ائلچین ELÇİN

تورک دیلی و ادبیاتی

تارزان

+0 بگندیم

 

تارزان 

عزیز نسین

       بیز آنکارانین مالتپه محلّه‌سینده اولوروق. اصلیمیز آنکارالی اولماسا دا، پایتاختین کؤهنه ساکینلریندنیک. مالتپه ده بیزیم دالانداکی اوچونجو ائو بیبیمین مولکودور. بیبیم عؤمرونو سیزه باغیشلایاندان سونرا، ائوه بیز کؤچموشوک. محلّه‌میزده تارزان آدلی بیر کؤپک وار. بورایا هارادان، نه واخت گلدیگینی بیلمیریک. بلکه ده، لاپ کوچوک واختیندان بورادا قالیب. یاشینی دا هئچ کس بیلمیر. بو باره ده محلّه ده کیمدن سوروشسانیز، جاوابیندا: - من بو محلّه‌یه گلنده تارزان آرتیق قوجا کؤپک ایدی، - دئییر. 

  آما بو دا تارزانین یاشینی، تخمینی ده اولسا، موعینلشدیرمگه اساس وئرمیر. اون سککیز ایل اولار کی، بیز بو محلّه‌‌‌یه گلمیشیک. بیبیم اؤلوب، بیز بو ائوه کؤچدوگوموز زامان تارزان قوجا بیر کؤپک ایدی. قونشوموز ممدوح بی‌گیل ایسه 21 ایلدیر محلّه ده یاشاییرلار. اونلار بورا گلدیکلری واخت دا تارزان واردی، قوجا بیر کؤپک ایدی. باققال ایلیاسین دئدیگینه گؤره، تارزانین یاشی اوتوزو اؤتمه‌لیدیر. چونکی او، بورا 30 ایلدیر کی، گلیب. تارزانی دا ائله بو کؤکده گؤروب. 

  دمیریول نظارتچیسی محمت افندی ایسه دئییر کی، تارزانین یاشی 40-ای چوخدان کئچیب، بو محلّه‌یه کؤچدوکلری زامان تارزانین آزی 3-4 یاشی واردی. 

  دوررییه بیبی اؤزونون تارزاندان جاوان اولدوغونو هئی تأکید ائدیر. بو حسابلا ایسه، تارزانین یاشی گرک 50-نی چوخدان کئچمیش اولسون. 

  اونا  " تارزان "  آدینی کیمین وئردیگی ده بللی دئییل. 

  ائله بیل کی، ایت: 

  - منیم آدیم تارزاندیر، - دئیه، هر کسه اؤزونو تانیتمیشدیر. 

  تارزانین ساری-بوز رنگده، قیسا توکلری وار. نه چوخ کیچیک، نه ده چوخ بؤیوکدور، تصوور ائله‌دیگیمیز عادی کوچه ایتلریندندیر. توپال اولماسا دا، ائله هئی آخسایار. محلّه اوشاقلاری اونو داشا باسیر، وورورلار. هله هئچ کیم زاواللی ایتین دؤرد آیاغی‌نین عئینی واختدا سالامات اولدوغونو گؤرمه‌ییب. محلّه اوشاقلاری‌نین ان بؤیوک اَیلنجه‌سی ائله تارزاندیر. یازیغین بئلینه مینیرلر، هئچ جینقیرینی دا چیخارمیر. بئلی بوکوله-بوکوله، اوستونده کی  اوشاغی داشیماغا چالیشیر. اوشاقلار بونونلا دا کیفایتلنمیر، ایکیسی بیردن تارزانین بئلینه مینیر. تارزانین بئلی قیریلیر، طاقتی توکه‌نیر. بئش-آلتی گون بئلینی دیکلده بیلمیر، توزلو کوچه لرده هئی سورونور. 

  لاپ بالاجالار ایسه، قویروغونو چکر، اورا-بوراسینا ایینه باتیرارلار. بیچاره تارزانسا، هئچ ائله بیل ایت دئییلمیش، قوزو کیمی لال-دینمز دوروب باخار. یالنیز جانی چوخ آغریمیش اولارسا، باشینی یاراماز اوشاقلارا طرف چئویرر، ساری رنگلی، چیرک باسمیش گؤزلری ایله عاغیللی-عاغیللی باخار. بو دا کار ائلمه‌سه ، کؤپک سسینه بنزمه‌ین یانیقلی بیر سسله اینیلدیر. 

  محلّه اوشاقلاری‌نین ان اَیلنجه‌لی اویونو ایسه تارزانی هامیلیقلا بیردن داشا توتماقلاری ساییلیر. بیر ده گؤرورسن کی، تارزانی بیر دیوارا سؤیکه‌ییبلر، اؤزلری اوچون هدفه چئویریبلر. ایتی داشا باسیر، نیشان تعلیمی کئچیرلر. 

  بیر آخشام ائوه گلیردیم. گؤردوم کی، اون - اون بئش اوشاق بیر سیرایا دوزولوب، اللرینده داش، حاضیر وضعیتده گؤزله‌ییرلر. ائله بو واخت بیری: - آتین! - دئیه، باغیردی. اوشاقلار، بونا بند ایمیشلر کیمی، اللرینده کی  داشلاری تارزانا ساری تولازلادیلار. 

  سوروشدوم: 

  - نئینیرسیز؟ 

  -  " گولله‌باران "  اویناییریق، دایی، - دئیه، دیللندیلر. 

  اوشاقدیلار دا، اوشاق اوینایار دا. بیز ده اوشاق اولاندا تارزانلا بئلجه چوخ اوینامیشیق. 

  باشینا نه اویون آچیرلارسا-آچسینلار، تارزان بیزیم محلّه‌نی ترک ائله‌میر. باشی برکدیر. اوشاقلار بیر یانا قالسین، هئچ بؤیوکلردن ده بیر نوازیش گؤرمه‌ییب. محلّه‌میزده کی لر تارزانا، هئچ اولماسا، بیر دفعه  داش آتماغی بو محلّه لی اولماغین باشلیجا شرطلریندن بیری ساییرلار. ائله کی، تارزان کیمینسه آیاقلارینا دولاشدی ها، درحال اونو تپیکله ووروب یئره سریرلر.  " یاراماز حئیوان، یارالی-بیتلی کؤپک " ، - دئییرلر. اونون هئچ یارا-خوراسیز اولدوغو واختلارینی گؤرمه‌میشم. بیز اوشاق اولاندا اونون قولاقلارینی کسمیشدیک. بیزدن سونراکیلار دا قویروغونو کسدیلر. 

  تارزانین قارنینی نئجه دولدوردوغو دا معلوم دئییل. نه او بیزیم محلّه دن بیر باشقا یئره گئتمز، نه ده محلّه میزدن بیر کیمسه اونا بیر پارچا قورو چؤرک وئرمز. نه یئیر، نه ایچر - بللی دئییل. بونو دوشونمک بئله هئچ بیریمیزین عاغلینا گلمه‌ییب. 

  بیر آرادا بلدیییه قوللوقچولاری کوچه ایتلرینی اؤلدوروردولر. بو تاماشانی هئچ اولماسا بیر دفعه  گؤرموسونوزمو؟ باشقا عالمدیر. بیر ماشین گلیر. ایت‌اؤلدورنلر ماشیندان دوشورلر. اللرینده تخمینن ایکی مئتر اوزونلوغوندا ماشایا اوخشار کاراستی اولور. بو کاراستیلارین اوجلاری ایتیدیر. بونونلا کؤپکلری توتورلار. کاراستی‌نین اوجلاری ایتین قارنینا گیریر، سونرا دا کی، یاراسیندان قانلار آخان کؤپگی قالدیریب ماشینا آتیرلار. 

  بلدیییه‌نین ایت اؤلدورنلری بیزیم تارزانی دا یاخالادیلار. بوتون محلّه جاماعاتی بو منظره‌نی سئیر ائدیردی. دمیر آلتین ایتی اوجلاری قارنینا گیرینجه: تارزان آغلاییرمیش کیمی بیر سس چیخاردی. سونرا باشینی چئویریب بیزه باخدی. ایت اؤلدورن تارزانی هاوایا قالدیردی، ماشینا آتارکن ایسه، گؤزله‌نیلمز حادیثه  باش وئردی. تارزان چیرپیندی، دارتیندی، قارنی ییرتیلدیسا دا، کاراستی‌نین اوجوندان قورتولا بیلدی. قانی آخا-آخا، قاچیب اوزاقلاشدی. 

  ائرته‌سی گون تارزانی یئنه ده محلّه ده گؤردوک. بیر مودت یارالی گزدی، سوروندو. سونرا یاخشیلاشدی. 

  ایتلری بو سایاق آلتلرله اؤلدورمگین اینسانلیقدان اوزاق بیر حرکت اولدوغو باره ده چوخلو شیکایتلر ائدیلدیگیندن، بوندان سونرا کؤپکلری توفنگله ووروب اؤلدورمگه قرار وئریلدی. بیر گون کؤپک اووچولاری بیزیم محلّه‌یه ده گلدیلر. بو، چوخ اَیلنجه‌لی بیر اوو ایدی. صاحیبی اولان کؤپکلری ائوده ساخلامیشدیلار. 

  تارزانی وورماق چتین اولمادی. گولله حئیوانجیغازین سول دؤشوندن دگدی. یئره ییخیلدی. آما اووچولار اونو توتا بیلمه‌دیلر، قاچدی گئتدی. 

  اونو یارالی-بیره‌لی یئنه محلّه‌ده گؤردوک. ایت‌اؤلدورنلر، سهون، صاحیبی اولان بیر ایتی ده وورموشدولار. صاحیبی ده ساییلانلارداندیر. بونا گؤره ده، ایتلری توفنگله وورماغین دا اینسانلیغا یاراشمایان حرکت اولماسی معلوم اولدوقدان سونرا، بو اوصولدان دا ال چکدیلر. ایندی ده کؤپکلری زهرله‌مگه باشلادیلار. 

  ایت زهرله‌ینلر بیزیم محلّه‌یه ده گلدیلر. محلّه‌میزدن، تارزاندان علاوه ، داها ایکی کؤپک زهرلی ات یئمیشدی. حئیوانلار بیر قدر سونرا یئره سریلیب گبرمگه باشلادیلار. کؤپکلرین ایکیسی‌نین صاحیبی واردی. ایتلرینه ساریمساقلا قاتیق ایچیردیلر کی، بلکه خیلاص اولسونلار. آما علاج اولمادی، ایکیسی ده اؤلدو. یالنیز تارزان خیلاص اولا بیلدی. هامیمیز ائله بیلیردیک کی، آرتیق او اؤلوب. چونکی اونو هئچ کیم خیلاص ائتمگه چالیشمامیشدی. گئجه‌یه کیمی دوشدوگو یئرده حرکتسیز قالمیشدی. سحر تئزدن گؤردوک کی، بودور، تارزان آیاق اوستده دیر. اوشاقلار سئوینجک حالدا - یاشا، تارزان! - دئیه، قیشقیرا-قیشقیرا، اونو داشا باسماغا باشلادیلار. 

  محلّه میزه بیر آمئریکان عاییله‌سی کؤچموشدو. و همین گوندن ده تارزانین بختی آچیلدی. اولجه آمئریکالی‌نین اون دؤرد یاشلی اوغلو تارزانا یئمک وئرمگه باشلادی. سونرا اونو ائوین باغچاسینا بوراخماغا باشلادیلار. اونون اوچون بیر ائوجیک ده تیکدیلر. اوچ-دؤرد آیین ایچینده تارزان دییشدی. بیر دری - بیر سوموک قالمیش تارزان دومبول کیمی اولدو. گؤزلرینه ایشیق گلدی، توکلری پار-پار پاریلدادی. بامباشقا بیر حئیوان اولدو… تارزان بو قدر گؤزللشینجه، هامیمیز اونو سئومگه باشلادیق. آخی گؤزل حئیوانی کیم سئومز کی؟! محلّه‌نین اوشاقلاری اونا چؤرک آتماغا باشلادیلار. تکجه چؤرک یوخ ائی، داها نه‌لر… محلّه ده هانسی ائوه ات گلسه، ائوین خانیمی سور-سومویو تارزان اوچون آییریر، اوغلونا دئییردی: 

  - گؤتور بونلاری، آپار تارزانا وئر. 

  تارزانین یئمگی اسکیک اولموردو. بیر سؤزله، هامیمیزین فیکری-ذیکری تارزانین یانیندا ایدی. 

  - آماندی، تارزان سوسوز قالماسین. آغزی وار، دیلی یوخ حئیوانجیغازین. یازیق سوسوزلوقدان یانار ها! 

  - تارزان اوچون ات آپارین!.. 

  آمئریکالیلار تارزانی ایکی-اوچ گوندن بیر چیمیزدیریردیلر. تارزان پار-پار یانیردی. قادینلار: 

  - آی اوشاق، - دئییردیلر، - سیز ده تارزانی چیمیزدیرسنیز!.. 

  قیش گلدی. آمئریکالیلار تارزانی ائوین آلت مرتبه‌سینده ساخلاماغا باشلادیلار. آما اونلار ایتی ایچری آپارماقدان اول، محلّه ده آرتیق دئدی-قودو باشلامیشدی: 

  - حئیوانی سویوقدان دوندوراجاقلار… 

  - قیشین بو قییامتینده هئچ ایتی باغچادا ساخلایارلارمی؟.. و س. و ای. 

  بلی، قیش دا کئچدی. معلوم اولدو کی، یازدا آمئریکالیلار وطنلرینه قاییداجاقلار. بو آرادا سؤز چیخدی کی، تارزانی دا آپارماق ایسته‌ییرلر. په، محلّه میزده بیر موصیبت قوپدو کی!.. بس نئجه، حاقیمیز دا واردی. 

  دمیریولو گؤزتچیسی محمت افندی ایره‌لی چیخدی: 

  - هئچ یئریندن ترپه ده ده بیلمزلر، - دئدی - محلّه میزین کؤپگینی اونلارا وئره‌جه‌ییک؟ عؤمرونده اولا بیلمز! 

  دوررییه بیبی‌نین گؤزلری‌نین یاشی سئل کیمی آخیردی. آغلایا-آغلایا دئییردی کی: 

  - حئیوان الیمده دونیایا گؤز آچدی، بؤیودو. من تارزانی هئچ کیمه وئرمرم. بیرجه آمئریکایا گئتمگی چاتمیردی. واللاهی کی، ائولرینی باشلارینا اوچورارام. 

  باققال ایلیاس صؤحبته قاریشدی: 

  - آی بالام، کیمین کؤپگینی کیمه وئریرسینیز؟ ایت کی منیمکیدیر؟! اونو لاپ کؤرپه‌لیکدن اؤزوم بسله‌ییب بؤیوتموشم. 

  ممدوح بی محلّه میزین ان اوخوموشو اولدوغوندان، قانونلارا گؤره دانیشماغا باشلادی: 

  - هئچ داریخمایین، هئچ یئره آپارا بیلمزلر. 

  - نییه کی؟ - دئیه، سوروشدوق. 

  - چونکی، قانونلار یول وئرمیر. بئله کی، تارزان بورادا دوغولموش، بؤیوموش، بو محلّه‌ده یئتیشمیشدیر. نئجه اولا بیلر کی، اونو یاد بیر اؤلکه‌یه آپارسینلار؟ آخی پاسپورت وئرمزلر، بو بیر… اوندان سونرا… 

  سؤزو آغزیندا قالدی. بوتون محلّه آیاغا قالخمیشدی. تارزانا گؤره محلّه ده آمئریکا علئیهینه دهشتلی بیر احوال-روحیییه باش قالدیرمیشدی. آز قالا بیر فاجیعه  ده باش وئره‌جکدی. نه فاجیعه ؟ - محلّه‌میزده اؤزگور آدیندا بیر اونیوئرسیتئت طلبه‌سی وار. بیر گون نئجه اولوبسا، قهوخانادا دئییب کی، اششی، قویون آپارسینلار دا، هئچ اولماسا، حئیوانین جانی قورتولار. په، آز قالمیشدی کی، اوغلاندان اؤترو لینچ محکمه سی قورسونلار. 

  - نئجه یعنی  " هئچ اولماسا حئیوانین جانی قورتولار " ؟ بو نه دئمکدیر؟ 

  بیچاره طلبه: 

  - یوخ ائی، مقصدیمی دوزگون باشا دوشمه‌دینیز. بو ساعات ایضاح ائدیم، - دئسه ده، قولاق آسماییب باش-گؤزونو یارمیشدیلار. یازیق جانینی بیرتهر قورتارا بیلمیشدی. 

  آمئریکالیلارین ائولری قارشیسیندا توپلاشیردیق، - تارزانی ایسته‌ییریک، - دئییب باغیریردیق. اونلاردان ایسه هئچ بیر سس چیخمیردی. 

  - آمئریکالیلار بیزیم تارزانی آپارماق ایسته‌ییرلر، - دئیه، پولیس ایداره‌سینه گئتدیک. کومیسسار بیزی دینله‌ییب دئدی: 

  - بیر شیکایت یازین کی، کؤپک سیزینکیدیر. سونراسینا انجام چکریک. 

  بوتون محلّه آدیندان  " تارزان بیزیمدیر! "  - دئیه بیر شیکایت عریضه سی ترتیب ائتدیک. آیریجا اولاراق،  " بیز تارزانیمیزی وئرمریک "  طلبنامه‌سی آلتینا دا ایمضا توپلادیق. ایش گئت-گئده داها دا بؤیویوردو. قونشو محلّه‌لر ده ایشه قاریشیردی. 

  بو آرادا، گونلرین بیر گونو گؤردوک کی، آمئریکالیلار اشیالارینی ساتیب گئتمگه حاضیرلاشیرلار. بیز اونلارین قاپیسی‌نین آغزینا توپلاشدیق. اونلار ایسه تارزانی ماشینا قویدولار. بیرباشا طیاره مئیدانینا گئده‌جک، بیرلیکده طیاره‌یه مینه‌جکدیلر. آمئریکالی اعتیراضیمیزی گؤرونجه دئدی: 

  - اللی دوللار وئریرم، کؤپگی ساتین منه. 

  بو سؤز بیزیم صبیر کاسامیزی داشیردی. عجب ایشدیر، جیبینده دوللاری وار دئیه، بو آمئریکالی نییمیز وارسا ساتین آلاجاق؟ 

  - اللی یوخ ائی، لاپ یوز دوللار، مین دوللار وئرسن ده، تارزانیمیزی وئرمریک! - دئییب، غضبیمیزی بیلدیردیک. 

  زاواللی تارزان دا، یازیق-یازیق باخیر، سانکی: - نه اولار، منی بو آمئریکالی‌نین الیندن قورتارین، - دئیه، یالواریردی. 

  اوشاقلار، قادینلار آغلاماغا، قیشقیرماغا باشلادیلار. های-کویه پولیس ده گلیب چیخدی. تارزان مسله‌سیندن خبرلری واردی. آمئریکالییا دئدیلر: 

  - میستئر، بو کؤپگی آپارا بیلمه‌یه‌جکسینیز. 

  - نه سببه؟ - دئیه، آمئریکالی چاشقین حالدا سوروشدو. 

  - چونکی، صاحیبی وار!… 

  خولاصه، پولیسین کؤمگی ایله تارزانیمیزی آمئریکالی‌نین الیندن قورتارا بیلدیک. آمئریکالیلار دا آرخالارینا باخا-باخا گئتدیلر. 

  ایندی تارزان بیزیمدیر. اون گونون ایچریسینده یئنه ده اولکی حالینی آلدی. سیسقالاشدی، قابیرغالاری چیخدی، یارا-بیره ایچینده ایتیب-باتدی. بوسبوتون بیزیم محلّه‌نین کؤپگی اولدو. اوشاقلار سحردن-آخشاما کیمی اونو داشا باسیر، اورا-بوراسینا ایینه سانجیر، بئلینه مینیرلر. 

  کئچن آخشام ائوه گلیردیم. گؤردوم کی، اوشاقلار تارزانی باش‌اشاغی وضعیتده ایپلرله آیاقلاریندان آغاجدان ساللامیشلار. اللرینده بیچاق واردی. 

  - نه ائدیرسیز، آی اوشاق؟ - دئیه، ماراقلاندیم. 

  دئدیلر کی، مکتبده موعلیم قورباغا کسه‌رک، اورگینی اونلارا گؤستریب. ایندی اونلار دا تارزانین اوزرینده عئینی عملیاتی آپارماق ایسته‌ییرلر. 

  …تارزان بیر نئچه گون یارا-خورا ایچینده دولاشدی. سونرا یاخشیلاشدی. یئنه محلّه‌نین کوچه لرینده ییخیلا-دورا، گزیب دولاشیر. 

 ترجومه: ساوالان سئیهان 

کؤچورن: عباس ائلچین