+0 بگندیم
فاحیشه كیشی
گی دو موپاسان
تئز-تئز بئله سؤزلر ائشیدیریك: " بو كیشی آدامی لاپ اؤزونه حئیران ائدیر، آنجاق نئیله‌یه‌سن كی، فاحیشهدیر، هم ده اصل فاحیشه! " مملكتیمیزین باغریندا قارا یارا اولان فاحیشه كیشیلر باره ده عادتن بئله دئییرلر.
چونكی فرانساداكی بوتون كیشیلر، ایچی بیز قاریشیق، فاحیشهدیر: اونلار، عئینیله قادینلار كیمی، دؤنوكدورلر، شیلتاقدیرلار، اعتیبارسیزدیرلار، عادتن نه ایسته‌دیكلرینی بیلمیرلر، اؤز دوشونجه و نیتلریندن تئز-تئز ساپیرلار، هردمخیال و ایراده سیزدیرلر.
البته، بوتون بو فاحیشه كیشیلرین ان بئتری پاریس‌لیلردیر: دایم بولواردا وئییلله‌نن و اینتئللئكتینی هامی‌نین گؤزونه سوخماغا چالیشان بئله‌لری نین شوخ قحبه‌لره خاص عیشوه‌لری و آشكار نؤقصانلاری كیشیلیك اؤزللیكلرییله اصلا بیر آرایا سیغمیر.
بیزیم دئپوتاتلار پالاتاسی ایسه فاحیشه كیشیلرله دولوب-داشیر. جاذیبه‌دار اوپپورتونیستلرین اورادا تشكیل ائتدیگی اكثریتی بیزیم " سوسنلر " آدلاندیرمامیز اصلا قباحت ساییلماز. اؤز نیتلرینی شیرین دیللری و یالانچی وعدلری حسابینا حیاتا كئچیرن بو جور تیپلر آدامین الینی ائله سیخیرلار كی، كؤنلونوز بیر آندا بونلارین كؤله‌سینه چئوریلیر. تزه تانیشلارینا درین و خوصوصی صمیمیتله " عزیز دوستوم " دئمگی باجاران بو شخصلر هئچ روحونوز دا حیس ائتمه‌دن رغبتینیزی قازانیر، هر جور یئنی ایدئیانی قبول ائتمه‌یه هر زامان حاضیر گؤرونورلر. اؤز مؤوقئعلرینی یارانمیش شراییطه گؤره دییشمكده فلوگئر كیمی ماهیر اولان بو تیپلر باشقالاری قدر اؤزلرینی ده آسانلیقلا آلداتماغا قادیردیرلر. بو گون دئدیكلرینی صاباح دببه‌له‌مك، وعدیندن جایماق اونلار اوچون عادی حالدیر.
قزئتلرده ده فاحیشه كیشیلر چوخلوق تشكیل ائدیرلر. حتّی دئیردیم كی، اورادا اونلار داها بولدور، چونكی رئداكسییالاردا اونلارا داها بؤیوك طلبات دویولور. البته، بعضی نشرلر بو باخیمدان ایستیثنا ساییلا بیلر، مثلا، " دئبا " و " قازئت دئ فرانس " .
او دا گئرچكدیر كی، ایسته‌نیلن یئتكین ژورنالیستده فاحیشه‌لره خاص بعضی اؤزللیكلر اولمالیدیر: آخی، اونلار اوخوجو كوتله‌سی نین ذؤوقویله آیاقلاشماغا مجبوردورلار، توپلومدا دولاشان شاییعه‌لرین بوتون مقاملارینی آیری-سئچكیلیك قویمادان ایزله‌یه بیلمكدن اؤترو اونلار خئیلی اسنك داورانمالیدیرلار، هرطرفلی اولماقلا یاناشی، دقیق جاوابلاردان یایینمالی، هر شئیه هم شوبهه، هم ده درین اعتیمادلا یاناشمالی، هم آجیماسیز، هم ده فداكار اولمالی، هم ایتوینادان، هم ده جناب پرودوم كیمی هر شئیه ماراق دویمالی، اؤزونو هر زامان كینایه‌لی و اینانان بیری كیمی آپارمالی، اصلینده ایسه هئچجه نه‌یه اینانمامالیدیر.
خانیم آبئل امیندیر كی، خاریجیلر - دئدیگینده دوران اینگیلیسلرله گونبول آلمانلار - بیزیم تام عكسیمیزدیر، اونلار ایندی‌نین اؤزونده ده بیزی نیفرت قاریشیق بیر حئیرتله سوزورلر و بو یوزایلین سونونا قدر ده بونا داوام ائده جكلر. اونلار بیزی یئل‌بئیین میلْت ساییرلار. حالبوكی یانیلیرلار: بیز – فاحیشه‌ییك. محض ائله بونا گؤره ده، بیزی سئویرلر، بو باخیمدان پیس جهتلریمیزه گؤز یومور، نؤقصانلاریمیزا رغمن، دایم بیزه جان آتیر و اؤزلرینه بو جور حاق قازاندیریرلار: " سئونلر كوسر ده، باریشار دا! "
كوبار عالمده فاحیشه كیشی ایله بئشجه دقیقه لیك صؤحبت یئترلیدیر كی، اؤز جاذیبه‌سییله موصاحیبی‌نین كؤنلونده اؤزونه تاخت قورسون. سانارسینیز كی، اونون تبسْومو یالنیز و یالنیز سیزه عونوانلانیب، سسینده كی ظریف نزاكت دولو اینتوناسییالارین دا تك عونوانی سیزسینیز. آیریلدیغینیز واخت اونونلا آزی یگیرمی ایلین تانیشی اولدوغونوزا اصلا شوبهه بسله‌مزسینیز. حتّی ایسته‌سه، اونا بلكه بورج پول دا وئررسینیز. چونكی سیزی عئینیله بیر قادین قدر اؤزونه حئیران قویار. حتّی چوخ دوروست داورانماسا بئله، سیز اونا آچیق نیفرت بسله‌یه بیلمزسینیز، چونكی هر گؤروشده نزاكتییله سیزی اووسونلایار! یوخسا او، عوذرخاهلیق ائدیر؟ سیز بونا ایمكان وئرمز، اونو قاباقلایارسینیز. بلكه او، یالان دانیشیر؟ بونا هئچ واخت اینانمازسینیز! یوخسا او، سیزی بارماغینا دولاییب و وئردیگی وعدلر اوجدان‌توتما یالان چیخیر؟ آنجاق سیز اؤزونوزو صیرف بو وعدلره گؤره اونا بورجلو ساییر و اینانیرسینیز كی، سیزه یارینماق، بیر قوللوق ائله‌مك اوچون او، یئرین آلتینی اوستونه چئویریب!
بیر شئیه حئیرانلیغینی بیلدیرركن او، اؤز دویغولارینی ائله ایچدن ایفاده ائدیر كی، سؤزلری كؤنلونوزون تئللرینی تیتره‌دیر. دونن او، ویكتور هوقویا والئه ایدی، بو گون ایسه اونو سارساق آدلاندیریر. ائمیل زولیادان اؤترو اوللر دوئله چیخماغا حاضیر گؤرونن بو حریف ایندی اونو باربئ د اورویلیی نین آیاغینا وئرمكدن چكینمیر. هم ده اؤزونون حئیران اولدوغو شئیه قارشی هئچ بیر اعتیراضلا حسابلاشمیر: حتّی آغیزاوجو اعتیراض بیلدیرسه‌نیز، اوندان یاغلی بیر شاپالاق یئیه‌جگینیز شوبهه‌سیزدیر. اگر او، نه‌یه ایسه نیفرت بسله‌ییرسه، گؤزونه هئچ نه گؤرونمور و بونا دایر هر هانسی اعتیراض-فیلان دینله‌ین دئییل.
بئله گؤتورنده، اونون هئچ ندن باشی چیخمیر.
ایكی گنج قیزین صؤحبتینه قولاق وئرك:
- دئمه‌لی، جولییا ایله آرانیز دَییب؟
- هله سوروشورسان دا؟ اونا یاغلی بیر شیلله چكدیم، آخی.
- سنه نئیله‌میشدی كی؟
- پولینایا دئییبمیش كی، گویا من ایلین اون اوچ آیی آج قالیرام. پولینا ایسه بونو قونترانا سؤیله‌ییب. تصوورونه گتیریرسن ده؟
- سیز اونونلا كلوزئل كوچه‌سینده بیرگه یاشامیردینیز؟
- اونونلا بیرگه دوز دؤرد ایل برئد كوچه‌سینده یاشامیشیق. سونرا ایسه بیر جوت جوراب اوستونده آرامیز دَیدی. یالاندان دئییردی كی، گویا من مارتئن خالاسی‌نین اونا وئردیگی ایپك جورابلاری گئیمیشم. من ده اونون درسینی وئردیم. سونرا همین ائوی ترك ائله‌دی. آلتی آی اول اونونلا راستلاشاندا یالواردی كی، یانیما كؤچمگینه راضیلیق وئریم، چونكی توتدوغو ائو احتییاج دویدوغوندان ایكی دفعه بؤیوكموش.
صؤحبتین آردینی دینله‌مه‌دن كئچیر، یولونوزا داوام ائدیرسینیز.
سونراكی بازار گونو سئن-ژئرمئنه گئدركن سیزین واقونا بیر جوت جاوان خانیم داخیل اولور. بونلاردان بیری نین جولییانین دوشمنی اولدوغونو ائله ایلك باخیشدان آنلاییرسینیز. بس او بیری كیمدیر گؤره سن؟ او دا جولییانین اؤزودور.
و اونلارین آراسیندا گئدن صؤحبت زامانی نوازیش دولو پیچیلتیلار، گله‌جك پلانلار باره ده سؤزلر دییر قولاغینیزا: " جولییا، دئ گؤروم… " ، " قولاق آس، جولییا " و سایر كیمی.
فاحیشه كیشیلره ده بو جور دوستلوقلار خاصدیر. اوچ آی سراسر او، اؤز یاخین و عزیز-گیرامی دوستو ژاكدان بیر آن دا آیریلمیر. اونون اوچون بو دونیادا یالنیز ژاك وار. ان ایتی عاغیل دا، دقیق منطیق ده تكجه اوندادیر. بوتون پاریسده تك پارلاق شخصیت وارسا، او دا ژاكدیر. هر یئره بیرگه گئدیر، بیرگه سوفره یه اوتورورلار، كوچه‌لرده بیرلیكده دولاشیرلار. آخشاملار بیر-بیرلریندن آیریلا، قوپا بیلمه‌دیكلری اوچون آزی اون كره یا بو اونو قاپیسینا قدر اؤتورور، یا دا او، بونو.
آرادان اوچ آی اؤتونجه ژاكلا اونون باره‌سینده دانیشماغا جهد گؤسته‌رك:
- نئجه ده ساختاكاردیر او! نئجه اجلاف، نئجه یارامازدیر، آه! – دئیه‌جك. - آرخایین اولون، من داها اونا یاخشی بلدم. اوندا نه بیر داملا دوروستلوك وارمیش، نه ده تربیی…
و سایر و ایلاخیر.
بوندان اوچ آی سونرا گؤرورسن كی، بو آداملار تكرار بیرلیكده دیرلر. بیر سحر اؤیره‌نیرسن كی، دوئله چیخان بو دوستلار آتیشماق عوضینه، گؤز یاشلاری آخیداراق، قوجاقلاشیب-اؤپوشوبلر.
بئله باخاندا، بونلار دونیادا ان صمیمی دوستلاردیر، بیر-بیرینی گاه ایفتیرایا لاییق گؤرورلر، گاه سونسوز نوازیشه. گاه بیر-بیری نین الینی ائله سیخیرلار كی، سوموكلری شاققیلداییر، گاه دا یانلیش آنلاشیلان بیر سؤز اوجباتیندان بیری دیگری‌نین قارنینی ییرتماغا حاضیر گؤرونور.
فاحیشه كیشیلر آراسینداكی باغلیلیق، باخ، بو جور دنگه سیزدیر، اونلارین احوالی و دویغولاری ان گؤزله‌نیلمز چیخیش-ائنیشلره محكومدور. بیر گؤز قیرپیمیندا روح یوكسكلیگی تنبللیكله، سئوگی نیفرتله، سیتاییش بیگانه‌لیكله عوض اولونور، آخی، اونلارین خاصیتی ده، گؤزه‌گلیملیلیگی ده، چیلغینلیغی دا فاحیشه‌لرینكینی خاطیرلادیر. اونلارین باشقالارینا دویدوغو باغلیلیق دا فاحیشه‌لرینكیندن ذره‌جه فرقلنمیر.
پوزغون قادینلار اؤز ایتلرییله نئجه داورانیرلارسا، بو كیشیلر ده دوستلارینا ائله دگر وئریرلر.
لَچَرلر سئویملی ایتلرینی اؤپوب-اوخشاییر، اونلاری شكرله یئمله‌ییر، یاتاقلارینا آلیب، اؤز یاستیقلاری‌نین اوستونده یاتیردیرلار. عصبلشنده ایسه اونلاری یا قویروقلاریندان توتماقلا، ساپاند كیمی هاوادا فیرلادیر، یا پنجره‌دن چؤله ویزیلدادیرلار. بیر سبب اولدو-اولمادی، اونو یا سویوق سویلا دولو وئدره یه سوخورلار، یا دا چوخ ایسته‌دیكلریندن آز قالا آغوشلاریندا بوغورلار.
حقیقی فاحیشه ایله فاحیشه كیشی‌نین قارشیلیقلی سئوگیسی ایسه بو سادالانانلاردان خئیلی فرقله‌نیر. كیشی قادینی دؤینده قادین دا اونو جیرماقلاییر. بیر-بیرینی گؤرن گؤزلری اولماسا دا، اونلار آیریلا دا بیلمیرلر، چونكی آرالاریندا آنلاشیلماز و سیرلی كؤنول باغلاری وار. قادین كیشی‌یه باشقالارییلا خیانت ائدیر، كیشی بونو اؤیرننده اولجه هؤنكورور، سونرا ایسه اونو باغیشلاییر. اویناشلاریندان بیری‌نین قادینا هدیه ائتدیگی چارپاییدا اونونلا یاتان كیشی اؤزونو اصلا خوش‌غئیرت سایمیر. كیشی قادینی هم سئویر، هم ده اونا نیفرت بسله‌ییر: بو زامان اونودور كی، اونا عئینی درجه ده نیفرت بسله‌مه‌یه ائله قادینین دا حاقی چاتیر. هر بیری دیگرینی آمانسیز ایشگنجه‌لره دوچار ائتسه‌ده، آرالارینداكی باغلاری قیرماغا هئچ بیری نین جورأتی یئتمیر، سحردن تا آخشاما قدر بیر-بیرینی تحقیر و تنبئه ائدن، اینانیلماز سوچلامالارین هدفینه چئویرن بئله آداملار اؤزلریندن تامام چیخاندا قاپیلدیقلاری غضب و چیلغینلیقدان بدنلرینه اسمه‌جه دوشور و اونلار بیر-بیری نین آغوشونا آتیلیرلار، كیشی‌نین ائهتیراسا تشنه دوداقلاری و قلبی تكرار فاحیشه نین قولونا، كؤله‌سینه چئوریلیر.
فاحیشه كیشی باشقالارینا نیسبتن داها جسور و داها آغ‌جیگردیر، اوندا شرف حیسی حدسیز اینكیشاف ائدیب، لاكین او، بیزلره خاص، عادی شرف حیسیندن محرومدور، اودور كی، موعین دوروملاردا اوندان گؤزله‌نیلمز ضعیفلیك و اجلافلیق گؤزله‌مك مومكوندور، بونا گؤره او، هر هانسی پئشمانلیق دویماز، چونكی یئنی اَیلنجه‌لر آختاریشیندا اولان روحونون هر شیلتاقلیغینا بویون اَیر.
قارماغینا كئچن شخصی آلداتماق اونون گؤزونده عادی، حتّی واجیب بیر شئیدیر. اونون قناعتینه گؤره، كارت بورجلارینی چیخماق شرطییله، آلدیغی بورجو، هم ده نه واختسا قایتاریلاجاغی شوبهه دوغوران بورجو گئری وئرمكدن ایمتیناع - اصل شرف ایشیدیر، چونكی بو جور شئیلرده ساختاكارلیغا هئچ جمعیت ده سن دئین پیس باخمیر. مثلا، پولا احتییاجی اولاندا او، هر یولا، فنده ال آتیب، بورج آلماغا چالیشاجاق و جوربجور یالان وعدلرله بورج صاحیبی نین باشینی توولایاجاق. اگر كیم ایسه اونو ان خیردا فیریلداقدا سوچلایارسا، اوندا حقیقتن اؤزوندن چیخان بو آدام قارشیسینداكی تیپی قیلینجی‌نین تك ضربه‌سییله اؤلدورمه یه چالیشاجاق.
چئویری: آزاد یاشار
كؤچورن: عباس ائلچین
