ائلچین

تورک دیلی و ادبیاتی

قاتیل‌لر - چارلز بوکووسکی

+0 بگندیم

قاتیل‌لر - چارلز بوکووسکی 

چئویری: آزاد یاشار 

کؤچورن: عباس ائلچین

  هارری یوک قاتاریندان تزه‌جه ائنمیشدی و آلامئدا یولویلا پئدرونون یانینا، بیر فینجان اوجوزواری قهوه ایچمگه گئدیردی. سحرین گؤزو تزه‌جه آچیلسا دا، پئدرونون اؤز دوکانینی عادتن ساعات 5-ده آچدیغینی او، یاخشی خاطیرلاییردی. جمعی بئش سئنت اؤدمکله اورادا ‌نینکی بیر، حتّی ایکی ساعات دا اوتورماق اولوردو. و دوشونمک. هارادا و نه‌یی دوز، نه‌یی ایسه یانلیش ائتدیگینی صاف-چوروک ائتمه ایمکانی قازانیردین اورادا. 

  پئدرونون دوکانی آچیق ایدی. قاباغینا بیر فینجان قهوه قویان مئکسیکالی قیز اونو اصل اینسان کیمی سوزدو. حیاتین هر اوزونو گؤرموشدو بو قول و سویوشیرین قیز ایدی. بئله دئیک ده - خئیلی سویوشیرین قیز ایدی. اصلینه قالاندا ایسه، قادینلارین هامیسی رئال تهلوکه منبعییدیر. حیاتداکی هر شئی آداما تهلوکه ساچیر. ایندی او، واختیله بیریسیندن ائشیتدیگی شخصی بیر قناعتی خاطیرلادی: حیاتین اؤزو تهلوکه‌لردن عیبارتدیر. 

  هارری کئچیب، کؤهنه ماسالاردان بیری‌نین آرخاسیندا اَیلشدی. بورانین قهوه‌سینه سؤز اولا بیلمزدی. جمعی اوتوز یاشین ایچینده اولسا دا، حیاتینی نؤقتله‌میشدی آرتیق. قهوه‌سینی اودوملایاراق، واختیله نه‌یی یانلیش، نه‌یی دوغرو ائتدیگینی خاطیرینده جانلاندیریردی ایندی. هر شئیدن - سیغورتا هنگاملریندن ده، خیردا کابینئتلردن ده، یوکسک شوشه‌لی عاغیللاردان دا، ائله موشتریلردن ده جانا ییغیلمیشدی او. آروادینا خیانت ائتمکدن، کاتیبه‌لری لیفتده، وئستیبولده الـله‌مکدن ده زینهارا گلمیشدی. میلاد و یئنی ایل بایرامی شنلیکلریندن، دوغوم گونو مجلیسلریندن، یئنی ماشین، مئبئل، حتّی قاز، سو، ائنئرژی اوچون اؤدمه‌لردن ده، اینسانین ان موختلیف طلباتلارینی قارشیلایان هر شئیدن ظنی-زهله‌سی گئدیردی اونون. 

  ان اول هر شئیی، بوتون ایش-گوجونو صیرف بئزدیگی اوچون بیر کنارا آتمیشدی. آز سونرا ایسه بوشانما مسله‌سی گونده‌مه گلدی، بونون آردینجا او، ایچکییه قورشاندی و قفیلدن اورتالیقدان قئیب اولدو. آرتیق هئچ نه‌یی یوخ ایدی و ایندی آنلاییردی کی، لوتون بیریسی کیمی یاشاماغین اؤزو ده خئیلی غلیظ مسله ایمیش. بو دا بیر باشقا جور یوکموش. کاش بونلارین آراسیندا، هم ده نیسبتن مانعه‌سیز بیر یول اولایدی. آخی، عادتن اینسان ایکی شئی آراسیندا سئچیم ائله‌ییر: یا اؤزونو اودا-کؤزه وورور، یا دا صیرف آوارالانماغا اوستونلوک وئریر. 

  اؤزو کیمی، یعنی بئش سئنته بیر فینجان قهوه آلان بیریسی کئچیب، دوز قارشیسیندا اَیلشنده هارری باشینی قالدیرمالی اولدو. بو آدام تخمینن قیرخ یاشلاریندایدی. هارری کیمی اونون دا اَیین-باشی تؤکولوردو. داماغینداکی سیقارئتی یاندیران بو حریف باخیشلارینی هارریدن چکمیردی. 

  - نه وار، نه یوخ؟ 

  هارری دیللندی: 

  - عجب سوالدیر. 

  - حاقلیسان. 

  قهوه‌لرینی ایچمگه داوام ائله‌دیلر. 

  - ماراقلیدیر، اینسانلار بئله یئرلره نئجه گلیب چیخیرلار، هه؟ 

  - هه-ه-ه، - دئیه هارری تصدیقله دی. 

  - یئری گلمیشکن، بونا بیر احتییاج وارسا، آدیم اویلیامدیر. 

  - منیمکی ایسه هارری. 

  - منی «بیلل» ده چاغیرا بیلرسن. 

  - من راضی. 

  - اوزونه باخانا ائله گلیر کی، سن گئدیب-گئدیب نیینسه لاپ آخیرینا چیخمیسان. 

  - من ساده‌جه قیرمانج یئمکدن یورولموشام. لاپ ایت کیمی الدن دوشموشم. 

  - هارری، یئنیدن جمعیته دؤنمک ایستیردین؟ 

  - یوخ، اصلا. ایندی داها چوخ بو دوشدوگوم دورومدان سییریلیب چیخماق آرزوسوندایام. 

  - حالبوکی سن جانینا دا قییا بیلردین. 

  - او هئچ ده. 

  بیلل دئدی: 

  - بورا باخ، اگر هارادانسا، هم ده قیسا واختدا الیمیزه بیر آز ناغد پول کئچیرسک، روحوموزو گئن-بول اَیلندیره بیلریک ها! 

  - نییه ده اولماسین؟ آما نئجه؟ 

  - ائ-ائ-ائ، آنجاق بیر آز ریسکه گئتمه‌لی‌ییک. 

  - مثلا، نئجه؟ 

  - اوللر من ائو سویوردوم. قازانجلی ایشدیر. یاخشی بیر اورتاغا ایندی یامانجا احتییاجیم وار. 

  - ائله ایسه دانیشدیق. من دئمک اولار کی، هر شئیه راضییام. اونسوز دا حیاتدان بئزیب-اوسانمیشام: قاینادیلمیش پاخلادان دا، بویات قوغاللاردان دا، هر جور میسسییالاردان دا، تانری حاقدا موعیظه‌لردن ده، خورولتولاردان دا… 

  بیلل دئدی: 

  - ایندی اساس مسله - بو ایشی گؤره جگیمیز یئره گئتمکدیر. 

  - منده ایکی دوللار وار. 

  - او دا یئتر. گئجه یاری گؤروشوروک. کارانداشین نئجه، وار؟ 

  - یوخ. 

  - گؤزله. گئدیب، بونلاردان ایسته‌ییم. 

  بیر قلم قیریغی تاپیب، گئری دؤندو. سالفئتی گؤتوروب، اوستونده نه‌لرسه جیزدی، قارالادی. 

  - بئوئرلی-هیللزه گئدن آوتوبوسا مینیب، سوروجویه دئ کی، سنی اورادا ائندیرسین. دوشندن سونرا شیمال طرفه اوز توتوب، ایکی محلله‌نین تا آخیرینا قدر گئت. اورادا سنی گؤزله‌یه‌جگم. گله‌بیله‌جکسن؟ 

  - گلرم. 

  - آرواد-اوشاغین نئجه، وار؟ - دئیه بیلل خبر آلاندا هارریدن: 

  - وار ایدی، - جاوابی گلدی. 

  *** 

  او گئجه هاوا سویوق ایدی. آوتوبوسدان ائنن هارری شیمالا طرف گئتمکله ایکی محلله‌نی گئریده قویدو. ظولمتدن گؤز-گؤزو گؤرموردو. بیلل اؤزو بوکدوگو تنبکینی توستولتمگینده ایدی. هم ده گؤرونن یئرده یوخ، ایری بیر کولون آردینا دورموشدو. 

  - سالام، بیلل. 

  - سالام، هارری. هه، پوللو بیر ایشه گیریشمگه حاضیرسان؟ 

  - هه. 

  - چوخ یاخشی. من بورالاری یاخشیجا آراشدیرمیشام. دئیسن، زنگین بیر ائو ده تاپمیشام. دیگر ائولردن آرالیدا تیکیلیب. اوندان اطرافا پول قوخوسو یاییلیر. قورخمورسان کی؟ 

  - یوخ. قورخمورام. 

  - الا. اوندا دیقتینی توپلا و آردیمجا گل. 

  بیلل سکی ایله بیر محلله نی کئچیب، دیگری‌نین یاریسینا قدر گئتدی. هارری ده کؤلگه کیمی اونون آردینجا دوشموشدو. سونرا بیلل کوللارین آراسیندان کئچیب، خیردا نوهور طرفه بورولدو. آرخا طرفدن یاناشدیقلاری ایری ائو ایکی‌مرتبه‌لی ایدی. بیلل آرخا پنجره‌نین یانینی کسدیردی. بیچاقلا پنجرده کی  تورو دلندن سونرا اطرافی دینله‌دی. هندوره اصل مزارلیق سوکوتو چؤکموشدو. تور وورولان چرچیوه نی یئریندن اویناتماقلا یوخاری قالدیردی. بیر خئیلی اونونلا اللشدی. هارری آرتیق اؤزونو دانلاماغا باشلامیشدی: «ایلاهی! یقین خام اوغرودور بو. یا دا پسیخین بیریسیدیر». 

  بو واخت پنجره آچیلدی و بیلل اؤزونو ایچری سالدی. قارانلیغا رغمن، هارری پنجره دن سیویشمگه چالیشان اورتاغینین یانبیزلارینی نئجه بورجوتدوغونو دا سئزدی. «عجب مزه‌لیدیر! - دئیه دوشوندو. - هئچ کیشی خئیلاغی دا بو ایشله مشغول اولار؟!» 

  بیلل ایچریدن پیچیلدادی: 

  - ایچری کئچ. 

  هارری ده ایچری دالدی. ائودن حقیقتن پول و جیلالی مئبئل قوخوسو گلیردی. 

  - آمان آللاه، بیلل. باخ، آنجاق ایندی جانیمی آنلاشیلماز قورخو حیسّی بورودو و بونون معناسیز بیر ایش اولدوغونو آنلادیم. 

  - سسینی باشینا آتما. اؤزون دئمیردین کی، سودا بیشن پاخلادان بئزمیسن؟ 

  - دئییردیم. 

  - اوندا کیشی اول. 

  بیلل آغیر-آغیر سیییرمه‌لری آچیب، اورادان قامارلادیقلارینی جیبلرینه دورتوشدوردوگو مودتده هارری اونون بؤیرونده کیریمیشجه دورموشدو. هر حالدا بورا یئمک اوتاغییدی، چونکی بیللین جیبینه سوخدوغو اشیالار قاشیق، چنگل و بیچاق ایدی. 

  هاررینی فیکیر گؤتوردو: «اگر بونلاری ساتساق، گویا الیمیزه نه قدر پول کئچه جک کی؟!» بیلل ایسه گوموش اشیالاری گؤدکچه‌سی‌نین جیبلرینه ییغماغینا آرا وئرمیردی. آرادا بیچاغین بیری الیندن یئره دوشدو. دؤشمه سرت ایدی، خالی سریلمه‌دیگیندن چوخ دقیق و آشکار جینگیلتی قوپدو. 

  - کیم وار اوردا؟ 

  بیلل و هارری نفسلرینی قیسیب، یئرلرینده قورودولار. 

  - من دئدیم: «کیم وار اوردا؟» 

  سونرا بیر قیز سسی ائشیدیلدی: 

  - نه اولوب ائله، سئیمور؟ 

  - قولاغیما بیر سس دَیدی. یوخودان دا او سسه اویاندیم. 

  - اوف، اوف، یات، یات. 

  - یوخ. من دقیق نسه ائشیتدیم. 

  اولجه چارپایی‌نین جیریلتیسینی، آردیندان ایسه کیشی‌نین آددیم سسلرینی دویدو هارری. قاپینی آچان او آدام ایندی اونلارلا بیرلیکده یئمک اوتاغیندا دایانمیشدی. 26 - 27 یاشلارینداکی بو کئچی‌ساققاللی و اوزون ساچلاری اولان جاوانین اَینینده پیژاما واردی. 

  - وای، ایبنه‌لر، دئیین گؤروم، ائویمده نه ایتینیز آزیب، هه؟! 

  بیلل هاررییه طرف چؤنوب، دئدی: 

  - یاتاق اوتاغینا گئت. چوخ یقین اورادا تئلئفون وار. قویما قیز بیر یئره زنگ ائله‌سین. بونون درسینی اؤزوم وئرجگم. 

  هارری یاتاق اوتاغینا طرف یوللاندی، قاپینی تاپیب، ایچری گیرنده اورادا جاوان، 23 یاشیندا ساریشین بیر قیزلا راستلاشدی. یاراشیقلی گئجه پالتاری‌نین آلتیندا قیزین ممه‌لری آهنگله ییرغالانیردی. بؤیرونده کی  تومبانین اوزرینده تئلئفون اولسا دا، قیز هله‌لیک هارایاسا زنگ ائله‌مگی عاغلینا دا گتیرمیردی. یاتاغیندا اوتورموشدو، دهشتدن الییله آغزینی قاپامیشدی. 

  هارری اونا تپیندی: 

  - سسینی چیخارتسان، گبردرم. 

  باشینین اوستونو کسدیردیگی قیزا گؤز قویدوقجا هارری اؤز آروادی باره ده دوشونوردو: او، هئچ واخت بو دیلبر قدر جان آلیجی اولمامیشدی. هاررینی تر باسدی، باشی گیجللندی. قیزلا گؤز-گؤزه قالدیغیندان ایدی یقین. 

  هارری چارپایی‌نین کناریندا اوتوردو. 

  - آروادیما توخونما، یوخسا سنی گبردرم! 

  بیلل اونو تزه‌جه یاتاق اوتاغینا چکیب گتیرمیشدی. کیشینین قولونو گئری قانیران بیلل بیچاغی اونون اونورغاسینا دیرمیشدی. 

  - قورخما، هئچ کس سنین آروادینا بیر شئی ائله‌مه‌یه‌جک. یئتر کی، سن او ایی وئریب، اییلنن پوللاری‌نین یئرینی دئ، بیز ده خوشلوقلا چیخیب گئدک. 

  - من آخی سیزه دئدیم کی، نه‌ییم وارسا، هامیسی پول‌قابیمدادیر. 

  بیلل اونون قولونو داها سرت بوردو و بیچاغی بیر آز دا درینه یئریتدی. کیشی آغریدان اوزونو بوروشدوردو. 

  بیلل سوروشدو: 

  - قیزیللار هارادادیر؟ اونلارین یئرینی گؤستر. 

  - یوخاریدادیر… 

  - یاخشی. اوندا بیرلیکده یوخاری قاتا چیخاق! 

  هارری باخیشلارییلا اونلاری اؤتوردو. سونرا گؤزلری تکرار قیزا زیللندی، هئچ قیز دا او آرا باخیشلارینی اوندان آییرمیردی. گؤی گؤزلری‌نین ببکلری قورخودان بؤیوموشدو. 

  هارری تکرار قیزا تپیندی: 

  - چیغیریب ائله‌مه، یوخسا، باخ، دوز سؤزومدور: سنی حقیقتن اؤلدوررم! 

  قیزین دوداقلاری سیریدی. اونلار سولغون پمبه رنگده‌ ایدیلر. گؤزله‌نیلمه‌دن یاد کیشی‌نین دوداقلاری اونلارا توخوندو. اونون ساچ-ساققالی قیزین اوزونو دالاییر، عوفونتلی نفسی اورگینی بولاندیریردی. ظریف و بیاض تنلی قیزین باشینی اوووجلاریندا توتان کیشی گؤزلری‌نین ایچینه باخاراق اونا دئدی: 

  - سن قانجیقسان! هه، هه، لعنته گلمیش سورتوکسن! 

  بونون آردینجا قیزی تکرار، آما بایاقکیندان داها قابا شکیلده اؤپدو. سونرا هر ایکیسی یاتاغا سره‌لندی. اللرییله قیزی گؤوده‌سینه سیخدیغی اوچون او، آیاققابیلارینی چیخارماقدان اؤترو آیاقلارینی یئلله‌مگه مجبور اولدو. داها سونرا عئینی اوصوللا شالوارینی سویونماغا، اونون منگنه‌سیندن قورتولماغا جهد گؤسترنده ده، قیزی بیر آن بئله بوراخمادی، اؤپوب-اوخشادی: 

  - قانجیغیم، لعنته گلمیش قانجیغیم… 

  - آه، یوخ! ایلاهی پروردیگارا، یوخ! آروادیما توخونمایین، اجلافلار! 

  اونلارین نه واخت گئری دؤندوگوندن هارری بیخبر ایدی. جاوان ار سسینی باشینا آتمیشدی. سونرا بیر خیریلتی گلدی هارری‌نین قولاغینا. کرکینمگینه آرا وئریب، گئرییه بویلاندی. بوغازی کسیلن جاوان یئره سره‌لنمیشدی، قانی ایسه بللی فاصیله‌لرله پارکئته سیچراماقدایدی. 

  هارری چیغیردی: 

  - سن اونو اؤلدوردون! 

  - آخی، او، باغیریردی. 

  - اونو اؤلدورمه‌یه ده بیلردین. 

  - سن ده اونون آروادینی زورلامایایدین. 

  - من قادینی هله زورلاییب-ائلمه‌میشم، آما سن آرتیق اونون ارینی گبرتدین. 

  بو سفر قادین شیون قوپارتدی. هارری اونون آغزینی الییله قاپادی و سوروشدو: 

  - ایندی نئیله یک؟ 

  - بونو دا ائله‌جه. شاهید قالماسین. 

  هارری دیللندی: 

  - منیم بونا الیم قالخماز. 

  بیلل دئدی: 

  - اوندا من اؤلدوررم. 

  - آما بو جور متاهی دادماماق باغیشلانماز گوناه اولاردی. 

  - ائله ایسه بویور، داد. 

  - سن اونون آغزینی بیر شئیله یومسانا. 

  بیلل دیللندی: 

  - او باره ده آرخایین اول. 

  سیییرمه‌دن چیخارتدیغی شرفی او، قادینین آغزینا دورتدو. سونرا بالیش‌اوزونو زولاقلار شکلینده جیریب، شرفین اوستوندن باغلادی. 

  - هایدی، ایشینی گؤر، - دئدی بیلل. 

  قیز آرتیق دیرنمیردی. دئیه سن، شوک وضعیتینه گیرمیشدی. 

  هارری ایشینی بیتیرندن سونرا، بیلل اونون یئرینی توتدو. هارری اورتاغینا گؤز قویوردو. باخ، بئله ها. تاریخ بویو بئله اولوب. ایشغالچی اوردو هر شئیدن اول یئرلی قادینلارا تجاووز ائدیب. ایندی بیلل ایله او دا ایشغالچی قوشون کیمی بیر شئی ایدی. 

  بیلل چارپاییدان ائنرکن: 

  - هئچ واز کئچیله‌سی جان دئییلمیش ها! - دئدی. 

  - بورا باخ، بیلل، گل، بونو اؤلدورمه‌یک. 

  - یوخ، گئدیب بیزی ساتار. شاهیددیر آخی. 

  - اگر جانینا قییماساق، او دا بیزی شرله‌مز. بئله داها دوغرو اولار. 

  - شرله‌یر. من اینسان اؤولادینا یاخشی بلدم. سونرادان گئدیب بیزی ساتاجاق. 

  - اونا وئردیگیمز بو حظّه گؤره نییه گئدیب بیزی ساتمالیدیر کی؟ 

  بیلل دئدیگینده دوردو: 

  - من ده ائله اونا گؤره دئییرم کی، موطلق بیزی ساتاجاق. نییه بونا ایمکان تانییاق، آخی؟! 

  - گل، اوندا اؤزوندن سوروشاق. اونونلا دانیشاق. بو باره ده فیکرینی اؤیرنک. 

  - ایندی اونون نه‌لر دوشوندوگونو من یاخشی بیلیرم. بو دقیقه  اونو گبرده‌جگم. 

  - سن جانین، بیلل، لازیم دئییل. گل، هر شئیی نئجه وارسا، ائله ده ساخلایاق. 

  - نئجه وارسا، ائله ده ساخلایاق؟! بوتون بونلاردان سونرا؟! چوخ گئجدیر. اگر سن بیر آزجا اؤزونه حاکیم اولسایدین و قاباغینداکی او شوغریبی هارا گلدی دورتمه‌سه‌یدین… 

  - بیلل، قییما اونا، من… باخا بیلمیرم… 

  - اوزونو یانا توت. 

  - بیلل، یالواریرام سن… 

  - سنه دئمه‌دیم اوزونو یانا توت، آی آناسی گؤیچک! 

  هارری اوزونو یانا چئویردی. قیزین هئچ جیققیری دا چیخمادی. آرادان بیر نئچه دقیقه  اؤتدو. 

  - بیلل، ایشینی بیتیردین؟ 

  - هه. ایندی دؤنوب، باخا بیلرسن. 

  - ایسته‌میرم. گئدک. گئدک بورادان. 

  اونلار ائله همین پنجره دن ده باییرا چیخدیلار. هاوا لاپ آیازلامیشدی. ائوین کؤلگه‌لی طرفییله ایره‌لیله‌ییب، سارماشیقلی چپردن او بیری اوزه کئچدیلر. 

  - بیلل؟ 

  - ندیر؟ 

  - کئفیم یامانجا دورولدو، ائله بیل هئچ نه اولماییبدیر. 

  - اولوب، اششی، اولوب. 

  گئرییه، آوتوبوس دایاناجاغینا قاییتدیلار. گئجه‌لر سرنیشینلر سئیرلدیگیندن بلکه ده آوتوبوسو بیر ساعات گؤزله‌مک لازیم گله‌جکدی. دایاناجاقدا دوروب، بیر-بیری‌نین اوست-باشینا گؤز قویوردولار کی، بیردن قان ایزی-فیلان اولار. آما غریبه دیر: هئچ یئرلرینده قاندان اثر-علامت یوخ ایدی. بوندان تام امین اولاندان سونرا آداما بیر تنبکی  بوکوب، توستولتمگه باشلادیلار. 

  قفیلدن بیلل اؤز تنبکی سینی یئره توپوردو: 

  - له-ه-نت سنه، کور شئیطان! 

  - نه اولدو کی، بیلل؟ 

  - بیز او حریفین پول‌قابیسینی گؤتورمگی اونوتدوق! 

  هارری دیللندی: 

  - اه، سنین ده لاپ بئترینی!..