ائلچین

تورک دیلی و ادبیاتی

شنبه گونو اوغروسو /گابریل گارسیا ماركز

+0 بگندیم

شنبه گونو اوغروسو

 قابریئل قارسییا ماركئز /گابریل گارسیا ماركز/

  چئویرن: كامیل زئینالوو 

       یالنیز هفته سونلاریندا اوغورلوق ائدن هوقو یئنه ده شنبه گئجه‌سی بیر ائوه گیردی. تخمینن 30 یاشلاریندا اولان و خرونیكی یوخوسوزلوقدان اذیت چكن گؤزل ائو صاحیبه‌سی آننا اونو جینایت باشیندا یاخالادی. اوغرونون تاپانچا ایله هده-قورخو گلمه‌سیندن قورخان قادین بوتون داش-قاشینی، قییمتلی اشیالارینی اونا وئردی، آنجاق خواهیش ائتدی كی، 3 یاشلی قیزی پاۇلی‌یه یاخینلاشماسین. 

       شوبهه‌سیز، قیز اونو گؤروردو، اوغرو ایسه سِحرباز حیله‌لری گؤسترمكله اونو اله آلماغا چالیشیردی. هوقو دوشوندو:  " اگر بوردا هر شئی یاخشیدیرسا، نییه بئله تئز گئدیم كی؟ "  بوتون هفته سونونو قالا و وضعیتدن تام شكیلده ذؤوق آلا بیلردی، چونكی قادینین اری ایشگوزار سفری ایله باغلی اولاراق بازار گونو گئجه گله‌‌جكدی (بونو اونلاری ایزله‌دیگینه گؤره بیلیردی). اوغرو بو باره‌‌‌ده چوخ فیكیرلشمه‌دی: ائو صاحیبی‌نین شالوارینی گئییندی و آننادان خواهیش ائتدی كی، اونون اوچون نسه بیشیرسین، آنباردان شراب گتیرسین و شام ائتمك اوچون یاخشی بیر ماهنی قویسون، چونكی موسیقی‌سیز یاشاماق مومكون دئییل. 

      پاۇلی‌یه گؤره ناراحات اولان آننا شام یئمگینی حاضیرلایا-حاضیرلایا بو حریفی ائودن چیخارماق باره‌ده فیكیرلشیردی. آنجاق الیندن هئچ نه گلمیردی، چونكی هوقو تئلئفون خطلرینی كسمیشدی، ائو ایسه اوزاقدا یئرلشیردی. گئجه‌نین بیر عالمی، هئچ كیم ده گئدیب-گلمیر. آننا قرارا گلدی كی، هوقونون قدحینه یوخو درمانی آتسین. شام یئمگی زامانی هفته ایچی بیر بانكدا گؤزتچی ایشله‌ین هوقو آشكار ائتدی كی، سن دئمه، آننا رادیودا اونون هر گئجه قولاق آسدیغی سئویملی موسیقی وئریلیشی‌نین آپاریجیسیدیر. هوقو قیزغین پرستیشكار ایدی. كاسئتده بؤیوك موغننی بئننی‌نین  " نئجه اولدو "  ماهنیسینا قولاق آسا-آسا موسیقی و موسیقیچیلردن صؤحبت ائتدیلر. آننا اونو یاتیرماغا پئشمان اولموشدو، چونكی هوقو اؤزونو چوخ ساكیت آپاریردی و اونا ضرر وورماق و یا زور ایشلتمك نیتی یوخ ایدی، آما آرتیق گئجدیر، یوخو درمانی آرتیق قدحده ایدی و اوغرو اونو ممنونیتله ایچیردی. آنجاق بیر یانلیشلیق اولموشدو، ایچینده حب اولان قدحی آننا گؤتورموشدو. اونا گؤره ده بیر گؤز قیرپیمیندا یوخویا گئتدی. 

       ائرته‌سی گون سحر آننا اویاناندا گؤردو كی، قوناق اوتاغیندا پالتارلی اوزانیب و اوستونه ده سلیقه ایله ادیال سالینیب. هوقو و پاۇلی باغچادا اویناییرلار، گؤرونور، سحر یئمگینی آرتیق یئمیشدیلر. آننا اونلارین بیر-بیری ایله یاخشی یولا گئتدیگینه سئویندی. اوسته‌‌لیك، بو اوغرونون یئمك حاضیرلاماسی آننانین خوشونا گلیردی، هر نئجه اولسا دا، هوقو كیفایت قدر یاراشیقلی ایدی. آننا غریبه  خوشبختلیك حیسّی كئچیرمه‌یه باشلادی. 

       ائله بو واخت آننانین بیر رفیقه‌سی گلیب اونو یئمه‌یه دعوت ائتدی. هوقونون عصبیلشدیگینی گؤرن آننا یالاندان اوشاغین خسته اولدوغونو بیلدیریب اونونلا تئز ساغ اوللاشدی. بئله‌جه، اونلار اوچو بیرلیكده بازار گونوندن ذؤوق آلماق اوچون ائوده قالدیلار. هوقو دونن گئجه فیت چالا-چالا سیندیردیغی پنجره‌لری و تئلئفونو تمیر ائله‌دی. آننا اونون چوخ گؤزل دانسون* اویناماغی باجاردیغینی اؤیرندی. بو رقص آننانین چوخ خوشونا گلیردی، آما هئچ واخت هئچ كیمله اوینامامیشدی. هوقو اونا بیر پارچانی اویناماغی تكلیف ائتدی و اونلار رقصه ائله آلوده اولموشدولار كی، آخشام دا دوشدو. پاۇلی اونلارا باخیر، ال چالیردی و نهایت، یوخویا گئتدی. اونلار ایسه اویناماقدان یورولوب رقصی زالداكی كرئسلونون اوستونه ییخیلماقلا بیتیردیلر. 

       واختین نئجه كئچدیگینی حیسّ ائتمه‌میشدیلر. آرتیق اری نین قاییدان واختی ایدی. آننا اعتیراض ائتسه‌ده، هوقو اوغورلادیغی دئمك اولار كی، هر شئیی گئری قایتاردی، اونا ائوینه اوغرولارین گیرمه‌مه‌سی اوچون بیر نئچه مصلحت ده وئردی. سونرا هر ایكیسی ایله كدرلی شكیلده ویدالاشدی. هوقو آرتیق گؤزدن ایتیردی كی، آننا اونو سسله‌دی. هوقو گئری قاییداندا قادین اونون گؤزلرینه دیقتله باخاراق دئدی كی، گلن هفته اری یئنه سفرده‌دیر. شنبه گونو اوغروسو یولا دوشنده اؤزونو خوشبخت حیسّ ائدیردی، رایونون كوچه‌لرینده رقص ائدیردی، هاوا ایسه یاواش-یاواش قارالیردی. 

دانسون* - كوبا میللی رقصی

كؤچورن:عباس ائلچین