+0 بگندیم
سئوینج
آنتوان چخوف
گئجه ساعات اون ایکی ایدی.
میتیا کوُلداروْو جوشغولو، ساچلاری پیرتلاشدیریلمیش حالدا تلم-تله‌سیک والیدئینلری‌نین یاشادیغی منزیله گلدی، سونرا تئز اوتاقباوتاق گزدی. والیدئینلری یاتماغا حاضیرلاشیردیلار. باجیسی چارپاییسیندا اوزانمیشدی و اوخودوغو رومانین آخیرینجی صحیفه‌سینده ایدی. گیمنازیست قارداشلاری‌سا یوخودایدیلار.
– هاردان گلیرسن؟ –والیدئینلری تعجوبلندیلر. –نه اولوب؟
–هئچ بیلیرسیز نه اولوب؟! گؤزله‌نیلمز اولدو! یامان گؤزله‌نیلمز اولدو! بو هئچ... عاغلاباتان دئییل!
میتیا قهقهه چکه‌رک خوشبختلیکدن دوروش گتیره بیلمیرمیش کیمی کرئسلویا چؤکدو.
–بو، اینانیلماز بیر شئی! هئچ تصوور ائتمزسیز! گؤر ائ...
باجیسی چارپاییسیندان سیچرادی و ادیالی چیینینه آتیب، تئز قارداشینا یاخینلاشدی. گیمنازیستلر ده اویاندیلار.
–نوْوْلوب سنه؟ تانینماز اولوبسان!
–سئوینجدندی، آناجان! ایندی منی بوتون روسیه تانیییر! روسیه! اوّل بو دونیادا کوللئج رئگیستراتورو دمیتریی کوُلداروْو کیمی تکجه سیز تانیییردیز منی، ایندی حاقیمدا بوتون روسیه بیلیر! آناجان! آی، آللاااه!
میتیا یئریندن سیچراییب، اوتاقباوتاق یویوروب یئنیدن اوتوردو.
–اخی نوولوب، دئسنه؟ دانیش گؤرک!
– سیز غریبه سیز، قزئت اوخومورسوز، آشکارلیق ندیر بیلمیرسیز، قزئتلرده ائله ماراقلی شئیلردن یازیرلار کی! نه باش وئردیسه، درحال یازیرلار! من نئجه ده خوشبختم! آی، آللاه! قزئتلرده آنجاق مشهورلاردان یازیرلار، بیردن-بیره منیم حاقیمدا دا!
–حقیقی‌ی‌ی؟ هاردا؟
آتاسی‌نین رنگی قاچدی. آناسی دیوارداکی صورته باخیب خاچ چکدی. گیمنازیست قارداشلار اوتاغا یاتاق گئییملرینده‌جه سیچراییب، بؤیوک قارداشلارینا یاخینلاشدیلار.
–بلی-بلی! حاقیمدا یازیبلار! ایندی منیم باره‌مده بوتون روسیه بیلیر! هه، آناجان، بو قزئت نؤمره‌سینی خاطیره کیمی ساخلایین! آرادابیر اوخویاجاغیق! بیر باخین!
میتیا قزئتی جیبیندن چیخاریب، آتاسینا اوزاتدی و گؤی کارانداشلا دایره‌لنمیش یئری بارماغی ایله گؤستردی.
–اوخویون!
آتا عئینگینی تاخدی.
–اوخویون دا!
آنا صورته باخیب، یئنیدن خاچ چکدی. آتا بوغازینی آریتلاییب، اوخوماغا باشلادی:
–"29دئکابر، گئجه ساعات 11-ده، کوللئج رئگیستراتورو دمیتریی کوُلداروْو...
–بیر باخین، باخین! آردی!
– ...کوللئج رئگیستراتورو دمیتریی کوُلداروْو، کوْزیخینین کیچیک بروْننیداکی پیوه‌خاناسیندان سرخوش وضعیتده چیخارکن...
–او منم، سئمیون پئتروْویچله‌یم... دقیق‌لیگیله یازیلیب ها! داوام ائدین! سونرا، سونرا! دینله‌یین!
–... سرخوش وضعیتده چیخارکن سوروشموش و اورادا دایانمیش یوُخنوْوسکی قزاسینداکی دوُریکین کندیندن اولان ایوان دروْتوْووُن آتی‌نین آلتینا ییخیلمیشدیر. هورکموش آت، کوُلداروْوون اوستوندن آدلایاراق و ایچریسینده ایکینجی گیلدییا درجه‌لی موسکوالی تاجیر ستئپان لوُکوْو اولان خیزه‌یی اونون اوزریندن دارتمیش، کوچه بویو برک چاپمیش و نهایت، آت سوپورگه‌چیلر طرفیندن ساخلانمیشدیر. کوُلداروْو هوشسوز وضعیتده اوّل پولیس بؤلمه‌سینه آپاریلمیش و حکیم طرفیندن موعایینه اولونموشدور. پئیسریندن آلدیغی ضربه...
–منیم قوشقویا چیرپیلماغیمی دئییر، آتا، باخین.
–اوخویون! آردینی اوخویون!
–...پئیسریندن آلدیغی ضربه یونگول حساب ائدیلمیشدیر. حادیثه باره‌ده پروتوکول ترتیب ائدیلمیشدیر. ضررچکمیش شخصه طیبی یاردیم گؤستریلمیشدیر..."
– بوینومون آردینی سویوق سویلا ایسلاتماغی مصلحت گؤردولر. اوخودوز؟ هه؟ ایش ده ائله اوراسیندادی دا!.. بوتون روسیه‌یه یاییلدی! وئرین بورا!
میتیا قزئتی قامارلاییب قاتلادی و جیبینه دورتدو.
–ماکاروْوگیله قاچیم، اونلارا گؤستره‌جم...سونرا هله ایوانیتسکی‌گیله گؤسترمک وار، سونرا ناتالیا ایوانوْونایا، آنیسیم واسیلیئویچه... من قاچدیم! سالامات قالین!
میتیا کوْکاردالی فوُراژکاسینی گئییب، شادیانالیق و سئوینج ایچینده کوچه‌یه قاچدی.
1883
ترجومه: ایلقار تاغی
کؤچورن:عباس ائلچین
