​

2021  نوبل ادبیات اؤدولونو قازانان: عبدالرزاق قورنه

عبدالرزاق  قورنه (1948، زنگیبار سولطان‌لیغی) - اینگیلیس دیلینده یازان تانزانیالی یازیچی . اینگیلیس‌ده یاشاییر. 2021.جی ایلده ادبیات اوزره نوبل اؤدولو قازانیب.   

Booker و Whitbread اؤدول‌لری طرفیندن قیسا سیاهیا آلینان "Paradise"  ( "جنّت" ) (1994)،  "Desertion"  ("فراری") (2005) و لوس آنجلس تایمز بووک پرایزکیتاب اؤدولو اوچون قیسا سیاهیا آلینمیش "By the sea"  ( " دنیز کناریندا "  " (2001) رومان‌لاری نین مؤلیفی‌دیر.

یاشامی

  1948-جی ایلده زنگبار آداسیندا عرب اصیللی موسلمان عاییله‌سینده آنادان اولوب. 1968-جی ایلده زنگیباردا آنتی-عرب فیکیرلری سببیندن اینگیلیسه کؤچه‌رک تحصیلینی اورادا داوام ائتدیردی. 1980-1982 -جی ایل‌لرده نیجریه‌ده‌کی  بایئرو بیلیم‌یوردوندا  موحاضیره اوخودو. 1982 -جی ایلده اینگیلیسده کی  کِنت بیلیم‌یوردوندا دوکتورلوق درجه‌سی آلدی. 1985 -جی ایلده موعلیم اولاراق قبول ائدیلدی و ایلک نؤوبه‌ده شرقی آفریقا، هیندیستان و کارائیب حؤوضه‌سینده کی  اینگیلیس موستملکه‌‌لرینده  اولان پوست‌موستملکه ادبیات و دیاسپور یازیچی‌لاری‌نین یارادیجی‌لیغی حاقیندا موحاضیره‌لر اوخودو. حال-حاضیردا، پروفسوردور، عئینی زاماندا کِنت بیلیم‌یوردونون اینگیلیس دیلی بؤلمه‌سی‌نین یوکسک لیسانیس شؤعبه‌سینه رهبرلیک ائدیر .    

  ایکی جیلدلیک  "‌آفریقا یازی‌لارینا دایر مقاله‌لر‌"  توپلوسونون ایجراچی رداکتورو اولدو و. س. نایپاول، سلمان رشدی و زوئه وایکومب داخیل اولماقلا بیر سیرا موعاصیر پوست‌موستملکه یازیچی‌لار یارادیجی‌لیغی اوزره تدقیقات‌لارین مؤلیفی‌دیر.

یارادیجی‌لیغی

  عبدالرزاق قورنه آفریقالی قاچقین‌لارین، کؤچکون‌لرین عذابلی حیاتینا، اونلارین غرب جمعیتیندده اؤزلرینه یئر تاپا بیلمه‌مه‌لرینه توخونان پسیکولوژی رومان‌لار یازیب. نوبل اؤدولونو ده محض موستملکه‌چی‌لیگین نتیجه‌لرینی حساس‌لیقلا قابارتدیغینا، قاره‌‌لر و مدنیت‌لر آراسینداکی اوچورومدا چابالایان قاچقین طالع‌لرینی بوتون چیلپاق‌لیغی ایله ایشیقلاندیردیغینا گؤره آلیب. 

عبدالرزاق قورنه اینگیلیس و سواحیلی دیل‌لرینده 10 رومان و چوخلو حکایه‌لر یازیب.   

  او، 1987-جی ایلده قلمه آلدیغی  "Memory of Departure"  (آیریلیشین خاطیره‌سی) آدلی ایلک رومانیندا آفریقادا کئچن گنجلیک ایل‌لری نین آردیندان اؤلکه‌سینی ترک ائدن حسن اوبرازی‌نین یادداشیندا ایز بوراخان پوست‌موستملکه دؤنمی‌نین میلّی کیملیک، شخصین اؤزونوآختاریشی مسله‌لرینی اینجه‌له‌ییب. 

  1988-جی ایلده قلمه آلدیغی ایکینجی رومانی - "Piligrim's Way"(زوّارلار یولو)  رومانیندا داها یاخشی بیر یاشام اومیدی ایله اینگیلیسه گلن تانزانیا اصیللی داوود آدلی شخصین موعاصیر اینگیلیس جمعیتینده کؤچگون‌لره قارشی دوشمن موناسیبت بسله‌مه‌سی حال‌لاری ایله قارشیلاشماسیندان، پارانویک بیر دوروم یاشاماسیندان و چاره‌نی، چیخیش یولونو تانزانیاداکی کئچمیشینی تامامیله سیلیب اؤزونو تام بیر اوروپالی کیمی آپارماقدا گؤرمه‌سیندن بحث ائدیر. 

  یازیچی نین 1990-جی ایلده نشر ائتدیردیگی  "Dottie"  رومانیندا ایسه، دوتی بادورا (فاطما بالفوور) اوبرازی اوزریندن یئنه ده گلمه بیر شخصین اوروپادا بنزر بیر یابانچی‌لاشما، اؤزگه‌لشمه پروسه‌سینی تصویر ائدیب. 

  فاطما بالفورون ملَزکیملیگی، عیرق و اتنیک منسوبیت مسله‌سی نین موهاجیرلر، سورگون‌لر، کؤچگون‌لر اوزرینده کی  تراوماتیک تاثیرلری‌نین اینجه‌لیک‌لرینی اوزه چیخاریر. 

عبدالرزاق قورنه‌نین آفریقادا و غرب اؤلکه‌لرینده بؤیوک ماراغا سبب اولان  "By the Sea"  (دنیز کناریندا) رومانیندا ایمپریالیست اؤلکه‌لرده (غربده) تحصیل آلان شخص‌لرین فرقلی دونیاگؤروشو ایله آفریقانین یئرلی عادت- عنعنه‌لری‌نین قارشیلاشماسی‌نین دوغوردوغو ضیدیت‌لری  تصویر ائدیلیر. رومانداکی صالح عمر آدلی گنجین "قرآن‌"ی اؤیرنمکدن دویدوغو میلّی-دینی باغلی‌لیق حیس‌لری ایله موستملکه‌چی اؤلکه‌ده آلدیغی غرب تحصیلی‌نین قازاندیردیغی دونیوی بیلگی‌لر و دوشونجه‌لر آراسیندا چارپیشماسی، چابالاماسی اوخوجولارین دیقتینه چاتدیریلیر. 

  عبدالرزاق قورنه اؤزو ده قاچقین، کؤچگون اولدوغو اوچون رومان‌لارینداکی اوبرازلارین داخیلی دونیاسینی، اونلارین یاشانتی‌لارینی، حیس‌لرینی بوتون خیردالیق‌لاری ایله، دولغون شکیلده تصویر ائتمگی باجاریر. 

  بو آفریقالی یازارین رومان‌لاریندا قالدیردیغی بو مسله‌لر بو گون شرق اؤلکه‌لری اوچون ده،غرب اوچون ده اولدوقجا آکتوال‌دیر. لیبی‌دن، سوریه‌دن، عراقدان، افغانیستاندان غربه اوز توتان قاچقین‌لارین، کؤچگون‌لرین هر بیری نین طالعیی بیر رومان، بیر فیلم مؤوضوسودور.  

اثرلری

•  "آیریلیش خاطیره‌سی "  (اینگ. Memory of Departure ، 1987 ) 
•  " زووارلارین یولو "  (اینگ. Pilgrims Way ، 1988) 
•  " دوتتی "  (اینگ. Dottie ، 1990) 
•  " جنّت "  (اینگ. Paradise ، 1994) 
•  " سوکوتا حئیران "  (اینگ. Admiring Silence ، 1996) 
•  " دنیز کناریندا "  (اینگ. By the Sea ، 2001) 
•  " فراری "  (اینگ. Desertion ، 2005) 
•  " آنام آفریقادا بیر تارلادا یاشاییردی "  (اینگ. My Mother Lived on a Farm in Africa ، 2006) - قیسا حکایه‌لر توپلوسو 
•  " سون هدیه "  (اینگ. The Last Gift ، 2011) 
•  " چینقیل اورک "  (اینگ. Gravel Heart ، 2017)  

کؤچورن: عباس ائلچین