ائلچین ELÇİN

تورک دیلی و ادبیاتی

آغجاقانادلار اولماسا

+0 بگندیم

عزیز نسین | Aziz Nasin 

آغجاقانادلار اولماسا

یازان : عزیز نسین 

 

اون یاشیندایکن بئله دئییردی: 

  - آه، بیر چانتام اولسا... آه، منیم ده او بیری اوشاقلار کیمی کیتابلاریم، اویونجاقلاریم اولسا!.. منیم ده رومانلاریم اولسا... اوندا گؤررلر، نئجه چالیشیرام. هئچ بیر شئییم یوخ. بئله نئجه چالیشیم من؟.. 

  *** 

  اون اوچ یاشینا گلینجه، او بیری اوشاقلار کیمی کیتابلاری، دفترلری، چانتاسی، اویونجاقلاری اولدو. آما هئچ جور چالیشا بیلمیردی.  

  - دوست-تانیشلاریم کیمی پالتارلاریم یوخ کی... -دئییردی. آنام، بابام، قارداشلاریم-هامیمیز بیر اوتاقدا یاشاییریق. بئله دار یئرده چالیشماق اولارمی؟ آه، بیر ماسام اولسا، اؤز باشیما بیر ماسام،بیر دولابیم. باخ، اوندا نئجه چالیشیلیر، گؤرسونلر... 

     *** 

  اون سککیز یاشیندا اؤز اوتاغی دا اولدو. 

  - منیم یاشیمدا بیر اینسان هفته ده اون لیره بئله جیب خرجلیگی آلمازسا، نئجه چالیشا بیلیر؟ کیتابلار آلمالییام، شکیللر آلمالییام... آه، آه... اوندا بیلرم نئجه چالیشاجاغیمی... 

  *** 

  ایسته دیکلری یگیرمی یاشیندایکن اولدو. 

  - آه، بو مکتبی بیتیرسه ایدیم... حیات باشقا، مکتب باشقا... فاکولته نی بیتیرینجه ائله چالیشاجاغام، ائله چالیشاجاغام، گؤرسونلر... ائله بیر اثر یازاجاغام کی... آه، آه، بو فاکولته بیر بیتسه... 

  *** 

  ایگیرمی دؤرد یاشیندا فاکولته نی بیتیردیگی زامان بئله سؤیله ییردی: 

  - هئچ جور ایسته دیگیم کیمی چالیشا بیلمیرم. عاغلیم، فیکریم همیشه عسگرلیکده دیر... آه، بو عسگرلیگی بیر بیتیرسم، گئجه-گوندوز دورمادان چالیشاجاغام... چالیشمادان اثر اورتایا چیخماز. بیر اثر یازاجاغام، هر کس مندن دانیشاجاق. آه، بو عسگرلیک... 

  *** 

  ایگیرمی آلتی یاشیندا عسگرلیگینی بیتیرمیشدی: 

  - چالیشا بیلمیرم کی... هئچ جور ایسته دیگیم کیمی چالیشا بیلمیرم. اثریمی یازا بیلمیرم. بو وضعیتده نئجه یازماق اولار؟ هر گون چؤرک پولو آرخاسینجا قاچیرام. اینسانین یاخشی بیر ایشی، بللی بیر گلیری اولماسا نه جور چالیشا بیلیر؟ آه، آه... بیر یاخشی ایش تاپسام، اثریمی یازماق اوچون هر گئجه صاباحا قدر چالیشاجاغام. 

  *** 

  ایگیرمی سککیز یاشیندا ایش-گوج صاحیبی اولموشدو. 

  - چالیشا بیلمیرم، وسسالام! - دئییردی، نئجه چالیشیم بئله؟ اینسانین ایکی اوتاقلی ائوی اولمالیدیر. رادیوسو اولمالیدیر. آچارسان رادیونو، موسیقیدن ایلهامی آلاجاقسان... باخ او زامان دورمادان چالیش!.. آه، آه!.. بیر رادیو اولسا...  

  ***  

  ایگیرمی دوققوز یاشیندا ایکی اوتاقلی بیر منزیل کیرایه یه گؤتوردو. بیر ده رادیو آلدی. آما یئنه ایسته دیگی کیمی چالیشا بیلمیر، ایللردن بری دوشوندویو اثرینی اورتایا چیخارا بیلمیردی. 

  - آه، آه!.. دئییردی، بو یالنیزلیق وار ها، بو یالنیزلیق... سانکی بو سینه مین ایچی سونسوز، دیپسیز ماغارالار کیمی بومبوشدور... اینسان بو یالنیزلیق ایچینده نئچه چالیشیب دا، اثر یازا بیلر؟ بیر اینسانی، چالیشماغا هوسلندیرن، شؤوقلندیرن، زورلایان بیر قوووه اولمالیدیر. کیمین اوچون چالیشاجاغام؟ کیمدن روحلانیب دا اثر یازاجاغام؟ آه، آه... ائی عشق، هاراداسان؟.. 

  ***  

  اوتوز یاشیندا عاشیق اولدو. هم سئویر، هم سئویلیردی. آما ایللردیر دوشوندویو او بؤیوک اثرینی هئچ جور یازا بیلمیردی.  

  - عشق گؤزل شئیدیر، دئییردی، گؤزل اولماسینا گؤزلدیر. آما ائولنمه دن چالیشماق اولارمی؟ بیر ائولنسم، او زامان حیاتیم قایدایا دوشر، ایسته دیگیم کیمی چالیشارام. ائولنمک ده آسان دئییل. آه، آه، بیر ائولنسم... بیر دقیقه می بئله بوش کئچیرمرم، دایانمادان چالیشارام. 

  ***  

  اوتوز ایکی یاشیندا ائولندی. خوشبخت ایدی، آما اثرینی هئچ جور یازا بیلمیردی. چونکی حاقلی سببی واردی. 

  - دولانماق دردی میندی چیگینلریمه. چؤرک پولو اوچون قاچماقدان اؤز ایسته دیگیم کیمی چالیشماغا واختیم یوخدور کی... اثر یازماق اوچون، اینسانین بوتون زامانینی او اثره وئریب، چالیشماسی گرکدیر. او دا بو پوللا اولماز. 

  ***  

  اوتوز آلتی یاشیندا قازانجی آرتمیشدی. آرتمیشدی، آما بیر اؤزونو دینله یک: 

  - ایکی اوتاقلی بیر منزیل... اوتاقلار دا کیچیکدیر. اوشاق-موشاق سس-کویو ده بیر یاندان... اینسان بو سس-کویون ایچریسینده اثر یازا بیلرمی؟ آه، آه... بئله دؤرد-بئش اودالی بیر ائوه چیخسام، ائله چالیشاجاغام، ائله چالیشاجاغام... 

  ***  

  اوتوز سککیز یاشیندا بئش اودالی بیر ائوه کؤچدو. هئچ جور اثرینی یازا بیلمیردی. چالیشا بیلمیرسه، تقصیر اونون دئییل کی... 

  - شهر ایچینده کی  بیر ائوده اینسان نئجه چالیشا بیلر؟ بو گورولتو ایچینده گل بیر چالیش دا... اثریمی یازا بیلمک اوچون سسسیزلییه، اؤزومون ایستیراحتیمه بیر احتییاج وار. بورا، توز، تورپاق، گورولتو... اولماز بورادا. آه، آه... بئله ساکیت، سسسیز بیر ائوه کؤچسم، ائله چالیشارام کی... ایچیمده چالیشماغا قارشی درین بیر سوسوزلوق وار.  

  ***  

  قیرخ یاشیندایکن، تام آختاردیغی کیمی، سسسیز بیر یئرده گؤزل منظره لی، گئنیش بیر ائوه کؤچموشدو. ایسته دیگی کیمی چالیشا بیلیردیمی؟ خئیر. چونکی: 

  - آه، آه... دئییردی - اینسانین ائوینده گؤزل اشیالار اولمازسا، دیوارلاردا دیرلی تابلولار، بؤیوک بیر یازی ماساسی اولمازسا، ظریف گؤزللیک اشیالاری، انتیق اشیالار اولمازسا، راحات اوتوراجاقلار، یومشاق خالیلار اولمازسا، نئجه چالیشا بیلر؟ گؤزل اثر اورتایا چیخارماق اوچون اینسانین گؤزو ذؤوقلو شئیلر گؤرمه لیدیر. کلاسسیک موسیقی واللاری اولمالیدیر. بیر یاندان گؤزون، بیر یاندان قولاغین ذؤوق آلارکن، سن هئچ دایانمادان چالیشاجاقسان. آه، آه... بو ایسته دیکلریم بیر گون اولاجاقمی، یا رببیم... ائله چالیشارام کی... 

  ***  

  قیرخ ایکی یاشیندا تام ایسته دیگی کیمی راحات، گؤزل، دیرلی اشیالارا دا قوووشموشدو. اگر یئنه ده هئچ جور اثرینی یازا بیلمیرسه، او نه ائتسین؟ 

  - آه، آه، دئییردی، منیم حالیمی بیر بیلسه ایدینیز. پول دردی، دولانماق سیخینتیسی چکمیرم. آروادیم منی خوشبخت ائدیر. اوشاقلاریم دا یاخشیدیرلار... ائویم گئنیشدیر، راحاتدیر، منظره سی ده گؤزلدیر. چوخ دیرلی، باهالی اشیالاریم دا وار...، بول-بول زامانیم دا وار. آما بو آغجاقانادلار، یوخمو، آغجاقانادلار... هئچ جور راحاتلیق وئرمیرلر کی، اوتوروب چالیشام. منیم حالیم نئجه اولاجاق؟ ندیر بو آغجاقانادلاردان چکدیگیم؟ آه، آه...، بو آغجاقانادلار اولماسا، من بیلیرم نئجه چالیشاجاغیمی... آما نه ائدک کی، آغجاقانادلار قویمور. هئچ جور اثریمی یازا بیلمیرم. گوندوز آغجاقانادلارین الیندن یاتا بیلمیرم کی، گئجه لری چالیشیم... پنجره لری قاپاتسام ایستی اولور. پنجره لره پرده چکسم، چیرکین اولور. قیشدامی چالیشیم دئدینیز؟ قیشدا آغجاقاناد اولماز، دئییلمی؟ آه، آه... آغجاقانادلار دا اولماسا من نه ائدردیم، بیلمیرم کی؟... 

  ***  

  ایندی قیرخ ایکی یاشندا اولدوغو اوچون داها بیزیم اوندان اومیدیمیز قیریلمادی. البتته، بیر گون آرادیغی راحاتلیقلارا چیخاجاق، نفس آلمادان چالیشیب او بؤیوک اثرینی اورتایا چیخاراجاقدیر. 

کؤچورن : عباس ائلچین