ائلچین ELÇİN

تورک دیلی و ادبیاتی

شاعیر

+0 بگندیم
شاعیر

کارئل چاپئک

 

  عادی بیر حادیثه : سحر ساعات دؤردده ژیتنی کوچه سینده سرخوش بیر قادینی آوتوموبیل وورموش، سونرا دا یوکسک سورعتله آرادان چیخمیشدیر. گنج پولیس مأمورو مئیزلیکین قارشیسیندا بو آوتوموبیلی تاپماق دوروردو. معلوم اولدوغو کیمی گنج پولیس مأمورلاری ایشلرینه چوخ جیدی یاناشیرلار. 

  - هیمم… دئمه لی، سیز اؤزونوزدن اوچ یوز مئتر مسافه ده سورعتله اوزاقلاشان آوتوموبیلی و یئره سریلمیش آدامی گؤردونوز. هر شئیدن اول سیز نه ائتدینیز؟ - دئیه مئیزلیک 141 نؤمره لی پولیس نفریندن سوروشدو. 

  - هر شئیدن اول ضررچکمیشین یانینا قاچدیم کی، اونا ایلک طیببی یاردیم گؤستریم، - پولیس سؤزه باشلادی. 

  - اولجه ماشینین نؤمره سینه دیقت یئتیرمک لازیم ایدی، - مئیزلیک دئییندی، - سونرا دا بو آروادینان مشغول اولماق. اصلینده ائله من ده بو جور حرکت ائدردیم،- دئیه علاوه  ائتدی و الینده کی  کارانداشلا باشینی قاشیدی. - دئمک، ماشینین نؤمره سینه دیقت یئتیرمه دینیز. بس، باشقا علامتلر؟ 

  - منه ائله گلیر کی، - 141 نؤمره لی پولیس اینامسیز حالدا جاواب وئردی، - ماشین توند رنگلی ایدی، یا ماوی ایدی، یا دا توند قیرمیزی. سس بوغانیندان گور توستو چیخیردی، هئچ نه گؤرمک اولموردو.    

  - آی آللاه! - مئیزلیک دیلخور اولدو. - بس بیز ایندی بو ماشینی نئجه تاپاق؟ سوروجودن سوروجویه قاچیب سوروشاق کی:  " بو قادینی ووروب اوستوندن کئچن سیز دئییلسینیز کی؟ "  ایندی دئیین گؤروم، عزیزیم، نئجه اولسون؟ 

  پولیس نزاکتله و لاقئیدلیکله چیگینلرینی چکدی. 

  - عرض ائتمه یه جسارت ائدیرم کی، من بیر شاهیدی ده قئیده آلمیشام. آما او دا بیر شئی بیلمیر. او قونشو اوتاقدا گؤزله ییر. 

  - چاغییرین گلسین، - دئیه سامان چؤپوندن ده یاپیشماغا چالیشان مئیزلیک قاشقاباقلی حالدا دیللندی و بو یاریتماز پروتوکولدان نه ایسه بیر توتام یئری تاپماغا چالیشدی. سونرا دا باشینی قالدیرمادان مئخانیکی اولاراق ایچرییه گیرن شاهیددن سوروشدو: 

  - فامیلیانیزی و یاشادیغینیز یئری سؤیله یین؟ 

  - کرالیک یان، مئخانیکا فاکولته سی نین طلبه سی، - دئیه شاهید آیدین سسله جاواب وئردی. 

  - بو گون سحر ساعات دؤردده ناملوم ماشین بوژئن ماخاچکووانی ووراندا سیز اونون شاهیدی اولموشدونوزمو؟ 

  - بلی. من عرض ائتمه لی یم کی، سوروجو گوناهکار ایدی. اؤزونوز دوشونون، کوچه تامامیله بومبوش ایدی، اگر او یول کسیشن یئرده ماشینین سورعتینی آزالتسایدی… 

  - سیز حادیثه  باش وئرن یئردن نه قدر مسافه ده ایدینیز؟ - مئیزلیک اونون سؤزونو کسدی. 

  - اون آددیملیغیندا. من تانیشیمی یولا سالیردیم… کافئدن چیخانادا. بیز ژیتنی کوچه سیندن کئچرکن… 

  - بس سیزین تانیشینیز کیمدیر؟ او بوردا قئید اولونماییب. - مئیزلیک یئنه شاهیدین سؤزونو کسه رک الینده کی  پروتوکولا ایشاره ائتدی. 

  - شاعیر یاروسلاو نئراد، - شاهیدین سسینده غورور دویولوردو… - آنجاق اوندان بیر شئی خبر آلا بیلمیه جکسینیز. 

  - او نییه ائله؟ - دئیه سامان چؤپوندن ده یاپیشیماغا حاضیر اولان مئیزلیک سوروشدو. 

  - چونکی او… اونون… پوئتیک ناتوراسی وار. همین بدبخت حادیثه  باش وئرنده او اوشاق کیمی آغلادی و او ساعات دا ائوه قاچدی… دئمک، بیز ژیتنی کوچه سی ایله گئدیردیک؛ بیردن هاردانسا آرخا طرفدن چوخ برک سورعتله حرکت ائدن بیر ماشین چیخدی… 

  - ماشی نین نؤمره سی؟ 

  - باغیشلایین، من دیقت یئتیره بیلمه دیم. من یالنیز اونون دلی کیمی سوردویو ماشینین سورعتینه فیکیر وئردیم و اؤز-اؤزومه دئدیم کی، باخ… 

  - ماشین هانسی تیپده ایدی؟- مئیزلیک یئنه اونون سؤزونو کسدی. 

  - دؤردتاکتلی داخیلی یانما موحرریکلی،- دئیه طلبه-مئخانیک ایشگوزاراجاسینا جاواب وئردی.- مارکاسی حاقیندا آیدیندیر کی، منیم باشیم چیخمیر. 

  - ماشینین کوزووو هانسی رنگده ایدی؟ ماشینی کیم سوروردو؟ اوستو آچیق ماشین ایدی، یا لیموزین ایدی؟ 

  - بیلمیرم، - دئیه شاهید شاشقینلیقلا جاواب وئردی.- رنگی دئیه سن، قارا ایدی. آما، اصلینده اونو خاطیرلایا بیلمیرم، چونکی بدبخت حادیثه  باش وئرنده من تانیشیما طرف چؤندوم و دئدیم:  "  اجلافا باخ ائ، آدامی ووردو، هله هئچ ماشینی دا ساخلامادی. "  

  - هیم…- مئیزلیک ناراضی لیقلا میزیلداندی. - بو البتته طبیعی رئاکسییادیر، آما من ایستردیم کی، سیز ماشینین نؤمره سینه دیقت ائتمیش اولایدینیز. چوخ تعجوبلودور، آداملار نه درجه ده دیقتسیزدیلر. سیزه آیدیندیر کی، سوروجو گوناهکاردیر، سیز دوغرو دئییرسینیز، او آدام اجلافین بیریدیر، آما ماشینین نؤمره سینه دیقتینیز صیفیردی. موحاکیمه یوروتمه یه هامی قوچاقدیر، آما ایشگوزارجاسینا اطرافی موشاهیده ائتمه یه گلینجه… تشککور ائدیرم جناب کرالیک، گئده بیلرسینیز، داها سیزی ساخلامیرام. 

  بیر ساعاتدان سونرا 141 نؤمره لی پولیس یاروسلاو نئرادانین قاپیسی نین زنگینی باسدی. 

  - ائوده دی،- ائو صاحیبه سی جاواب وئردی.- یاتیب. 

  یوخودان آییلان شاعیر گؤزلرینی پولیسه طرف برلده رک:  " گؤره سن من نئیله میشم کی؟ " - دئیه فیکیرلشدی… 

  نهایت پولیس ایشچیسی نئرادا اونو نه اوچون پولیس ایداره سینه چاغریلدیغینی بیرتهر ایضاح ائتدی. 

  - اورا گئتمک مجبوریدی؟ - شاعیر شوبهه لی شکیلده سوروشدو. - آخی من اونسوز دا ایندی هئچ نه خاطیرلامیرام. گئجه نی من بیر آز… 

  - وورموشدونوز، - پولیس ایشچیسی اونو باشا دوشه رک علاوه  ائتدی. - منیم بیر چوخ شاعیرلردن خبریم وار. خواهیش ائدیرم گئیینین. من گؤزله ییرم. 

  اونلار یول اوستو یئمکخانالاردان، حیاتدان، گؤیلرده گؤرونن علامتلردن و باشقا شئیلردن صؤحبت ائده-ائده گلیردیلر؛ تکجه سییاستدن باشقا، هر ایکیسی سییاسته بیگانه ایدی. بئلجه دوستیانا، عاغیللی صؤحبتلرله گلیب پولیس ایداره سینه چاتدیلار. 

  - شاعیر یاروسلاو نئراد سیزسینیز؟ - مئیزلیک سوروشدو. - سیز گؤزونوزله گؤرموسونوز کی، نامعلوم آوتوموبیل بوژئن ماخاچکووو نئجه ووردو؟ 

  - هه، - شاعیر دریندن کؤکسونو اؤتوردو. 

  - سیز دئیه بیلرسینیزمی کی، او نه جور ماشین ایدی، اوستو آچیقمی، اوستو اؤرتولومو، رنگی، سرنیشینلری نین سایی، نؤمره سی؟ 

  شاعیر برک فیکیرلشمه یه باشلادی. 

  - بیلمیرم. من اونلارا فیکیر وئرمه دیم. 

  - نه ایسه بیر خیردا شئی ده اولسا، تفصیلاتینی یادینیزا سالین، - مئیزلیک تاکید ائتدی. 

  - سیز نه دانیشیرسینیز! - نئراد حقیقتن تعجوبلندی. - من هئچ زامان تفصیلاتا دیقت یئتیرمیرم. 

  - زحمت اولماسا دئیین گؤرک، سیز اوندا نه یه دیقت یئتیردینیز؟- مئیزلیک کینایه ایله سوروشدو. 

  - دئمک بئله، عومومی احوالی، اووقات دا دئمک اولار. - شاعیر دقیق اولمایان بیر جاواب وئردی. - بیلیرسینیز، بو آدامسیز کوچه… اوزون کوچه… دان اوزونون کوچه سی… و یئرده قادین فیقورو… دایانین! - بیردن شاعیر یئریندن سیچرادی. - آخی من ائوه گلنده بو حاقدا شعئیر یازمیشام. 

  او جیبلرینی ائشله مه یه باشلادی. اوردان چئکلر، کونوئرتلر، ازیک کاغیذ پارچالاری چیخاردی. 

  - بو دئییل، بو دا دئییل… آها، دئیه سن باخ بودور. - او، کونوئرتین ترس اوزونه یازیلمیش یازینی اوخوماغا گیریشدی. 

  - وئرین من باخیم، - مئیزلیک اونا تکلیف ائتدی. 

  - دوغروسو، بو منیم ان یاخشی شعئیرلریمدن دئییل، آما ایسته سنیز اوخویا بیلرم. - شاعیر تواضع کارلیق ائتدی. 

  سونرا گؤزلرینی تاوانا طرف برلده رک ازبردن دئکلاماسییا ائتمه یه باشلادی: 

   

  ائولر تورانلیقدا دوزولموشدو دال-دالا، 

  آلاتوران دیلله نیردی ماندولیندا. 

  قیز قیزاریردی. 

  اوزاق سینقاپورا 

  سیز گئدیردینیز یاریش ماشینیندا. 

  قیریلمیش زانباق توزا باتدی، 

  ائهتیراسلار سوسدو. ایراده سیزلیک… اونودولمالار. 

  ائی قو قوشونون بوغازی! 

  ائی سینه! 

  ائی طبیل و قوشا چوبوقلار - 

  فاجیعه لرین علامتی وار! 

   

  - وسسالام!، - دئیه رک شاعیر سؤزونو بیتیردی. 

  - باغیشلایین، بوتون بونلار نه دئمکدیر؟ - مئیزلیک سوروشدو. - بوردا اصلینده، ندن صؤحبت گئدیر؟ 

  - نئجه یعنی ندن؟ ماشینلا باش وئرن حادیثه دن. مگر آیدین دئییل؟ - شاعیر تعجوبلندی. 

  - هئچ ده یوخ، - مئیزلیک اونا تنقیدی یاناشدی. - من هئچ جوره بوردان چیخارا بیلمیرم کی:  "اییول آیی نین اون بئشینده، سحر ساعات دؤردده، ژیتنی کوچه سینده آتمیش یاشی اولان سرخوش قادین بوژئنا ماخاچکووا آوتوموبیلله وورولموشدور. ضرردیده شهر خستخاناسینا گؤندریلمیشدیر و وضعیتی آغیردیر. "  بوتون بو فاکتلار حاقیندا سیزین شعئیرینیزده من باشا دوشودویومه گؤره بیر کلمه ده یوخدور. به-لی! 

  - بوتون بونلار ظاهیری فاکتلاردیر، چیی گئرچکلیکدیر، - دئیه رک شاعیر بورنونو قوردالادی و سونرا علاوه  ائتدی. - آنجاق پوئزییا - بو داخیلی رئاللیقدیر. پوئزییا - شاعیرین شعورونون آلت قاتلاریندا یارانمیش سربست سوررئالیستیک اوبرازلاردیر، باشا دوشورسونوز؟ بو همین او گؤرمه و ائشیتمه آسسوساسییالاریدیر کی، اوخوجو اونا نوفوذ ائتسین. او زامان او باشا دوشه جک، - شاعیر نئراد طعنه لی شکیلده سؤزونو بیتیردی. 

  - لوطفا سؤیله یین! - مئیزلیک قیشقیردی. -یاخشی، بو اثرینیزی منه وئرین گؤروم. تشککور. سونوجو، بوردا نه دئییلیر؟ هیم… " ائولر تورانلیقدا دوزولموشدو دال-دالا… "  نه اوچون دال-دالا دوزولموشدو، بونوسا دا ایضاح ائدین. 

  - ژیتنایا کوچه سینده ائولر ایکی جرگه دیلر، باشا دوشورسونوز؟ - شاعیر ساکیتجه ایضاح ائتمه یه باشلادی. 

  - بس نییه بو میللی پروسپئکت کیمی باشا دوشولمور؟ - مئیزلیک اینامسیزلیقلا سوروشدو. 

  - اونا گؤره کی، میللی پروسپئکت بئله بو جوره دوز اوزانیب گئتمیر. - شاعیر ایناملا جاواب وئردی. 

  -یاخشی، داوامی.  " آلاتوران دیلله نیردی ماندولینادا " . توتاق کی، بئله دیر.  " قیز قیزاریردی " . عوذر ایسته ییرم، بو قیز هاردان چیخدی بوردا؟ 

  - دان یئری نین شفقلری، - شاعیر قیساجا ایضاحات وئردی. 

  - عوزر ایسه ییرم، آه باغیشلایین.  " اوزاق سینقاپورا سیز گئدیردینیز یاریش ماشینیندا.؟ "  

  - گؤرونور او آوتومیوبیلی تخییولومده من ائله قاورامیشام، - شاعیر ایضاحات وئردی. 

  - او یاریش آوتوموبیلی ایدی؟ 

  - بیلمیرم. بو او دئمکدیر کی، او دلی کیمی قیزغین سورعتله گئدیردی. ائله بیل کی، دونیانین سونونا چاتماق ایسته ییردی. 

  - آها، بئله. مثلا سینقاپورا؟ یاخشی، ایلاهی، بس نییه محض سینقاپورا؟ 

  شاعیر چیگینلرینی چکدی. 

  - بیلمیرم، اولا بیلسین اوردا مالایزییالیلار یاشاییر، اونا گؤره. 

  شاعیر چاشدی. سونرا اؤزونو اله آلدی: 

  - اولا بیلسین، ماشین قهوه یی رنگده ایدی، اونا گؤره، - دوشونه رک علاوه  ائتدی، - نه ایسه اوردا قهوه یی یه چالان بیر شئی واردی. یوخسا سینقاپور هاردان گلیب اورا دوشه بیلردی؟ 

  - دئمک، بئله. باشقا شاهیدلر دئییرلر کی، آوتوموبیل ماوی ایدی، توند-قیرمیزی ایدی، قارا ایدی، کیمه ایناناق؟ 

  - منه. من دئین رنگ گؤز اوخشاییر. 

  -  " قیریلمیش زانباق توزا باتدی " ، بو سرخوش دیلنچی نین نظرده توتولماسیدیر؟ 

  - من اونون حاقیندا سیز دئین کیمی یازا بیلمزدیم! - شاعیر پرت اولدو. - او قادین ایدی، وسسالام. آیدیندیر؟ 

  - آها! بس بو ندی:  " ائی قو قوشونون بوغازی! ائی سینه! ائی طبیل! "  بونلار سربست آسسوساسییالاردیر؟ 

  - وئرین باخیم، - شاعیر شئیر یازیلمیش کونوئرتین اوستونه طرف اَییلدی، - هیمم…  " ائی قو قوشونون بوغازی! ائی سینه! ائی طبیل و قوشا چوبوقلار… "  بونلارین معناسی گؤره سن ندیر؟ 

  - باخ ائله من ده اونو بیلمک ایسته ییرم، - پولیس مأمورو کینایه ایله علاوه  ائتدی. 

  - دایانین، - نئراد دوشونجه یه غرق اولدو، - آخی بو اوبرازلاری نه ایسه منه دیقته ائتمیشدیر… دئیین گؤروم، ایکی رقمی قو قوشونون بوغازینا بنزمیرمی؟ باخین! 

  او کارانداشلا کاغیذا  " 2″ یازدی. 

  - آها! - مئیزلیک آرتیق گئرچکدن ماراقلاندی. - بس، بو  " سینه " ؟ 

  - بو کی  " 3″ رقمیدیر، آخی او ایکی یاریمچئوره دن عیبارتدیر کی، او دا سینه ده کی  دؤشلردیر. 

  - قالیر طبیل و چوبوقلار! - پولیس مأمورو هیجانلا قیشقیردی. 

  - طبیل و چوبوقلار… - نئراد فیکره گئتدی.- طبیل و چوبوقلار. یقین کی، بو بئش رقمیدیر، هه؟ باخین. - او کاغیذا  " 5″ رقمینی یازدی. - آلتداکی دایره وی حیصه سی طبیله اوخشاییر، اوستونده ده ایکی چوبوق وار. 

  - دئمک بئله، - دئیه رک مئیزلیک 235 رقمینی کاغیذا یازدی. - سیز امینسینیزمی آوتوموبیلین نؤمره سی ایکی یوز اوتوزبئش ایدی؟ 

  - نؤمره؟ منیم هئچ بیر نؤمره یادیمدا قالماییب، - نئراد قطعیتله اعتیراض ائتدی. - آنجاق اوردا نه ایسه بئله بیر شئی اولماسا، من بئله یازا بیلمزدیم. ظنیمجه بو شئعیرین ان اوغورلو یئریدیر، سیز نئجه دوشونورسونوز؟ 

   

  ایکی گوندن سونرا مئیزلیک نئرادین یانینا گلدی. بو دفعه  شاعیر یاتمامیشدی. اونون یانیندا گنج بیر قیز دا وار ایدی. او ال-آیاغا دوشسه ده پولیس مأمورونا تکلیف ائتمه یه بیر استول دا تاپا بیلمه دی. 

  - من بیر دقیقه لییه گلمیشم، - مئیزلیک اونون ناراحاتلیغینی سوووشدوردو. - گلدیم سیزه دئیم کی، او دوغرودان دا ایکی یوز اوتوزبئش نؤمره لی ماشین ایمیش! 

  - هانسی آوتوموبیل؟ - شاعیر تعجوبلندی. 

  -  " ائی قو قوشونون بوغازی! ائی سینه! ائی طبیل و بو چوبوقلار! "  - مئیزلیک بیرنفسه سؤیله دی. - سینقاپور باره سینده ده دوغرو چیخدی. آوتوموبیلین رنگی قهوه یی ایمیش. 

  - آها! - ندن صؤحبت گئتدیگی شاعیرین ایندی یادینا دوشدو. - باخ گؤرورسونوزمو، داخیلی رئاللیق نه دئمکدیر. ایسته ییرسینیزسه، سیزه ایکی-اوچ شعئیریمی اوخویوم؟ سیز ایندی اونلاری باشا دوشه بیلرسینیز 

  - باشقا بیر واختدا! - پولیس مأمورو تئزجنک جاواب وئردی. - منیم باشیما بیر ده بئله حادیثه  گلسه، یاخشیمی؟ 

   چئویرن : سولطان مرزیلی، 

   کؤچورن : عباس ائلچین