+0 بگندیم
زققومون کؤکو
مظفر ایزگو
آلیر آلیر، دئییر و آرتیریردی: اوشاق دئدیگین گوله بنزر، بو گون سولار، صاباح آچار… آما آتام بیلمیردی کی، بو گون سولان باشقا بیر گولدور، صاباح آچان باشقا بیر گول. و بیر گول، او گون ایلک کز دوکتورون ماساسینا یاتدی. دوکتور بحری بَی، اورامی دینله‌دی، بورامی دینله‌دی.
-هارادایدینیز ایندییه قدر، دئدی.
-ائوده ایدیک، دئدی آتام. یوخسول آتاسی ایدی بحری بَی… آتامین، اووچونا قویدوغو جینقیرتیلی خیردا پوللارا نه باخدی، نه ده بیر سس ائتدی، یالنیز،
-صاباح یئنه گتیرین، دئدی.
اورادا یئدیگیم اوچ ایینه، بیر ده بؤیوک-بؤیوک گوللاچلار، بیر هفته‌ده آیاغا قالدیردی منی. آما او گئجه، نه آنام یاتدی، نه ده آتام. دوکتور مگر سولو ساپلیجان دئمیش. ائ‌ئ‌ی، سولو ساپلیجان دا اوشاق دوشمنی او زامانلار.
ترله‌ین بدنیمه دسمالین بیرینی قویدو، بیرینی قالدیردی آناجیغیم. آرادا بیر نفسیمی دینله‌مگی ده اونوتمادی. چونکی، نفس اؤنملیدیر یوخسول ائوینده. یازیق، مندن بیر یاش بؤیوک اولان بؤیوک قارینداشیم بیر هفته بویونجا آیریلمادی باشیمدان. نه ناغیللار اویدوردو، نه ماهنیلار سؤیله‌دی باشیمدا، یاشاملا باغلیلیغی قوپارماییم دئیه… حالبوکی من، یاشاماغی، او شرطلر ایچینده بئله سئویردیم. بیر هفته سونرا آرتیق نه باشیم دؤنوردو، نه ده قیزدیرمام واریدی…
ایلده بیر کز ائو صاحیبیمیزین ائوینه گئدردیک. آدانادا ائو کرایه‌لری محرمدن محرمه توپدان اؤده‌نر. محرم آیی دا ندنسه هئچ دییشمز، همیشه سئنتیابرا دنگ گلیر و نارلارین یئتکینلشدیگی مؤوسومدور. آنام، باغچامیزداکی چاتلامایان نارلاردان بؤیوک بیر سبد حاضیرلایاردی. سونرا، بؤیوک قارینداشیملا منیم الیمیزی اوزوموزو بیر گؤزل یویار، بویاما شالوارلاریمیزی گئیدیرر، بایراملیق آیاققابیلاریمیزی (وارسا طبیعی) آیاقلاریمیزا کئچیرر، ائو صاحیبیمیزین یولونو توتاردیق. نارلار، ائو صاحیبیمیزه روشوت، بیز ایکی قارینداش دا آجیما دویغولارینی جوشغولاندیراجاق بیر اویاریجی… آتام یولدا اویاریردی:
-هئی، بویونوزو یاخشیجا بوکون ها، دئیه… آهان بئله بوکه‌جکسینیز!
بیز آرتیق، ائو صاحیبیمیزین اورایا قدر یاخشیجا وردیش قازاناق دئیه، کوچه‌ده بئله بویوموزو قیرار گئدردیک.
-ناموسسوز قاری، هئی نه وار سانکی بیزی ائودن چیخاراجاق به! قالتاق، چاتمادیمی او ائولر سنه؟ باخ‌سنه بو ایکی صبیه. نه ائده‌ره‌م من بو ایکی صبیه‌ینن کوچه‌لرده؟ اینسان بونلارا آجییار به!
بیلمیرم، نئچه لیره ایدی بو بیزیم اوتوردوغوموز تورپاق پارچاسی‌نین ایللیک کرایه‌سی! تورپاق پارچاسی دئییرم، چونکی اوزرینده‌کی چؤردن -چؤپدن اوتاغی، یوکسک موهندیس آتام قوندورموشدو.
-هئی، دئیردی آتام، باخدینیز قوجا آرواد مینقامینق ائدیر، آغلاماغی اونوتمایین ها! آغلایین، سولو سولو تؤکون!
بیز ایکی قارینداش، بیر تئاترین درام آکتیورلاری کیمی صحنه‌یه یاخینلاشدیقجا، بیر آز داها بویوموزا، گؤزیاشی عیارینا چکی-دوزن وئرردیک. آسان دئییل، بیر آز سونرا بؤیوک تاماشاچی نین قارشیسینا چیخاجاغیق. اولار کی، رولوموزو یاخشی کسمزسک، سئنتیابر آییندان سونرا چؤلده‌ییک… اوندان سونرا آدانانین اون بئش ایییرمی گون هئچ دایانمادان چیسه‌له‌ین یاغیشلاری تپنده… قالاقاپیسی سمتینده، بؤیوک بیر ائوین قاپیسینی دؤین آتام، بیر کز داها،
-هئی یاخشیجا قیرین بویونوزو ها، دئمه‌یی اونوتمازدی.
قیریق بویونلا، قیوریم-قیوریم پیلله‌کنلری چیخار، گئنیش بیر اوتاغی‌نین اورتا یئرینده‌قولتوغا قورولموش کؤک بیر قادینین الینی اؤپردیک. ندنسه بو ال هر واخت کئچی کیمی اییلنمیشدیر منه. آما، ایشین اوجوندا اؤلوم قالیم اولدوقدان سونرا، اوّل آللاه اؤپمک دئییل یا، یالا دئسه‌لر یالایاردیم بو قالین دامارلی کئچی کئچی ایی وئرن الی… آتام، منوّر خانیم، دئیردی، سایه‌نیزده بؤیویوب گئدیر ایشده صبیه‌لر.
گؤز قیرپاردی آتام، بوینوزو بیر آز داها قیرین! دئمک ایدی.
-سیزه نار گؤندردی بیزیمکی.
قادین دانیشمازدی هئچ. بیر بسله‌مه درحال نارلاری بوشالدار، سبدی توتوشدوروردو الیمیزه… آتام،دوینله‌دیگی پولو، بو قوجا آروادین اووچونا سایدیغی زامان، ایشده او آندا باشلار ایدی هئچ دانیشمایان قادین دانیشماغا:
-احمد افندی، دئیردی، گؤی اکسم داها چوخ قازانارام بو پولدان!
-دوغرو منوّر خانیم، چوخ دوغرو. آما بیلیرسن کی…
-اولماز، بئله بیر نئچه لیره داها وئر گؤره‌ک!
-واللاهی یوخ خانیم!
ایشده او زامان بوتون وظیفه بیزیم چییینلریمیزه یوکلندیگی اوچون، آتامدان وظیفه‌سینی گؤتورر، باشلاردیق بویون قیریب آغلاماغا…
-عمممه عمممه آتما بیزی کوچه‌یه عمّه … آه، اورکلر دایانیر می، بویونلار قیریق، گؤزلر یاشلی… قوجا آرواد دانیشار،
-هایدی، بو ایل ده اوشاقلارین خاطیری اوچون اوتورون. آما ایله هئچ قاریشمام ها احمد افندی، دئیردی.
قادین بسله‌مه‌یه سسله‌نر،
-قییز، اوشاقلارین قارینلارینی دویور، دئیردی. بسله‌مه بیزی، مطبخه بیر ایت انیگی کیمی سوخار،
-نه یئیه‌جکسیز اولان، دئیه سوروشاردی.
سانکی، بونو ایسته‌ییریک، بونو ایسته‌ییریک دئسک، اولاجاقمیش کیمی…
-هئچ باجی، دئیردیک، نه وئرسن.
-نه وئریم اولان من سیزه، ات وئریممی؟ سوروشدوغو شئیه باخ! بؤیوک بیر قاب ات قویاردی اؤنوموزه. سونرا، آدینی بیلمه‌دیگیمیز، آدینی ائشیتمه‌دیگیمیز شیرین و کومپوتلار… جیبلریمیزه ده اریک قوروسو. ایکی قارینداش، تیخانانا قدر یئیردیک بونلاردان.
-شربت ده دوزه‌لدیممی اولان سیزه؟
-دوزه‌لت باجی!
-نه آجگؤزسونوز اولان سیز؟
نه بیلک، سونرادان اؤیرندیک، مگر تشکّور ائدیریک باجی دئمه‌میز گره‌کیرمیش بو چوخ نزاکتلی بسله‌مه‌یه…
نییمیزه گرک تشکّور، بوز کیمی بؤیوک بیر استکان ویشنه شربتی وارکن… دلیسوْو قیز،
-من ائوله‌نه‌جم ها، دئیردی.
-یاخشی باجی، دئیردیک.
-کیمنن بیلیرسینیزمی؟
-کیمنن باجی؟
-آذانچی کالفاسیینان. ننه‌م ائولندیره‌جک منی. دورون اولان سیزه کؤکه ده وئریم. اوغلان منی دلیلر کیمی سئویر. بو کؤکه‌لری من یاپدیم ها!
-الینه ساغلیق باجی!
-سیزه قلم وئریممی؟
-وئر باجی!
-آما ایکی دنه یوخ!
-اولسون، بیز اورتادان بؤله‌ریک. چؤلدن قوجا آروادین سسی ائشیدیلردی:
-قیز، آشاغیدان او کؤهنه دولو بوخچانی گتیر! بسله‌مه، بیزه یان یان باخار،
-ننه سیزه کؤهنه وئره‌جک، دئیر. بسله‌مه ایله بیرلیکده چؤله چیخاردیق. درحال آتامیزین یانینا دیز چؤکر اوتوراردیق. آما آرادان زامان کئچدیگی اوچون، نه بؤیوک قارینداشیمین عاغیلیندا قالاردی بویون قیرماق، نه ده منیم. آتام، ترس ترس باخاردی صیفتیمیزه. او دقیقه آنلار، قیراردیق بویونلاریمیزی…قوجا آرواد بوخچادان بیر ییغین کؤهنه شئیلر سئچر، باشقا بیر بوخچایا دولدوراردی. چوخ خوشبخت آیریلاردیق اورادان، هم بیر ایلی داها قارانتی‌له‌میش، هم ده بیر ییغین کؤهنه تؤکونتونو صاحیبلنمیش اولاراق… اوسته‌لیک معده‌لر تیخا باسا دولو، جیبلرده اریک قوروسو. آما آتام، یئنه ده یولدا دئیینیردی:
-تورپاق دویورسون گؤزونو، دئیه. بیر نئچه لیره داهایمیش. کفن پولون اولار اینشاللاه او بیر نئچه لیره…
بعضاً، بو کؤهنه‌لرین ایچیندن بیر پالتو، بیر مانتو دا چیخاردی. آناجیغیم بونلاری کسر بیچر، الینده تیکه‌رک بویوموزا اویدورماغا چالیشاردی. چوخ دوعا آلمیشدیر بو قوجا آرواد آنامدان چوخ… ائوین بیر ایللیک ضمانتی ده بئله‌جه طرفلر آراسیندا ایمضا آلتینا آلیندیقدان سونرا، آتام قیش حاضیرلیغینا باشلار ایدی. پالچیغی توتار، ایچینه سامانی تؤکر، اوچ گون یئتیشدیرردی. اوندان سونرا گیریشردی ان ماراقلی اولدوغو ایشه. ائوین دؤرد بیر یانینی سووایاردی. بیز ده یاردیم ائدردیک.
-سو وئر، پالچیق وئر!
-آل سو، آل پالچیق!
بو سوواق گونلرینده بوتون اشیامیز حَیَطده قالاردی. سانکی اوغرولار کؤهنه‌یه تؤکونتویه ماراقلی‌ایمیشلار کیمی آتام، او اوچ گون اوچ گئجه چاناقلارین قابلارین آراسیندا یاتار قالخاردی. آنام،
-بره حریف، اوغرولار نه ائدیرلر او کؤهنه تؤکونتولری، دئدیکجه، آتام،
-هئی آرواد، ائویمیز دئدیگین شئیلر بونلار به، بیر ده بونلار گئدرسه، اورتادا نه قالار، دئیردی.
دوغرو، اورتادا نه قالاردی گئرچکدن ائویمیز دئیه بیله‌جگیمیز… بیر یاتاق، بیر چول، ایکی قازان، آلتی سهن، اوچ سبد، بیر تاوا، ایکی نیمچه، بیر مانقال، یاستیق و یورغانلاری سایمازساق ائویمیزه ائو دئدیردن شئیلر بونلار ایدی…
گئجه‌لری بیر شیققاشیق ائشیتسک، درحال سیچرایاردیق.
-آنا اوغرو!
-یاتیشین اولان قورخمایین، آتانیز بیر یانیندان او یانینا دؤندو!
آشاغیدان آتامین سسی ائشیدیلردی:
-آرواد! ..
-هی…
-دئییرم کی، بو ایل گون‌چیخانداکی پنجره‌نی باغلاییب، گون‌باتاندان آچاق دئییرم.
-یاهو حریف سحر دوشونک، ایندی گئجه یاریسی.
-ایندی دوشونسک نولار؟ گون‌باتاندان آچساق آخشام گونشی..!
-من بیلمم، نه حالین وارسا گؤر! منیم دیزلریم تیتره‌ییر پالچیق داشیماقدان.
-یوخ سانکی بیزیمکی تیتره‌میر. یاخشی، گون‌چیخاندان آچساق نولار؟
-آللاه آللاه، آچ یاهو. هارادان ایسته‌سن جانین اورادان آچ، ایسته‌سن تپه‌سیندن آچ!
-هئی آرواد سن همیشه بئله‌سن ذاتن. سن دئمیردینمی گون‌چیخانی آغاج باغلار دئیه.
-یاخشی یاخشی، گون‌باتاندان آچ! ایمدی یات!
اون دقیقه سونرا آتام یئنه آشاغیدان سسلنردی:
-آرواد!
-هی!
-من گون‌باتان دئدیم آمّا، سن حاقلیسان، نار آغاجینی اونوتدوق، بو سفر او باغلایار. ان یاخشیسی قوزئیدن آچاق!.
-سن بیلرسن!
-سویوقمو آلیر دئییل؟
-نه بیلیم!
-نه بیله‌سن؟
-آللاه آللاه، یاتسنه یاهو.
-ایکی دنه آچاقمی؟
-دؤرد دنه آچ!
-دمیر، دمیر وارمی سانکی بونلاری باغلایاجاق؟
-سن دئدین ایکی دنه دئیه.
-آما من دؤرد دئمه‌دیم کی…
-بره حریف دوشونمک اوچون سحرلره قیرانمی گیردی به!
-بره آرواد، ایمدی قرار وئرسک، من اونا گؤره باشیمدا سحره قدر پلانلار جیزه‌جم ده…
-یاخشی یاخشی، ایکی دنه آچ!
او سیرادا بؤیوک قارینداشیمین سسی ائشیدیلردی:
-آنا سو!
آتام گورولدایاردی:
-یمندن گلمیش ایت‌اوغلو ایتلر، یمندن…
آنام قالخار، تاختدان آشاغییا ائنر، سو سویوسون دئیه تولومبانی بیر آز چکر، دولدوراردی تاسا.
-آرواد، منه ده وئر!
آتام، سو ایچرکن یئنه آچاردی پنجره سؤزونو. اوسته‌لیک آیاغا دا قالخاراق:
-آرواد دئییرم کی، ایشده بیرینی بوردان، بیرینی ده اوردان آچاق.
-یاخشی اولار…
-باخمادین کی…
-قارانلیق بره حریف !
-من نئجه گؤرورم؟
بؤیوک قارینداشیم یئنه قیشقیراردی:
-آنا سوو!
آتام یئنه گورولدایاردی:
-یمندن گلمیش ایت اوغلو ایتلر، یمندن… وئر آرواد وئر، بیر آز داها ایچیم او بوز کیمی سودان!
آنام، منه ده سوروشاردی:
-ایچه‌جنمی بالام، دئیه.
-ایچه‌جم آنا!
آتام یئنه گورولدایاردی آشاغیدان:
-هئچ ایچمز اولارمی؟ یاخشی کی اولان سو پولوینان دئییلمیش.
کؤچورن: عباس ائلچین
