ائلچین

تورک دیلی و ادبیاتی

اسنه‌‌ین اینسانلارین اؤلکه‌سی

+0 بگندیم

اسنه‌‌ین اینسانلارین اؤلکه‌سی 

  عزیز نسین 

    بیری وارمیش، بیری یوخموش، سنده اولسا دا، منده یوخموش، منده اولسا دا، اوندا یوخموش. بیر زامانلار یئر اوزونون بیر گوشه‌سینده بیر اؤلکه وارمیش. بو اؤلکه‌ده‌کی  بنده‌لر خوشبختلیک ایچینده یاشایارکن، آللاه گؤسترمه‌سین، بیر ناملوم یولخوجو خسته‌لیک اونلاری قیرماغا باشلامیشدی. ائله خسته لیک کی، اؤلکه‌ده‌کی  اینسانلارین بیر حیصه‌سی ضعیفله‌مگه، کیچیلمگه، دیگر حیصه‌سی ده گونبوللاشماغا، ایریلشمگه باشلامیشدی. 

   آریقلایانلارین بویلاری دا گوندن-گونه بالاجالاشیرمیش. آما بو بالاجالاشما، کیچیلمه، ضعیفله‌مه او قدر یاواش-یاواش اولورموش کی، هئچ کیم نه اؤزونون، نه ده باشقالاری نین کیچیلدیگینی حیس ائتمیرمیش. گونده آنجاق بئش-اون قرام ضعیفله ییر، بیر-ایکی میلی‌مئتر بالاجالاشیرلارمیش. اینسانلار کیچیله-کیچیله، خیردالاشا-خیردالاشا، ضعیفله‌یه-ضعیفله‌یه، سیسقالاشا-سیسقالاشا بیر زامان گلمیش کی، چلیک قدر آریقلامیش، ساج‌ایاق قدر قیسالمیشلار. گوندن-گونه داها دا قیسالیب جیرتدان بویدا اولموشلار. 

   دیگر یاندان دا اینسانلارین بیر حیصه‌سی گوندن-گونه شیشمانلاشیر، ایریلشیرمیش. او بیریلری نین کیچیلمه‌سی، بالاجالاشماسی کیمی، بو بؤیومه، کؤکلمه ده گوندن-گونه بیر نئچه میلی مئتر، بئش-اون قرام اولدوغوندان، نه اؤزلری، نه ده باشقالاری اونلارین هر گون بیر آز دا یئکله‌رک دیو بویدا اولدوقلارینی حیس ائتدیریرلرمیش. بویلاری قولـله قدر اوزانیر، گؤوده‌لری گمی قدر ایریلشیرمیش. 

   فقط او اؤلکه ده بؤیوینلرین سایی ضعیفله‌ییب کیچیلنلرین سایینا برابر دئییلمیش. ایکیسی‌نین ده سایی بیر-بیرینه برابر اولمورموش. بئش-اونو کیچیلنده آنجاق بیر آدام بؤیویورموش. ضعیفلرین اوشاقلاری دا ضعیف، فیندیق بویدا دوغولماغا باشلاییر. بونا باخمایاراق، ایریلرین اوشاقلاری دا فیل بالاسی قدر بؤیوک، ایری دوغولورلارمیش.   

   آنادان کیچیک اولانلارلا بؤیوک دوغولانلار بو ایشین ائله او جور ده گلیب، بئله ده گئده‌جگینی سانار، بوندا هئچ بیر آیری-سئچکیلیک، غئیری-عادی‌لیک، پیس علامت گؤرمزلرمیش. گؤرمه‌دیکلری کیمی ده کیچیلنلر اؤزلریندن داها کیچیکلره باخاراق  " آللاه، بونا دا شوکورلر اولسون، کیچیکدن ده کیچیگی وار. من یئنه یاخشییام! "  - دئیه اؤزلرینه تسکین‌لیک وئررمیشلر. 

   گوندن-گونه ایریلشنلر ده اؤزلریندن داها ایریلرینی گؤردوکجه  " آللاه، منی اوندان داها ایری ائت! "  - دئیه یالواریرلارمیش. آللاه دا دیلکلرینی، یالوار-یاخارلارینی ائشیدر، اونلاری گوندن-گونه شیشیرر، ائله هئی شیشیررمیش. بیر زامان گلمیش کی، شیشمانلاشانلار، ایریلشنلر اوتوردوقلاری ائولره، یاتدیقلاری یاتاقلارا، کئچدیکلری یوللارا سیغمازمیشلار. هر نه ائتسه‌لر ده، آیاقلاری یورغاندان چؤله چیخدیغیندان، یورغانلارینی آیاقلارینا گؤره اوزاتماغا، یوللاری گؤوده‌لرینه گؤره آچماغا، ائولرینی ده بویلارینا گؤره بؤیوتمگه باشلامیشلار. 

   بیر زامان گلمیش کی، آچدیقلاری یوللاردان دا کئچه، بؤیوتدوکلری ائولره گیره، اوزاتدیقلاری یورغانلارینا دا سیغا بیلمه‌میشلر. یئنیدن ائولرینی، یوللارینی، یورغانلارینی بؤیوتموشلر. مئیدانلار کیچیک گلمیش، مئیدانلارین دا آراسینی آچمیشلار. یاشادیقلاری شهر کیچیک گلمیش، شهردن صحرالارا قاچمیشلار. یاییلدیقجا یاییلمیشلار، کؤچدوکجه کؤچموشلر. 

  کیچیلنلر ده کیچیلدیکجه کیچیلمیش، خیردالاشدیقجا خیردالاشمیشلار، آرتیق ائله اولموش کی، بیر مودتدن سونرا کیمیسی ائو یئرینه قارپیز قابیغینا، کیمیسی قوز، کیمیسی ده فیندیق قابیغینا گیرمیشلر. ایش بونونلا دا قورتارمامیش، بیر مودتدن سونرا کیچیله-کیچیله ایتمگه باشلامیشلار. گؤزله گؤرونمز اولموشلار. آنجاق میکروسکوپلا باخاندا گؤرمک مومکون اولارمیش. 

    بوتون بو اولوب-کئچنلری هر کس عادی بیر شئی سانار، هئچ بیری گیلئیلنمزمیش. 

   بئله‌جه زامان کئچمیش، ایریلشنلرین ایریلشمه‌سی، شیشمانلاشانلارین شیشمانلاشماسی دایانمیش. ایش بونونلا دا بیتمه‌میش، اونلار دا کیچیلمگه، بالاجالاشماغا باشلامیشلار. گوندن-گونه آریقلاییرلارمیش. آما آریقلاماقلاری شیشمانلاشمالاری کیمی یاواش-یاواش دئییل، بیردن-بیره اولورموش. اوللر گونده بیر-ایکی میلی‌‌مئتر اوزاندیقلاری حالدا، ایندی گونده قفیلدن بیر-ایکی قاریش قیسالیرلارمیش. اوللر گونده بیر نئچه قرام شیشمانلاشدیقلاری حالدا، ایندی گونده بئش-اون قرام بیردن آریقلاییرلارمیش. بویو بئش مئتر، آغیرلیغی ایکی تون اولانلار گئجه یاتیر، سحر بویلاری ایکی مئتر، چکیلری ایکی یوز کیلویلا اویانیرلارمیش. نهنگلر بؤیوک سورعتله اریمگه باشلامیشلار. بیر زامان گلمیش کی، آرتیق بیر-بیرلرینی بئله تانیمیر، آیناداکی صورتلریندن قورخورلارمیش. چوخ قورخویا دوشورلر. کیچیله-کیچیله تامامیله یوخ اولماغین قورخوسوندان اینتیحار ائدنلر بئله پئیدا اولموشدو. بیر-بیر اؤزلرینی اؤلدورورلرمیش. شهرین هر یانیندا آغلاشما، باغیرتی گؤیه اوجالیرمیش: 

  - آریقلاییریق!.. 

  - اریییریک!… 

  - یوخ اولوروق!.. 

   آغلاماق، سیزلاماق، قیشقیرماقسا ایشه یارامازمیش.  " بوسبوتون اورتادان یوخ اولوب گئتمزدن اول عاغلیمیزی باشیمیزا توپلامالی‌ییق. بالاجالاشماغیمیزین قاباغینی آلان بیر چیخیش یولو تاپمالی‌ییق! "  - دئیه اونلار دوشونورلر. آرتیق شیشمانلاشماقدان، بؤیومکدن قالانلار اولدوقلاری کیمی یاشاماق ایسته‌میشلر. حکیملره موراجیعت ائتمیشلر. حکیملر اونلاردان دا پیس وضعیتده‌ ایمیش. هر کس اؤز باشینا چاره آختاریرمیش. گؤز گؤره-گؤره کیچیلیر، اریییرلر. بو، ائله آمانسیز بیر ائپیدئمییایمیش کی، یولوخاندان باشقاسینا کئچیرمیش. 

   حکیملر چوخلارینا کؤکلوک درمانلاری وئرمیشلر، سوموکلری مؤحکمله‌‌دن ایینه‌‌لر وورموشلار.  " بول-بول یئیین! "  - سؤیله‌میشلر.  " کدرلنمه‌یین، جانینیزی سیخمایین! "  - دئمیشلر. آنجاق بوتون بونلارین هئچ بیر فایداسی اولمازمیش. او زامان بو اؤلکه‌ده یاشایانلار دوشونوب-داشینمیشلار:  " باشقا بیر اؤلکه‌دن، دردیمیزه درمان تاپاجاق بیر موتخصیص آختاراق! "  - دئمیشلر. 

    دوشوندوکلری کیمی ده ائدیب دونیانین ان مشهور شیشمانلاشما اوزره موتخصیصینی اؤز اؤلکه‌لرینه دعوت ائدیبمیشلر. حکیم گلمیش، کیچیلنلره، خیردالاشانلارا باخیب: 

  - بو یئنی بیر خسته‌لیک دئییل، - دئمیش، - او بلا دونیانین باشقا یئرلرینده ده گؤرونوب. هر نه قدر ائپیدئمیک بیر خسته‌لیک اولسا دا، قاباغین آلماق اولار. آرانیزدا بیر مودت یاشایاجاغام. نه ائتسم، سیز ده گؤزونوزو، قولاغینیزی آچین، منی تکرارلایین. گؤره جکسینیز کی، منیم کیمی داورانسانیز، هم ضعیفله‌مه، کیچیلمه، هم کؤکلمه دایاناجاق … نئجه‌سینیزسه، ائله ده قالاجاقسینیز. 

  بونو سؤیله دیکدن سونرا اونلارین گؤزلری قارشیسیندا اؤزونو اؤلچموشدو: آغیرلیغی 75 کیلو، بویو دا 1.79 مئتر اولموشدو. 

   او اؤلکه ده یاشایانلار حکیم نه‌لر ائده‌جک دئیه، گؤزلرینی اوندان آییرمامیشلار. هامیسی نین گؤزو-قولاغی اوندا اولورموش. همیشه اونا باخیرلارمیش. حکیم او اؤلکه‌ده قیرخ گون، قیرخ گئجه قالیبمیش. سونرا اهالینی توپلاییب: 

  - بو قدر واختدا آرانیزدا یاشادیم. نه‌لر ائتدیگیمی گؤردونوز، سیز ده منیم کیمی ائدیب، منیم کیمی یاشاسانیز، بو درددن خیلاص اولارسینیز، - سؤیله‌میش. دئییبمیش، آما، او اؤلکه ده یاشایانلار حکیمین اؤزلریندن فرقلی نسه بیر شئی ائتدیگینی گؤرمه‌‌میشلر. گؤرسه‌لر ده، آنلایا بیلمه‌‌میشلر. حکیم: 

  - بودور باخین، یئنه گؤزونوزون قارشیسیندا یوخلاییرام، - دئمیش و اؤلچموش، یئنه آغیرلیغی 75 کیلو، بویو 1.79 مئتر اولموش … نئجه گلمیشدیسه، یئنه ده ائله‌دی. نه شیشمانلامیش، نه ده ضعیفله‌میشدی. او اؤلکه ده یاشایانلار تامامیله چاشمیشلار.  " بو حکیم بیزیم گؤردویوموز ایشلردن باشقا نه ائتدی کی، هئچ آریقلامادی، قیسالمادی؟ "  -دئمیشلر. 

  حکیم گمییه مینیب او اؤلکه دن آیریلارکن: 

  - آنلادینیزمی؟ - سوروشموش، - من نه ائتدیمسه، سیز ده اونو تکرارلایین! آللاها امانت اولون. 

  حکیم بیر گئجه یوخوسوز قالدیغینا گؤره بو سؤزلری سؤیله‌دیکدن سونرا دیلی گؤروننه قدر آغزینی آچیب، بیر دفعه  اسنه‌میش. 

  او اؤلکه ده یاشایانلار بونو گؤرونجه، هامسی بیر آغیزدان سئوینجک باغیرمیشلار: 

  - اولدو … 

  - حکیم اسنه دی… 

  - حکیم گریلدی… 

  - آریقلامادیغی‌نین سببینی ایندی آنلادیق… 

  - حکیم نه ائتدیسه، بیز ده اونو ائدک… 

   او گوندن سونرا او اؤلکه ده یاشایانلار  " حکیم اسنه‌دی، گریلدی "  دئیه‌رک دایانمادان اسنمگه، گریلمگه باشلامیشلار. حقیقتن ده آریقلامالاری، کیچیلمه‌لری، قیسالمالاری دایانیبمیش. ایریلری ایری، بالاجالاری دا کیچیک قالمیش، هئچ بیر دییشمه اولمامیشدی. چونکی اسنمکدن، گریلمکدن واخت تاپا بیلمه‌میشلر کی، کیچیلسینلر، بالاجالاشسینلار، یا دا بؤیویوب ایریلشسینلر… همیشه اسنه‌ییر، همیشه گریلیرلرمیش…

تورکییه تورکجه سیندن اویغونلاشدیران: توووز تئیمورووا 

کؤچورن: عباس ائلچین
+ :  شنبه ۱۳۹۴/۱۰/۰۵ساعات  23:18