یوخو

یازان : عباس ائلچین

".... سن هارالاردا ایدین ؟ سنی گؤیده آختاریردیم یئرده تاپدیم " دئییب  بیلگینی سیخدی. كیشی قیشقیریب یوخودان داشلاندی. گونش آچیشقادان ایچری بویلانمیشدی.  قان تر ایچینده ایدی. آیاغا قالخدی. اورگی كؤكسونو سؤكوب چیخاجاقدی سانكی. یئنه بو قورخونج یوخو ایله آییلیردی. " بو بیر اویاری می ؟ بو تئزلیكده اؤله جگم می؟ " دئییندی كیشی- " یوخ! یوخ ! اؤلمك ایسته میرم، هله چوخ گنجم. اؤلومون الیندن بیر یئرلره قاچمالی یام . نئجه اولورسا اولسون اؤلومسوزلوگو تاپمالی یام....".

كیشی بوخچاسینی باغلادی. آز گئدیب اوز گئدیب دره تپه دوز گئده جكدی. ال ترپتملی ایدی. تلسیك یولا قویولدو. هارا گئده جگینی بیلمیردی آنجاق باش آلدی گئتدی. بیچینچیلرین آیرانیدان ایچدی ؛ چوبانلارین دوغراماجیندان یئدی ، آغاجلارین كؤلگه سسینده یاتدی.

گونلرین بیر گونونده ، بیر اورمانا یئتیشدی. اورمانچی آغاج قیرماقدایدی. كیشینی گؤردوكده ایشدن ال چیكیب آلنینین ترینی الینین دالی ایله سیله رك سؤروشدو :

_" اشی ! هارادان گلیب هارا گئدیرسن ؟ "

كیشی اولوب بیتنلری دانیشدیقدا، اورمانچی بارماغی ایله اوجسوز-بوجاقسیز اورمانی گؤستره رك سوروشدو:

-"سنجه، نئچه ایلده بو اورمانین بوتون آغاجلارینی قیرا بیله رم؟"  

كیشی گولومسه یه رك :

-" بئله كی سن قیریرسان... اوچ-دؤرد یوز ایل چكر "- دئدی.

-" بئله ایسه ، بو اورمانین سون آغاجی قیریلانادك منیمله بورا دا یاشایا بیلرسن " – دئدی اورمانچی.

كیشی :

-" اوچ – دؤرد یوز ایل  اوزون بیر عؤموردور آنجاق اؤلومسوزلوك دئییل.. یوخ! ، یوخ! من بورادا قالا بیلمه رم .." دئیه یولا دوغرولدو.

كیشی یوللاری كسه – كسه گلدی بیر داش كسنه یئتیشدی. داش كسن قوجامان بیر قایانی چاپماقدایدی. اولوب بیتنلر دانیشیلدیقدان سونرا داش كسن كیشییه اوزونو توتوب دئدی:

-" گؤردویون بو داغلاری چاپیب قورتارانادك منیم له قالسان  اوچ – دؤرد مین ایل یاشا بیلرسن  . نه دئییرسن قالیرسانمی ؟"

-" اوچ- دؤرد مین ایل اوزون بیر عؤموردور آنجاق اؤلومسوزلوك دئییل . یوخ! یوخ! من بوردا دا قالا بیلمه رم " – دئییب یئنه یولا دوزلدی كیشی.

-" یاش كسن ، داش كسن ، باش كسن ، آز یاشایار . اؤلومسوزلوكله بونلارین بیر ایلیشكیسی اولا بیلمز.."- دئیه دوشونن كیشی ایكی یولون آیریجیندا بیر قوردلا قارشیلاشدی.بئنیندن " قورد اوزو اوغورلو اولار" كئچه رك قوردان  اؤلومسوزلوگون سالیغینی توتدو.

-" بیزیمله قالسان سونسوزادك یاشایا بیله جكسن "- دئدی قورد.

كیشی  شاشغینلیق لا  قوردون سؤزونو یئنه له دی :

-" بیزیمله ..!؟"

قورد ساغ یولون سونوندا دومانلارین ایچینده گیزلنن داغین یاماجینداكی ائوجیگی  گؤستره رك :

- ” من له قاری "- دئدی –" او، یولونو گؤزله ییر ، تلس !"

 ***

كیشی ایللر ایدی  قورد قاری ایله یاشاییردی آرتیق آی -گونون سایی الیندن چیخمیشدی . گونلرین بیر گونونده كیشی اوزونو قارییا توتوب دئدی:

- ´ قاری ننه ، چوخداندیر سیزله بوردا یاشاییرام آنجاق دوغروسونو ایسته سنیز اورگیم یوردومادان یانا بیر آز داریخیر. ایسته ییرم گئدیب یورد – یوواما بیر باش چكم " .

قاری گولدو –" اوغلوم ، سن هئچ بیلیرسن می نئچه ایلدیر بورادا یاشاییرسان؟ سن بئله دوشورسن ایندی سنین یورد – یوواندان بیر ایز – توزمو قالیب؟ "

كیشی ایستگی نین اوزه رینده آیاق دیره یینجه ، قاری بیر آت گتیریب جیلووونو اونون الینه وئره رك دئدی:

-" اوغلوم ! گئت یوردونو دولاندا تئز گل . ساقین آتدان آشاغی یئنمه یه سن. قورخولودور؛ هر آن اؤلومه توتولا بیلرسن."

كیشی آتی مینیب یوردونا ساری اوز قویدو . قاییتدیغی یئرلر سانكی گلدی یئرلر دئییلدی. گؤردوگو داش كسندن ، داغدان بیر ایز- توز قالمامیشدی. اورمانچی ایله بولوشدوغو اورمانین یئرینده ایندی بؤیوك بیر كند سالینمیشدی.  یورد – یوواسیندا  تانیمادیق باشقا بیری لری یاشاییردیلار.هوش باشیندان چیخماقدایدی. آتینین باشینی  چئویردی قاری ننه نین ائوینه ساری. دالغین – دالغین قاییدیردی.

-" دلیقانلی بو آرابایا بیر ال آتارسان می ؟ "

كیشی اؤزونه گلدی. قوجا بیر كیشی ایدی چاغیران. قوجانین ائششك آراباسی چامورا باتمیش نه قدر گوجنیردیسه ترپتنمیردی یئریندن. آربا دولو ایدی دمیر باشماقلار ایله.كیشی آتدان ائنیب قوجا ایله چیگین-چیگینه آرابانی ایته له دی. كیشی، " بو  دمیر باشماقلار نه دیر قوجا ، یاشیمدان بئله بیر شئی گؤرمه میشدیم! "دئیه سوروشدو . قوجا، كیشی نین قولوندان توتاراق:

-" بونلار سنی آختاراركن ییرتدیغیم دمیر باشماقلاردیر كیشی ، سن هارالاردا ایدین ؟ سنی گؤیده آختاریردیم یئرده تاپدیم " دئییب بیلگینی سیخدی. كیشی قیشقیریب یوخودان داشلاندی. گونش آچیشقادان ایچری بویلانمیشدی...

1390.8.2

حیكایه، آذربایجان ائل یارادیجیلیغیندان آلینمیشیدیر.