ائلچین

تورک دیلی و ادبیاتی

بورا ایشه‌ین ائششکدیر

+0 بگندیم

بورا ایشه‌ین ائششکدیر 

 مظفر ایزگو

        آه بیر الیمه کئچه ده او، - بورا ایشه‌ین آدامی دئییرم، - ائله اورداجا بوغوب اؤلدوررم. بیزیم دیوارا نه اولدوسا ائله او واختدان سونرا اولدو. دؤزه بیلمه‌ینلر بورنو آمونیاک ایگینه حساس اولدوغونا گؤره کوچه‌یه دؤنن کیمی بورانی  " کشف ائله‌ییرلر " . دوز دیوارین دیبینه یاخینلاشان کیمی بیر ساغا باخیرلار، بیر سولا باخیرلار، - عاییب اولماسین، - نه لازیمدیرسا ائدیرلر. هانسی بیری‌نین توتاسان، بیر گون سحردن آخشاماجان گؤزله‌‌‌دیم. 38 آداملا ساواشدیم، آغیزلاشدیم. هله گؤر ساواشدیغیم آداملاردان بیری نه دئدی: 

  - بلدیییه لازیمی قدر توالئت تیکدیرمیر، بیز نئیله‌یک؟ 

  قیشقیردیم اوستونه: 

  - اوندا گل قوناق اوتاغیمیزا دا ایشه، حئیوان اوغلو حئیوان. 

  او آداملا او قدر ساواشدیم کی، یاخینلیقداکی باققال بیزی گوجنن آییردی. اونون گؤزونون اوستونه یومروق دیدیکجه دئییردی: 

  - نه بؤیوک ایش اولوب آخی، دؤزه بیلمه‌‌دیم، هم ده ثوابدی، - آی آخماق تا ائوده اوتورا بیلمیریک، هاراسی ثوابدی بونون. - سونرا علاوه  ائتدی: 

  - اونسوز هامیسینی ائلمه‌میشدیم کی! 

  باققال قولومدان توتوب چکمه‌سه ، پارچالایاجاقدیم اونو. بئله‌دیر دا، هامی لازیم اولانی ائدیر، راحاتلاشیر، آخشام‌ اوستو او یئرلری یویوب-تمیزله‌مک ده منه قالیر. بیر الیمده سو قابی، بیر الیمده سوپورگه. دیلیمده‌سه سؤیوش و قارغیشلار. سوپور کی، سوپور. گؤردوم کی یوخ، بئله داوام ائده بیلمز. ان یاخشی رنگلردن بیرینی آلیب بازار گونو، دیوارا یازدیم:  " بورا ایشه ین ائششکدیر " . البتّه، دیواردا بو یازینی گؤرن آدام، ائششکلیگی بوینونا آلماماق اوچون قاداغانی پوزمایاجاقدی. آما سحری گون آخشاما یاخین قاییداندا نه گؤرسم یاخشیدیر، آمان آللاه، دونیادا نه قدره ائششک وار. دیوار سویون ایچینده دیر. باخسان دئیرسن کی، بیر-بیرییله یاریشا گیریبلر. دیوارین دیبیندن، پنجره یه قدر نمدیر. آی آخماقلار بو ایشی نئجه گؤرورسوز؟ 

  - استغفوروللاه، یوخسا، آی حئیوانلار، اوتوروب ایشه‌ییرسیز؟ 

  آرادان بیر هفته کئچدی. باخدیم کی، بو یازی‌نین هئچ بیر خئیری یوخدو. بو دفعه  داها تاثیرلی اولسون دئیه بئله یازدیم: 

  - بورا ایشه ین ائششک اوغلو ائششکدیر. 

  او گوندن سونرا جاماعات، سانکی آتاسینی ائششک ائتمک اوچون یاریشا گیرمیشدیلر، - نه واخت تینه دؤنسم آزی ایکی-اوچ نفرین جانینی راحاتلادیغینی گؤروردوم. 

  - اجلاف، اوتانمیرسان اورا... 

  آداملاردا عار ائله‌مک، اوتانماق دئییلن شئیدن اثر-علامت یوخ ایدی. بعضیلری اوزومه باخیب هیریلداییردیلار. 

  نترسیز، یاخشیسیز، یاخشی راحاتلاشا بیلدیز؟ - دئییرممیش کیمی باخا-باخا هیریلداییردیلار. 

  آنجاق آداملاردان بیری بیر دفعه  بئله دئدی: 

  - باغیشلا قارداش، بو ائو سیزیندیر؟ 

  یوخ، - دئدیم. 

  - اوندا گل سن ده راحاتلاش. آخماغا باخ، گؤر بورا نه یازیب، اصلینده، ائششک اوغلو ائششک ائله اؤزودور. اونسوز دا، آداملار بورانی قارالاییبلار. بس بو آخماغا نه دوشوب، گؤره‌سن؟ بئله یازسایدی یاخشی اولاردی: خالقین خیدمتینده دیر، ایسته دیگینیز قدر ایشه‌یین. 

  - آخماق، ردد اول بوردان، - دئییب اوستونه یئریدیم. بیر تهر قاچدی الیمدن. او گوندن سونرا همین یازی‌نین آلتینا بو سؤزلری علاوه  ائتدیم: 

  - بورا ایشه ین حئیوان اوغلو حئیواندیر. 

  سحری گون گلیب گؤردوم کی، سؤزلری هؤججله‌یه-هؤججله‌یه سیلمه‌یه چالیشیر. هم ده شیرهاشیر ایشه‌ییر. ایشینی بیتیریب ...دویمله‌یندن سونرا اوز-اوزه گلدیک: 

  - گؤرورسن دا، قارداش، دودوک بورا نه یازیب. - دئیه‌سن، ائله بیلدی کی، من ده بورا ایشمگه گلمیشم. جیبیندن رنگلی بیر قلم چیخاردیب ایری حرفلرله یازماغا باشلادی. 

  - بورا ایشمه‌ین کؤپک اوغلودور. ¬- منه ساری چئوریلیب هیریلدادی: 

  - یاخشی، یازدیم، هه؟ 

  حئیرتدن دونوب قالمیشدیم. هیریلدایا-هیریلدایا چیخیب گئتدی. دئمه‌لی بئله، او گوندن سونرا بیزیم دیوار  " دیله گلدی " . بیر گون سونرا گلیب گؤردوم کی بو سؤزلری یازیبلار: 

  - اجلاف، ائششک اولماماق اوچون ایشمه‌دیم، آما بیل کی، بونو یازان ائله کؤپکدیر. - سحری گون او یازی‌نین آلتیندا باشقا بیر یازی وار ایدی:  

  - کؤپک سنین آتاندیر، نه دئییب کی، دئییب راحاتلاش دا! 

  اوندان سونرا، سؤزون اصل معناسیندا، توالئت ادبیاتی یازیلماغا باشلادی. 

  -  " بونو یازان توسون، اوخویانا سورسون " . 

  داها سونرا دیداکتیک فصل باشلادی. 

  - هر میلتی توالئتیندن تانیماق اولور، جناب. بورا هئچ نه یازما، بورا بیر توریست ده ایشه‌یه بیلر. 

  سحری گون اونا جاواب یازمیشدیلار: 

  - ای سفئه، توریست بورانی گؤرسه، شکلی‌نین چکیب توریزیمیمیزی بالاتلایار. 

  دیوار گونبَگون یازییلا دولوردو. منی ده ماراق حیسی بوروموشدو،  " گؤره سن، ایندی جاماعات نه یازیر "  دئیه دوشونوردوم. دیوار یوخ، سانکی موقدس  " قارا کوادرات "  ایدی. کیمین عاغلینا نه گلیردیسه یازیردی. مثلا، بیری یازیردی: 

   " ساغا باخ " ، دئییردی. ساغا باخدیم. یازیلمیشدی:  " سولا باخ " . ایندی ده سولا باخدیم، اوردا دا بیر اوخ ایشاره سی واردی:  " یوخاری باخ " . باشیمی قالدیریب یوخاری باخدیم:  " آی آخماق، ساغا-سولا باخماقدانسا اؤز ایشینه باخ " . 

  هه واللاه، بئله وضعیتده نئجه دلی اولمایاسان. همین گون حیرصله‌نیب پولیس ایداره سینه گئتدیم. پروکورورون اوتاغینا قالخدیم و دئدیم: جناب پروکورور، درده دوشموشوک، بیزی بو درددن قورتارین. 

  ¬نه اولوب؟ - سوروشدو. 

  بوتون اولانلاری اولدوغو کیمی دانیشدیم. پروکورور دئدی: - یاخشی، آی قارداش، بو ایشه بلدییّه 

  باخیر، بیزیم صلاحیبّتیمیزه داخیل دئییل.  

  اوز توتدوم بلدیییه ایداره‌سینه. بو جور ایشلره مسئول اولان شخصی تاپیب بوتون اولانلاری دانیشدیم. 

  - سیز هئچ ناراحات اولمایین بیز نه لازیمدیرسا، ائده‌ریک - دئدی. 

  آرادان بیر هفته کئچندن سونرا آخشام اوستو ائوه گلنده آروادیم منه بیر کاغیذ اوزاتدی. 

  - بو نه کاغیذیدیر؟ - سوروشدوم. 

  بلدیییه ایداره‌سیندن بیلدیریش گلیب. 

  - آی آللاه راضی اولسون. 

  باشا دوشمه دیم؟ - آروادیم دئدی. 

  - آللاه بلدیییه ایشچیسیندن راضی اولسون، بیزی بو بلادان قورتاراجاق. 

  - بیر اوخو اوندان سونرا دوعا ائله. 

  اوخودوم، اوخودوقجا بئینیمه قان سیچرادی. آللاه آماندی، یولو چیرکلندیردیگیمیزه، گیگییئنیک(بهداشتی) قایدالارا رعایت ائتمه‌دیگیمیزه، اطراف موحیطی پوزدوغوموزا، کوچه‌نی موردارلاغیمیزا گؤره یوز لیرا پول جزاسی اؤدمه‌لی‌ ایدیک. 

  تئز بله دیییه ایداره سینه گئتدیم، بو ایشله مشغول اولان آدامی تاپیب دئدیم: - آی قارداش، بو نه ایشدی بئله منیم باشیما آچمیسینیز؟ - حیرصیمدن آز قالا آغلایاجاقدیم. مسئول شخص اول بیلدیریشه، سونرا منه باخیب دئدی: 

  - سیز هئچ ناراحات اولمایین یولونا قویاریق، آما گرک سیز بو پولو اؤدیه‌سینیز، چونکی جزا مبلغی تصدیق اولونوب. 

  - آللاه خاطیرینه بئله ائلمه، آی قارداش، ائوه دینامیت قویوب گؤیه اوچوراجام واللاه. 

  - یوخ، بو قدر عصبیلشمه‌یه احتییاج یوخدور. سیز خزینه‌یه یوز لیرا اؤده‌یین، بیز بو ایشی ساهمانا سالاجاغیق. 

  نئیله‌مک اولار، یوز لیرانی اؤده‌دیم خزینه‌یه، بوینو بوکوک حالدا ائوه ساری گلدیم، کوچه‌یه دؤنن کیمی گؤردوم کی، بیر آدام اوزونو دیوارا توتوب ایشه‌ییر. وار گوجومله قیشقیردیم: 

  - دویمه‌نی باغلا، - یازیق هئچ پالتارینی دا دوزلتمه‌دن قاچدی. 

  بیر هفته سونرا چرشنبه آخشامی آروادیم منه یئنه کاغیذ اوزاتدی، کاغیذا باخان کیمی تانیدیم: - عمللرینیزده ایصرار ائتدیگینیزه گؤره، توالئته یوخ دیوارا ایشه‌یه‌رک کوچه‌نی چیرکلندیردیگینیزه، بوندان اولکی خبردارلیغا رعایت ائتمه‌دیگینیزه گؤره 200 لیرا پول جزاسی اؤدمه‌لی‌سینیز " . 

  اوف، اوف. اوف، واللاه، دلی اولاجاغام. 

  کاغیذی همین آنداجا جیردیب نئجه پنجره دن توللامیشامسا... 

   " من سیزه گؤسترررم، آخماقلار " . 

  سحری گون دیوارین دؤشونه بیر ماسا قویدوم، بیر ده کاغیذ یاپیدیردیم:  " کییچیک باییر: 25 قوروش، کاغیذ 25 قوروش، کولوننا 25 قوروش " . بیر ده لؤوحه آسدیم:  " کیچیک باییرا گئتمک سربستدیر " . به، به نئجه گؤزل ایمیش. ایندی دونیانین پولونو قازانیرام...   

 دیلیمیزه اویغونلاشدیران: فرید حسین

کؤچورن:عباس ائلچین