+0 بگندیم
اوشاقلار اوچون ناغیل :
جیک جیک خانیم
بیری وار ایدی، بیری یوخ ایدی، بیر سئرچه وار ایدی. آدی جیک-جیک خانیم ایدی. بیر گون جیک-جیک خانیم بو قاراتیکان کولوندان، او بیرینه قونوب جیک-جیک ائله ییردی.
بیردن جیک-جیک خانیمین آیاغینا تیکان باتدی، نه قدر اللشدی، چیخارا بیلمه دی. گؤزلری نین یاشینی تؤکوب آغلاماغا باشلادی.
قاری ننه اونو گؤروب سوروشدو:
-آی جیک-جیک خانیم، نازلی خانیم، مزه لی خانیم، نییه آغلاییرسان؟
جیک-جیک خانیم آغلایا-آغلایا قاری ننه یه جاواب وئردی:
-آی قاری ننه، آیاغیما تیکان باتیب، قاناییب، گل چیخارت!
قاری ننه جیک-جیک خانیمین آیاغیندان تیکانی چیخاریب تندیره آتدی.
جیک-جیک خانیمین کئفی دورولدو. بیر او یانا، بیر بو یانا اوچوب دئدی:
-قاری ننه، منیم تیکانیمی قایتار!
قاری ننه دئدی:
-هارادان آلیم، آتدیم تندیره، یاندی.
جیک-جیک خانیم دئدی:
-منه نه بورج، تیکانیمی وئر! وئرمه سه ن، چؤرگینی گؤتوروب قاچارام.
قاری ننه گولدو.
جیک-جیک خانیم او یانا اوچدو، بو یانا اوچدو، قاری ننه نین چؤرگینی گؤتوروب قاچدی.
جیک-جیک خانیم گؤی ایله اوچوردو، گؤردو یئرده بیر چوبان قویون ساغیر. یئره قوندو، چوبانا طرف گلیب دئدی:
-برکتلی اولسون، چوبان قارداش! چؤرک گتیرمیشم، آل، سوده دوغرا، یئ!
چوبان چؤرگی آلدی، چاناغینا دوغرادی، اوستونه ده سود تؤکوب دئدی:
-جیک-جیک خانیم، نازلی خانیم، مزه لی خانیم، گل سن ده یئ.
جیک-جیک خانیم جاواب وئردی:
-من توخام، یئمیرم، اؤزون یئ.
چوبان چؤرگی یئییب قورتاردی.
جیک-جیک خانیم قانادلارینی یئلله دیب دئدی:
-آی چوبان قارداش، منیم چؤرگیمی وئر، گئدیرم.
چوبان دئدی:
-چؤرگینی هارادان آلیم؟ یئدیم، گئتدی.
جیک-جیک خانیم دئدی:
-منه نه بورج یئدین. چؤرگیمی وئر، یوخسا قویونونو گؤتوروب قاچارام!
چوبان گولوب دئدی:
-آی جیک-جیک خانیم، نازلی خانیم، منده نه گوناه وار کی، قویونومو آپاراسان؟ چؤرگی اؤزون وئردین، من نه دئدیم.
جیک-جیک خانیم دئدی:
-گؤر ایندی سنین باشینا نه اویون گتیره جگم؟
جیک-جیک خانیم او یانا اوچدو، بو یانا اوچدو، چوبانین قویونونو گؤتوروب قاچدی. چوبان قیشقیرماغا باشلادی:
-آی آمان، آغام منی اؤلدوره جک!
جیک-جیک خانیم جایناغیندا قویون اوچوردو، گؤردو کی، بیر دسته آتلی گلیر، اونلارا یاخینلاشیب سوروشدو:
-آی قارداشلار، هارا گئدیرسینیز؟
آتلیلار جاواب وئردیلر:
-جیک-جیک خانیم، نازلی خانیم، گئدیریک پادشاها گلین گتیرک.
جیک-جیک خانیم اوچوب پادشاهین قاپیسینا قوندو، قویونو خیدمتچیلره وئریب دئدی:
-آلین، پادشاهین تویونا گتیرمیشم.
جیک-جیک خانیم ایچری گیریب یوخاری باشدا اَیلشدی.
خیدمتچیلر قویونو کسیب، کاباب بیشیردیلر، قوناقلارا پایلادیلار.
قازی ایله جیک-جیک خانیما دا بیر قابدا کاباب قویدولار. قازی تئز-تئز یئییب جیک-جیک خانیمی آج قویدو.
جیک-جیک آجیغا دوشوب پادشاها دئدی:
-منیم قویونومو وئر!
دئدیلر:
-قویونو یئمیشیک، قورتاریب گئدیب.
جیک-جیک خانیم دئدی:
-اونو-بونو بیلمیرم، قویونومو وئریرسینیز، وئرین، وئرمیرسینیز، گلینینیزی آپاراجاغام!
هامی گولدو.
جیک-جیک اوچوب چپرین اوستونه قوندو، گؤزله دی.
گلینی زورنا-بالابان چالا-چالا گتیردیلر. جیک-جیک خانیم او یانا اوچدو، بو یانا اوچدو، گلینی آتین اوستوندن آلیب قاچدی.
پادشاه بیر باشینا دؤیدو، بیر گؤزونه، آغلادی.
جیک-جیک خانیم گلینی هوندور بیر آغاجین دیبینده یئره قویدو، گؤردو کی، آغاجین کؤلگه سینده بیر آشیق ساز چالیر.
جیک-جیک خانیم دئدی:
-سالام علئیکوم، آی آشیق قارداش، گل گلینی وئریم سنه، سن ده سازی وئر منه.
آشیق سئوینیب دئدی:
-آی جیک-جیک خانیم، نازلی خانیم، مزه لی خانیم، سندن من هئچ بیر شئی اسیرگه مرم. آل سازی!
جیک-جیک خانیم سازی آلدی، گلینی وئردی.
آشیق گلینی گؤتوروب ائوینه آپاردی. جیک-جیک خانیم آغاجین گؤلگه سینده اوتوروب، سازی دینقیلداتماغا باشلادی.
تیکان وئردیم، چؤرک آلدیم،
دینقیل سازیم، دینقیل سازیم.
چؤرک وئردیم، قویون آلدیم،
دینقیل سازیم، دینقیل سازیم.
قویونو وئردیم، گلین آلدیم،
دینقیل سازیم، دینقیل سازیم.
گلینی وئردیم، بیر ساز آلدیم،
دینقیل سازیم، دینقیل سازیم.
ائله او گوندن بری جیک-جیک خانیم عؤمرونو ساز چالا-چالا، توی-ناغارا ایله کئچیریر.
کؤچورن :عباس ائلچین
