+0 بگندیم
بیر كالیفورنییالی‌نین حئكایه‌سی
مارك تواین
چئویرن: نرمین كریملی
گنج‌ایكن كالیفورنییایا قیزیل آختاریشینا گئتمیشدیم. منیم هئچ واخت وارلی اولاجاق قدر پولوم اولماییب. اورادا دییارین " ستانیسلاو " آدلانان ان گؤزل بؤلگه‌سینی كشف ائتدیم. بورا اینسانا یئر اوزونده كی جنّتی خاطیرلادیردی. خفیف كولكلرین آغاجلارا توخوندوغو یئرلرده قالین مئشه‌لیك و یاشیل تپه‌لیكلر وار ایدی.
ستانیسلاویا مندن ایللر اول، قیزیل آختارماق مقصدی ایله اینسانلار گلیبمیش. اونلار بورادا بانكلاری، مكتبلری، ماغازالاری اولان كیچیجیك بیر شهر سالمیشلار. همچنین، عاییله‌لری اوچون ائولر ده تیكمیشلر.
ایلك زامانلار اونلار ستانیسلاونون تپه‌جیكلریندن قیزیل تاپا بیلسه‌لر ده، سونرالار بو اوغور چوخ چكمه‌دی . بیر نئچه ایل سونرا ایسه قیزیل یوخا چیخدی. من ستانیسلاویا چاتاندا آرتیق اورادا مسكونلاشان اینسانلار دا یوخا چیخمیشدیلار. ایندی كوچه‌لری اوتلار باسمیش، ائولرین اوزرینی ایسه وحشی قیزیل‌گول كوللاری ساریمیشدی.
بیر كیشی كیچیك بیر ائوین قارشیسیندا دایانمیش، منه باخیب گولومسه‌دی. بو ائوین اوزرینی دییارداكی دیگر ائولردن فرقلی اولاراق، وحشی قیزیل‌گول كوللاری اؤرتمه‌میشدی. ائوین قارشیسیندا سئویملی، خودمانی باغچا وار ایدی و اورادا ماوی، ساری گوللر اكیلمیشدی. خفیف یای كولگی ایسه پنجره‌لردن آسیلمیش آغ پرده‌لری یئلله‌دیردی.
كیشی قاپینی آچدی و منی ایچری دعوت ائتدی. ایجری گیرنده گؤزلریمه اینانا بیلمه‌دیم. من هفته‌لرله شاختاچیلارین دوشرگه‌سینده دیگر قیزیل آختارانلار ایله بیرگه یاشامیشدیم. بیز برك یئرده یاتیر، سویوق مئتال قابلاردا كونسئرولشدیریلمیش سویوق لوبیا یئییر و بوتون گونوموزو قیزیل آختارماقلا كئچیریردیك.
آنجاق بو كیچیجیك ائوده سانكی روحوم یئنیدن حیاتا قاییتدی.
تاختا دؤشمه‌نین اوزرینه خالچا سریلمیش، دیوارلاردان ایسه شكیللر آسیلمیشدی. ستوللارین اوزرینده گوللرله دولو چینی قابلار و كیتابلار وار ایدی. بو ائوی ائو ائدن بیر قادین الی اولموشدور.
قلبیمده‌كی سئوینج حیسی سانكی اوزومده عكس اولونوردو. كیشی بونو حیس ائدیب گولومسه‌یه‌رك دئدی:
- بلی، بوتون بونلاری او ائدیب. اونون اللری بو اوتاقداكی هر شئیه توخونوب.
دیوارداكی رسملردن بیری یئرینه دوزگون آسیلمامیشدی. كیشی بونو گؤروب دوزلتدی و بیر نئچه دفعه آرخایا چكیلیب یئری‌نین دوز اولوب-اولمادیغینی یوخلادی.
- " او، همیشه اوتاغی سلیقه‌یه سالیر "-دئیه‌رك گولومسه‌دی.
كیشی دانیشاركن اوزونده كی ایفاده دن من بئله حیس ائتدیم كی، او منیم اوتاقدا باشقا بیر شئیه ده فیكیر وئرمه‌ییمی ایسته‌ییر. اطرافا گؤز گزدیردیم. گؤزلریم اوتاغین كونجونه ساتاشاندا، او اللرینی بیر- بیرینه ووراراق سئوینجله گولمه‌یه باشلادی.
" بو اودور " - دئیه او قیشقیردی. سن اونو تاپدین. من بیلیردیم كی، سن بونو ائده‌جكسن. بو اونون شكلیدیر. من شكلی الیمه آلدیم. حیاتیمدا گؤردویوم ان گؤزل قادین رسمی ایدی. قادینین اوزونده حیاتیم بویو گؤرمه‌دیگیم شیرینلیك و مولاییملیك وار ایدی.
آدام رسمی الیمدن آلدی و دیقتله اونا باخدی.
- " بیز ائولننده، اونون اون دوققوز یاشی وار ایدی. سن اونو گؤرنده… گؤزله، سن اونونلا تانیش اولاجاقسان.
-او ایندی هارادادیر؟- دئیه من سوروشدوم.
- " ایندی بورادا دئییل " - او كؤكسونو اؤتوره‌رك دئدی و شكیلی رفه قویدو. او، بورادان تخمینی 40-50 میل اوزاقلیقدا قالان والیدئینلرینی زیارته گئدیب. بو گون گئدیشیندن ایكی هفته كئچیر.
-نه واخت گئری قاییداجاق؟- دئیه من سوروشدوم. كیشی آلچاق سسله دئدی:
-بو گون چرشنبه دیر. او ایسه شنبه گونو آخشام قاییداجاق.
من تأسوفله‌نه‌رك:- " آخی شنبه گونو گئده‌جگم " دئدیم.
- گئتمك؟ خئییر! گرك گئده سن؟ گئتمه. او پیس اولاجاق. گؤردویون كیمی، او اینسانلارلا تانیش اولماغی چوخ سئویر.
من قطعیتله: " خئییر، من گئتمه‌لی‌یم " - دئدیم.
آدام شكیلی یئنیدن یوخارییا قالدیردی و منیم گؤزلریمین اؤنونه گتیره‌رك دئدی:
- ایندی اونون اوزونه باخاراق دئ كی، سن اونونلا گؤروشمك اوچون قالمالی ایدین، آنجاق گئدیرسن.
من شكیله ایكینجی دفعه باخاندا سانكی بیر قوووه فیكریمی دئییشمه‌ییمه تاثیر ائتدی و من قالماغی قرارا آلدیم.
آدام منه آدی‌نین هئنری اولدوغونو دئدی. همین آخشام هئنری و من موختلیف شئیلر حاققیندا، اساسن ده اونون حاقیندا دانیشدیق.
نؤوبتی گون ده بئله‌جه كئچدی. جومه آخشامی بیزیم قوناغیمیز وار ایدی. او، توم آدیندا بوز ساچلی بیر شاختاچی ایدی.
- " من ساده‌جه بیر نئچه دقیقه‌لیگه اونون ائوه نه واخت گله‌جگینی سوروشماق اوچون گلمیشدیم " - دئیه توم ایضاح ائتدی. " یئنی خبر وار؟ "
- " بلی " - آدام جاواب وئردی. منده مكتوب وار. دینله‌مك ایسته‌یرسن؟ او، جیبیندن مكتوبو چیخاردی و بیزه اوخوماغا باشلادی. بو، هئنرییه و باشقالارینا- یاخینلارا، قونشولارا یازیلمیش سئوگی دولو مكتوب ایدی. آدام مكتوبو اوخویوب قورتاراندان سونرا دوستونون اوزونه باخدی.
" یوخ، سن یئنه عئینی شئیی تكرار ائدیرسن، توم. من نه واخت اوندان گلن مكتوبو اوخوسام، سن آغلاییرسان. من بو دفعه اونا دئیه‌جم " .
- " خئییر، سن بونو ائتمه‌مه‌لی‌سن، هئنری " - بوز ساچلی شاختاچی دئدی. من گئت گئده یاشلانیرام، اونا گؤره ده خیردا كدرلی شئیلر بئله منی آغلادیر. من حقیقتن ده اومید ائدیردیم كی، او،بو آخشام قاییداجاق.
نؤوبتی جومه گونو باشقا بیر شاختاچی زیارته گلدی. او، مكتوبو اوخوماغی خواهیش ائتدی. بو مكتوب اونو دا آغلاتدی.
" بیز هامیمیز اوندان اؤترو چوخ داریخیریق " - او دئدی.
نهایت شنبه گونو گلدی. من اؤزوم ده ساعاتیما تئز-تئز باخیردیم. بو، هئنری‌نین دیقتینی چكمیشدی. " سن ده فیكیرلشیرسن كی، نه ایسه باش وئریب، ائله دئییل می؟ " - دئیه او مندن سوروشدو.
گولومسه‌دیم و هر شئیین یاخشی اولدوغونو دئدیم. لاكین بو اونو قانع ائتمه‌دی.
من اونون دوستلاری توم و جوئنین گلدیگینی گؤرنده سئویندیم. یاشلی شاختاچیلار اللرینده گیتارا، ائلجه‌ده بیر بوتولكا ویسكی و گوللر گتیرمیشدیلر. گوللری گولدانا قویدولار، گیتارادا شن و جانلی ماهنیلار ایفا ائتمه‌یه باشلادیلار.
هئنری‌نین دوستلاری اونا فاصیله‌سی اولاراق ایچكیدن وئریردیلر. من ستولون اوستونده قالمیش ویسكی بوتولكاسینا یاخینلاشاندا، توم قولومدان توتاراق منی ساخلادی.
" اونو یئره قوی دیگرینی گؤتور " - او پیچیلدادی.
ساعات گئجه یاریسینی وورماغا باشلایاندا، او، شوشه ده قالان ویسكیدن هئنرییه وئردی.
هئنری بوتون شوشه‌نی بوشالتدی. اونون صیفتی گئت گئده آغاریردی. " دوستلار " - او دئدی. " من اؤزومو یاخشی حیس ائتمیرم. اوزانسام یاخشی اولار " .
سؤزلر آغزیندان چیخاركن هئنری آرتیق یاری‌یوخولو ایدی. بو مقامدا، دوستلاری هئنرینی یاتاغینا داشیدی. اونلار قاپینی باغلاییب گئری قاییتدیلار و گئتمه‌یه حاضیرلاشاندا من دئدیم:
- جنابلار، خواهیش ائدیرم گئتمه‌یین. او، منی تانیمایاجاق، من بوردا غریبه‌م.
اونلار بیر-بیری‌نین اوزونه باخدی. " اونون حیات یولداشی آرتیق اون دوققوز ایلدیر كی، وفات ائدیب " - دئیه توم دیللندی.
- " وفات ائدیب؟، " - من پیچیلدادیم.
- " وفات ائدیب یاخود دا داها پیسی " - او دئدی.
او، ائولندیكدن آلتی آی سونرا والیدئینلرینی زیارت ائتمك اوچون گئتدی. ائوه قاییداركن، اییون آیی‌نین شنبه آخشامی، بورایا چوخ یاخین مسافه ده ایندیانالیلار اونو اسیر آلدیلار. او حادیثه دن سونرا اونو بیر داها گؤرن اولمادی. هئنری عاغلینی ایتیردی. او هله ده ائله ظن ائدیر كی، حیات یولداشی ساغدیر. اییون آیی گلنده، هئنری دوشونور كی، او، والیدئینلرینی زیارت ائتمه‌یه گئدیب و گئری قاییداجاغینی گؤزله‌مه‌یه باشلاییر. هئنری كؤهنه مكتوبلاری چیخاردیر و بیز بیر آرایا توپلاشاندا، اونلاری بیزیم اوچون اوخویور. شنبه گونو آخشام یولداشی‌نین قاییداجاغینی گومان ائدیر. بیز همین گون گلیریك و بوتون گئجه‌نی یاتماسی اوچون ایچكیسینه یوخوگتیریجی درمان آتیریق. بئله‌لیكله، هئنری نؤوبتی ایلی نورمال كئچیردیر.
جوئ كئپكاسینی و گیتاراسینی الینه آلدی و دئدی:
- " بیز بونو هر ایل اییون آیی ائتمیشیك. بیرینجی ایل بیز یگیرمی یئددی نفر ایدیك، لاكین ایندی یالنیزجا ایكی نفر قالمیشیق " .
بو سؤزلری دئییب او كیچیجیك ائوین قاپیسینی آچدی. و بو ایكی آدام ستانیسلاونون قارانلیغیندا غئیب اولدو .
كؤچورن: عباس ائلچین
