بوتون بو اولانلار ایسه ایمپئراتورون آناسینی و اونون یاخینلارینی داها دا هیدّتلندیریر. بیر گون ایمپئراتورون آناسی، ایمپئراتورون آدیندان دیلشاد خاتونا بیر خنجر یوللاییر و اونا "یا منه اره گلمگه راضی اول، یا دا بو خنجرله اؤزونو اؤلدور" مئساژینی گؤندریر. دیلشاد خاتون ایمپئراتورون آدیندان گلن ائلچیلره جاواب وئریر: "اؤلومدن اصلا قورخمورام. آنجاق هله وظیفه‌لریم وار. اینتیقامیمی آلمادان اؤلمه‌یه‌جگم". 

بیر گون ده ایمپئراتورون آناسی، اوغلونون 3 گون مودّتینه سارایدا اولمایاجاغینی فورصت بیله‌رک، دیلشاد خاتونا دوستلوق تکلیف ائدیر و اونو سارایین رسملر اولان بؤلومونه دعوت ائدیر. رسملره تاماشا ائتدیکدن سونرا ایمپئراتیریچه "اوغلومو و دؤولتیمیزی خیلاص ائتمک اوچون سنی اؤلدوره‌جگم" – دئییب، بیر آز آرالیدا گؤزله‌ین خیدمتچیلرینی چاغیریر. و ائله اورداجا اونو ایپله بوغدوروب اؤلدورور. دیلشاد خاتونون سؤن سؤزو "من اؤلومدن قورخمورام. آنجاق هله ده اینتیقامیمی آلا بیلمه‌دیگیم اوچون چوخ اوزولورم" – اولموشدو. ایمپئراتور حادیثه یئرینه گلنده آرتیق گئج ایدی. قایناقلار بو حادیثه دن سونرا ایمپئراتور چی ائن لونقون اوزون مودّت معبده قاپاندیغینی و گوشه‌نیشین حیات طرزی سوردویونو یازیر.

دیلشاد خاتون 1757-جی ایلدن 1759-جو ایله کیمی - 2 ایل دوغو تورکوستاندا قهرمانجاسینا چین ایشغالچیلارینا قارشی ساواشدی. بو ساواشچی قادینین سسی-سوراغی اوزاق ائللره یاییلدی. داها سونرا 8 ایل پئکین ساراییندا قالدی. ایمپئراتورون دفعه‌لرله عوذر ایسته‌مگینه، اونون سئوگیسینی قازانماق اوچون هر شئیه راضی اولماسینا باخمایاراق، گئجه گوندوز یالنیز یوردونو و سویونون اینتیقامینی دوشوندو. ایمپئراتورون اونا یاخینلاشماق جهدی اولاندا ایسه جیلغینجاسینا: "یاخینلاشما، یوخسا سنی ده اؤلدوره‌رم، اؤزومو ده"- دئییب هایقیرمیشدی. پئکینده اولدوغو 8 ایل عرضینده بیرجه دفعه‌ده اولسون، چینلی گئییمی گئیمه‌دی. دوغولدوغو تورپاقلارا مخصوص اولان گئییملری گئیدی و یوردونون اؤزگورلوگونو دوشوندو. 

سوندا، یورد و ناموس شهیدی اولاراق ابدییته قوووشدو. بو اؤزللیکلرینه گؤره، یوز ایللردی کی، تکجه تورکوستاندا دئییل، چینده بئله ناموس و قوتساللیق سیموولو اولاراق آنیلیر دیلشاد خاتون. 

هله یاشادیغی دؤنمده آدی افسانه‌لشن بو خاتونون مزاری‌نین هارادا اولماسی حاقّیندا کسین بیلگی یوخدور. اونون هارادا دفن اولونماسی حاقّیندا ایکی فیکیر وار. بیرینجی وئرسییا چین وئرسییاسیدیر. چینلیلره گؤره دیلشاد خاتونون قبری بؤیوک مانچوُ ایمپئراتورلاری‌نین دفن ائدیلدیگی قبیریستانلیقدا، ایمپئراتور چی ائن لونقون مزاری‌نین یانیندادیر. تورکوستان جوغرافییاسیندا یایغین اولان و اینانیلان وئرسییایا گؤره ایسه دیلشاد خاتون اؤلدورولندن سونرا جنازه‌‌سی کاشغار اراضیسینه گتیریلیب و بورادا "خوجا هیدایت‌اوللاه" توربه‌سینده دفن ائدیلیب. دیلشاد خاتونون مزاری اولدوغو دوشونولن هر ایکی یئر هم چینلیلر، هم ده تورکوستانلیلار طرفیندن موقدّس زیارتگاه اولاراق قبول ائدیلیر و زیارت اولونور. دیلشاد خاتونون مزارینی موسلمانلارلا برابر بوددیستلر ده موقدّس مقام کیمی زیارت ائدیرلر.