ائلچین

تورک دیلی و ادبیاتی

" سیزین اؤلکه ده ائششک یوخدورمو؟ "

+0 بگندیم

 AZİZ NƏSİN

" سیزین اؤلکه ده ائششک یوخدورمو؟ " 

  یازان : عزیز نسین

       دیشی آغریییر کیمی، بیر الی اوزونده باشینی ساغا-سولا یئلله ده-یئلله ده ایچری گیردی. بیر یاندان الینی یاناغینا وورور، بیر یاندان دا: 

      - توفف، روسوایی-جاهان اولدوق...- دئیه دئیینیردی. 

      او، اصلینده چوخ نجیب بیر آدامدیر. قاپیدان گیرر-گیرمز، سالام وئرمه دن بئله دئیینمه سینه چوخ تعجوب ائتدیم. 

  - خوش گلدینیز، - دئدیم - بویورون، ریجا ائدیرم اوتورون. 

  - رذیل اولدوق، رذیل…  

  - نئجه سینیز؟ 

  - نئجه اولا بیلرم؟ بی آبیر اولدوق… بی آبیر… یقین باشینا بیر فلاکت گلمیشدی. بلکه ده عاییله سینه بیر بدبختلیک اوز وئرمیشدی... 

     - یئرین دیبینه گیردیک، محو اولدوق... 

    - آخی نه اوچون؟ نه اولموشدور؟ 

     - داها نه اولاجاق. بیر قوتور ائششگی کیشییه ایکی مین بئش یوز لیره یه ساتدیلار... 

    اوزونه دیقتله باخدیم: یوخسا دلی اولموشدو؟ قورخومو گیزلتمک ایستمه دیم. آروادی چاغیرماق اوچون بهانه ائده رک:  

      - قهوه ایچرسینیزمی؟ - دئدیم. 

      - قهوه-زاد یئری دئییل. روسوای اولدوق… بیر نالسیز قارت ائششک ایکی مین بئش یوز لیره یه وئریلر؟ 

       - هئچ ائششک ساتمادیغیم اوچون بو قییمتین آرتیق-اسکیک اولدوغونو دئیه بیلمرم. 

      - جانیم، من ده ائششک چووداری دئییلم. آما بیر ائششگین ایکی مین بئش یوزه گئتمه دیگینی بیلیرم. 

     - دئیه سن عصبلرینیز پوزولموشدور؟ 

    - پوزولار دا… منیم عصبیم پوزولماسین کیمینکی پوزولسون؟ سیز ائششگین بو قدر باها ساتیلدیغینی گؤرموسونوزمو؟ 

      - ایییرمی ایلدن چوخ اولار کی، هئچ ائششک گؤرمه میشم. 

     - من سیزه ائششگی گؤروب-گؤرمه دیگینیزی یوخ، اونون بئله مبلغه ساتیلدیغینی دئییرم. 

      - واللاهی نه دئییم… لیاقتلی ائششک بلکه او قییمته گئده... 

      - جانیم ائششک - ائششکدیر. نه لیاقتبازلیقدیر. او، دوروب نیطق سؤیله مه یه جک کی؟ اوسته لیک هم قوتور، هم ده قارت… ائله باها قییمته ساتدیلار. هم ده ایشین ان پیس جهتی اودور کی، بوندا منیم ده ایشتیراکیم وار. 

    - نه دئییرسن؟ 

      - بلی. ائله من سنه بونو دئمک اوچون گلمیشم. سن یقین بیلیرسن کی، آمئریکانین دعوتی اوزره من ایستانبول اونیوئرسیتئتیندن بیر ایللییه اورایا اعزام ائدیلمیش و خانیمیمی دا اؤزومله آپارمیشدیم. 

      - اونو بیلیرم. 

    - آمئریکادا بیر پروفئسسورلا دوست اولدوم. منه چوخ کؤمک ائتدی. چوخ یاخشیلیغی کئچدی. قاییدیب گلندن سونرا اونونلا مکتوبلاشدیق. او، تورکییه نی سئون، تورکلره دوست اولان بیر آدامدیر. مکتوبلاری نین بیرینده آنتیک خالی موتخصیصی اولان بیر دوستونون اؤز اثری اوچون تدقیقات آپارماق مقصدیله تورکییه گله جگینی یازیب اونا کؤمک ائدیب-ائده بیلمیه جگینی سوروشوردو. 

  من ده تعطیل واختیندا بورایا گلرسه، ممنوعنیتله اونا یولداشلیق ائده جگیمی یازدیم.  

  هیندیستان و ایراندا تدقیقات آپاراندان سونرا او، اییول آییندا گلیب چیخدی.  

  او دوشدویو اوتئلدن منه تئلئفون ائتدی، من ده اونون یانینا گئتدیم. او، اصلا آلمانییالی اولان آمئریکان ایدی. دئیه سن یهودی ایدی. 

  بورا گلمه میشدن اول گزدیگی یئرلردن دؤرد بؤیوک چامادان دولوسو خالی، هئیبه و کیلیم گتیرمیشدی.  

  او، چامادانلارینی آچیب بوراداکی شئیلری منه گؤستردی.  

  او، بو شئیلری تاپماسیندان چوخ ممنون حالدا بونلارین اؤلچولمز درجه ده قییمتلی اولدوغونو سؤیله دی.  

  بو شئیلرین آراسیندا اوچ قاریش ائنی، بئش-اون قاریش اوزونو اولان کؤهنه خالی پارچاسینی گؤستره رک اونون آزی اوتوز مین دوللار قییمتی اولدوغونو، بیر ایرانلی کندلیدن جمعیسی بیر دوللارا ساتین آلدیغینی و بو زامان همین کندلی نین پولو آلارکن خئیلی تعجوب ائتدیگینی دئدی. 

  من بو خالی پارچاسی نین ندن بو قدر باها اولدوغونو سوروشدوم. 

  «چونکی - دئدی، - بونون هر کوادرات سانتیمئترینده سکسن ایلمک وار. بو بیر شاه اثردیر».  

  او، بؤیوک ائهتیراسلا بو مسله حاقیندا دانیشیر و دونیادا بیر کوادرات سانتیمئترده یوز ایلمک اولان خالی نین مؤوجود اولماسی، دونیانین هانسی موزه ینده ایسه آسیلماسی حاقدا دا دئییردی... 

  سونرا منه بیر کئچه گؤستردی. «بونو - دئدی - اللی سئنته آلدیم.  

  بونون ایسه آزی بئش مین دوللار قییمتی وار». من اوندان بئله باهالی شئیلری نه یوللا بو قدر اوجوز آلا بیلدیگینی سوروشدوم. 

  - قیرخ ایلدیر کی، بو ساحه ده چالیشیرام، - دئدی. - بیزیم ده اؤزوموزه گؤره اوصولوموز وار. 

  او سونرا منه بو اوصوللار حاقیندا معلومات وئردی. آغزیم آچیلا قالدی. خالیچیلیق صنعتی، دونیانین ان یوکسک صنعتییمیش.  

  او خالی حاقیندا ایکی آلبوم، اوچ کیتاب نشر ائتدیریب. دونیادا اولان بیر نئچه قییمتلی خالی کوللئکسییاسی نین بیرینه ده اونون اؤزو صاحیبمیش. 

  بیز سونرا اونونلا آنادولونو گزمه یه چیخدیق. ویلایتلری، قزالاری گزیردیک. او، مسجیدلرده قییمتلی حساب ائتدیگی خالیلارین رنگلی فوتولارینی چکیر، قئیدلر ائدیردی. 

  بیر نئچه آدامدان کؤهنه هئیبه، خالی، کئچه و کیلیم ده ساتین آلدی. دئدیگینه گؤره بورادا آلدیقلاری باشقا شرق اؤلکه لرینده آلدیغی شئیلرین هامیسیندان قییمتلی ایمیش.   

  آرخئولوژی قازینتیلار آپاریلان بیر یئره ده گلدیک.  

  آمئریکا و آلمان آرخئولوقلاری بیر-بیریندن بئش-اون کیلومئتر آرالی دوشرگه لر قورموش، قازینتی ایشلری آپاریردیلار. اونلار یئرین آلتینی اوستونه چئویرمیش، داغلاری، تپه لری حللاج پامبیغی حالینا سالمیشدیلار. 

  بیر قصبه  گئنیشلیگی اولان بو قازینتی اراضیسینده ائرامیزدان اون عصر اولدن باشلامیش، بو گونه قدر بیر نئچه مدنیت یارانیبمیش و تورپاغین آلتیندا اوست-اوسته قالیبلارمیش.  

  اونلار یئرین آلتیندا بیر نئچه شهر کشف ائتمیش، اورادا سارایلار، قبیرلر تاپمیشدیلار. 

  تاریخ و آرخئولوگییا ایله ماراقلانان چوخلو خاریجی توریست ماشینی دا بورادا قایناشیردی. هر ایکی-اوچ کیلومئترده بئش-اون توریسته راست گلمک اولوردو. 

  اطرافداکی کندلرین ساکینلری بورایا توپلاشیر، یئر آلتیندان تاپدیقلاری ساخسی پارچالارینی بو توریستلره ساتیر، توریستلر بو شئیلری قاپیشدیریردیلار.  

  کندلی اوشاقلاری دا یول بویونا دوزوله رک قازینتی یئریندن تاپدیقلاری حالقالاری، یازیلی داشلاری، قاب-قاجاق قیریقلارینی «وان دالیر»، «توو دالیر»- دئیه باغیرا-باغیرا توریستلرین دالینجا قاچیردیلار. 

  بورالارا قدر گلیب چیخدیغیم اوچون من ده یادیگار بیر شئی آلیم - دئدیم. اون یاشی آنجاق اولان بیر قیزین الینده بیر وازو قولپو، یانینداکی اوغلانین الینده ایسه آدام باشینا اوخشایان ماوی رنگلی کیچیک بیر داش واردی. بو یقین اوزوک داشی ایدی. 

  - بونلار نئچه دیر، بالا؟ - دئیه سوروشدوم. 

  قیز وازونون قولپو اوچون قیرخ لیره، اوغلان ایسه داش اوچون اون بئش لیره ایسته دی. بو شئیلرین همین مبلغه دییب-دیمه دیگینی بیلمه دیگیمه باخمایاراق:   

  - باهادیر، - دئدیم. 

  اونلار بؤیوک آداملار کیمی بو شئیلرین هئچ ده باها اولمادیغینی، آتالاری نین بو شئیلری بئش مئتر درینلیکده تاپدیغینی دئدیلر.  

  بو شئیلری آلماق ایسته ییردیم کی، آمئریکالی موتخصیص اونلارین هئچ بیر تاریخ و آرخئولوژی دیری اولمادیغینی، 

  شرق اؤلکه لرینده کندلیلرین آوروپا و آمئریکادان گلن توریستلری آلدادیب بئله شئیلری ساتدیقلارینی سؤیله دی. اونون دئدیگینه گؤره بو حیله گر کندلیلر مشهور آرخئولوقلاری بئله آلداتماغی باجاریرلار.  

  حتّی بیر دفعه  اؤلو بیر ایت لئشی نین توکلرینی قیرخاراق اونو بیر حؤکمدارین مومییاسی آدی ایله آمئریکالی توریسته ساتا بیلمیشلر. 

  بیز کیراله دیگیمیز جیپ ماشینیندا گئدیردیک. هاوا چوخ بورکو ایدی. یول کناریندا اوچ قوواق آغاجی آلتینداکی قویونو گؤرنده دایاندیق.  

  کؤلگه ده اوتوروب ناهار ائتمک ایسته ییردیک. اورادا بیر کندلی اوزانمیشدی. اونون یاخینلیغیندا ایسه بیر ائششک اوتلاییردی. 

  بیز قوجا ایله سالاملاشدیق و اونونلا دانیشماغا باشلادیق. من اونون دئدیکلرینی آمئریکالی اوچون اینگیلیسجه یه چئویردیم. 

  - بوراداکی کندلرده ان چوخ نه یئتیشیر؟  

  کندلی: 

  - هئچ بیر شئی - دئیه جاواب وئردی. - اوللر بورادا اکین-بیچینله مشغول اولاردیلار، تاخیل یئتیشردی. آما بو قازینتیلار باشلایالی 20 ایلدیر کی، هامی تنبلله شیب، داها هئچ بیر شئی اکمیرلر. 

  آمئریکالی: 

  - عئینن باشقا یئرلرده ده بئله دیر، - دئدی. 

  - بس بو یئرلرین آداملاری نه ایله کئچینیرلر؟ - دئیه سوروشدوم. 

- یئرین آلتیندان قاب-قاجاق قیریغی، داش-ماش چیخاردیب بورا دولوشان اجنبیلره ساتیرلار.  

  آمئریکالی:   

  - عئینن باشقا یئرلرده اولدوغو کیمی، - دئیه تکرار ائتدی. 

  - بیزیم بو یئرلرین آداملاری یامان خاراب اولوبلار. اؤلکه نین بوتون خزینه لرینی سو قییمتینه اجنبیلره ساتدیلار. یئردن چیخان شئیلر اصیل دیرینه ساتیلسا ایدی اون بئله تورکییه نی آباد ائتمک اولاردی. اوغرولار بورا دولوشوب. تورپاق آلتیندان چیخان قییمتلی آنتیک شئیلری اوغورلاییب خاریجی اؤلکه لره آپاریرلار. بو شئیلرین بعضیسینی اؤزلری قازیب چیخاریر، بعضیلرینی ده کندلیلردن آلیرلار. 

    آمئریکالی یئنه اونون سؤزونو تصدیق ائتدی.  

  کندلی سؤزونه داوام ائده رک: 

  - داها، - دئدی، - تورپاغین آلتیندا چیخارماغا بیر زهریمار دا قالماییب. اجنبیلر ایندی نه اوغورلاییرسا، اونو حؤکومتدن اوغورلاییرلار. 

  من: 

  - بس کندلیلر ایندی نه ایله دولانیرلار؟ - دئیه سوروشدوم. 

  - هئچ اونو سوروشما… بورالاردا آلتی کند وار. ائولرینه گئتسن، چیر-چیلپاق. هئچ بیر شئی گؤره بیلمزسن. نه سو قابی، نه سهنگ، نه چاناق قالمیشدیر. 

  - نه اوچون بئله؟ 

  - اونا گؤره کی، هر شئیی بو توریستلره ساتیرلار. ائولرده قییمتلی بیر شئی قالمامیشدیر.  

  هر نه وارسا آدینی آنتیک شئی قویوب ساتیرلار. آداملار یامان کورلانیب. دونن، ال بویدا بیر اوشاق منیم ائششگیمین بوینونداکی مونجوقلاری اوغورلاییب.  

  او، بونلاری آپاریب اول تورپاغا باسدیراجاق، سونرا دا اورادان چیخاردیب آنتیک شئیدیر - دئیه ساتاجاق. ائولرده کی  گلینلیک قیزلار دا بیجلشیبلر.  

  اللرینه کئچن هر داشی مهارتله اووور، اونلارا جوربجور شکیللر وئریب ساتیرلار. اونلار ائششک نالیندان مئداللار، کؤهنه پوللار قاییرماغی دا باجاریرلار. 

  آمئریکالی یئنه باشقا اؤلکه لرده ده بئله ائتدیکلرینی تصدیق ائله دی. 

  من قوجا کندلیدن: 

  - بس سن نه ایله دولانیرسان؟ - دئیه سوروشدوم. 

  - من ائششک چوودارییام - دئدی. 

  او بونو دئییب قویودان سو چکدی و ائششگیه وئردی. ائششک سو ایچرکن آمئریکالی بیردن یئریندن سیچراییب ائششگین یانینا گئتدی. من ایسه کندلی ایله صؤحبتیمی داوام ائتدیردیم. 

  - ائششک آلیب-ساتماقلا کئچینه بیلرسنمی؟ 

  - شوکور آللاها… بئش ایلدیر بو ایشله دولانیرام. 

  - مثلا، نه قدر قازانیرسان؟ 

  - بو آلیب-ساتدیغیم ائششکدن آسیلیدیر. 

  - بیر ائششگی نه قدر واختا ساتا بیلرسن؟ 

  - بونو دا بیلمک اولماز. بعضاً اوچ آی، بئش آی بیر ائششک ساتیلمیر، بعضاً ده گؤرورسن بیر گونده بئش ائششک ساتمیسان... 

  آمئریکالی یانیما قاییتدی. چوخ هیجانلی ایدی. 

  - ائششگین اوستونده بیر خالی پارچاسی وار، گؤرموسنمی؟ 

  او، اینگیلیسجه دانیشدیغی اوچون کندلی اونو باشا دوشموردو. من باخدیم. ائششگین دالیندا چوخ کؤهنه، پالچیقلی بیر چول واردی. 

  - سن بو چیرکلی جیندیری دئییرسن؟  

  - سن نه دانیشیرسان؟ بو بیر خاریقه، بیر شاه اثردیر. سیز کندلی ایله صؤحبت ائدنده من خالینی دیقتله گؤزدن کئچیردیم. اونون رنگی ده ایشی کیمی چوخ قییمتلیدیر. هر سانتیمئترینده دوز یوز ایلمک وار. دونیادا بونا بنزر بیر شئی گؤرونمه ییب. اونو آلماق ایسته ییرسن؟ 

  - البتته! آما کندلی اونو آلاجاغیمی بیلمه مه لیدیر، من بونلاری یاخشی تانیییرام. بیر شئیینی آلماق ایسته سن، آنتیک شئی حساب ائدیب اوستونه دونیانین قییمتینی قویاجاقلار. نه قدر پول وئرسن گؤزلری دویماز. اونا گؤره ائله ائدک کی، او اصیل مقصدیمیزی باشا دوشمه سین. کندلی بیزه باخیب: 

  - بو کافیر نه قیریلدادیر؟ - دئیه سوروشدو. 

  - هئچ، - دئدیم، - بو یئرلردن خوشو گلدیگینی دئییر. 

  - بورادا خوشا گلن نه وار کی؟ چیلپاق کیرجلی تپه لردیر. 

  آمئریکالی منه: 

  - سیزه آنتیک شئیلری اوجوز آلا بیلدیگیمی دئمیشدیم. ایندی باخ، یئنه بو فندیمی ایشه سالاجاغام. 

  - نئجه ائده جکسینیز؟ 

  - خالی نین آدینی بئله چکمیه جک، ائششگی آلاجاغام. کندلی، چوخ احتیمال کی، خالی نین قییمتینی بیلمه دیگیم اوچون کؤهنه چولو دا ائششگین اوستونده بیزه وئره جک. سیز ایندی اونا منیم بو ائششگی آلماق ایسته دیگیمی سؤیله یین! 

  من کندلیدن: 

  - سن بو ائششگی ساتیرسانمی؟ - دئیه سوروشدوم. 

  - هه… ساتماق ایسته ییرم... 

  - اونو نئچه یه ساتماق فیکرینده سن؟ 

  - او باخیر آلیجیسینا! 

  - بیز آلماق ایسته سک…  

  او گولدو: 

  - منیمله ظارافات ائدیرسینیز؟ سیزین کیمی بیر بَیین ائششک نیینه لازیمدیر؟ 

  - سن اونون فیکرینی چکم… بیز اونو آلماق ایسته ییریک. نئچه یه وئریرسن؟ 

  - دئدیم کی، او باخیر آلیجیسینا… سن آلاجاقسان یوخسا بو کافیر؟ 

  - او آلاجاق... 

  - او نه میلتدندیر؟  

  - آمئریکالی... 

  - هه… اؤزگه دئییلمیش… اؤزوموزنکی ساییلیر. جانیم بو چوخ قارت شئیدیر، دئ کی، بونو آلماق اونا ال وئرمز. 

  مسله نی آمئریکالییا دئدیم. 

  - لاپ یاخشی - دئدی، - دئمه لی او ائششگی اوجوز وئره جک.  

  من کندلییه : 

   - ائششک قارت دا اولسا، راضیدیر - دئدیم. 

  - اشی، بیزیمچین عاییب اولار. سونرا اؤلکه سینه گئدیب «تورکلر منی آلداتدی» - دئیر. 

  بونو دا آمئریکالییا دئدیم. 

  - تورک کندلیسی چوخ صاف، ان دوزگون آداملاردیر - دئدی. باشقا یئرلرده اولسایدی درحال ساتماغا تلسردیلر. ایندی کی او، بو قدر تمیز قلبلی آدامدیر، من ده ائششگی باها قییمته آلاجاغام. 

  کندلییه: 

  - آمئریکالی راضیدیر، - دئدیم. 

  - یاخشی. آما بو ائششک آمئریکایا چاتمامیش یولدا اؤله بیلر. هر یئرینی قوتور باسیب. 

  - سنه نه جانیم. او بئله ده اولسا، آلماق ایسته ییر. 

  - آی جانیم، بو قوتور ائششک اونون نیینه لازیمدیر. 

  - سنین نیینه گرک؟ 

  - ماراقلانیرام، - دئدی. - بیرجه بو آمئریکالی جنابدان سوروش، مگر اونون اؤلکه سینده هئچ ائششک یوخدور؟ 

  بونو آمئریکالیدان سوروشدوم. 

  - اونا دئیین کی، وار. آما بئله سی یوخدور. 

  - دئمه لی بئله… آمئریکان ائششگی اونون خوشونا گلمیر، تورکیه ائششکلرینی داها چوخ خوشلاییر. 

  - ائه، داها نه ائتمک اولار. بابالی اؤز بوینونا. من ائششکده اولان بوتون نؤقصانلاری سادالادیم. ایندی بیر قوتور ائششک اوچون داها بیر اجنبی قوناغیمیزین خطرینی یئره سالمایاق. ساتاق دئییرم. 

  - نئچه یه؟ 

  - سیزین اوچون اون مین لیره یه وئره بیلرم. 

  - نه؟ جانیم دلی-زاد اولمامیسان؟ ان تمیزقانلی عرب آتینی ایکی-اوچ مین لیره یه وئریرلر. 

  - ائله ایسه ائششک اونون نیینه لازیمدیر، ائله بیر عرب آتی آلسین دا... 

  اونون نه قدر ایسته دیگینی آمئریکالییا دئدیم. 

  - من اونلارین خاصیتینی بیلیرم - دئدی. - بودور، گؤردون؟ ائششک اوچون اون مین لیره ایسته ین، یقین کی، خالی اوچون یوز مین لیره ایستر. ایندی من بو ائششگیه اون مین لیره وئررم. آما بونو ائشیدن کیمی یگیرمی مین ایستیه جک. اونو وئرمه لی اولسان اللی مین ایستیه جک. اونا گؤره ده یاخشی سؤوده لشمک لازیمدیر... 

  کندلییه: 

  - سن دوزونو سؤیله، - دئدیم - بو ائششگی نئچه یه آلمیسان؟ 

  - دیلیمه یالان گلمز. اؤزوم ده دستمازلییام، یالان دئیه بیلمرم. من بو ائششگی دریسیندن چاریقلیق چیخارتماق اوچون بئش لیره یه آلدیم. بو گون ده اولماسا صاباح اؤله جک. او، باشقا ایشه ده یاراماز. 

  - آ کیشی، اینصافین اولسون. بئش لیره یه آلدیغین بو حئیوانی بس نه اوچون اون مین لیره یه ساتماق ایسته ییرسن؟ 

  - جانیم بیز اونو ساتماق فیکرینده دئییلیک. سیز اؤزونوز آلماق ایسته ییرسینیز… قارت دئدیم، قوتور دئدیم. صاباحا چیخماز دئدیم… آلیرام دئییر… هه، آز قالا یادیمدان چیخمیشدی. بو اوسته لیک بیر ده توپالدیر. دال آیاغینی چکیر... 

  - ضرری یوخدور. 

  - گؤرورسنمی؟ دئمه لی بئله چیخیر کی، بونون نه ایسه بیر قییمتی، بیر کرامتی وار. ائله دئییلسه، بو آمئریکالی کافیره نه دوشوب کی، بئله قوتور، قارت، توپال ائرکک بیر ائششگی آلسین. ائله دئییلمی؟ اون مین! هئچ جور آشاغی اولماز. 

  من آمئریکالییا: 

  آشاغی دوشمور - دئدیم. - اون مین وئرک؟ 

  نه ائدک؟ اون مین لیره نی وئرسک او زامان یگیرمی مین لیره ایستیه جک... 

  قییمت اوستونده دوز ایکی ساعات سؤوده لشدیک. آرادا بیر فیکریمیزدن ال چکمیش کیمی گؤرونوب یولا دوشدوک. قوجا بونو هئچ وئجینه آلمادی. قاییدیب یانینا گلدیک، 

  - قاییدیب گله جگینیزی بیلیردیم. 

  - ندن بیلیردین؟ 

  - بونو بیلمه یه نه وار کی؟ الینیزه بئله اوجوز بیر ائششک دوشوب. اونو الدن قاچیرمایاجاقدینیز کی؟ 

  شوفئره ماشینی سوروب، ایره لیده، یول اوستونده بیزی گؤزله مه سینی تاپشیردیم. بیز ائششگی آلاندان اوندا اورایا گئده جک و ائششگی اورادا قویوب یولا دوشه جکدیک. 

  نه ایسه، افندیم، خئیلی بوغاز دؤیمه دن سونرا بیز ایکی مین بئش یوز لیره یه راضیلاشدیق. پولو اووجونا سایدیق. کندلی بوندان سونرا ائششگین چولونو گؤتوردو و نوختاسینی وئردی الیمیزه: 

  - آللاه خئییر وئرسین! - دئدی. سونرا دا علاوه  ائتدی: - بیزیم بو قوتور قارت ائششک هاوایی ساتیلدی… نه ایسه… خئییر آپاراسینیز... 

  آمئریکالی نین گؤزلری برَلمیشدی. او، کندلی نین الینده کی  چولا باخیردی. ایندی نه اولاجاقدی؟ آمئریکالی منه: 

 - قوی دویوق دوشمه سین، - دئدی. - ائششگی چکه-چکه بیر آز گئدک و مسله یه اهمیت وئرمیرمیش کیمی قاییدیب، «ائششگین بئلی اوشویر، چولو وئر اوستونه آتاق» دئیک. ائله ائدریک کی، او، خالی پارچاسینی ایسته دیگیمیزی باشا دوشمه سین... 

  ائششگین نوختاسیندان توتوب یولا دوشدوک. ائششک چوخ چتینلیکله یئریییردی. آمئریکالی آرخادان ایتله ییر، من نوختاسینی چکیردیم. ائششک گئتدیکجه آیاغینی یئره داها چوخ دیره ییر بیز طاقتدن دوشوردوک. خالینی کندلی نین الیندن قوپارا بیلسک ائششگی درحال بوراخیب سوووشاجاقدیق. 

  گوج-بلا ایله یگیرمی-اوتوز آددیم گئتمیشدیک کی، کندلی آرخادان: 

  - دایانین، - دئیه بیزی سسله دی - ائششگین زادی قالمیشدیر... 

  بیز چوخ سئویندیک. گومان ائتدیک کی، بو ساعات چولو گتیره جک. او، یویوره-یویوره گلدی. 

  - ائششگین پایاسینی یاددان چیخارمیسینیز. آمئریکادا اونون باشینی نه یه باغلایاجاقسینیز؟ هئچ پایاسیز دا ائششک ساخلارلارمی؟ ناشی اولماغینیز ائله بوندان بیلیندی. 

  آمئریکالی: 

  - فورصتدیر، - دئدی. - خالی پارچاسینی ایسته. دئ، بو کؤهنه چولو دا وئرسین. 

  من کندلییه: 

  - ائششک ضعیف و خسته دیر، - دئدیم - اوشویه جک. سن اونون اوستونه بیر چول سالمیشدین. اونو دا وئر اوستونه آتاق. 

  - یوووخ! اونو وئرمرم. سیز مندن ائششگی آلمیسینیز، چولو یوخ. 

  - دوزدور، ائششگی آلمیشیق. آما او کؤهنه بیر قپییه دیمه ین جیندیر پارچاسینی دا وئر اوستونه سالاق. 

  - کؤهنه اولماغینا کؤهنه دیر، پولا دا گئتمز. آما وئرمه رم. 

  - نه اوچون؟ 

  - او، منیم آتامدان یادیگار قالمیش بیر چولدور. دده-بابادان خاطیره دیر، وئره بیلمرم، جناب! 

  بونو آمئریکالییا دئدیم: 

  - سوروش گؤرک بو چیرکلی جیندیر اونون نیینه یارایار؟ 

  بونو دا کندلییه دئدیم. 

 - نییمه یارایار نه دئمکدیر؟ باشقا بیر ائششک آلیب اونون بئلینی اؤرته جگم. قیسمت اولارسا، بیر سیزین کیمیسینی تاپیب، آللاهین ایزینییله اونا ساتاجاغام. بو خالی پارچاسی اوغورلودور. گؤردونوز پایانی سیزه هاوایی وئردیم. هئچ پول ایسته دیم؟ 

  - آ جانیم، بیر نئچه قوروش دا چول اوچون وئرک؟ ائششک یازیقدیر، اوستونه اؤرتریک. 

  - آی دئدین ها! سونرا بو ائششکلری نئجه ساتاجاغام. بئش ایلدیر قارت و قوتور ائششکلری آلیب بو چولون سایه سینده ساتیرام. هایدی، خوش گلدینیز… مالین خئیرینی گؤرون! 

  آمئریکالی نین قانی داها دا قارالیر دئیه بو سؤزلری اونا دئمه ییب قولونا گیردیم. کندلی بیر نئچه آددیم اوزاقلاشدیقدان سونرا: 

  - ائششگی بوراخیب گئده جگینیزی بیلیرم - دئدی. - اونا گؤره اوزاغا آپارمایین. یوخسا یورولارام. 

  ائششگی ائله اوراداجا بوراخیب ماشینا طرف گئتدیک.  

  آمئریکالی خالی موتخصیصی: 

  - باشقا یئرلرده، باخ، بئله سی یوخ ایدی - دئدی. - هئچ یئرده باشیما بو ایش گلمه میشدی. باشقا ایشلر اولموشدو. آما بئله سی اولمامیشدی. 

  ماشینا میندیک. پایا هله ده الینده ایدی. من: 

  - بونو نه ائده جکسن؟ - دئیه سوروشدوم. 

  - بونو بو یئرلرین خاطیره سی اولاراق خالی کوللئکسییاما قویاجاغام. قییمتلی شئی کیمی. ظارافات دئییل، بو بیزه ایکی مین بئش یوز لیره یه اوتوردو. چوخ اوجوز آلدیق... 

  - گؤرورسنمی، بوتون عالمده بی آبیر اولدوق، بی آبیر… او، باشینی قاپازلایا-قاپازلایا بو سؤزلری بیر نئچه دفعه  تکرار ائتدی... 

کؤچورن : عباس ائلچین

قایناق : آزادلیق رادیوسو