.

 

رئیس عصبلی قوجایا طرف چئوریلدی:

-بو ایستانبول باخ، بئله‌دیر، بو یاشا گلمیسن بو قدر ایستانبول سکیسینی تاپدالامیسان. مادام کی، بو سولو، تربییه‌سیز، اؤزونو بیلمز، کوبود حریفلره دؤزه بیلمیرسن، بو یاشدا نییه ائویندن چیخیرسان، آی ……..

 رئیس بیر آز دایاندی، فیکیرلشدی. سونرا:

………. آ بَی‌یم!.. – دئیه سؤزونو بیتیردی.

آذربایجان تورکجه‌سینه اویغونلاشدیران: سئوینج سولئیمان

کؤچورن: عباس ائلچین 


آچار سؤزلر : تورکیه ادبیاتی,