+0 بگندیم
کریسمس هدییه‌سی
اوْ. هئنری
جعمی بیر دولار سکسن یئددی سئنتی وار ایدی؛ نه بیر سئنت اسکیک، نه ده بیر سئنت آرتیق!.. بونون دا آلتمیش سئنتی پئننیدن عیبارت خیردا-خوروش ایدی. بو پئننیلری بیر-بیر، باققال، قصاب، مئیوه‌ساتانلا چکیشه-چکیشه بازارلیق ائده‌رک و هر دفعه ساتیجیلارین اونو خسیس و بو کیمی آدلارلا آدلاندیرماسیندان اوتانیب قیپ‌قیرمیزی کسیله‌رک ییغمیشدی. دئللا پوللاری اوچ دفعه سایدی. بیر دولار سکسن یئددی سئنت، جمعی بو قدر! هانسیکی صاباحیسی گون میلاد ایدی.
اوتاقداکی دیوانین اوستونه سریلیب هیچقیرا-هیچقیرا آغلاماقدان باشقا چاره یوخ ایدی. او دا بو جور ائتدی.
دئللانین ائوی، هفته‌سی سککیز دولارا توتولموش کیتایه بیر ائو ایدی! تصویره گله‌جک بیر گؤرونوشو اولمایان بیر میسکین ائو!
آشاغیدا گیریشده، ایچینه تک بیر ظرفین سیغمایاجاغی بیر مکتوب قوتوسو ایله اؤلومون بئله اصلا سسلندیرمه‌یه‌جگی زنگ واردی. قاپیدا دا "میستر. جئیمس دیللینقهام یوونق " یازیلمیش بیر کارت آسیلی ایدی.
میستر. جئیمس دیللینقهام ائوه گلدیگی واخت، سیزه اوّلجه "دئللا" دئیه تقدیم ائتدیگیمیز آروادی اونا "جیم" دئیه موراجیعت ائدر، بوینونا ساریلاراق، اونو باغرینا باساردی.
گؤز یاشلاری دایاندیقدان سونرا دئللا الینه بیر پوْموْزوْک گؤتوره‌رک اوزونو پودرالادی. پنجره‌ده دایاناراق منزیلین آرخاداسینداکی قارانلیق حَیَطده‌کی بوز رنگلی بیر بارماقلیق اوزرینده گئدن بوز پیشیگی آخماقجاسینا سئیر ائتدی. صاباح میلاد ایدی. جیمه بیر هدیه آلا بیله‌جک جمعی بیر دولار سکسن یئددی سئنتی وار ایدی. بو پئننیلری آیلاردان بری بیر-بیر ییغمیشدی. حالبوکی ایندی هئچ بیر ایشه یارامادیقلارینی گؤروردو. هفته‌ده ایییرمی دولارا چوخ شئی ائتمگه ایمکان یوخ ایدی. خرج اومید ائتدیگیندن چوخ چیخیردی. اونسوز دا هر زامان بئله اولوردو! .. سئوگیلی جیمینه گؤزل بیر شئی آلماق باره‌سینده خیاللار قوراراق مسعود آنلار یاشامیشدی. گؤزل، نادیر، پارلاق بیر شئی، جیمه عایید اولماق شرفی ایله آز-چوخ موتناسیب بیر هدیه.
پنجره‌دن اوزاقلاشاراق آینانین قارشیسینا کئچدی. گؤزلری ترتمیز یانیردی، آما ایییرمی ثانیه ایچینده رنگی آوازیمیشدی. ساچلارینی آچاراق چیگینلرینه تؤکدو.
جئیمس دیللینقهام یوونق عاییله‌سی‌نین فخر ائتدیگی ایکی شئی واردی؛ بیری جیمین آتاسیندان قالما و اصلینده باباسینا عایید اولان قیزیل ساعات، دیگری ایسه دئللانین ساچلاری ایدی. منزیلین نفسلیگی‌نین قارشی طرفینده صابا ملایکه‌سی اوتورسایدی، دئللا، کرالیچانین لعل-جواهیراتلارینی قییمتدن سالماق قصدی ایله، او گؤزل ساچلارینی پنجره‌دن چؤله ساللایاردی. حضرتی سولئیمان منزیلین قاپیچیسی اولسا و بوتون ثروتینی، آلمازلارینی، زیرزمیده ساخلاسایدی، جیم قوجانی قیسقاندیریب حسدله ساققالینی قاشیتدیرماق اوچون قارشیسیندان هر کئچنده جیبینده‌کی ساعاتی چیخاریب اؤزونو ساعاتا باخیرمیش کیمی گؤسترردی.
دئللانین ساچلاری قیزیلی رنگلی بیر شلاله کیمی پارلاییب دالغالاناراق دیزلرینه قدر تؤکولدو و بیر پالتار کیمی بدنینی اؤرتدو. بونا باخمایاراق دئللا، ساچلاری‌نین اوزون مودّت بئله قالماسینا یول وئرمه‌دی. عصبی حالدا درحال ییغدی. بیر آن دایاندی. تردّود ائدر کیمی اولدو. یئرده‌کی قیرمیزی توکلری دیدیلمیش خالییا بیر ایکی داملا گؤز یاشی آخدی.
دئللا، گؤزلری‌نین یاشی قورومادان قهوه‌یی پئنجگینی قاپیب عئینی رنگلی شاپقاسینی باشینا قویان کیمی، اتکلرینی ییغاراق قاپییا طرف آتیلدی. پیللکانلاری ائنیب کوچه‌یه چیخدی.
"مم. سوْفروْنییئ. هر جور ساچ لوازیماتی" ائعلانی یازیلمیش تابلو قارشیسیندا دایاندی. بیر گؤز قیرپیمیندا اؤزونو یوخاریدا گؤردو. ایری گؤوده‌لی، سود کیمی آغ بنیزلی، سویوق بیر قادین اولان مادام سوْفروْنییئدن تنگ‌نفس:
- ساچلاریمی آلارسینیزمی؟- دئیه سوروشدو. مادام:
- آلارام، آما شاپکانی چیخار، بیر باخاق، - قادین دئدی. دئللا قیزیلی رنگلی شلاله‌یه بنزه‌ین ساچلارینی تؤکدو.
مادام، ساچلاری پئشه‌کار بیر آلیجی الی ایله یوخلادیقدان سونرا:
- ایییرمی دولار،- دئدی.
دئللا:
- یاخشی، -درحال راضیلاشدی. اوندان سونراکی ایکی ساعاتی سئوینجله چهرایی بیر بولود اوستونده اوچورموش کیمی نئجه کئچیردیگینی بیلمه‌دی. جیم اوچون ایسته‌دیگی هدییه‌نی تاپماق آرزوسو ایله دوکانلارین آلتینی اوستونه چئویردی. نهایت تاپا بیلدی. اساسن ده جیم اوچون حاضیرلانمیش بیر شئی ایدی. دوکان - دوکان گزمیش، هئچ بیرینده بونا بنزر بیر شئی گؤرمه‌میشدی. پلاتین بیر ساعات زنجیری ایدی. قییمتی، چوخ دبدبه‌لی بزکلرینده دئییل، ناخیشی‌نین ساده‌لیگینده و کوبارلیغیندا ایدی.
بوتون یاخشی شئیلر بئله اولمالیدیر. زنجیر جیمین او بنزرسیز ساعاتینا لاییق درجه‌ده گؤزل ایدی. دئللا ایلک باخیشدا قرارینی وئردی. زنجیر عئینیله جیم کیمی ایدی- گؤرکمسیز، لاکین قییمتلی. ارینی دا، زنجیری ده عئینی شکیلده تصویر ائتمک مومکون ایدی. ایییرمی بیر دولار وئردی. بو زنجیری تاخدیقدان سونرا جیم آرتیق، ساعاتینا هارادا اولسا باخا بیلر، داها دوغروسو باخماغا هوسلنَردی. حالبوکی، او، بنزرسیز ساعاتا، قاییشی اولمادیغیندان همیشه گیزله‌یه‌رک باخیردی.
ائوه قاییتدیقدان سونرا دئللانین سرخوشلوغو بیر آز کئچدی. عاغلی باشینا گله‌رک احتیاطلی حرکت ائتمگی دوشوندو. ساچلاری‌نین سانجاقلارینی چیخارداراق فئنی ایشه سالدی. و عشقله جومردلیگین وحدتیندن یارانان پروبلئمی آرادان قالدیرماغا چالیشدی.
عزیز دوستلار، دوداق بوزوب کئچمه‌یین. بو هر زامان بؤیوک بیر ایشدیر. مودهیش بیر ایش!.
قیرخ دقیقه عرضینده ساچلاری مکتبدن قاچان بیر اوشاق ساچی کیمی قیوریم-قیوریم اولموشدو. دئللا آینادا اؤز عکسینی اوزون-اوزادی دیقّتله سئیر ائتدی. اؤز-اؤزونه:
- جیم منی بو جور گؤروب اؤلدورمه‌سه یاخشیدیر. آکتریسالارا بنزده‌جک، آما نه ائدیم. بیر دولار سکسن یئددی سئنتله نه آلا بیلردیم کی؟ - دئدی.
یئددی‌نین یاریسیندا قهوه بیشیریلمیشدی. تاوا دا سوبانین آرخاسینا یئرلشدیریله‌رک ایسیدیلمیش اتی قیزارتماق اوچون حاضیرلانمیشدی.
جیم، هئچ گئج گلمزدی. دئللا زنجیری اوووجونا آلاراق قاپی‌نین یانینداکی ماسانین اوستونده اوتوردو. ارینین، پیللکاندا آیاق سسلرینی ائشیدینجه دوم‌آغ اولدو. گونده‌لیک، ان ساده شئیلری اوچون دوعا ائتمگه عادت ائتمیشدی.
- بؤیوک آللاهیم! یالواریرام سنه، نه اولار، ساچلاریمی بگندیر، - دئیه دوعا ائتدی.
جیم قاپینی آچدی و ایچری گیریب آرخاسیندان باغلادی.یورغون و چوخ جیدی بیر گؤرکمی واردی. یازیق دوز ایییرمی ایکی یاشیندان، عاییله یوکو داشیییردی. یئنی بیر پالتویا احتییاجی واردی، اللرینده الجک یوخ ایدی.
اوتاغا ایی آلمیش بیر اوْو ایتی کیمی اطرافینا ائعتیناسیز باخیناراق گیردی. گؤزلری دئللایا دیکیلمیشدی. دئللا بو دیک باخیشلارین معناسینی آنلامایاراق قورخدو. بو نظرلر نه حئیرت، نه حیدّت، نه دهشت، نه بینمه‌مزلیک، یعنی گنج قادینین حاضیرلاندیغی حیسّلردن هئچ بیرینی ایفاده ائتمیردی.
جیم، اوزونده او غریبه ایفاده ایله باخیشلارینی آروادینا دیکه‌رک، یالنیز باخیردی.
دئللا ماسانین یانیندان ارینه یاخینلاشدی.
- جیم، عزیزیم، نه اولار، ائله باخما، - دئیه یالواردی. ساچیمی کسیب ساتدیم. میلادی، سنه هدییه آلمادان کئچیره بیلمزدیم، اؤلردیم. عئیبی یوخ، یئنه اوزانار. باغیشلاییرسان، دئییلمی؟ نه ائدیم، باشقا چاره‌م یوخ ایدی. ساچلاریم تئز اوزانار. اونوداق بونو، جیم، عزیزیم. میلادین موبارک اولسون، باریشاق! نه گؤزل، نه خوش بیر هدییه آلدیغیمی تصوّور ائده بیلمزسن، - دئدی.
جیم باشینی یوراجاق قدر دوشونوب -داشیندی، هئچ نه آنلایا بیلمه‌میش کیمی یاواش-یاواش:
- ساچینیمی کسدین؟ - دئدی.
دئللا:
- کسیب ساتدیم. بو گؤرکمیمی بگنمه‌دینمی؟ اوّلکی قدر سئومه‌دینمی؟ ساچسیز دا یئنه عئینی اینسان دئییلممی؟-دئیه یالواردی.
جیم اطرافینا چاشقینلیقلا باخدی. نهایت آخماق بیر وضعییته دوشوبموش کیمی:
- "ساچیمی کسدیم" دئدین؟ - سوروشدو.
دئللا:
- بلی، کسیب ساتدیم، دئییرم، - دئدی. عزیزیم، بو آخشام میلاددیر! منی عوزرلو سای، باغیشلا. سنین اوغروندا گئتدی، -دئییب مئهریبانلیقلا:
- ساچلاریمین تئللرینی سایماق بلکه مومکوندور، آما سنه اولان سئوگیمی اؤلچمک غئیری-مومکوندور. عزیزیم، اتی اوجاغا قویاقمی؟ - دئیه سوروشدو.
جیم، یوخودان اویانمیش کیمی اولدو. دئللانی قوللارینا آلدی، پالتوسونون جیبیندن بیر پاکئت چیخاراراق ماسانین اوستونه آتدی.
- دئللام، آلدانیرسان. ساچینی نئجه کسیرسن کس، هئچ فرق ائتمز. سنه اولان سئوگیمی هئچ نه دَییشدیره بیلمز. پاکئتی آچسان بیردن-بیره نییه کئفسیزله‌دیگیمی آنلارسان، - دئدی.
دئللا آغ بارماقلاری ایله کاغیذی جیردی، ایپلری قوپاراراق پاکئتی آچدی. آچماسییلا فریاد ائتمه‌سی بیر اولدو.
گؤزلریندن یاشلار آخماغا باشلادی. پاکئتدن دئللانین بروْوْدوایدا بیر ویترینده گؤروب اوزون مودّت آرزولادیغی داراق چیخمیشدی. تیسباغا قابیغیندان حاضیرلانمیش آلماز کنارلی او گؤزل داراق ایندی قارشیسیندایدی. رنگلری ده ساچلارینا نه قدر اویغون ایدی. باهالی اولدوغونو بیلدیگیندن هئچ اومیده قاپیلمادان بگنمیشدی و مئیل ائدردی. هئچ گؤزلمه‌دیگی اولموشدو. آما نه چاره کی، بو داراغی بزه‌یه‌جک ساچلار کسیلمیشدی.
دئللا نهایت اؤزونو اله آلاراق ارینین گتیردیگی هدییه نی باغرینا باسدی. گولومسه‌یه‌رک ارینه باخدی.
- عزیزیم، ساچیم چوخ تئز اوزانار، - دئییب توکلری آلوولانان بیر پیشیک کیمی یئریندن آتیلاراق: - آی، اونوتدوم! - دئیه قیشقیردی.
جیم آلینان گؤزل هدییه‌نی گؤرمه‌میشدی. دئللا اوووجونو آچاراق سئوینجله ارینه اوزاتدی. بو قییمتلی زنجیر گنج قادینین روحونداکی آتشین عکس ایله پارلایار کیمی اولدو.
- عزیزیم، گؤزل دئییلمی؟ بوتون شهری آلت-اوست ائتدیکدن سونرا تاپا بیلدیم. ساعاتینی وئر، باخاق نئجه یاراشاجاق، -دئدی.
جیم، دئللانین دئدیگینی ائده‌جگی حالدا اللرینی باشینین آرخاسینا قویاراق گولمگه باشلادی.
- دئللا سئوگیلیم، میلاد هدییه‌لریمیزی بیر کنارا قویوب بیر مودّت ساخلایاق. بوگونکی حالیمیزا اویغون دئییل. بیر آز چوخدور. داراقلاری آلماق اوچون ساعاتی ساتدیم. اتی اوجاغا قوی، - دئدی.
عیسایا دوغولدوغو زامان هدییه گتیرن آتشپرستلر عاغیللی اینسانلار ایدی. میلاددا هدیه وئرمک عادتی اونلاردان قالیب. عاغیللی اولدوقلاری اوچون دایم اویغون هدییه‌لر گتیرر و جوت اولانلاری دَییشدیریردیلر.
بیر-بیرلری اوچون ان قییمتلی شئیلرینی فدا ائدن ایکی عاغیلسیز گنجین احوالاتینی نقل ائتدیم.
آنجاق بو گونون عاغیللی گنجلرینه بونو خاطیرلاتماق ایسته‌ییرم …
بو ایکی گنجین بیر-بیرینه وئردیکلری هدییه‌دن داها اویغونو اولا بیلمزدی. آلیب وئریلن هدییه‌لر آراسیندا بونلارینکیندان داها اویغونو یوخدور. گونوموزون، حقیقتن قییمتلی اینسانلاری ائله بونلار کیمیلریدیر.
چئویرن: ذکا
کؤچورن: عباس ائلچین
