ائلچین ELÇİN

تورک دیلی و ادبیاتی

روشوت

+0 بگندیم

روشوت

عمر سیف الدین 

یازان : عؤمر سئیف الدین 

  بازار مئیدانی نین بؤیوك چینار آغاجلاری، یئره دوشن كؤلگه لرینی آلاجالاندیراراق پیچیلداییردیلار. گوجلو كولك اسیردی. وكیل حاجی نامیق افندی كاغیذلاری اوچماسین دئیه، زومرود كؤشكه بنزه ین كیچیك دوكانی نین پنجره لرینی باغلادی. سونرا گئتدی، آچیق قاپینی ایتله یركن هئیبه سی چیینینده، یوینلی آتی نین جیلووو الینده، ساریقلی، قیسا بویلو، یومرو بیر كندلی نین یاخینلاشدیغینی گؤردو. 

  - سالام علی موعلیم، - دئدی، - بئله واختسیز نه آختاریرسان بورادا؟ هله بازارا ایكی گون وار… 

  كندلی ایكی قارا نؤقطه یه بنزه ین باپبالاجا گؤزلرینی داها چوخ قییاراق:  

  - علئیكومسالام نامیق افندی! بلایا دوشموشم. بیر داوا اوچون گلمیشم، - دئیه باشینی بولادی. 

  - ائئ، گل، بیر آز صؤحبت ائدك. 

  - ائدك. 

  - دردینی دانیش باخاق گؤرك. 

  - سندن باشقا كیمه دانیشاجام؟ 

  آتینین جیلووونو تاختا سكامیانین دیرگینه باغلادی. كیچیك دوكانا گیردی. جئویز ماساسینین ساغینداكی آلچاق حصیر كتیلده اوتوردو. هئیبه سینی یانینا قویدو. نامیق افندی نین اوزاتدیغی توتوندن بوكه-بوكه داواسینی دانیشماغا باشلادی. دوشمنی كندین موختاری هویسوزاوغلو ایدی. هویسوزاوغلونون تورپاغیندا علی موعلیم واختیله بیر بینا تیكدیرمیشدی. ایندی خئیلی واخت كئچدیكدن سونرا موختار بو بینانی ایسته ییردی. حالبوكی بینا كیمیندیسه، یئر ده اونوندو دئمك… 

  - نامیق افندی چال ساققالینی قاشیدی. گؤزلوگونون اوستوندن باخاراق: 

  - سن حاقسیزسان، علی موعلیم، - دئدی. 

  - حاقسیزام؟ 

  - بلی. 

  - خئیر، من حاقلییام. نییه بینانی تیكركن سسینی چیخارمامیشدی.  

  - چیخارماسین. 

  - من حاقلی اولدوغومو بیلیرم، نامیق افندی. داوادان ایمتیناع ائتمه یه جم.  

  - اودوزاجاقسان! 

  - اودوزوم، ضرر یوخدو. آما داوامدان گئری دورمایاجام. 

  نامیق افندی حاقسیز داوالاری گؤتورمزدی. الی موعلیم وكالت تكلیفینی ردد ائتمك ایسته ییردی. لاكین  " بوزاؤیوك "  كندی نین خالقی اوتوز ایللیك موشتریلری ایدی. ائششك آخورونو بلله ین كیمی اونون دوكانینی بلله میشدیلر، حؤكومتده كی  بوتون ایشلری اوچون اونا موراجیعت ائدیردیلر. قیشلیغین بوتون بوغداسی همیشه اوردان گلیردی. نهایت: 

  یاخشی، - سنین بو ایشینه باخاجام. اودوزساق، مندن اینجیمیه جكسن، - دئدی. 

  - اینجیمرم، آما نییه اودوزاجاقسان؟ 

  - چونكی حاقسیزسان. 

  - حاكیمه گؤزل بیر قوچ گؤندرسم؟ 

  - نه؟.. 

  - او واخت داوانی اودا بیلمرم؟  

  - او واخت، هئچ شوبهه سیز، ایشی اودوزارسان! 

  - نه اوچون؟ 

  - یئنی حاكیم سن بیلن آداملاردان دئییل. 

  الی موعلیم وكیلین هیجانینی آنلایا بیلمیردی. اوزون-اوزادی یئنی حاكیمین مدحینی دینله دی. و بو شخص روشوتین، هدیییه نین قورخونج دوشمنییمیش! ان حاقلی شیكایتچی روشوت وئرمه یه تششببوث ائتسه، او ساعات دا حاقسیز چیخاریرمیش! 

  علی موعلیم: 

  - آللاه بئله دوزگون اینسانلاری دونیا اوزوندن اسكیك ائتمه سین، - دئیه دوعا ائتدی. 

  نامیق افندی: 

  - آمین، آمین، - دئدی. 

  داوادان، دوزگونلوكدن بیر ساعاتا قدر دانیشدیلار. وكالت اوچون راضیلاشدیلار. وكیل اومیدسیزدی. بو ایشی خطیر اوچون بوینونا گؤتوردو. حاقسیزلیق او قدر آچیق-آشكار ایدی كی… 

  ایكی هفته سونرا، عئینی ساعاتدا علی موعلیم یاشیل بویالی دوكانین قاپیسیندا گؤروندو. نامیق افندی عریضه یازیردی. گؤزلوگونون اوستوندن موشتریسینی گؤرونجه گولدو: 

  - خوش گلدین! نه دئییرسن داوانی اوددوق، - دئدی. 

  بو قدر حاقسیز بیر حؤكمو حاكیمین نئجه وئردیگینه بیر هفته دیر تعجوبله نیردی. الی موعلیم سویوققانلیقلا:  

  - منیم گؤندردیگیم قوچ سایه سینده اوددوق! 

  - نه؟! سن حاكیمه قوچ گؤندردین؟  

  - بلی. 

  - بونا جسارت ائتدین ه… 

  - بلی، آما سن منه  " روشوت دوشمندیر، كیم هدیییه وئرسه، حاقسیز چیخار "  دئمیشدینمی؟ 

  - بلی. 

  - من ده قوچو اؤز آدیمدان گؤندرمه دیم. 

  - بس نه ائتدین؟ 

  - دوشمنیم موختار هویسوزوغلونون آدیندان گؤندردیم. 

  - !!!.. 

  قوجا وكیلین قلم الیندن دوشدو. آرخایا یایخاندی. قارشیسیندا پارلایان باپبالاجا قارا گؤزلره باخا-باخا قالدی. مئیدانداكی بؤیوك چینار آغاجلاری نین درین پیچیلتیلاری، قاپیدا آیاقدا دایانان علی موعلیمین یانیندان، تپه سیندن، آیاقلاری نین آراسیندان گیریر، دیوارلارینا كؤهنه ویلایت قزئتلری یاپیشدیریلمیش دوكانین ایچینی دولدوروردو… 

كؤچورن:عباس ائلچین