+0 بگندیم
اعدام
جورج اوروئل
هر کس گولوردو. حتّی حبسخانا مودیری ده ایشاریردی. "یاخشیسی بودور، هامینیز چؤله چیخیب ایچکی ایچین" خوش بیر شکیلده دئدی، "ماشیندا بیر شوشه ویسکیم وار. اونو بوشالدا بیلریک." حبسخانانین بؤیوک قوشا قاپیسیندان کئچیب چؤله چیخدیق. بیرمالی حاکیم بیردن، "آیاقلاریندان چکمک" دئدی و اوجا سسلی قهقهه‌لره بوغولدو. هامیمیز تزه‌دن گولمه‌یه باشلادیق.
بیرمادا چوخ گوجلو یاغیش یاغان بیر صاباح ایدی. ساریمتیل آلومینیوم فولقا کیمی سولغون بیر ایشیق هوندور دیوارلارین اوزریندن حبسخانانین حَیَطینه دوشوردو. کیچیک حئیوان قفسلرینه بنزر سیخ بارماقلیقلارلا احاطه اولونموش اوتاقلارین قارشیسیندا گؤزله‌ییردیک. بو اوتاقلار تخمینی دوققوز کوادرات مئتر گئنیشلیگینده ایدی و ایچریده تاختا بیر یاتاق ایله بیر قاب ایچمه‌لی سودان باشقا هئچ نه یوخ ایدی. بعضی اوتاقلاردا سسسیز قابابوغدایی آداملار چییینلرینده آدیاللارلا بارماقلاردان یاپیشمیش حالدا اوتوروردولار. بونلار بیر-ایکی هفته عرضینده آسیلاجاق گوناهکار محکوملار ایدی.
بیر محکوم اوتاغیندان چیخاریلمیشدی. هیندلی ایدی. باشی کئچل، گؤزلری بالاجا اولان بو آدام چوخ ضعیف گؤرونوردو. صیفتینه گؤره قات-قات بؤیوک، فیلملرده‌کی کومئدییا پئرسوناژلارینا بنزه‌ین قالین، سیخ بیغی وار ایدی. باشینین اوستونده گؤزله‌ین آلتی نفر هیند موحافیظه‌چی اونو اعداما حاضیرلاییردیلار. موحافیظه‌چیلردن ایکیسی الینده سونگولو توفنگله دورموشدو، دیگرلری ایسه محکومون الینی باغلاییردی. سانکی، بوتون بو مودت عرضینده محکومون اورادا اولدوغوندان امین دئییللرمیش کیمی، دیقتلی شکیلده اونون اوست-باشینی یوخلاییردیلار. محکومو دؤوره‌یه آلمیشدیلار - هله ده جانلی اولان و هر آن سویا آتیلا بیله‌جک بیر بالیغی توتارجاسینا. آما محکوم سانکی نه‌لر باش وئردیگینی بیلمیرمیش کیمی اللرینی اعتیراض ائتمه‌دن، ساکیت طرزده ایپلره تسلیم ائتدی.
ساعات سککیزی کئچیردی. نملی هاوادا اوزاق باراکلاردان ضعیف تروبا سسی گلیردی. بیزدن خئیلی آرالیدا دایانان حبسخانا مودیری الینده‌کی چوماقلا یئرده‌کیداشلاری ائشیر و باشینی سس گلن طرفه اوزادیردی. دیش فیرچاسینا بنزه‌ین بوزومتول بیغی و بوغوق سسی ایله اصل حربچییه اوخشاییردی. "آللاه خاطیرینه، جلد اول فرانکیس" عصبی شکیلده دیللندی: "آدام ایندییه قدر چوخدان اؤلموش اولمالی ایدی. هله ده حاضیر دئییلسینیز؟"
آغ کوبود پارچادان گؤدکچه گئیینمیش، قیزیلی عئینکلی، کؤک بیر دراوید اولان باش موحافیظه‌چی فرانکیس الینی قالدیردی. آغزینی کؤپورده‌رک: "بلی رئیس. بلی رئیس" دئدی. "هر شئی ایسته‌دیگینیز کیمی حاضیرلانیب. جللاد دا حاضیردی. داوام ائده بیلریک."
"یاخشی، تئز اولون. ایش بیتمه‌دن محکوملار یئمکلرینی آلا بیلمه‌یه‌جکلر."
دار آغاجینا دوغرو یؤنلدیک. توفنگلرینی اَیمیش ایکی موحافیظه‌چی یان طرفینده، دیگر ایکیسی ایسه اؤنونده ایدی: محکومون قولوندان و چیینیندن توتاراق گئدیردیلر. دیگرلریمیز، موتتهیملر و س. آرخادان اونلاری تعقیب ائدیردیک. تخمینن اون مئتر گئتدیکدن سونرا، قروپ هر هانسی بیر امر اولمادان قیسا مودتلیگینه دایاندی. توک اورپه‌دن بیر شئی اولموشدو، حَیَطدن هارادان گلدیگی بللی اولمایان بیر ایت اورتایا چیخمیشدی. دایانمادان هورور، توللاناراق اوستوموزه دوغرو گلیردی. بو قدر چوخ اینسانی بیر آرادا گؤرمه‌نین سئوینجیندن چاشیب قالمیش شکیلده اطرافیمیزدا داواملی سیچراییب دوروردو. یونا بنزر توکلری اولان یاری "Airedale" بیر ایت ایدی. بیر آندا توللانیب اطرافیمیزدا فیرلاندی و داها سونرا محکومون اوستونه آتیلدی – هئچ کس اونون قاباغینی آلا بیلمه‌میشدی – هوپپانیب مکومون اوزونو یالاماغا چالیشدی. هر کس ایتی توتا بیلمه‌یه‌جک شکیلده چاشیب قالمیشدی.
مودیر عصبی حالدا: " بو لعنته گلمیش حئیوانی کیم بورا سالدی" دئدی و علاوه ائتدی: "بیرینیز بونو توتون".
قروپدان آیریلان بیر موحافیظه‌چی باجاریقسیزجاسینا ایته یؤنلدی، آما بونلارین هامیسینی اویونون بیر حیصه‌سی کیمی گؤرن ایت اوینایاراق آدامین چاتا بیله‌جگی مسافه‌نین کنارینا چیخدی. گنج بیر آوراسییالی موحافیظه‌چی، یئردن بیر اوووچ خیردا داش گؤتوردو و ایته آتاراق اونو قووماغا چالیشدی، آنجاق ایت داشلاردان قاچیب قورتولدوقدان سونرا یئنه آرخامیزجا گلدی. اونون قیسا و کسکین سسی حبسخانا دیوارلاریندا عکس-صدا وئریردی. ایکی موحافیظه‌چی‌نین سیخیب توتدوغو محکوم اعدام مراسیمینی اعتیناسیزجا نظردن کئچیریردی. موحافیظه‌چیلردن بیری ایتی توتانا قدر بیر نئچه دقیقه کئچدی. آردیندان دسمالیمی هله ده سیزلایان ایتین بوینونا باغلادیم و بیز یئنیدن حرکته باشلادیق.
دار آغاجینا تقریبی قیرخ مئتر قالمیشدی. محکومون چیلپاق قهوه‌یی رنگلی کورگینین منیم اؤنومده حرکت ائتمگینی ایزله‌ییردیم. عضله‌لری هر آددیمدا موکمّل شکیلده اویناییر، آیاقلاری ایسلانمیش داشلی تورپاقدا ایز بوراخیردی. و هر ایکی چیینینی توتان آداملارا رغمن، حتّی قارشیسینا چیخان پالچیقلی یئره باسماماق اوچون یونگولجه کنارا چکیلدی.
ماراقلیدیر، ساغلام و شوعورلو بیر اینسانی آرادان گؤتورمگین نه آنلاما گلدیگینی او آنا قدر قاورایا بیلمه‌میشدیم. محکوموم پالچیقلی یئره باسماماق اوچون کنارا چکیلدیگینی گؤردویومده، آخیب گئدن حیاتی بیردن-بیره سونلاندیرمانین سیررینی کلیمه‌لرله آنلادا بیلمه‌یه‌جگیمی باشا دوشدوم. بو آدام اؤلموردو اصلینده، عئینیله بیزیم جانلی اولدوغوموز کیمی او دا جانلی ایدی. بدنینده‌کی بوتون اورقانلار ایشله‌ییر، باغیرساقلاری یئمک هضم ائدیر، دریسی اؤز-اؤزونو یئنیله‌ییر، دیرناقلاری اوزانیر، توخومالاری اینکیشاف ائدیردی. دیرناقلاری ساده‌جه بیر ثانیه‌نین اوندا بیری قدر یاشایاجاق واختی قالدیغیندا بئله اوزاناجاقدی. گؤزلری ساری داشلاری و بوزومتول دیوارلاری گؤروردو، بئینی هله ده خاطیرلاییردی، اولا بیلر کی، خیردا داشلار حاقیندا نسه دوشونوردو. او و بیز بیر یئرده حرکت ائدن بیر قروپ آدام ایدیک؛ عئینی دونیانی گؤرور، ائشیدیر، آنلاییردیق و ایکی دقیقه ایچینده آنی بیر قوپما ایله بیریمیز کؤچموش اولاجاغدیق: بیر عاغیل، بیر دونیا داها آز.
دار آغاجی حدسیز اوزانمیش تیکانلی اوتلار طرفیندن احاطه اولونموش حبسخانانین اساس مئیدانچاسیندان آیری اولان بالاجا حَیَطین ایچینده ایدی. حبسخانانین آغ اونیفورماسینی گئیینن، ساچلارینا دن دوشموش، عئینی زاماندا محکوم اولان جللاد دار آغاجی‌نین اوزاقدا گؤزله‌ییردی. ایچری گیردیگیمیزده بیزه کؤله کیمی دیز چؤکه‌رک سالام وئردی. محکومو اولدوقجا سیخ فورمادا توتان ایکی موحافیظه‌چی فرانکیسین بیر سؤزویله، بیر طرفدن یول گؤستریر، دیگر طرفدن ده باجاریقسیز شکیلده محکومون داراغاجی‌نین نردیوانینا چیخماسینا کؤمک ائتدیلر. آردیندان جللاد نردیوانا چیخدی و ایپی محکومون بوینونا کئچیردی.
بیز بئش مئتر کناردا دورموشدوق. موحافیظه‌چیلر داراغاجی‌نین اطرافیندا چئوره شکلینده دوزولموشدولر. و آردیندان، ایلگک حاضیر وضعیته گتیریلدی، سونرا محکوم تانریسینا هایقیرماغا باشلادی. داواملی تکرارلانان کسکین بیر هایقیرتی ایدی: "رام! رام! رام! رام!" بیر دوعا، یا دا کؤمک چاغیریشی کیمی ایصرارلی و قورخو دولو دئییل، هارداسا بیر زنگ چالماسی کیمی داواملی و ریتمیکدی. ایت سسه زینگیلده‌یرک جاواب وئردی. هله ده داراغاجی‌نین یانیندا دوران جللاد بالاجا، پامبیق پارچادان اولان بیر چووال چیخاردیب اوزونو اؤرته‌جک شکیلده محکومون باشینا کئچیردی. آنجاق پارچانین بوغدوغو سس دفعه‌لرله تکرارلاندی: "رام! رام! "رام! رام! "رام! رام!"
جللاد ایپین اوجونا باغلانمیش اولان چوبوغو الینده حاضیر ساخلامیشدی. دقیقه‌لر اؤتوردو. بوغوق هایقیرتی سسی بیر آن بئله اولسون دایانمادان داوام ائدیردی: "رام! رام! رام!" مودیر باشینی اؤنه اَیمیشدی و الینده‌کی اوزون چوبوقلا یاواشجا یئری قازیردی، بلکه ده هایقیرتیلاری ساییر، محکوما موعین بیر سایا - اللی، یا دا بلکه یوزه - قدر شانس وئریردی. هر کسین رنگی دییشمیشدی. هیندلیلر کئیفیتسیز قهوه کیمی آغارمیشدیلار. داواملی اولاراق باشینا چووال کئچیریلمیش محکومون هایقیرتیلارینی ائشیدیردیک: هر هایقیرتی حیاتین بیر ثانیه‌سی ایدی. عئینی دوشونجه هامیمیزین بئینیندن کئچیردی: آه، اونو تئز اؤلدور، عؤهده‌سیندن گل، آرتیق بو اییرنج سسی کس!
بیردن-بیره مودیر قرارینی وئردی. باشینی هاوایا قالدیریب شیددتلی بیر شکیلده "Chalo!" دئیه باغیردی.
اؤنجه توکورپه‌دیجی بیر سس، آردیندان اؤلوم سسسیزلیگی. محکوم گؤزدن غئیب اولموشدو سانکی، ایپ اؤز اطرافیندا فیرلانیردی. ایتی سئیر ائله‌دیم، جلد داراغاجی‌نین آرخاسینا قاچدی، چاتاندا قیسا بیر مودت دایاندی، هوردو و حَیَطین بیر طرفینه چکیلیب، اوتلارین آراسیندا دیکله‌رک اورکک-اورکک بیزه باخماغا باشلادی. محکومون بدنینه باخاراق داراغاجی‌نین اطرافیندا دولاندیق. آیاق بارماقلاری آشاغییا دوغرو گریلمیشدی. داش کیمی اؤلو ایدی.
حبسخانا مودیری چوبوغونو اوزادیب چیلپاق صیفتینی دورتمله‌دی. محبوسون صیفتی یونگولجه آشاغییا دوغرو اَییلدی. مودیر: "بونون ایشی حاضیردی" دئدی. داراغاجی‌نین آلتیندان گئری چکیلدی و دریندن نفس آلدی. صیفتی‌نین بوز گؤرونتوسو آنی بیر فورمادا یوخا چیخدی. قول ساعاتینا باخدی: "8:08. بو سحرلیک بو قدر. تانرییا شوکور."
موحافیظه‌چیلر سونگولرینی چیخاردیب یاواش-یاواش اوزاقلاشدیلار. ایت بونلاری آرخادان آراملا سوزدو. داراغاجی اولان حَیَطدن چیخدیق، ایچریسینده اعدام اولوناجاق محکوملار اولان اوتاقلارین یئرلشدیگی بؤیوک مئیدانچایا داخیل اولدوق. بامبوک دَینکلرله سیرالانمیش موحافیظه‌چیلرین نظارتینده محکوملارا سحر یئمگی وئریلیردی. اللرینده قاب اولان ایکی موحافیظه‌چی دویو پایلاییردیلار، محکوملار ایسه اؤز نؤوبه‌سینده الینده بالاجا تاختا قابلارلا اوزون نؤوبه‌ده گؤزله‌ییردیلر. بو صحنه اعدامدان سونرا اینسانا اولدوقجا یاخین و حرارتلی گلیردی. ایش حلّ ائدیلدیگی اوچون بؤیوک بیر راحاتلانما حیس ائدیردیک. اینسانین ایچینده ماهنی اوخوماغا، بیردن-بیره قاچماغا باشلاما ایستگی باش قالدیریردی.
یانیمدا گئدن آوراسییالی گنج باشی ایله گلدیگیمیز یولو گؤستریب چوخ بیلمیش بیر گولومسمه ایله: "بیلیرسینیز جناب، دوستوم (اؤلموش آدامی نظرده توتوردو) اعتیراضی‌نین ردّ ائدیلدیگینی ائشیدنده آلتینا ایشمیشدی. قورخودان. " مدنی شکیلده: "سیقارئتیمدن بیر دنه‌سینی یاندیرین، جناب. یئنی گوموش سیقارئت قوتومو بیندینیزمی، جناب؟ سیّار ساتیجیدان ایکی روپییه آلدیم. شوخ آوروپا طرزی."
خئیلی اینسان گولوشدو؛ هئچکیم نه‌یه گولدوگونه تام اولاراق امین دئییلدی.
فرانکیس مودیرین یانیندا گزیر، بوش‌بوغازلیق ائدیر، آغزینی کؤپوردوردو: "هر شئی سون درجه دوزگون شکیلده حیاتا کئچدی، رئیس. آما هر زامان بئله اولمور. حکیمین داراغاجی‌نین آلتینا کئچیب، اؤلدوگوندن امین اولماق اوچون محکومون آیاقلاریندان چکمک مجبوریتینده قالدیغی وضعیتلری گؤرموشم."
"قیوریلیر، ائله‌دی؟ باخ، بو چوخ پیسدی"- مودیر دئدی.
"آه رئیس، گوجلو اولماقلاری چوخ پیسدی! آپارماغا گئتدیگیمیزده بیر آدامین قفسین بارماقلیقلاریندان مؤحکم توتدوغونو خاطیرلاییرام. آدامی یئریندن ترپتمک اوچون هر ایکی آیاغیندان توتان آلتی موحافیظه‌چییه احتییاج اولدوغونا اینانمایاجاقسینیز. اونو یولا گتیرمه‌یه چالیشدیق، "عزیز دوستوم" دئدیک، "بیزه وئردیگین اذیتلری و آجیلاری دوشون". آما خئیر، دینله‌مه‌دی. چوخ زحمتلی ایدی!".
اولدوقجا اوجا سسله گولدوگوموم فرقینه واردیم. هر کس گولوردو. حتّی حبسخانا مودیری ده ایشاریردی. "یاخشیسی بودور، هامینیز چؤله چیخیب ایچکی ایچین" خوش بیر شکیلده دئدی، "ماشیندا بیر شوشه ویسکیم وار. اونو بوشالدا بیلریک."
حبسخانانین بؤیوک قوشا قاپیسیندان کئچیب چؤله چیخدیق. بیرمالی حاکیم بیردن، "آیاقلاریندان چکمک" دئدی و اوجا سسلی قهقهه‌لره بوغولدو. هامیمیز تزه‌دن گولمه‌یه باشلادیق. او آندا فرانکیسین سؤزو اولدوقجا کومیک آلیندی. یئرلیلر و آوروپالیلار دوستجاسینا، بیرلیکده ایچکی ایچدیک. اؤلموش آدام ایسه یوز مئتر اوزاغیمیزدا ایدی.
چئویری: فرید عابدی‌یئو
کؤچورن: عباس ائلچین
