+0 بگندیم
سهراب طاهر
داها
دردی درد اولموشدو ائلینده منه،
آغلادیم بیر ناشی گولنده منه،
هئچ کس آغلاماسین اؤلنده منه،
من هئچ واخت،هچ زامان اؤلمه‌رم داها.
آزاد قارداشیم وار اونونلا خوشام،
من گرک ساحیلی ساحیله قوشام،
ایکی بؤلونمکدن ائله قورخموشام،
چؤپو ده ایکی‌یه بؤلمه‌رم داها.
دنیزلر دریالار منه دایازدیر،
ان درین بیر چای وار او دا آرازدیر،
منه گؤروش وئرین آزادلیق آزدیر،
گؤروشسم آیریلماق بیلمه‌رم داها.
عؤمرومدن غوربت‌لر، یادلار قووولسون
کئچمیشیم یییه‌سیز قالدی، قوی اولسون
آنجاق گله جگیم منیمکی اولسون
من اونو عؤمرومدن سیلمه‌رم داها
منیم سعادتیم هارداسا بیتدی،
او هاساد گلمیشدی، هاساد دا گئتدی،
منه نه ائتدیسه سعادت ائتدی،
بدباخت سعادته گولمه‌رم داها .
