ائلچین ELÇİN

تورک دیلی و ادبیاتی

ماوی ایتین گؤزلری

+0 بگندیم

ماوی ایتین گؤزلری

قابریئل قارسیا مارکئس

       او، دیقتله منه باخیردی، منسه، بو قیزی اولّلر هاردا گؤردوگومو یادیما سالا بیلمیردیم. اونون نم و مأیوس باخیشلاری کئروْسین لامپاسی‌نین تیترک ایشیغیندا پاریلدادی و من خاطیرلادیم کی، بو اوتاق و بو لامپا هر گئجه یوخوما گیریر، هر گئجه بوردا ایضطیرابلی گؤزلری اولان بو قیزلا گؤروشورم. هه-هه، من هر گئجه یوخو ایله گئرچک‌لیگین غئیری-موعین سرحدّینی آشاراق محض اونو گؤرورم.

    ستولا سؤیکه‌نیب آغیرلیغیمی اونون آرخا آیاقلاری اوستونده تارازلاشدیراراق سیقارئت آختاریب یاندیردیم، آجی توستو حالقالاری هاوایا قالخدی. بیز سوسموشدوق.  من ستولدا ییرغالانیر، او ایسه آغاپپاق اوزون بارماقلارینی لامپا‌نین شوشه‌سینده قیزدیریردی. اونون گؤز قاپاقلاریندا کؤلگه‌لر تیتره‌ییردی. منه ائله گلدی کی، نسه دئمه‌لی‌یم، اودور کی، فیکیرلشمه‌دن دیللندیم: "ماوی ایتین گؤزلری".

 او دا غمگین-غمگین جاواب وئردی: "هه. آرتیق بیز بونو هئچ واخت اونوتماریق".

 او، لامپا‌نین دایره‌وی ایشیغیندان کنارا چکیلدی و تکرار ائتدی: "ماوی ایتین گؤزلری. من بونو هر یئرده یازمیشدیم".

    او چئوریلدی و توالئت ستولونا یاخینلاشدی. آی ایشیغی دوشموش گوزگوده اونون اوزو - اوزونون عکسی، لامپا‌نین ایتیرک ایشیغیندا یوخ اولماغا حاضیرلاشان اوپتیک اوبرازی، اوخشاری گؤروندو.

    سویوق کول رنگلی غمگین گؤزلری کدرله منه باخدی و یئره دیکیلدی، صدفدن دوزلدیلمیش پودرا قوتوسونو آچدی، پودرا یاستیغینی آلنینا، بورنونا توخوندوردو.

"من قورخورام کی، - دئدی، - بو اوتاق باشقا بیری‌نین یوخوسونا گیرر و بوردا هر شئیی قاریشدیرارلار".

پودرا قابینی شاققیلداداراق باغلادی و آیاغا قالخیب لامپایا یاخینلاشدی. "سنه سویوق اولمور؟" - سوروشدو.

 "هردن اولور …" - جاواب وئردیم.

 اوشوین اللرینی آچیق لامپا‌نین اوستونه توتدو، بارماقلاری‌نین کؤلگه‌سی اوزونه دوشدو.

"یقین کی، سویوقلایاجام، - شیکایتلندی، - عمللی-باشلی بوز شهرده یاشاییرسان" - دئدی.

     قیزین دریسی کئروسین آلوووندا پارلاق، قیرمیزی-میس رنگده گؤرونوردو. "سنین درین بورونجدندیر، - دئدیم - هردن منه ائله گلیر کی، سن اصیل حیاتدا هانسی بیر موزه‌یینسه کونجونده هئیکل اولمالیسان".

 "عکسینه، - دئدی - هردن سول بؤیروم اوستده یاتاندا یا دا اورگیمین دؤیونتوسونو ائشیدنده منه ائله گلیر کی، مئتالدانام".

 - "من سنین اورگی‌نین نئجه دؤیوندوگونو همیشه ائشیتمک ایسته‌ییرم".

- "اگر بیز آییقلیقدا گؤروشسک، قولاغینی سینمین اوستونه قویوب ائشیده بیلرسن".

- "اگر بیز آییقلیقدا گؤروشسک…"

او، الینی لامپا‌نین شوشه‌سینه توخوندوروب دیللندی: "ماوی ایتین گؤزلری. من هر یئرده بو سؤزلری تکرارلاییرام".

 ماوی ایتین گؤزلری. بو ایفاده‌‌نین کؤمگی ایله او منی رئال حیاتدا آختاریردی، بو سؤزلر بیر-بیریمیزی آییقلیقدا تانیماق اوچون پارول ایدی.

 او کوچه‌به‌کوچه گزیب اؤزوندن آسیلی اولمایاراق تکرارلاییردی: "ماوی ایتین گؤزلری".

رئستورانلاردا دا سیفاریش وئردیکدن سونرا گنج اوفیسیانتلارا پیچیلداییردی: "ماوی ایتین گؤزلری".

 اطرافداکی اینسانلار تعجّوبله چیگینلرینی چکیردی، اوفیسیانتلارسا لاقئیدجه باشلارینی ترپه‌دیردیلر. بیر دفعه اپتئکده اولاندا یوخولاردان تانیدیغی قوخونو دویدو و آپتئکچی‌یه دئدی: "یوخودا گؤردوگوم بیر گنج وار. او همیشه دئییر: "ماوی ایتین گؤزلری". بلکه سیز اونو تانیییرسیز؟"

 آپتئکچی جاوابیندا ایستئهزایلا گولوب پیشتاختا‌نین او بیری طرفینه کئچدی. او ایسه آپتئکین تزجه وورولموش کاشی دؤشمه‌سینه باخیردی و تانیش قوخو اونا عذاب وئریردی. دؤزمه‌ییب دیزی اوسته یئره چؤکدو و آغ پلیته‌لرین اوستونده پومادا ایله یازدی: "ماوی ایتین گؤزلری".

 آپتئکچی اونا تپیندی: "سئنیوریتا، سیز دؤشمه‌نی کورلادینیز. اسکینی گؤتورون و دؤشمه‌نی تئز سیلین!".

      بوتون آخشامی او، دیزلری اوستده ایمکله‌یه‌رک حرفلری سیلیردی و گؤز یاشی آخیدا-آخیدا دئییردی:"ماوی ایتین گؤزلری. ماوی ایتین گؤزلری".

 قاپیدا ایسه، دلی‌یه باخماغا ییغیشان آوارالار قهقهه چکیب گولوردولر. او سوسدو، منسه ستولدا اوتوروب ییرغالانیردیم.

"هر سحر، - من دئدیم، - سنی تاپماق اوچون دئیه‌جه‌یم ایفاده‌نی خاطیرلاماغا چالیشیرام. یوخودا منه ائله گلیر کی، اونو یاخشی ازبرله‌میشم، آما آییلدیقدان سونرا بیرجه سؤز ده یادیما دوشمور".

 - "سن کی، بو سؤزلری اؤزون اویدورموسان".

- "هه. بو سؤزلر اونا گؤره عاغلیما گلدی کی، سنین کول رنگلی گؤزلرین وار. لاکین گوندوز سنین اوزونو ده خاطیرلایا بیلمیرم".

 او، نا اومید بارماقلارینی سیخدی: "آه، اگر شهریمیزین آدینی بیلسیدیک!".

دوداقلاری‌نین کناریندا غمگین قیریشلار عمله گلدی. "من سنه الیمی وورماق ایسته‌ییرم" ،- دئدیم.

 او، گؤزلرینی قالدیردی، آلووون دیللری ببکلرینده اوینادی.

"سن بونو هئچ واخت دئمیردین" ،دیللندی.

 "ایندی ایسه دئییرم".

 او گؤزلرینی آشاغی سالدی و سیقارئت ایسته‌دی.

 "نییه من یاشادیغیم شهرین آدینی هئچ جوره خاطیرلایا بیلمیرم؟"،- دئدیم.

 او مأیوس-مأیوس گولومسه‌دی:  "بو اوتاق منیم نئجه یوخوما گیریرسه، سنین ده ائله‌جه یوخونا گیریر".

 من قالخیب لامپایا طرف گئتدیم، او ایسه آرامیزداکی گؤرونمز خطی کئچه‌جگیمدن احتیاطلانیب قورخا-قورخا گئری‌یه چکیلدی. اونا طرف اوزاتدیغیم سیقارئتی آلیب، لامپا‌نین آلوووندا یاندیردی.

 "یقین کی، دونیا‌نین هانسی شهرینده‌سه بوتون دیوارلارا "ماوی ایتین گؤزلری یازیلیب" ،- من دئدیم.

 - اگر من بو سؤزلری خاطیرلاسام، سنی آختارماق اوچون گونو صاباح دونیا سیاحتینه چیخارام".

      اونون اوزو سیقارئتین قیرمیزیمتیل کؤزو ایله ایشیقلاندی، درین بیر قوللاب ووروب سیقارئتی نازیک بارماقلاریندا فیرلاداراق دئدی: "آللاها شوکور، دئیه‌سن، قیزینماغا باشلاییرام" ،- و یازان پئروْنوُن آردینجا تکرارلاییرمیش کیمی سؤزلری اوزادا-اوزادا دئدی: "من … قیزینماغا… - بارماقلارینی ائله ترپتدی، سانکی بورو شکلینده یومرولانمیش گؤرونمز کاغیذ ورقینی جیردی، - باشلاییرام…" - کاغیذ قورتاردی و بوزوشه‌رک کوله دؤنوب دؤشمه‌یه دوشدو.

"لاپ یاخشی اولدو، - دئدیم - سن اوشوینده من همیشه قورخورام". بئله‌جه بیز نئچه ایللردیر کی، گؤروشوروک. هردن ائله اولور کی، یوخولارین لابیرینتینده بیر-بیریمیزی تانیدیغیمیز واخت، باییردا کیمسه قاشیغی الیندن سالیر دؤشمه‌یه و بیز آییلیریق. آز دا اولسا بیز آجی حقیقتله باریشمیشیق - بیزیم دوستلوغوموز چوخ عادی اشیالاردان آسیلیدیر.

 صوبح چاغی عادی بیر قاشیق دا بیزیم قیسا گؤروشوموزه سون قویا بیلر.

 او، لامپا‌نین آرخاسیندا دوروب منه باخیر. ائله باخیر کی، لاپ بیرینجی گئجه‌ده‌کی کیمی. او واخت من یوخودایکن اؤزومو لامپا و گوزگو اولان غریبه اوتاقدا گؤردوم، قارشیمداسا کول رنگلی گؤزلری اولان قیز دایانمیشدی.

من سوروشدوم: "سیز کیمسینیز؟" او ایسه "خاطیرلایا بیلمیرم" دئدی، - "آما، دئیه‌سن، بیز آرتیق گؤروشموشوک".

-"اولا بیلر. سیز بو اوتاقدا منیم یوخوما گیره بیلیرسینیز".

 - "دوزدور!" - دئدیم. - "من سیزی یوخودا گؤرموشم". - "چوخ غریبه دیر، - دئییب گولومسوندو - دئمه‌لی، بیز یوخولاردا گؤروشوروک؟" سیقارئتین کؤزرن اودونا باخا-باخا بیر قوللاب دا ووردو. یئنه ده منه ائله گلدی کی، او میسدندیر، آما سویوق و برک یوخ، ایستی و یومشاق میسدن.

 "سنه توخونماق ایسته‌ییرم" ،- تکرار دئدیم.

 "هر شئیی محو ائدرسن، - قورخویلا دیللندی، - منه توخونسان یوخودان آییلاریق و بیر داها گؤروشمه‌ریک".

- "یوخ، - دئدیم، - باشیمیزی بالیشا قویان کیمی، یئنه ده گؤروشه‌جه‌ییک".

 من الیمی اوزاتدیم، آما او ترپنمه‌دی.

 "سن هر شئیی محو ائده‌جکسن… - او پیچیلدادی.

 - اگر خطی کئچیب گلسن، بیز دونیا‌نین آیری-آیری طرفلرینه آتیلمیش حالدا آییلاجاغیق".

 - "اولسون" ،- من تأکید ائتدیم، آما او یالنیز کیرپیکلرینی ائندیردی: "بو گؤروشلر - بیزیم آخیرینجی شانسیمیزدیر. سن کی، سحر آچیلاندا هئچ نه‌یی خاطیرلامیرسان". من داها هئچ نه دئمه‌دیم. او ایسه الینی لامپایا قویوب شیکایتلندی: "بیز گؤروشدوکدن سونرا من هئچ واخت یاتا بیلمیرم. گئجه‌‌نین یاریسیندا آییلیرام و داها گؤزلریمی یوما بیلمیرم - بالیش اوزومو یاندیریر و من هئی دئییرم: "ماوی ایتین گؤزلری. ماوی ایتین گؤزلری".

 "تئزلیکله سحر آچیلاجاق، - دئدیم، - آخیرینجی دفعه من ساعات 2-ده آییلمیشدیم، ایندی همین واختدان چوخ کئچیب".

 قاپییا یاخینلاشیب دستکدن یاپیشدیم.

 "احتیاطلی اول، - خبردارلیق ائتدی، - قاپی‌نین آرخاسیندا آغیر یوخولار یاشاییر".

 - "هاردان بیلیرسن؟". - "بو یاخینلاردا من اورا گیرمیشدیم، چوخ چتینلیکله گئری قاییتدیم. آییلاندا گؤردوم کی، اورگیم طرفده، سول بؤیرو اوستده یاتمیشام".

بونونلا بئله من قاپینی آچدیم. یونگول مئه چؤلدن مونبیت و شوملانمیش تورپاغین قوخوسونو گتیردی. من باشیمی اونا طرف چئویریب دئدیم: "بوردا دهلیز یوخدور. من تورپاق ساحه‌لری‌نین اییینی حیس ائدیرم".

 - "اوردا، قاپی‌نین آرخاسیندا، - دئدی، - یوخوسوندا تارلا گؤرن قادین یاتیر. او همیشه کندده یاشاماغی آرزولاییب، آما هئچ واخت شهردن کنارا چیخا بیلمه‌ییب".

قاپی‌نین آرخاسیندا هاوا ایشیقلاشیردی و هر یئرده اینسانلار یوخودان اویانیردیلار.

 "منی، یقین کی، ناهارا گؤزله‌ییرلر" - دئدیم. تارلالاردان اسن کولک ضعیفله‌دی، سونرا ایسه تامام دایاندی. اونون عوضینه یاتاقدا ایندیجه او بیری بؤیرو اوسته چئوریلمیش آدامین نفسی ائشیدیلیردی. کولک دایاندی و اونونلا بیرلیکده قورخولار دا اؤلدو.

"صاباح بیز حؤکمن بیر-بیریمیزی تانییاجاییق، - دئدیم - من دیوارلارا "ماوی ایتین گؤزلری" کلمه‌سینی یازان قادینی آختاراجاغام."

 او، غمگین-غمگین گولومسوندو و الینی لامپا‌نین سویوماقدا اولان شوشه‌سینه قویدو:

 "سن گوندوزلر هئچ نیی خاطیرلامیرسان". اونون کدرلی سیلوُئتی صوبح ایشیغیندا آرتیق یوخ اولماغا باشلاییردی. "سن غریبه آدامسان، - دئدی - یوخولارینی هئچ واخت خاطیرلامیرسان".

کؤچورن:عباس ائلچین