+0 بگندیم
آنا دیلیمه
محمد گنجه
زیندانی اولوبسان ایللر بویونجا
سنله دانیشماغا قویماییب خاین
ایندی قوی دانیشیم سنله دویونجا
آنام یادیگاری سنسن ناز‌نین
***
سنینله سؤزوم وار بیر قَدَر درین
ندن سن اولوبسان بو قدر شیرین؟
سنینله دانیشیر گؤیلرده شاهین
سنینله آچیلیر یاسمن، نسرین
***
ائی منیم قلبیمین آچاری دیلیم
سؤیله‌سن، دونیایا ندیر املیم؟
ایشده، بیلدیرمکدیر منیم عملیم
عالمه نقلدیر ، شیرینسن، شیرین
***
تاریخین بؤیوکدور، چوخ دا قوجامان
بؤیوک سرکرده‌لر دیلیسن، اینان
سنینله دانیشیر بو آذربایجان
سنه اؤیله دئییبدیر گؤیلر، آفرین
***
سن اولدون ستارخان ظفر فرمانی
آذرلر دیلیسن، ائللر سولطانی
تار-مار اولاجاق ظولمون بیناسی
سنین فرمانینلا، ائی شهدی-انگبین
***
آزادلیق فرمانی سنینله اینشا
اولاجاق وطنیم ایراندا، آنلا
سنین حؤکمون ایله اولاجاق بینا
حوریّت قانونو، ائی دیلیم، یقین
***
یاراجاق تاریخلرین هر زامان
سنله فخر ائده‌جک آذربادِگان
سنینله گؤره‌جک تاریخ اوخویان
اولوب دموکراسی ایراندا تضمین
***
ایفتیخار ائله‌ییب سنله جاوانشیر
سؤیله‌ییب اجدادیم یادیگاریدیر.
بس من ده سؤیله‌ییم سیزلره بیر-بیر
یاشاسین دیلیمیز، دئسینلر آمین!
یاشاسین دیلیمیز، دئسینلر آمین!
"آذربایجان" قزئتی. آذربایجان دموکرات فیرقه‌سی‌نین اورقانی، تبریز. نؤمره 84، 23 دِکابر 1946
تقدیم ائدن صمد بایرام‌زاده
